ජනාධිපති මෛත්‍රීපාල සිරිසේන විසින්ම පත්කළ බරපතළ වංචා, දූෂණ, රාජ්‍ය සම්පත්, වරප්‍රසාද, බලය හා අධිකාරිය අනිසි ලෙස භාවිත කිරීම සම්බන්ධයෙන් විමර්ශනය කිරීම සඳහා වූ ජනාධිපති පරීක්ෂණ කොමිෂන් සභාව විසින් ජනාධිපතිවරයාට නිර්දේශ කර තිබුණේ මහින්ද රාජපක්ෂට අගමැතිධුරය ලබා දෙන ලෙස නොවේ. මහින්ද රාජපක්ෂට අධිචෝදනා මත නඩු පවරන ලෙසය. රාජපක්ෂ වැනි පුද්ගලයන්ට නැවත කිසිදා දේශපාලන නියෝජිතයන් ලෙස පත්වීම වැළැක්වීමට නීතිරීති නිර්මාණය කරන ලෙසය.

මෙම ජනාධිපති විශේෂ විමර්ශන කොමිෂන් සභාව අර්ධ අධිකරණයක ස්වරූපයෙන් කටයුතු කර තිබුණි. දඬුවම් කිරීමේ බලතල නොතිබුණද, විරුද්ධ පාර්ශ්වයෙන් කරුණු දැක්වීමට නීතිඥයන් ඉදිරිපත් වී සිටි අතර සාක්ෂි විමසීම, හරස් ප්‍රශ්න ඇසීම ඇතුළු විධිමත් අධිකරණයක කටයුතු රැසක් එහිදී සිදුවිය. කොමිෂන් සභාවේ සාමාජිකයන් ලෙස ක්‍රියාකාරී අධිකරණ විනිසුරුවරු සිටියෝය. අභියාචනාධිකරණයේ සභාපති ප්‍රීති පද්මන් සූරසේන කොමිසමේ සභාපතිවරයා ලෙස කටයුතු කළේය. මහාධිකරණ විනිසුරුවරුන් වන මෙන්ඩිස් සෙනෙවිරත්න, ගිහාන් කුලතුංග හා විකුම් කළුආරච්චි යන විනිසුරුවරුන්ට අමතරව විශ්‍රාමික විගණකාධිපති ආරච්චිගේ ප්‍රේමතිලක මහතා කොමිසමේ සාමාජිකයන් විය.
ජනාධිපති මෛත්‍රීපාල පත්කළ මෙම කොමිෂන් සභාව ස්වාධීන නැති හෝ දේශපාලනික පළිගැනීම් වෙනුවෙන් නිර්මාණය කළ ආයතනයක් නොවන බව පැහැදිලිය. මෙම කොමිසමේ සිටින සාමාජිකයන් එවැනි දේශපාලන පළි ගැනීමක් කරනු ඇතැයි මහින්ද රාජපක්ෂට හෝ කිසිවෙකුට චෝදනා කළ නොහැක. එමෙන්ම මෙම කොමිෂන් සභා වාර්තාවේ ඇත්තේ බී වාර්තා හෝ හුදු චෝදනා නොවේ. චෝදනා විභාග කිරීමෙන් පසුව තහවුරු කරගත් කරුණුය.
ඒ අනුව දූෂණය නම් වරද සම්බන්ධයෙන් මහින්ද රාජපක්ෂ වරදකරු ලෙස කොමිෂන් සභාව තීරණය කර ඇත.
මහින්ද රාජපක්ෂට චෝදනා එල්ල වී ඇත්තේ ස්වාධීන රූපවාහිනී මාධ්‍ය ජාලයට ලැබිය යුතු මුදල් නොගෙවා 2015 ජනවාරි 08 ජනාධිපතිවරණය වෙනුවෙන් දැන්වීම් පළකිරීම සම්බන්ධයෙනි. එමෙන්ම දැන් මහින්ද රාජපක්ෂ නළවමින් සිටින මෛත්‍රීපාල සිරිසේනගේ දැන්වීම් පළ නොකර අසාධාරණ ලෙස ක්‍රියාකිරීම සම්බන්ධයෙනි. ජනාධිපති පරීක්ෂණ කොමිෂන් සභාවේ තුන්වැනි චෝදනාව එය විය. එම පරීක්ෂණයේ චෝදනා ලත් පාර්ශ්වයන් 6ක් විය. පිළිවෙළින්, හේවගේ අනුර සිරිවර්ධන, විජේසිංහ පණ්ඩිතගේ අරුණ මූර්ති විජේසිංහ, ජයසිංහ ආරච්චිලාගේ උපාලි රංජිත, දිලිප් ප්‍රියන්ත වික්‍රමසිංහ, කෙහෙළිය බණ්ඩාර දිසානායක රඹුක්වැල්ල, පර්සි මහේන්ද්‍ර රාජපක්ෂ යන පුද්ගලයන් එසේ චෝදනා ලබා තිබුණි.

