පවතින තත්වය යටතේ මහමැතිවරණය පැවැත්වුවහොත් සාධාරණ සහ නිදහස් මැතිවරණයක් පැවැත්වීමට නොහැකි වනු ඇතැයි පෙන්වාදෙමින් මැතිවරණය පැවැත්වීමේ නිවේදනයක් නිකුත් නොකරන ලෙස ඉල්ලා ශ‍්‍රී ලංකා මුස්ලිම් කොංග‍්‍රසය මැතිවරණ කොමිෂන් සභාව වෙත ලිපියක් යවා ඇත.


ශ‍්‍රී ලංකා මුස්ලිම් කොංග‍්‍රසයේ ලේකම් නිසාම් කාරියප්පර්ගේ අත්සනින් අපේ‍්‍රල් 16 වැනිදා එම ලිපිය යවා ඇත.


එදිනෙදා කටයුතු කරගෙන යෑම සඳහා සෞඛ්‍ය විශේෂඥයන් හා පොලීසිය සම්පූර්ණ අවස්ථාව ලබාදීමත්, වසංගතය පැතිරීමට ඉඩකඩ නැති බවට සහතිකය ලැබීමත් සිදුවන තෙක් මැතිවරණය සඳහා දිනයක් නියම කිරීම නුසුදුසු බව තම පක්ෂයේ මතය යැයි ඔවුන් පෙන්වාදී තිබේ.


අපේ‍්‍රල් 25 වැනිදාට නියමිතව තිබුණු මැතිවරණය මැතිවරණ කොමිසමට ලැබී ඇති බලතල අනුව කල් දමමින් මාර්තු 21 වැනිදා නිකුත් කළ ගැසට් නිවේදනය පිළිබඳව ගෞරවය පුදකරන බවද එම ලිපියෙන් දන්වා ඇත. ඒ මොහොතේ කොවිඞ්-19 වසංගතය නිසා මැතිවරණය කල් දැමීමට සිදුවූ බවත්, එම තත්වය අදටත් වලංගු බවත් පෙන්වාදී ඇත.


මෙම ගැටලූව උනන්දුවක් ඇති පාර්ශ්වයන් හා දේශපාලන පක්ෂ ශ්‍රේෂ්ඨාධිකරණය ඉදිරියේ සාකච්ඡාවට ගත යුතු බවත්, ඒ සඳහා ඉඩ සලසමින් මැතිවරණය පැවැත්වීමේ නිවේදනය නිකුත් නොකරන ලෙසත් මුස්ලිම් කොංග‍්‍රසය ඉල්ලා ඇත.


පාර්ලිමේන්තුව විසුරුවාහැරීමෙන් මාස තුනක් ඇතුළත මැතිවරණය පැවැත්වීමට ඇති නොහැකියාව පිළිබඳව ශ්‍රේෂ්ඨාධිකරණයෙන් විමසන ලෙස මැතිවරණ කොමිෂන් සභාව ජනාධිපතිවරයාට කරන ලද යෝජනාව පිළිබඳවද එම ලිපියෙන් සිහිපත් කර ඇත.