පාර්ලිමේන්තු මන්ත්‍රී වාසුදේව නානායක්කාර

විපක්ෂය විදියට ඔබේ කණ්ඩායම ඉදිරියේදී කරන්න බලාපොරොත්තු වෙන්නේ මොනවාද?
පළාත් සභා මැතිවරණයක් ඉක්මනින්ම ලබාගැනීම සඳහා කළ හැකි සියලු‍ දේ කරන්නයි අපේ බලාපොරොත්තුව. ඒ වගේම පාර්ලිමේන්තු මැතිවරණයක් ඉක්මනින් කැඳවන්නැයි අපි ඉල්ලනවා.

ජනාධිපතිවරණයක් ඉල්ලන්න අදහසක් නැද්ද?
ඉක්මනින් ජනාධිපතිවරණයක් ඉල්ලා සිටීමේ බලාපොරොත්තුවක් අපට නැහැ. එහෙත් ඔක්තෝබර් වෙනකොට ජනාධිපතිවරණයක් කැඳවීමට නියමිතයි. එහෙත් එතරම් කාලයක් අපට වෙනත් මැතිවරණයක් පවත්වන්නට බැරිවුණොත් ජනාධිපතිවරණය කලින් කැඳවන්න වේවි. වෙනත් මැතිවරණයක් නැතිවුණොත් අපට කැඳවන්නට ඉතිරි වී තිබෙන මැතිවරණය තමයි ජනාධිපතිවරණය කියන්නේ.

ආණ්ඩුවක් පිහිටුවීමේ උත්සාහය අසාර්ථක වීමට හේතුව කුමක්දැයි ස්වයං විවේචනයක් තිබෙනවාද?
නැහැ. අධිකරණයේ තීන්දු දෙකක් තමයි මේ තත්ත්වයට ප්‍රධානම හේතුව වුණේ. ඒ වගේම කථානායකවරයාගේ හිතුවක්කාර බලය තමයි අපට ලොකු බාධාවක් වුණේ. මේ කාරණා තුනට මැදිවෙන්නට අපට සිද්ධවුණා. අවසාන වශයෙන් අපට ලොකු ප්‍රශ්නයක් ආවා. ඒ තමයි ජනවාරි මාසයේදී කොහොමද මුදල් වියදම් කරන්නේ කියන එක. ඒ ප්‍රශ්න නිසා අපට සිද්ධවුණා මේක අත්හරින්න. අයවැයක් හෝ අතුරු සම්මත ගිණුමක් නැතිව ආණ්ඩුව ගෙන යන්න බැහැ. රාජ්‍ය සේවකයන්ට පවා වැටුප් ගෙවන්න බැරි වුණා. ඒක රට වෙනුවෙන් බරපතළ වගකීමක්. වියදම් කරන්න මුදල් නැතිව රටක් ගෙනියන්න බැහැනේ.

ඒත් පාර්ලිමේන්තුවේ බහුතර බලයක් නැතිව ආණ්ඩු හදන්න උත්සාහ කිරීම ඔබේ පාර්ශ්වයේ වැරැද්දක්නේ?
බහුතරය අපට හදාගන්න පුළුවන්නේ. දැන් බලන්න 18 වැනිදා පාර්ලිමේන්තුවේදී තුන්දෙනෙක් ආණ්ඩුව පැත්තට ගියා. ඒ වගේ තමයි. ආණ්ඩුව වැඩ පටන්ගත්තාම බහුතරයක් ලබාගැනීම අසීරු දෙයක් නෙවෙයි. ලොකු සංඛ්‍යාවක වෙනසක් තිබුණේ නැහැනේ.

එහෙත් එක්සත් ජාතික පක්ෂ කණ්ඩායම විරෝධය පෑවේ ඔබේ කණ්ඩායම බහුතරය හදාගන්නා තෙක් රටම නැවතී බලාසිටිය යුතු නැති නිසා විය හැකියි. එය ව්‍යවස්ථානුකූල නොවන බව බොහෝ අය විශ්වාස කළ නිසා විය හැකියි. බහුතරය හදාගන්නට පුලු‍වන්කම් තිබුණා නම් අයවැයේදී ආණ්ඩුවක් හදන්නට පුළු‍වන්කම තිබුණා නේද?
අයවැයට කලින් ඔක්තෝබර් 26 වැනිදා අවස්ථාව පෑදුණානේ. ඒ පෑදුණු අවස්ථාව අත්හරින්න බැරිවුණා. රටේ සහ ජනතාවගේ වුවමනාව වුණේ ආණ්ඩුව ගෙදර යැවීම. ආණ්ඩුව යටතේ ඇතිවෙමින් තිබුණේ අනතුරුදායක තත්ත්වයක්. උදාහරණයක් විදියට ඇමෙරිකානු නාවික හමුදාවට ලංකාවේ නාවික හමුදා මධ්‍යස්ථානයක් නිර්මාණය කරන්නට ඉඩකඩ සූදානම් කරලා තියෙනවා.

