ගෝඨාභය රාජපක්ෂ මීළඟ ජනාධිපතිධුරය ලැබීම සඳහාද සුදුස්සෙක්යැයි ඇතැම් අය කියන්නට පටන්ගත්තේ මෑත කාලයේදීය. එහෙත් සැබැවින්ම ගෝඨාභයට සුදුසු වෙන්නේ ජනාධිපතිධුරය නොවේ. ගෝඨාභය රාජපක්ෂ යනු ලංකාවේ රාජ්‍ය බලය ඉහළින්ම අවභාවිත කළ පුද්ගලයෙකි. ඔහු දූෂණය නම් වරද සිදුකර ඇති බවත්, ඔහුට එරෙහිව නඩු පැවරිය යුතු බවත් කියන්නේ අප නොවේ. ජනාධිපති මෛත්‍රීපාල සිරිසේන මහතා විසින් පත්කළ ජනාධිපති පරීක්ෂණ කොමිෂන් සභාව විසින්ය.

ජනාධිපති කොමිෂම
මෛත්‍රීපාල සිරිසේන ජනාධිපතිවරයා කොමිසමක් පත් කර තිබුණි. එය බරපතළ වංචා, දූෂණ, රාජ්‍ය සම්පත්, වරප්‍රසාද, බලය සහ අධිකාරිය අනිසි ලෙස භාවිත කිරීම සම්බන්ධයෙන් විමර්ශනය කිරීම සඳහා වූ ජනාධිපති පරීක්ෂණ කොමිෂන් සභාව නම් විය. කොමිසමේ සිටියේ සේවයේ නියුතු අධිකරණ විනිසුරුවරුන් තිදෙනෙකු සහ විශ්‍රාමික විගණකාධිපතිවරයෙකි. කොමිසම ක්‍රියාත්මක වුණේ අර්ධ-අධිකරණ කටයුත්තක් පරිද්දෙනි. සාක්ෂි විමසීම, හරස් ප්‍රශ්න ඇසීම ඇතුළු කටයුතු සිදුවිය. දඬුවම් දීමේ බලය පමණක් කොමිසමට තිබුණේ නැත. එම කොමිෂන් සභාව විසින් ජනාධිපතිවරයා වෙත ලබා දී තිබුණු වාර්තාවේ තිබුණු කරුණු අධිකරණ තීන්දුවක් ලෙස සැලකිය නොහැක. එසේ වුව සත්‍යය සොයන පුද්ගලයෙකුට එම කොමිෂන් සභාවේ වාර්තාව ස්වාධීන හා විධිමත් පරීක්ෂණ වාර්තාවක් ලෙස සැලකිය හැකිය. එය බී වාර්තාවක් හෝ වෙනත් පරීක්ෂණ වාර්තාවක් නොවේ. ස්වාධීන නිලධාරීන් පිරිසක් විසින් ලබාදුන් පරිපූර්ණ විමර්ශන වාර්තාවකි. එම විමර්ශන වාර්තාව කියන්නේ ගෝඨාභය රාජපක්ෂ විසින් දූෂණය නම් අපරාධය සිදුකර ඇති බවය. ඒ සම්බන්ධයෙන් ගෝඨාභයට එරෙහිව නඩු පැවරිය යුතු බවය.

චුදිතයෝ
ජනාධිපති පරීක්ෂණ කොමිසම විසින් විමර්ශනය කර තිබුණේ රාජ්‍ය ආරක්ෂක අමාත්‍යාංශය සහ ඒ යටතේ ඇති ආයතන විසින් රක්නා ලංකා ආරක්ෂක සමාගමත් ඇවන්ට්ගාර්ඞ් මැරිටයිම් සර්විසස් ආයතනයත් සමග කර තිබුණු ගනුදෙනු සම්බන්ධයෙනි.
ආරක්ෂක අමාත්‍යාංශයේ ලේකම්වරයා වශයෙන් 2015 ජනවාරි 08 වැනිදා දක්වා කටයුතු කළ ගෝඨාභය රාජපක්ෂ මහතා චෝදනා ලබා ඇත්තේ තනිව නොවේ. ඔහු යටතේ සේවය කළ, ඔහුගේ අණට අනුව කටයුතු කළ බව රටම දන්නා පුද්ගලයන් 12 දෙනෙකු චෝදනා ලබා තිබුණි.
