දේශපාලන අර්බුදයේ දැන් තිබෙන තත්ත්වය ඒ ගැන ඔබ මොකද හිතන්නේ?
ඇත්තටම දැන් නම් උදාවෙලා තියෙන්නේ කාටවත්ම තේරුම් ගන්න බැරි ව්‍යාකූල තත්ත්වයක්. මේක බල අරගලයක් කියලත් කියන්න පුළුවන්. සාමාන්‍යයෙන් ප‍්‍රජාතන්ත‍්‍රවාදී රටක මේ වගේ දේවල් සිද්ධ වෙන්න බැහැ.. යම් දෙයක් සිද්ධවෙනවා නම් ඒක පාර්ලිමේන්තුව හරහා තමයි වෙන්න ඕනෑ.. මෙතැන සිද්ධ වෙලා තියෙන්නේ විධායකයේ බලතල අත්තනෝමතිකව යොදාගෙන ප‍්‍රජාතන්ත‍්‍රවාදයට හා පාර්ලිමේන්තු සම්ප‍්‍රදායට වගේම රටේ ව්‍යවස්ථාව පවා නොසලකා සිදුකළ දේශපාලන කුමන්ත‍්‍රණයක්. අපි නිර්මාණය කළ ජනාධිපති අන්තිම කැත විදිහට අපිව පාවලා දුන්නා. 62 ලක්ෂයේ ජනතා අභිලාෂය පාවලා දුන්නා.

දැන් 14 වෙනිදා පාර්ලිමේන්තුව කැඳවලා තිබෙනවා. මේ තත්ත්වය තුළ යූඑන්පී පක්ෂයට බහුතරය අහිමිවීමේ අවදානමක් තිබෙනවාද?
මගේ දේශපාලන ඉතිහාසය තුළ මම මෙහෙම තමන්ගේ බලය රැුක ගැනීම උදෙසා බහුතර ජනතා මතයට විරුද්ධව ඞීල් දාන ජනාධිපති කෙනෙක් දැකලා නෑ. හිතුවක්කාර විදිහට පක්ෂවල මහජන නියෝජිතයන් සල්ලිවලට අරගන්න ජනාධිපති කෙනෙක් දැකලා නෑ. මේක තමයි මම දැක්ක නින්දිතම, ලැජ්ජා සහගතම දේශපාලන කුමන්ත‍්‍රණය. මේ විදියට ඇමතිකම්වලට මුදල්වලට ඞීල් දාන අයත්, විකිණෙන කට්ටියත් තමන්ගේ හෘදය සාක්ෂියට එකඟව නෙවෙයි මෙම තීරණ ගන්නේ. අපේ පක්ෂයෙන් මේ වන විටත් කුමන්ත‍්‍රණකාරී ලෙස ජනපති මහින්ද පාර්ශ්වයට එක්ක එකතු වෙලා ඉන්නේ පාර්ලිමේන්තු මන්ත‍්‍රීවරුන් තුන්දෙනෙක් විතරයි. මේ තත්ත්වය හමුවේ අපේ පක්ෂය, පක්ෂයේ බේස් එක තවත් ශක්තිමත් වුණා කියන එක ජාතික සංවිධායක විදියට මට පැහැදිලිවම කියන්න පුළුවන්. අනෙක් පැත්තෙන් මෙතැනින් ඉදිරියට එජාපය හැරදා හොර අගමැති සහ පිරිවර එක්ක අපේ අය එකතුවෙයි කියලා හිතන්න අමාරුයි. අපි මේ සටන කොහොම හරි ජයගත යුතුයි. මේක රනිල් වික‍්‍රමසිංහ තියාගන්න කරන සටනක් නෙවෙයි. මේක මිනිස්සුන්ගේ ජීවිතය පිළිබඳ ප‍්‍රශ්නයක්. නිදහසේ හුස්ම ගන්න අනාගතයේ ඉඩ ලැබෙයිද කියන ප‍්‍රශ්නය මෙතන තිබෙන්නේ.

