පාර්ලිමේන්තු මන්ත්‍රී
අජිත් පී. පෙරේරා

 

පාර්ලිමේන්තුවේ දැන් තියෙන තත්ත්වය මොකක්ද?
පාර්ලිමේන්තුව නීත්‍යනුකූලව රැ ස්වෙනවා. පාර්ලිමේන්තුවට වලංගු රජයක් නැහැ. ඒ නිසා තමයි න්‍යාය පත්‍රයට රජයේ කටයුතු පිළිබඳව ඇතුළත් කරන්න බැරි. එහෙත් රජයක් නැතිව වුණත් පාර්ලිමේන්තුවට සිමිත කටයුතු ප්‍රමාණයක් කරන්න අවස්ථාව තියෙනවා. මොකද රජයේ තීන්දුවලට අනුමැතිය ලබාදීම පාර්ලිමේන්තුවේ එකම රාජකාරිය නෙවෙයි. ඒ අතරින් එකක් තමයි පාර්ලිමේන්තුවේ සභාව කල්තැබීමේ යෝජනා ඉදිරිපත් කිරීම. පාර්ලිමේන්තුවේ කමිටු වශයෙන් රැස්වීම. කමිටුවලට තෝරාගැනීමේ ක්‍රියාවලිය. මූල්‍ය පාලනය සහ ඒවාට අදාළ, පනත් සම්මත කිරීම් නොවන යෝජනා සම්මත කිරීම කරන්න පුළු‍වන්. ඒවා නීත්‍යනුකූලයි. ව්‍යවස්ථානුකුලයි. සම්ප්‍රදායට අනුකූලයි. ස්ථාවර නියෝගවලට අනුකූලයි. රටේ ඇතිවෙලා තියෙන කලබලකාරී තත්ත්වය එක්ක යම් විශේෂිත කටයුතු කිරීමේ හැකියාව තියෙනවා.

පහුගිය දිනයේ පාර්ලිමේන්තුවේ කළේ මොනවාද?
මේ දින කිහිපයේම අපි කළ කටයුතු කිහිපයක් තිබුණා. ආණ්ඩුවක් පිහිටුවන තුරු රටේ ජනතාවට ජාතික වශයෙන් වැදගත් වෙන ප්‍රශ්න ස්ථාවර නියෝග 19 ඇතුළේ ඉදිරිපත් කොට, පාර්ලිමේන්තුව තුළ සාකච්ඡා කරන්න පුළුවන්. 29 හා 30 දිනවල නීති විරෝධී ආණ්ඩුවේ ඊනියා අගමැතිවරයාගේ සහ ඊනියා කැබිනට් මණ්ඩලයේ වියදම් කපා දැමීමට අදාළ යෝජනා ඉදිරිපත් කරලා තියෙනවා. ඒවා ස්ථාවර නියෝග අනුව කළ හැකි දේවල්.

අල්ලස් ගෙවමින් මන්ත්‍රීවරුන් ඩැහැගැනීම නීතිවිරෝධී ආණ්ඩුව පාර්ශ්වයෙන් යළි උත්සාහ කරන බව කියනවා. එජාපයේ මන්ත්‍රීවරු නීතිවිරෝධී ආණ්ඩුවට එක්වීමේ ඉඩක් තියෙනවාද?
මං හිතන්නෑ එහෙම වේවි කියලා. යන කට්ටිය ගියා. අපට පාර්ලිමේන්තුවේ අතිමහත් බහුතරයක් තියෙනවා. ජනාධිපතිවරයාගේ සහ මහින්ද රාජපක්ෂගේ ආණ්ඩු විරෝධී කුමන්ත්‍රණය සම්බන්ධයෙන් විශාල ජනතා විරෝධයක් තියෙනවා. එක්සත් ජාතික පක්ෂය කවදාටත් වඩා ශක්තිමත්. එහෙම අවස්ථාවක තමන්ගේ ගෞරවය විනාශ කරගනිමින් නීතිවිරෝධී ඊනියා ආණ්ඩුව සමඟ එක්වීමේ අවශ්‍යතාවක් කිසිම මන්ත්‍රීවරයෙක්ට ඇතැයි මම හිතන්නේ නැහැ.