පරීක්ෂණයෙන් අනතුරුව චෝදනා ලත් පාර්ශ්වයන් අතරින් ස්වාධීන රූපවාහිනියේ සභාපතිවරයා ලෙස කටයුතු කළ අනුර සිරිවර්ධන, නියෝජ්‍ය සාමාන්‍යාධිකාරී (අලෙවි) වශයෙන් ක්‍රියා කළ උපාලි රංජිත, සහකාර කළමනාකරු දිලිප් වික්‍රමසිංහ හා විශේෂ සැලකීමක් ලද ජනාධිපතිවරණ අපේක්ෂකයෙකු වූ මහින්ද රාජපක්ෂ යන පුද්ගලයන් විසින් අල්ලස් පනතේ 70 වන වගන්තියෙහි විස්තර කර ඇති දූෂණය නැමැති වරද, දූෂණයට කුමන්ත්‍රණය කිරීමේ වරද, දූෂණයට අනුබල දීමේ වරද යන මෙම වැරදි එකක් හෝ ඊට වැඩි ගණනක් සිදු කර ඇති බව කොමිෂන් සභාව විසින් තීරණය කර තිබුණි. ඒ අනුව මෙම කොමිෂන් සභාව විසින් මහින්ද රාජපක්ෂ ‘දූෂණය’ නම් වරද සම්බන්ධයෙන් වරදකරුවෙක් යැයි තීන්දු කර තිබුණි.

මෙම වාර්තාවෙන් මහින්ද රාජපක්ෂ ජනාධිපති අපේක්ෂකයෙකු ලෙස මිසක ජනාධිපතිවරයා ලෙස පෙන්වාදී නොමැති බවත් පැහැදිලි කරගත යුතුය. ජනාධිපතිවරයාට මුක්තියක් තිබුණද ජනාධිපති අපේක්ෂකයන්ට නීතියෙන් මිදී සිටිමට මුක්තියක් නැත. ඒ නිසා මෙම චෝදනා සම්බන්ධයෙන් හෙට වුව නීතිමය ක්‍රියාමාර්ග ගත හැක. මහජන බදු මුදල් වියදම් කරමින් මෙම කොමිසම පත් කළේ වාර්තා හංගාගෙන සිටින්නට නොවේ. ක්‍රියාමාර්ග ගැනීමටය.

පරීක්ෂණයෙන් අනතුරුව තහවුරු කරගත් චෝදනා රැසක් විය. පුරප්පාඩුවක් නොමැති මොහොතක අනුර සිරිවර්ධන ස්වාධීන රූපවාහිනී මාධ්‍ය ජාලයේ සභාපතිවරයා ලෙස පත්කිරීම එලෙස තහවුරු කරගත් පළමුවැනි චෝදනාව විය.
2015 ජනාධිපතිවරණයේ අපේක්ෂකයෙකු ලෙස ඉදිරිපත් වූ මහින්ද රාජපක්ෂගේ දැන්වීම් නොමිලයේ විකාශය කිරීම තුළින් රුපියල් 101,773,058 ක මූල්‍යමය පාඩුවක් සිදු කර ඇති බව තහවුරු වූ තවත් චෝදනාවකි. ‘මීඩියා ෆැක්ටරි’ නම් ආයතනයක් හරහා ඒ දැන්වීම් විකාශය කර තිබුණි.