ඔබ අවසානයට කළ චෝදනාව ඔප්පු වූ චෝදනාවක් නොවෙයි නේද?
නැහැ. එහෙම සූදානමක් තිබුණා. ඒ වගේම අපේ බැංකුවල කොටස් ටික කොටස් වෙළෙඳපොළට දැමිමට යෝජනා කර තිබුණු වැඩපිළිවෙලට. එවැනි යෝජනා බොහොමයක් තිබුණා. ඒ වගේම පළාත් සභා ඡන්දය යටිකූට්ටු විදියට කල් දාලා තිබුණා. ඉතින්, අපි හිතුවා තත්වයේ හැටියට අපි මේ අවස්ථාව අත් නොහැරිය යුතු බව. විශේෂයෙන්ම ජනාධිපතිවරයා මහින්ද රාජපක්ෂ මහතාව අගමැතිවරයා විදියට පත් කරන්න සූදානම් වෙනවානම් ඒ අවස්ථාව අත් නොහැරිය යුතු බව අපි විශ්වාස කළා.

එහෙත් ඔබේ කණ්ඩායම ඇතුළේම මේ ආණ්ඩු හැදීමේ කතාවට විරුද්ධ අය හිටියා නේද?
කණ්ඩායම් දෙකේම ඒ වගේ අය හිටියා. ඒ කියන්නේ මහින්ද පිළේ සහ මෛත්‍රී පිළේ. අපේ කණ්ඩායමේ හිටියා මෛත්‍රීපාල සිරිසේන ජනාධිපතිතුමාට අකමැති අය. මෛත්‍රීපාල සිරිසේන ජනාධිපතිතුමාගේ කණ්ඩායමේ හිටියා මහින්ද රාජපක්ෂ මහතාට අකැමති අය. ඒ අය ඒ බව ප්‍රකාශ කරලා තිබුණා. එහෙත් ප්‍රතිවිරුද්ධ හේතු උඩ තමයි ඒ අකැමැත්ත ප්‍රකාශ වෙලා තිබුණේ. ඒ අකැමැත්ත තිබියදීම ආණ්ඩුවක් හදන්න අපි කටයුතු කළා. ඒ හින්දා තමයි බහුතරය හදාගැනීමත් අපහසු වුණේ.

කෙසේ වෙතත් ආණ්ඩු හැදීමේ උත්සාහය නිසා ඔබේ කණ්ඩායම ප්‍රජාතන්ත්‍රවාදයට, ව්‍යවස්ථාවට හා අධිකරණයට ගරු නොකරන බව මුළු රටටම ඔප්පු වුණා නේද?
එහෙම ගැටලු‍වක් මම නම් දකින්නේ නැහැ. අපි මේ ඉල්ලා අස්වීමෙන් අපි ප්‍රජාතන්ත්‍රවාදී බව ඔප්පු වුණා. අපි අපේ වගකීම තේරුම් අරගෙනයි මේක කළේ. අපි උසාවියේ නඩු තීන්දුවලට අවනත වුණා. අපි පාර්ලිමේන්තුවේ ඉදිරි කාලයේදී වැඩ කරගෙන යන්න නියමිත ආකාරයට තීන්දු කළා. ඒ අනුව අපි ප්‍රජාතන්ත්‍ර විරෝධී බව කියන්න අමාරුයි. විශේෂයෙන්ම අපි මැතිවරණ නියමිත කාලයට පවත්වන අය. අනෙක මේ අවස්ථාවේ අපි ඉල්ලු‍වේ මැතිවරණයක්. තර්ක විතර්කවලින් අපි ප්‍රජාතන්ත්‍ර විරෝධී බවට ඔප්පු කරන එක ලේසි වෙන්නේ නැහැ.