එසේ වුවහොත් මහින්ද රාජපක්ෂ මහතාගේ පාර්ශ්වයට කළ හැකි දෙයක් නැහැ නේද?
කොහොමත් මහින්ද රාජපක්ෂ මහත්තයාට තව දින කිහිපයයි තියෙන්නේ. දේශපාලන වශයෙන් මොනවා හරි වටිනාකමක් ඉතිරිකරගන්න අවශ්‍ය නම් ඒ දින කිහිපය තුළ තමන්ට ඉල්ලා අස්වෙන්න පුළුවන්. තමන්ගේ පැත්තෙන් කරුණු දක්වන්නත් පුළුවන්. දේශපාලන වශයෙන් කුණුබක්කියට යන්න අවශ්‍ය නම්, ඊනියා ආණ්ඩුවක් විදියට බහුතරයක් නැතිව වැඩකටයුතු කරන්න පුළුවන්. ඒත් ඔවුන් කරන ඒ වැඩකටයුතු පාර්ලිමේන්තුවෙන් අනුමත කරගන්නට කෙහොමත් අවස්ථාවක් ලැබෙන්නේ නැහැ. එහෙම නැත්නම් ප්‍රජාතන්ත්‍ර විරෝධීම නායකයෙක් හැටියට ඉතිහාසගත වෙන්න පුළුවන්.

රනිල් වික්‍රමසිංහව අගමැතිධුරයට පත් කරන්න බැරි බව ජනාධිපති මෛත්‍රීපාල සිරිසේන මහතා කියලා තියෙනවා නේද?
කිසිම දෙයක් නිල වශයෙන් කතාකරලා නැහැ. ඔහු මාධ්‍යවේදීන්ට තමයි ඔය කතාව කිව්වේ. ඔහු කියන්නේ මොකක්දැයි ඔහුම දන්නේ නැතිව ඇති. තමන්ගේ තනතුර මොකක්ද, ඔහු පත් කළ යුතු තනතුර මොකක්ද කියලා ඔහු දන්නේ නැතිව ඇති. තමන්ගේ වත්තේ සුපිරින්ටෙන්ඩන්ට් පත් කරනවා නම් ඔහුට මූණ බලලා තමන් කැමති කෙනෙක්ව පත් කරන්න පුළුවන්. තමන්ගේ දුවට විවාහයක් කරලා දෙන්න බලාපොරොත්තු වෙනවා නම් හොයලා බලලා තමන් කැමති කෙනෙක්ව විවාහ කරලා දෙන්න පුළුවන්. අකමැති කෙනෙක්ව ප්‍රතික්ෂේප කරන්න පුළුවන්. පාර්ලිමේන්තුවේ බහුතරය දිනාගත හැකි පුද්ගලයාව අග්‍රාමාත්‍යවරයා වශයෙන් පත් කිරීම පෞද්ගලික ආශාවන් මත කළ හැකි දෙයක් නෙවෙයි. ඒක ඔහුගේ ධුරයට පැවරිලා තියෙන වගකීමක්. ඒ නිසා ඔහුගේ එවැනි ප්‍රකාශයන්ට කිසිම වලංගුභාවයක් නැහැ. ඔහු ඉල්ලා සිටියොත් ඕනෑම මන්ත්‍රීවරයෙක් ඉදිරිපත් වෙන්න කියලා, අපට පුළුවන් රනිල් වික්‍රමසිංහ මහතාව ඉදිරිපත් කරන්න.

ජනාධිපතිවරයාගේ කැමැත්ත අනුව යමින් සජිත් ප්‍රේමදාස වැනි වෙනත් පුද්ගලයෙක්ව අගමැති අපේක්ෂකත්වයට පත් කිරීමේ ඉඩක් තියෙනවාද?
අපි එහෙම සාකච්ඡාවක් කරලා නැහැ. අපි කියන්නේ අපේ නායකයා රනිල් වික්‍රමසිංහ මහතා. ඔහුට තමයි නීත්‍යනුකූලව අගමැතිධුරය සඳහා අයිතිය තියෙන්නේ. අපි ඉදිරිපත් කරන්නේ රනිල් වික්‍රමසිංහ අගමැතිතුමාව.