ඊට අමතරව ‘ස්පෙෂල් සොලියුෂන්’ නම් දැන්වීම් ආයතනයක්ද මහින්ද රාජපක්ෂ නම් අපේක්ෂකයා වෙනුවෙන් මුදල් නොගෙවා දැන්වීම් විකාශය කර තිබුණි. ඒ හේතුවෙන් රුපියල් 2,467,812 ක මූල්‍යමය පාඩුවක් සිදුව තිබේ.
2015 ජනාධිපතිවරණ මැතිවරණ කාලසීමාව තුළදි අපේක්ෂක මෛත්‍රීපාල සිරිසේනගේ මැතිවරණ ප්‍රවර්ධන ප්‍රචාරක දැන්වීම් විකාශනය කිරිමට පෙර ලබාගෙන තිබුණි. එම දැන්වීම් ප්‍රචාරය කර නොතිබුණු අතර, ලබා ගත් මුදල්වලින් රුපියල් 8,663,768 ක මුදලක් ආපසු ‘වික්ටරි ඇඞ්වටයිසින්’ නම් දැන්වීම් ලබාදුන් ආයතනය වෙත නැවත ගෙවා තිබුණි.
ඊට අමතරව මෛත්‍රීපාල සිරිසේනට අසාධාරණ ලෙස සැලකීමටද කටයුතු කර තිබුණි. දැන්වීම් සඳහා ජනාධිපතිවරණ අපේක්ෂක මෛත්‍රීපාල සිරිසේනගෙන් අය කරගෙන තිබුණේ මහින්ද රාජපක්ෂට මැතිවරණ ප්‍රචාරක දැන්වීම් සඳහා නියම කළ මිල මෙන් දෙගුණයක වටිනාකමින් යුත් මුදලකි. පැහැදිලිවම මහින්ද රාජපක්ෂට විශේෂ සැලකීමක් දක්වමින්, අනෙක් ප්‍රධාන අපේක්ෂකයාට අසාධාරණ ලෙස සලකා තිබුණි.

එකම මැතිවරණයකදී සමාන අපේක්ෂකයන් දෙදෙනෙකුගෙන් එක් අයෙකුට අසමාන ලෙස සැලකීමකට බඳුන් කර වැඩිපුර මුදලක් ස්වාධීන රූපවාහිනී පාලන අධිකාරිය මගින් ලබා ගැනීමට කටයුතු කිරීම සහ ස්වාධීන රූපවාහිනි මාධ්‍ය ජාලයට රුපියල් 112,904,863 මූල්‍යමය පාඩුවක් සිදු කිරීම ඒ අනුව ඔප්පු වූ අවසාන චෝදනාව විය.

‘දූෂණය’ නම් වරදෙන් ආවරණය වෙන්නේ රාජ්‍ය සේවකයෙකු අයුතු ලෙස රාජ්‍ය බලය අවභාවිත කරමින් තමන්ට හෝ වෙනත් කෙනෙකුට වාසි සහගත ලෙස කටයුතු කිරීම හෝ ආණ්ඩුවට පාඩු සිදුවන අයුරින් ‘රාජ්‍ය සේවකයෙකු’ කටයුතු කිරීමය. රාජ්‍ය සේවකයෙක් යන්නට මහජන නියෝජිතයන්ද අයත් වන බව අල්ලස් පනතේ 90 වගන්තියෙහි සඳහන් වෙයි. ස්වාධීන රූපවාහිනිය වැනි 100% රජය සතු වූ සමාගමක් අයත් වන්නේ රාජ්‍ය සේවකයා යන්නටය.

අල්ලස් පනත අනුව අනුර සිරිවර්ධන, උපාලි රංජිත, දිලිප් වික්‍රමසිංහ හා පර්සි මහේන්ද්‍ර රාජපක්ෂ යන පුද්ගලයන් දඬුවම් ලැබිය යුතු බව එම වාර්තාවෙන් පැහැදිලිව පෙන්වා දී තිබේ. ඒ අනුව මේ පිළිබඳව නඩු පැවරීමේ කටයුතු සඳහා අල්ලස් හෝ දූෂණ චෝදනා විමර්ශන කොමිෂන් සභාවට විමර්ශනයේ ලිපිගොනු ලබාදීමටදත් කොමිසම තීරණය කර ඇත. ජනාධිපති මෛත්‍රීපාල සිරිසේන විසින්ම පත්කළ කොමිසම ජනාධිපති මෛත්‍රීපාල සිරිසේනට උපදෙස් ලබා දී තිබෙන්නේ මහින්ද රාජපක්ෂ ඇතුළුව ඉහතින් නම් සඳහන් කළ සිව්දෙනාට අධිචෝදනා ඉදිරිපත් කොට අධිකරණයේ නඩු පැවරිය යුතු බවය.

කොමිසම විසින් වරදකරු බවට පත්කළ සිව්දෙනා අතරින් තිදෙනෙකුම රජයේ සේවකයන්ව සිටි අයයි. ඒ තිදෙනාට නැවත රජයේ තනතුරු ලබා නොදිය යුතු බව කොමිසම නිර්දේශ කර ඇත. සිව්වැන්නා වන මහින්ද රාජපක්ෂ මහජන නියෝජිතයෙකි. ඔහු සම්බන්ධයෙන් මෙසේ කියා ඇත.