ඒ අනුව කේ.බී. එගොඩවෙල, පාලිත ප්‍රනාන්දු, නන්දසේන ගෝඨාභය රාජපක්ෂ, මනමෙල්දුර රෝහණවීර ද සොයිසා, අච්චි මද්දුමාගේ දොන් හසල ධනසිරි අමරතුංග, අරුමාදුර ලෝරන්ස් රොමෙල්ලෝ දුමින්ද සිල්වා, රණවක ආරච්චිගේ දොන් ජනක, හේවාමාතරගේ උපාලි කොඩිකාර, චන්ද්‍රසේකර රෝහිත බෝගොල්ලාගම, දිසානායක මුදියන්සේලාගේ සුජාතා දමයන්ති ජයරත්න, හිටපු නාවික හමුදාපති ජයනාත් සිරිකුමාර කොළඔගේ, සමරසිංහ ආරච්චිලාගේ මැක්සිමස් ජයන්ත පෙරේරා, වයි. එච්. පී නිශ්ශංක යාපා සෙනවිරත්න යන චෝදනා ලත් පාර්ශ්වයන් සම්බන්ධයෙන් විමර්ශනය සිදු කර තිබුණි.

රක්නා ලංකා
එල්ලවී ඇති චෝදනා සම්බන්ධයෙන් නිශ්චිතව කතාකිරීමට ප්‍රථමයෙන්, සිදුව ඇත්තේ කුමක්දැයි මෙසේ සංක්ෂිප්තව ලියා තැබිය හැකිය.
රක්නා ලංකා ආරක්ෂක ආයතනය රජය සතුව 100%ක් කොටස් තිබුණු ආයතනයක් විය. එය තිබුණේ ආරක්ෂක අමාත්‍යාංශය යටතේය. ආරක්ෂක අමාත්‍යාංශ ලේකම්වරයා ලෙස කටයුතු කළේ ගෝඨාභය රාජපක්ෂය. රක්නා ලංකා ආයතනයේ සභාපතිවරයා ලෙස පාලිත ප්‍රනාන්දු කටයුතු කළේය. එහි ප්‍රධාන විධායක නිලධාරියා ලෙස කේ.බී. එගොඩවෙල කටයුතු කළේය. අධ්‍යක්ෂ මණ්ඩලයක් හරහා එම ආයතනය පාලනය විය. අධ්‍යක්ෂ මණ්ඩලය පත් කළේ ආරක්ෂක අමාත්‍යාංශ ලේකම්වරයා විසින්ය. ආරක්ෂක ලේකම් ගෝඨාභය රාජපක්ෂ පත් කර තිබුණේ ජනාධිපති මහින්ද රාජපක්ෂ විසින්ය.
රක්නා ලංකා ආයතනය රජයේ සමාගමක් ලෙස රජය සමග සිදුකරන ව්‍යාපාර කටයුතුවලදී විශේෂ සහ අනිසි ලාභයක් ලැබීය. එයට විශේෂ සැලකීමක් දක්වා තිබුණි. ඒ හරහා සමාගමට විශාල ආදායමක් ලැබුණි. එම ආදායම සමාගම විසින්ම ලාභාංශ ලෙස නම් කොට රජයට පවරන තෙක් සමාගම සතු ආදායමක් වශයෙන් පවතියි. එම ආදායමට කරන දේ පිළිබඳව තීන්දු ගන්නේ අධ්‍යක්ෂ මණ්ඩලය විසින්ය. පෙර කී ලෙස අධ්‍යක්ෂ මණ්ඩලය පත් කරන්නේ එම සමාගම අයත්වන අමාත්‍යාංශයේ ලේකම්වරයා විසින්ය.
රජය සතුව 100%ක කොටස් තිබුණද, එකල එවැනි සමාගම් විගණකාධිපති දෙපාර්තමේන්තුව යටතේ විගණනයට ලක් කළේද නැත. රජයට 100% කොටස් ඇති සමාගම් විගණනයට ලක් කිරීම විගණකාධිපති දෙපාර්තමේන්තුව විසින් පුළුල්ව සිදු කරන්නේ 2015 ජනවාරි 08 වැනිදායින් පසුවය.