දෙමළ ජාතික සන්ධානය සහ ජනතා විමුක්ති පෙරමුණ මහින්ද රාජපක්ෂට විරුද්ධව කටයුතු කළත්, එක්සත් ජාතික පක්ෂයේ ආණ්ඩුවකට ඔවුන්ගේ සහාය ලැබෙන්නේ නැති බවයි පෙනෙන්නට තියෙන්නේ. ඒ නිසා එජාපයටත් බහුතරයක් නැතිවේවිද?
අපට ද්‍රවිඩ සන්ධානය හා ජනතා විමුක්ති පෙරමුණ නැතිවම 113ක් ලබාග න්න හැකියාව තියෙනවා. බහුතරය ලබාග ැනීම අපට ගැටලු‍වක් නෙවෙයි. ඒ තත්ත්වය උදාවෙන්නේ නව අගමැතිවරයාව පත් කළාම. අපට ආරාධනාව ලැබුණු විගස ඒ අමතර මන්ත්‍රී සංඛ්‍යාව පෙන්වන්න අපට පුළුවන්. එජාපයට තනිව 113ක් ලබාග න්න අවශ්‍ය එකඟතා ඇති කරගෙන හමාරයි. ඊට අමතරව ද්‍රවිඩ සන්ධානයත්, පාර්ලිමේන්තුවට ඉදිරිපත් වෙන යෝජනා අනුව තමන්ගේ මතය තීරණය කරනු ඇති.

දෙමළ ජාතික සන්ධානය එලෙස සහාය පළ කරන්නට එකඟ වුණාද?
මීට කලිනුත් එහෙම කරලා තියෙනවානේ. බොහෝ අවස්ථාවල ආණ්ඩුවට පක්ෂව දෙමළ ජාතික සන්ධානය ඡන්දය ප්‍රකාශ කරලා තියෙනවා.

අයවැයක් ඉදිරිපත් නොවීම නිසා රටට සිදුවෙන ආර්ථික බලපෑම පිළිබඳ තක්සේරුවක් තියෙනවාද?
දැනටමත් අපි ගණන් හදලා තියෙනවා, මේ මාසය තුළ පමණක් සිදුවූ ආර්ථික හානිය රුපියල් බිලියන 720ක් පමණ වෙන බව. දැවැන්ත හානියක් මේ රටේ ආර්ථිකයට සිද්ධවෙලා තියෙනවා. හැම දවසක් ගානෙම බිලියන ගණනක් රටට පාඩුයි. පාර්ලිමේන්තුව තමයි රාජ්‍ය මූල්‍ය පිළිබඳ අනුමත කිරීම් කරන්නේ. පාර්ලිමේන්තුව අකර්මණ්‍ය කිරීම තුළ මහා විනාශයක් මේ රටට සිද්ධවෙනවා.

එජාපය ඡන්දයට බයද කියන ප්‍රශ්නය නීතිවිරෝධී ආණ්ඩුව විසින් අහනවා. මේ කුමන්ත්‍රණය පරාජය කළාට පස්සේ මැති වරණයකට යෑමේ බලාපොරොත්තුවක් තියෙනවාද?
පළමුවැනි ඉලක්කය තමයි නීත්‍යනුකූල ආණ්ඩුවක් පිහිටුවීම. ඕනෑම මැතිවරණයක් නීත්‍යනුකූලව පවත්වන්න පුළුවන් නීත්‍යනුකූල ආණ්ඩුවක් පිහිටුවීමෙන් පස්සෙ. ඒ වගේම ජනවාරි 08 වෙනකොට නීත්‍යනුකූලව ජනාධිපතිවරණයක් පවත්වන්න හැකියාව තියෙනවා. අනෙක් පක්ෂවලින් තුනෙන් දෙකක සහයෝගයක් ලබාගන්න පුළුවන් වුණොත් නීත්‍යනුකූල මැතිවරණයක් පවත්වන්න අපි බලාපොරොත්තු වෙනවා. අපේ මතය තමයි නීත්‍යනුකූලව පාර්ලිමේන්තු මහමැතිවරණයක් එක්ක ජනාධිපතිවරණයක් එකම දිනයක පැවැත්විය යුතු බව. ඒකෙන් ජනමතයක් පැහැදිලිවම ලබාගන්න පුළුවන්. අලු‍ත් ආරම්භයක් ගන්න පුළුවන්. සෑහෙන වියදමක් ඉතිරි වෙනවා. මෛත්‍රීපාල සිරිසේන ජනාධිපතිතුමාට ජන අනුමැතියක් තිබෙනවාද යන්නත් බලාගන්න පුළුවන්.