රටට සිද්ධවු ආර්ථික හානියට වගකියනවාද?
ඒකට වගකියන්න ඕනෑ නඩු තීන්දු දීපු උදවිය. නැත්නම් නඩු තීන්දු ලබාගන්නට උසාවි ගිය අය. ජනාධිපතිවරයා අපව පත් කළාම ඒ පැත්තේ අය විපක්ෂයේ කාර්යභාරය බාරගත්තා නම් එහෙම වෙන්නේ නැහැ. එහෙම නැත්නම් නියමිත ආකාරයට විශ්වාසභංග යෝජනාවක් ගෙනල්ලා පාර්ලිමේන්තුවේ කටයුතු කළා නම් ඔය ප්‍රශ්නය ඇති වෙන්නේ නැහැ. එහෙම වුණා නම් නිශ්චිත විදියට ඔය ප්‍රශ්නය විසඳෙන්න තිබුණා. රනිල් වික්‍රමසිංහලා ගණන් බැලු‍වෙත් අපි ආණ්ඩුව ක්‍රියාත්මක කරන්න පටන්ගත්තොත් අපට බහුතරයක් හදාගන්නට පුළුවන් වෙන බව. ඒ නිසා තමයි අපේ ආණ්ඩුවට ක්‍රියාත්මක වෙන්න නොදී පාර්ලිමේන්තුවේදී කටයුතු කළේ. අධිකරණය ඉදිරියට ගියේ. විසුරුවාහැරීම නවත්වලා කැබිනට් මණ්ඩලය තහනම් කරගන්න තමයි ඔවුන් උත්සාහ කළේ.

ඔබේ කණ්ඩායම හදිසියේ ආණ්ඩුවක් නිර්මාණය කරලා, ඊට පස්සෙ බහුතරය හදාගන්නට උත්සාහ කරද්දී, අනෙක් පාර්ශ්වය ඒක වළක්වන්නට උත්සාහ කිරීම වැරැද්දක් යැයි කියන්නට පුළුවන්ද? විශේෂයෙන්ම පාර්ලිමේන්තුව විසිරවීම වැනි ක්‍රියා සඳහා ජනාධිපතිවරයාට බලයක් නැහැ නේද?
මම හිතන්නේ නැහැ. මම හිතන්නේ ජනාධිපතිවරයාට මෙවැනි කාරණා ගැන අවසාන වශයෙන් බලයක් තියෙනවා. ඒ බලය ප්‍රකාශිතව නැහැ. ශේෂ වූ බලයක් ජනාධිපතිවරයාට තියෙනවා. ඇත්තටම එවැනි බලයක් ඕනෑම ආයතනයක ප්‍රධානියෙකුට තියෙනවා. එය ප්‍රකාශිත බලයට අතිරේක බලයක්. අන්න ඒ බලය අනුව තමයි 33 (2) ඇ කියන වගන්තිය ඇතුළත් කරලා තියෙන්නෙ. අනෙක් වගන්ති එක්ක පරස්පරයක් මම දකින්නේ නැහැ. 19 වැනි සංශෝධනය සම්මත වෙද්දී ශ්‍රේෂ්ඨාධිකරණය විසින් ඒක අනුමත කළේ ජනාධිපතිවරයාට එවැනි බලයක් තියෙන හින්දා.

එහෙත් ශ්‍රේෂ්ඨාධිකරණය විසින් දැනටමත් පැහැදිලිව කියලා තියෙනවානේ, ජනධිපතිවරයාට බලයක් නොමැති බව?
ඒක වෙන්න පුළුවන්. ඒත් ‍19 වැනි ශ්‍රේෂ්ඨාධිකරණය විසින් මේ පිළිබඳව දුන්නා වූ නිරීක්ෂණවලට පටහැනි විදියට තමයි පසුගිය සතියේ නඩු තීන්දුව දීලා තියෙන්නේ. මම මේ නඩු තීන්දුව පිළිගන්නේ නැහැ. එය ඉතාම වැරදියි. මම මේ නඩු තීන්දුව සම්පූර්ණයෙන්ම ප්‍රතික්ෂේප කරනවා. ඒකට හේතු දක්වන්න පුළු‍වන් දීර්ඝ වශයෙන්. ඒක මේ වෙලාවේ කරන්න බැහැ. කොහොම වුණත් අපි අධිකරණයට අවනත වෙනවා. මොකද නීතියේ ආධිපත්‍යය පිළිගන්න ඕනෑ බව අපි විශ්වාස කළා. ඒත් අප සමග හිටපු සමහර අය කීවා රාජ්‍ය බලය අනුව අධිකරණ තීන්දුව පිළිනොගෙන ඉදිරියට යමු කියලා. යන එන ගමන් කීවා ඕවා පිළිගන්න ඕනෑ නැහැනේ කියලා. එහෙත් අපි කීවා අද අපි රාජ්‍ය බලය අතට ගත්තොත්, හෙට ඒ බලය අපට විරුද්ධවම එන්න පුළුවන් බව. අපිත් රාජ්‍ය බලයේ හිරකාරයන් වෙන්න ඉඩ තියෙන බව. ට්‍රොට්ස්කි කියපු දෙයක් තියෙනවා. රතු හමුදාව ට්‍රොට්ස්කිවාදීන් අතේ තිබුණු වෙලාවක ට්‍රොට්ස්කිට යෝජනාවක් ආවා ඒ බලය පාවිච්චි කරලා ස්ටාලින්ට විරුද්ධ වෙමු කියලා. ට්‍රොට්ස්කි කිව්වා මේ වෙලාවේ අපි පක්ෂයටත් ස්ටාලින්ටත් විරුද්ධව රතු හමුදාව පාවිච්චි කළොත්, හෙට ඒක අපටම එරෙහිව එන්න ඉඩ තියෙන බව. ඒක මගේ මතකයේ තිබුණා.