මෙවැනි සමාගමක් වූ රක්නා ලංකා සමාගම රජය සතු තුවක්කු නීතිවිරෝධීව පාවිච්චි කළේය. ලාභ ලැබීය. එලෙස ලාභ ලැබූ සමාගමක් වන රක්නා ලංකා ආරක්ෂක සමාගම ඇවන්ට්ගාඞ් මැරිටයිම් සර්විසස් නම් ආරක්ෂක සමාගම සමග බද්ධ ගිවිසුම් ගණනාවක් ඇති කරගෙන තිබුණි. ඒ හරහා එම සමාගම් දෙක එකට ව්‍යාපාර කටයුතුවල යෙදී තිබුණි. ඇවන්ට්ගාඞ් මැරිටයිම් සර්විසස් නම් සමාගම පෞද්ගලික සමාගමකි. ඒ අනුව නාවික හමුදාව සතුව තිබුණු ව්‍යාපාරයක් වන නෞකාවලට ආරක්ෂාව සැපයීමේ හා ආරක්ෂාව වෙනුවෙන් ආයුධ සැපයීමේ කටයුත්ත ඇවන්ට්ගාඞ් නම් පෞද්ගලික සමාගමට පවරා තිබුණි. ආයුධ ද ලබා දී තිබුණි.
ඒ අනුව 2012 ඔක්තෝබර් 15 වන දින සිට ඇවන්ට්ගාඞ් සමාගමට එම ව්‍යාපාරය පවරා තිබුණි. 2012 ඔක්තෝබර් මස සිට 2014 දෙසැම්බර් මස දක්වා කාලය තුළදී ක්‍රම ක්‍රමයෙන් නාවික හමුදාවට ලැබෙන ආදායම සහ ආදායම් ප්‍රතිශත අඩු වී තිබුණි.
මෙම අවි ගබඩා කර තිබී ඇත්තේ ගාලු‍ වරායේය. ගබඩා කිරීම සිදුකර ඇත්තේ නාවික හමුදාව විසින්ය. එම අවි හරහා ලාභ ලැබුවේ පෞද්ගලික සමාගමක් සහ රජය සතුව කොටස් ඇති සමාගමක් විසින්ය. නාවික හමුදාවේ ශ්‍රමය ද වෙනත් පාර්ශ්වයක් වෙනුවෙන් අවභාවිත වී තිබුණි.

පුහුණුවත් දීලා
ආයුධ ලබාදීමෙන් ඔවුන් නැවතී තිබුණේ නැත. පෞද්ගලික සමාගමක් වන ඇවන්ට්ගාඞ් සමාගමේ සී මාෂල්වරුන්ට පුහුණුව ලබාදීමටද විශේෂ සහයෝගයක් දක්වා තිබුණි.
ඒ අනුව ඇවන්ට්ගාඞ් මැරිටයිම් සමාගම විසින් කටුකුරුන්දේ හමුදා විශේෂ කාර්ය බලකා කඳවුර තුළ අවි පුහුණුව සහ ඊට අදාළ සහතික නිකුත් කිරීමේ ව්‍යාපෘතියක් පවත්වාගෙන ගොස් තිබේ. පෞද්ගලික සමාගමක් වන ඇවන්ට්ගාඞ් මැරිටයිම් සමාගම රජයේ හමුදාවේ අවි ආයුධ පාවිච්චි කරමින්, රජයේ ආයතනයක සිට අවි පුහුණුව ලබාදීමේ ව්‍යාපාරයක් සිදුකර තිබුණි. එපමණක් නොවේ, එම පුහුණුවෙන් පසුව ලබා දී තිබුණු සහතිකයට රාජ්‍ය ලාංඡනය, ආරක්ෂක අමාත්‍යාංශයේ ලේකම් ගෝඨාභය රාජපක්ෂගේත්, සහකාර ලේකම් දමයන්ති ජයරත්නගේත් අත්සන් හා නාවික හමුදාපතිගේ අත්සන් ලබාදී තිබුණි. රාජ්‍ය ආරක්ෂක අංශවලින් පෞද්ගලික සමාගමකට ලැබී තිබුණු මේ විශේෂ සහයෝගය නිසා ඇවන්ට්ගාඞ් සමාගම අතිවිශාල ලාභයක් ලබන්නට ඇත.