එවැනි මැතිවරණයකදී සජිත් ප්‍රේමදාසව අගමැති අපේ ක්ෂකයා විදියට ඉදිරිපත් කරනවාද? සජිත් – රනිල් වෙනුවෙන් එජාපයේ අභ්‍යන්තර ගැටුමක් ඇතැයි ඇතැම් අය කියනවා.
අපි අනිවාර්යයෙන්ම සජිත් ප්‍රේමදාස මැතිතුමාව පක්ෂයේ අනාගත නායකයා විදියට පිළිගන්නවා. ඔහු පක්ෂයේ විශාලම ජනප්‍රියතාවක් තියෙන නායකයෙක්. එහෙත් ඔහුව පක්ෂයේ නායකයා විදියට කවදා පත් කරනවාද කියන එක පක්ෂයේ තීරණයක්. අපි කතාකරලා ඒ තීරණය ගන්නම්. මෛත්‍රීපාල සිරිසේන මහතා ඒ ගැන කලබල විය යුතු නැහැ.

ජනාධිපතිවරණ අපේක්ෂකයෙක් ගැන සාකච්ඡාවක් තියෙන වාද?
අපි ඒ ගැන ඇතුළේ කතාකරලා නැහැ. විවිධ අදහස් ඇති. ඒත් ඒකත් පක්ෂයේ තීන්දුවක්. මෛත්‍රීපාල සිරිසේන මැතිතුමා ජනාධිපතිවරණයක් ප්‍රකාශය පත් කළාට පස්සෙ අපි ඒ ගැන තීන්දුවක් ගන්නවා. කොහොමත් අපි ඉදිරිපත් කරන්නේ එජාප සාමාජිකයෙක්ව.

නීතිවිරෝධී ආණ්ඩුව පාර්ශ්වයෙන් අතුරු සම්මත ගිණුමක් සම්මත කරගැනීම සම්බන්ධයෙන් සාකච්ඡාවක්වත් පවත්වලා තියෙනවාද?
එහෙම කිසිම යෝජනාවක් ඉදිරිපත් වෙලාත් නැහැ. දැන් ඊනියා රාජපක්ෂ පිල පාර්ලිමේන්තුවට එන්නේත් නැහැ. ඇත්තටම ඔවුන්ට අසූපහකටත් වඩා අඩු පිරිසක් ඉන්නේ. කවදාවත් ඔවුන්ට බහුතර බලයක් මේ අටවැනි පාර්ලිමේන්තුවේ තිබිලාම නැහැ. ඉස්සර ඒකාබද්ධ විපක්ෂයේ 69ක් හිටියා. දැන් ඒකට සුළු පිරිසක් එකතුවෙලා තියෙනවා. ඒක තමයි යථාර්ථය. ඉතින් ඔවුන්ට එවැන්නක් සම්මත කරගන්න බැහැ.

පාර්ලිමේන්තුව හරහා තවත් අමාත්‍යාංශවල වැය ශීර්ෂ කපා හරින්න බලාපොරොත්තු වෙනවාද?
30 වැනිදා ඉදිරිපත් වෙන්නේ දැනට අපි ඉදිරිපත් කරලා තියෙන යෝජනා ටික. අපි හිතනවා තව ටික දිනකින් මේක අවසාන වේවි කියලා. ඒත් ඊට පස්සේත් දිගටම මේ තත්වය පැවතුණොත් අපට සිද්ධවෙනවා පාර්ලිමේන්තුවේ ඔවුන්ට බලයක් නොමැති බව පෙන්වීම සඳහා තවත් යෝජනා සම්මත කරන්න.

ඉදිරියේදී ජනාධිපති කාර්යාලය වටලා හෝ ප්‍රශ්නය විසඳා ගන්න බලාපොරොත්තු වෙන බව කියා තිබෙනවා නේද?
අපි අනිවාර්යයෙන්ම එහෙම ක්‍රියාමාර්ගවලට යනවා. අපි හැමදාම උත්සාහ කරන්නේ හැකි තරම් සාමකාමීව ප්‍රශ්න විසඳන්න. අපි අවිහිංසාවාදී ක්‍රියාමාර්ග හරහා මේ ප්‍රශ්නය විසඳන්නට හැකි තරම් උත්සාහ ගන්නවා. බැරි නම් ජනතාව සමග පාරට බහිනවා. දැනටමත් ඒකට සැලසුම් සකස් කරලා තියෙන්නේ. ප්‍රජාතන්ත්‍රවාදය යටපත් කරන පුද්ගලයෝ කවුරු වුණත් ඔවුන්ට ජනබලය පෙන්වනවා. මෛත්‍රීපාල සිරිසේන විය හැකියි. මහින්ද රාජපකෂ විය හැකියි. ඔවුන් නීතිවිරෝධීව ගන්නා ක්‍රියාමාර්ග පරාජය කරලා මහජනතාවගේ බලය ශක්තිමත් කරන වැඩපිළිවෙළකට අපි යනවා. අපි බලාගෙන ඉන්නෙ නැහැ. මෙතෙක් අපි අවිහිංසාවාදීව කටයුතු කළා. අපි රට පුරා ඒ පිළිබඳව දැනුවත් කරගෙන යනවා.