විධායක ජනාධිපති ක්‍රමය අහෝසි කිරීම සඳහා 20 වන සංශෝධනය පාර්ලිමේන්තුවේ විවාදයට ලක්වෙනවා. විධායක ජනාධිපති ක්‍රමය අහෝසි කිරිමට ජීවිත කාලය් පුරා හීන දැකපු ඔබ වැනි උදවිය පැහැදිලිවම ඒ යෝජනාවට එකඟ වේවි නේද?
එහෙම එකක් දැනට නැහැ. දැනට තියෙන තත්වය අනුව අපට පෙනී ගියා විධායක ජනාධිපති ක්‍රමය මේ වෙලාවේ කොච්චර අවශ්‍යද කියලා. මේ වෙලාවේ විධායක ජනාධිපති ක්‍රමය රටට හොඳයි. මේ අවධිය හරහා යා යුතුයි. කඩඉම පහු කළ යුතුයි. ඒ නිසා 20 වන සංශෝධන යෝජනාව සමඟ එකට ගමන් කරන්න විදියක් නැහැ.

මේ අවධිය නිශ්චිතව පැහැදිලි කළොත්?
මේ කඩඉම. මේ ආණ්ඩුව. මේ ආණ්ඩුව විසින් කරන දේශපාලන හරඹය යම් කෙළවරකට ගෙනයෑමෙන් පසුව තමයි අපට විධායක ජනාධිපති ක්‍රමය අහෝසි කිරීම ගැන හිතන්න වෙන්නෙ. කොහොම වුණත් විධායක ජනාධිපති ක්‍රමය නෛසර්ගිකව අවශ්‍යද නැද්ද යන කාරණාව ගැන අපේ කණ්ඩායම ඇතුළේ මත දෙකක් තියෙනවා.

ඒ කියන්නේ වාසුදේව නානායක්කාරලා විධායක ජනාධිපති ධූරය ශක්තිමත් කරන තැනට පත්වූ බවද?
ශක්තිමත් කරනවාට වඩා ඔය තිබෙන බලය තිබෙන හැටියටම තියෙන්න ඉඩ හරින්න ඕනෑ කියලයි අපි කියන්නේ.

ශ්‍රීලනිපය සහ පොදුජන පෙරමුණ එකට කටයුතු කරන්නට බලාපොරොත්තු වෙන්නේ කොහොමද?
අපි ඒකාබද්ධ සන්ධානයක් හදන්න යන්නේ. ශ්‍රීලනිපය, පොහොට්ටුව එක්ක මහා සන්ධානයක් හදනවා. දැනට ශ්‍රී ලංකා නිදහස් පොදුජන පෙරමුණ හැටියට තාවකාලිකව නම් කරලා තියෙනවා. ඒ නම වෙනස් වෙන්න ඉඩ තියෙනවා. සලකුණ ඊතලය. ඉදිරි මැතිවරණවලදී ඒ විදියට කටයුතු කරන්න යෝජනා කරලා තියෙනවා. කෙසේ වෙතත් මේවා අවසාන එකඟතාවන් නෙවෙයි. දැනට යෝජනා මට්ටමේ තියෙන කාරණා.■