විවිධ අවස්ථාවන්වලදී අවි 17ක් තුවක්කු ආඥා පනත යටතේ නිකුත් කළ යුතු බලපත්‍ර නිකුත් නොකර, එම පුහුණුව වෙනුවෙන් භාවිත කිරීමට අවසර දී තිබේ. එම අවසරය ලබාදීම සඳහා නිශ්ශංක යාපා සෙනෙවිරත්න විසින් ගෝඨාභය රාජපක්ෂ සමග එක්ව ක්‍රියා කර ඇතැයි හෙළිවී තිබේ. මෙය 1998 අංක 45 දරන පුද්ගලික ආරක්ෂක නියෝජ්‍යායතතන විධිමත් කිරිමේ පනතෙහි 18 වැනි වගන්තිය උල්ලංඝනය කිරීමක් බවත් කොමිෂන් සභාව පෙන්වයි.

තුවක්කු තෑගි දීලා
රජයේ හමුදා සතු තුවක්කු 3473ක් මෙම ආරක්ෂක ආයතන සඳහා තෑගි දී තිබුණි. ඒ අනුව කොමිෂන් සභාව විසින් අවි රක්නා ලංකා ආරක්ෂක ආයතනයට විකිණීම හෝ පැවරීම සිදු කර ඇති බවත්, ඒ අනුව එම ආයතනය විසින් තුවක්කු ආඥා පනත ප්‍රකාරව නිසි බලපත්‍ර ලබාගත යුතු බවත් පෙන්වාදෙයි.
මීට පෙර අවස්ථාවලද රජයේ සමාගම්වවල ආරක්ෂාව වෙනුවෙන් ආරක්ෂක හමුදා සතු ගිනි අවි ලබා දී ඇතත් ඒවා විධිමත් ලෙස අවි සන්තකයේ දැරීම සඳහා අවසරය සහිත ලිපි සමඟ ප්‍රකාශිතව ලබා දී ඇති බව කොමිසම පෙන්වයි. එහෙත් මේ සිදුවීම එවැනි අවස්ථාවලින් වෙනස් වෙයි. මේ අවි වාණිජමය කටයුත්තකට යොදවා ලාභ ලැබීමේ අරමුණෙන් ලබාදීමකි. එපමණක් නොව, එම අවි සන්තකයේ දැරීමට හෝ පාවිච්චි කිරීමට නීත්‍යනුකූල අවසරයක් ලබා දී නැත. ඒ අනුව තුවක්කු ආඥා පනත උල්ලංඝනය කර ඇත.
මෙම තුවක්කු සඳහා ආරක්ෂක අමාත්‍යාංශයේ හිටපු අතිරේක ලේකම් දමයන්ති ජයරත්න විසින් හුදු ලියැවිලි පමණක් නිකුත් කර තිබෙන අතර ඒ සම්බන්ධයෙන් බදු අයකිරිම මඟහැර ඇත.

චෝදනා හතරක්
නිශ්චිත ලෙස ජනාධිපති පරීක්ෂණ කොමිෂම විසින් වැරදි සහ අක්‍රමිකතා හඳුනාගෙන තිබුණේ වැරදි හතරක් සම්බන්ධයෙනි. ඒවා කොමිෂන් සභා වාර්තාවේ සටහන් වී තිබුණේ මෙසේය.

  1. රක්නා ලංකා සමාගමේ සේවකයන් 2015 ජනවාරි 08 වන දින පැවැති ජනාධිපතිවරණයට අදාළ ප්‍රචාරණ කටයුතුවලට සහ ඊට අදාළව ආනුෂංශික ක්‍රියා සඳහා 2014.12.01 වැනි දින සිට 2015.01.05 වන දින අතර කාලය තුළ යොදවා ඇත. ඒ සඳහා කිසිදු මුදලක් අය නොකර රක්නා ලංකා සමාගම විසින් එසේ යෙදවූ අයට වේතන සහ ගෙවීම් සිදුකිරීමෙන්ද , ආහාරපාන සැපයීමෙන්ද එම ආයතයට රුපියල් ලක්ෂ 70 ක පමණ මුදලක පාඩුවක් සිදු කර ඇත.