ඒ අර්ථයෙන් ගතහොත් එක්සත් ජාතික පක්ෂයට මේ අර්බුදය වාසිදායක වුණා නේද?
මෛත්‍රීපාල සිරිසේන මැතිතුමා එජාපය අවදි කළා. අපේ ලක්ෂ ගණනක් වෙච්ච සාමාජිකයො ඉතාමත්ම හැඟීමෙන් සහ ආවේගයෙන් ඉන්නවා. ඒ එක්සත් ජාතික පක්ෂයේ ආණ්ඩුවක් පිහිටුවන්න. එහෙත් තව විශේෂ ලක්ෂණයක් අපි දැක්කා. එජාප ආණ්ඩුවක් පිහිටුවන්නට එන එජාප පාක්ෂිකයන් වගේම මධ්‍යස්ථ පුරවැසියන් බොහෝ දෙනෙක් ප්‍රජාතන්ත්‍රවාදය වෙනුවෙන් අප වටා එකතුවෙනවා. අපි කළුතරදී පැවති ජනරැලියට ඒ විදියේ විශාල පිරිසක් ආ හැටි දැක්කා. ඒ නිසා මහපාරේ සටනක් කරන්න අපට පුළුවන්. ඒත් අපට ඒ තත්වයට යන්නට ඕනෑ නැහැ. අපි තවමත් හිතන්නේ අවිහිංසාවාදීව මේ පක්ෂය විසඳාගන්න. මේ ක්‍රියාවලියෙන් මිනිස්සු පක්ෂ භේද නැතිව ප්‍රජාතන්ත්‍රවාදය වෙනුවෙන් එකතු වුණා. අපේ රජයේත් අඩුපාඩු ගොඩක් තිබුණා. අපි විශ්වාස කරනවා ඉක්මනින්ම පාලන බලය ලබාගන්න පුළුවන් වේවි කියලා. එහෙම පුළුවන් වුණොත් අඩුපාඩු හදාගෙන ඉදිරියට යන්න අපට වුවමනාව තියෙනවා.

එවැනි එක්වීමක් එජාපය තමන්ගේ පෞද්ගලික බල අරමුණු වෙනුවෙන් පාවිච්චි කරනවාද? නැත්නම් රටේ පොදු යහපත වෙනුවෙන් පාවිච්චි කරනවාද?
අපි පළවැනි පියවර විදියට ලංකාවේ දේශපාලන ඉතිහාසයේ ප්‍රජාතන්ත්‍රවාදය වෙනුවෙන් ගොඩනැඟු‍ණු විශාලම සන්ධානය ගොඩනංවනවා. ඒක පක්ෂයකට සීමා නොවූ දැවැන්ත සන්ධානයක්. පක්ෂයක් විදියට අපි අපේ පක්ෂයේ අඩුපාඩු නිවැරදි කරගන්නවා. අපට දේශපාලන පක්ෂයක් විදියට දැවැන්ත වගකීමක් තියෙනවා අපේ අඩුපාඩු හදාගන්නට. අපි පැරණිම සහ විශාලම දේශපාලන පක්ෂය. ලංකාවේ ප්‍රජාතන්ත්‍රවාදය ආරක්ෂා කරගැනීම අපේ පක්ෂයේ වගකීමක්.