‘දූෂණය අද මුළු රටම වෙලාගත් ව්‍යවසනයක් බව අමුතුවෙන් කිව යුතු නොවේ. දූෂණයට හෝ වෙනත් අපරාධ නඩුවකට අධිකරණයකදී වරදකරු වී දඬුවම් ලැබූ අයෙකු මහජන නියෝජිතයෙකු වශයෙන් තේරී පත්වීමේදී ඇති නුසුදුසුකම් පිළිබඳව ශ්‍රී ලංකා ප්‍රජාතන්ත්‍රික සමාජවාදී ජනරජයේ ආණ්ඩුක්‍රම ව්‍යවස්ථාවේ 89 වැනි ව්‍යවස්ථාවේ සඳහන් වේ. 89 ( ඇ) ව්‍යවස්ථාවේ ඇති කරුණු කොමිෂන් සභාවේ වාර්තාව විසින් පෙන්වා දි තිබේ. 89 (ඉ) වගන්තියද පෙන්වා දෙයි. දැනට ඇති නීතිය අනුව අධිකරණයේ දඬුවම් ලැබූ පුද්ගලයෙකු ජනතා නියෝජිතයෙකු ලෙස තේරී පත්වීමට වසර හතක් ගතවෙන තෙක් නුසුදුස්සෙක් බවද එම වාර්තාවෙන් පෙන්වාදෙයි. එසේ වුව කොමිෂන් වාර්තාව නිර්දේශ කරන්නේ දූෂණය වැනි වරදකට වරදකරු වූ දේශපාලනඥයෙකු වසර හතකට පසුව වුව මහජන නියෝජිතයෙකු පත්වීමට නුසුදුසු වන බවයි. ඒ නිසා අනාගතයේදී එවැනි චෝදනා සඳහා වරදකරුවන් වන පුද්ගලයන්ට කිසිදා මහජන නියෝජිතයන් ලෙස පත්වීමට සුදුසුකම් නොමැති වන ලෙස නීති සකසන්නැයි කොමිසම ජනාධිපතිවරයාට නිර්දේශ කර ඇත.
මහින්ද රාජපක්ස පත්කළ ස්වාධීන රූපවාහිනියේ සභාපති අනුර සිරිවර්ධන විසින් ස්වාධීන රූපවාහිනිය තමන්ගේ පුද්ගලික දේපලක් ලෙස සලකා ඇති බවත්, මහින්ද රාජපක්ෂත් එලෙසම කටයුතු කර ඇති බවත් කොමිසම කියයි. මෙවැනි වැරදි සිදු කළ අය රට වෙනුවෙන් සහ රටේ ජනතාව වෙනුවෙන් සේවයක් සිදු කරතැයි අපේක්ෂා කළ නොහැකි බව එම කොමිසම කියයි.

දැන් වරද ඇත්තේ කොතැනකදැයි අපට කියාදිය යුත්තේ මෛත්‍රීපාල සිරිසේන ජනාධිපතිවරයාමය.
මේ වෙද්දී බැඳුම්කර ගනුදෙනුව පිළිබඳ කොමිෂන් සභාව විසින් ලබාදුන් සම්පූර්ණ වාර්තාව ප්‍රසිද්ධ කරන බවට ජනාධිපති මෛත්‍රීපාල සිරිසේන තර්ජනය කරමින් සිටියි. අප බලා සිටින්නේද එම වාර්තාවත් ප්‍රසිද්ධ කරන තුරුය. වාර්තාව සඟවාගෙන සිටියේ මෛත්‍රීපාල සිරිසේන ජනාධිපතිවරයා විසින් මිස අප විසින් නොවේ. කෙසේ වෙතත් තමන්ගේ දේශපාලන වුවමනාවන් වෙනුවෙන් පාවිච්චි නොකර, එක් චෝදනාවක් රැගත් බැඳුම්කර ගනුදෙනුව පිළිබඳ ජනාධිපති පරීක්ෂණ කොමිෂන් සභා වාර්තාවත් මහින්ද රාජපක්ෂ කල්ලියේ සිටින දූෂිතයන් ගණනාවක් සම්බන්ධයෙන් චෝදනා 34 ක් රැගත් මහා පරිමාණ අපරාධ පරීක්ෂණ කොමිෂන් සභා වාර්තාවත් යටපත් වෙන්නට නොදී නීතිය ඉදිරියට ගෙන ආ යුත්තේ ජනාධිපතිවරයා විසින්මය.■