  2. ශ්‍රී ලංකා නාවික හමුදාව විසින් සිදු කරමින් පැවැති මුහුදු ආරක්ෂක සේවාවන් සපයන ආයතනවලට අයත් අවි තැන්පත් කිරීමේ ව්‍යාපාර කටයුත්ත ඇවන්ට්ගාඞ් මැරිටයිම් සමාගමට, රක්නා ලංකා ආයතනය සමග සිදු කිරීම සඳහා බාර දී ඇත. ඉන් අනතුරුව මුලින් තීරණය කරන ලද, ශ්‍රී ලංකා නාවික හමුදාවට ලැබිය යුතු ආදායම් කොටස අඩු කිරීම තුළින් රජයට පාඩු සිදුකර හෝ රජයේ ආදායමට හානි සිදු කර ඇත.
  3. මුහුදු ආරක්ෂක සේවාවන් සැපයීමට අදාළ ව්‍යාපාර කටයුතු සිදු කිරිමේදි ඇවන්ට්ගාඞ් මැරිටයිම් සර්විස් පුද්ගලික සමාගමට අනිසි වාසියක් සිදුවන ආකාරයට කටයුතු කර ඇත.
    4 ඇවන්ට්ගාඞ් ආයතනය කටුකුරුන්ද විශේෂ කා‍ර්ය බලකා කඳවුර තුළ අවි ගබඩා කටයුතු සම්බන්ධ ව්‍යාපාර කටයුත්තක් සිදු කර ඇත. ඒ සඳහා තුවක්කු 17ක් නිසි ආකාරයට බදු ගෙවීමකින් සහ නිසි බලපත ලබා ගැනීමකින් තොරව අවභාවිත කර සහ සිදුකිරීමට සහාය දී ඇත.

නඩු පවරන්න
කොමිෂන් සභාව විසින් නොතීසිලත් පාර්ශ්වයන් 13ම විවිධ නීතිමය වැරදි සඳහා වරදකරුවන් ලෙස හඳුනාගෙන ඇත. ඒ සම්බන්ධයෙන් වෙන් වෙන්ව සිදුවීම් හඳුනාගෙන නඩු පැවරීම සිදු කළ යුතු බවට නිර්දේශ කර ඇත.
රක්නා ලංකා ආරක්ෂක සේවයේ නිලධාරීන් දේශපාලන කටයුතුවලට යෙදවීමේ ක්‍රියාව අල්ලස් පනතේ 70 වැනි වගන්තිය යටතට ගැනෙන දූෂණය නම් අපරාධයට අයත් වෙයි.
සියලු‍ නොතීසි ලත් පාර්ශ්වයන්ට එරෙහිව අපරාධමය නඩු ගොනු කළ යුතු බව කොමිෂන් සභාව නිර්දේශ කර ඇත. ඒ සඳහා නීතිපතිවරයාට සහ අල්ලස් හෝ දූෂණ විමර්ශන කොමිෂන් සභාව වෙත පරීක්ෂණ සටහන් යොමු කළ යුතු බව කොමිසම නිර්දේශ කර ඇත. එමෙන්ම රාජ්‍ය නිලධාරීන් වශයෙන් කටයුතු කළ ගෝඨාභය රාජපක්ෂ හා දමයන්ති ජයරත්න ඉදිරියේදී රාජ්‍ය සේවයේ හෝ රාජ්‍ය ආයතනවල කිසිදු පත්වීමක් ලැබීමට සුදුසු අය නොවන බව කොමිසම විසින් නිර්දේශ කර ඇත. ඇතැම් අය විසින් ජනාධිපති ධුරයට යෝජනා කරන්නේ එවැනි නුසුදුස්සෙකුය. දූෂණය නම් අපරාධය සිදුකර ඇති බවට චෝදනාලද්දකුය. ■