ඉදිරි එජාප රජයකින් කරන්නට බලාපොරොත්තු වෙන්නේ මොනවද?
පළමුවැනි දේ තමයි අපි නීතිය ක්‍රියාත්මක කිරීම සම්බන්ධයෙන් විශාල ප්‍රගතියක් ලබා තිබීම. අපි යහපාලන ආණ්ඩුවට කළ නොහැකි වූ දේවල් සම්පූර්ණ කරගනිමින් හිටියා. බරපතළ පරීක්ෂණ 120කට වඩා අපි අවසන් කරලා තියෙනවා. මහාධිකරණවල නඩු 20කට වඩා ගොනු කරලා තියෙනවා. එක් නඩුවක් අවසන් වුණා. තවත් ගණනාවක් විභාග වෙමින් තියෙනවා. ඒ වගේම අපි ත්‍රිපුද්ගල දූෂණ විරෝධී මහාධිකරණ තුනක් පිහිටෙව්වා. තුන්වැනි අධිකරණයත් පත් කළ යුතුව තියෙනවා. අපි ඒවා හරහා දූෂණ වංචා ගැන විභාග කරලා වරදකරුවන් ඉන්නවා නම් දඬුවම් දෙන්න බලාපොරොත්තු වෙනවා. ඒ හරහා දූෂණය මර්දනය කරන්න බලාපොරොත්තු වුණා. ආර්ථික ප්‍රතිපත්තිවල අඩුපාඩු අපි දැක්කා. ඒවාත් හදාගන්න බලාපොරොත්තු වෙනවා. මේක අපි දකින්නේ දෙවැනි ඉපදීමක් විදියට. අපට ගහපු බරපතළ ප්‍රජාතන්ත්‍ර විරෝධී ප්‍රහාරය තුළ අපි ශක්තිමත්ව ආරක්ෂා වුණා. මේ අවස්ථාව මේ රටටත් අපටත් ලැබුණු අවස්ථාවක්. දැන් අපි කරන්න ඕනෑ අපේ ගමන නිවැරදි කරගැනීම.

නව ව්‍යවස්ථාවක් බිහිකරගැනීම අවශ්‍යයි නේද?
අනිවාර්යයෙන්ම ඉක්මන් කරන්න ඕනෑ, අපි පහුගි ය කාලය තුළ ඒ ගැන ගැඹුරු සාකච්ඡාවක් කළේ නැහැ. කොහොම වෙතත් ඒ ක්‍රියාවලිය ඉදිරියට ගෙන යා යුතුයි. ඒ ගැන සැලකිය යුතු සාකච්ඡාවක් ඉදිරියේදී කරනවා.

විධායක ජනාධිපති ක්‍රමය අහෝසි කරන්නට ඉදිරියේදී එජාප යෙන් ඉදිරිපත් වන ජනාධිපති අපේක්ෂකයෙක්
කැමති වේවිද?
දැනටත් ඕකේ මහා බලතල ප්‍රමාණයක් නැහැ. මෛත්‍රීපාල සිරිසේන මැතිතුමාට තේරුම් ගන්න බැරි ඒකයි. ඉස්සර තිබුණු විධායක බලතලවලින් විශාල ප්‍රමාණයක් දැන් කපාහැරලා තියෙන්නෙ. ඉදිරියේදී අපි විධායක ජනාධිපති ක්‍රමය සම්පූර්ණයෙන් අහෝසි කළ යුතුයි. මේ අත්දැකීමෙනුත් අපට ලැබෙන පාඩම ඒකයි. බල කේන්ද්‍ර දෙකක් තියෙන්න බැහැ. නායකයන් දෙන්නෙක් ඉන්න බැහැ. එක් කණ්ඩායමකට බලය තිබිය යුතුයි.

කථානායකවරයාගේ ක්‍රියා කලාපය ගැන නීතිවිරෝධී ආණ්ඩුව පැත්තෙන් විශාල චෝදනා එල්ල වෙනවා. ඒ ගැන අදහස මොකක්ද?
කථානායකතුමා ආණ්ඩුක්‍රම ව්‍යවස්ථාවට සහ ස්ථාවර නියෝගවලට පක්ෂපාතයි. ප්‍රජාතන්ත්‍රවාදයට පක්ෂපාතයි. ප්‍රජාතන්ත්‍රවාදයට විරුද්ධ අයට පෙනෙන්නේ එතුමා විරුද්ධවාදියෙක් හැටියට.

මෛත්‍රීපාල සිරිසේන ජනාධිපතිවරයාගේ ක්‍රියාකලාපය ගැන තක්සේරුව මොකක්ද?
එතුමා දේශපාලනිකව සියදිවි නසාගත්තා. එතුමාට ඉතිහාසයේ හිමිවෙන තැන තීරණය වෙලා ඉවරයි. මගේ විනිශ්චය නම් එතුමා දැනටමත් ඉන්නේ දේශපාලන කුණු බක්කියේ.■