පක්ෂයේ ප‍්‍රතිසංස්කරණ ගැන සෑහීමකට පත්වෙනවාද? අද ජනධිපති පාර්ශ්වයට එජාප මන්ත‍්‍රීවරුන් බිලීබාගන්න හැකියාව තිබෙන්නේ මේ පක්ෂයේ අත්‍යවශ්‍ය ප‍්‍රතිසංස්කරණ නොවීම සහ ඒ පිළිබඳව මන්ත‍්‍රීවරුන්ගේ කලකිරීම නෙවෙයිද?
මෑතකදී ඇතිවුණු ප‍්‍රශ්නත් එක්ක පක්ෂයේ යම් යම් ප‍්‍රතිසංස්කරණ ඇති වුණා. නායකත්ව මණ්ඩලයේ රහස් ඡුන්දයෙන් මට වැඩිම ඡුන්ද ප‍්‍රතිශතයක් ලැබුණා. ඒ අනුව යම් යම් ප‍්‍රතිසංස්කරණ පක්ෂය තුළ කෙරුණා. ඒවා ගැන සීයට සීයක් සෑහීමකට පත්විය නොහැකි වෙන්න පුළුවන්. පක්ෂය ඇතුළේ අපිට නායකත්වය සමග යම් යම් අර්බුද තියෙන්නත් පුළුවන්. නමුත් මේ වෙලාවේ ඒ අර්බුද පස්සේ යන එක මම අනුමත කරන්නේ නෑ. ඒක පස්සෙ විසඳගනිමු. නැතුව මේ මොහොතේ නායකත්වය විවේචනය කරමින් පක්ෂ ප‍්‍රතිසංස්කරණ ගැන කතා කිරීම තේරුමක් නැහැ. ඒක අපේ පාක්ෂිකයාට සහ ප‍්‍රජාතන්ත‍්‍රවාදයට ගරුකරමින් අපිත් එක්ක එකට හිටගන්න නීතිගරුක පුරවැසියන්ට කරන අසාධාරණයක්. ඒ නිසා අපි මෙතැනදී ව්‍යවස්ථාවට ගරුකරන, දේශපාලන විනයක් සහිත රටක් වෙනුවෙන් එකට එකාවන්ව හිටගන්න ඕනෑ. එක්සත් ජාතික පක්ෂයේ සාමාජිකයාගේ ඉඳලා පක්ෂයට ආදරය කරන සෑම ජනතා නියෝජිතයෙක්ම අද මේ සටනේදී එක අරමුණක ඉන්න බව මට විශ්වාසයි. අනික මේ අර්බුදයත් එක්ක ගමේ අපේ පාක්ෂිකයාගේ පිබිදීමක් තිබෙනවා. ඒක සෑහෙන්න හොඳ දෙයක්. අපිට ඒක හරියට කළමනාකරණය කරගන්න පුළුවන් වුණොත් පක්ෂයක් විදිහට අපිට හොඳයි. අනික් පැත්තෙන් මේ ගොඩනැගෙන ඒ එකමුතුව තුළින් තමයි මේ ජනාධිපතිවරයා ප‍්‍රමුඛ කල්ලියේ දේශපාලන මගඩියට එරෙහිව නිවැරදිව මුහුණ දෙන්න පුළුවන් වෙන්නේ.

පැන්න අය ගැන මොකද හිතන්නෙ. එයාලට පක්ෂය ඇතුළේ ප‍්‍රශ්න තිබුණා කියලා කියනවා. නායකත්වය ඒවාට ඇහුන්කම් දුන්නේ නෑ කියලා තියෙනවා. මෙහිදී ජාතික සංවිධායක විදිහට ඔබටත් යම් වගකීමක් පැවරෙනවා නේද?
සල්ලිවලට විකුණුණු සල්ලිවලට පක්ෂය පාවා දුන්න නියෝජිතයන්ට මට කියන්න තියෙන්නෙ මෙච්චරයි. එයාලගේ දේශපාලන අරමුණු මේ කුමන්ත‍්‍රණය ඇතුළේ විනාශ වෙනවා. ඒගොල්ලන්ට යූඑන්පී එකෙන් ඡුන්දේ ඉල්ලන්න බෑ. අපි නාම යෝජනා දෙන්නෙත් නෑ. අපි දුන්නත් එක්සත් ජාතික පාක්ෂිකයෝ එයාලට ඡුන්දේ දෙන්නේ නෑ. මේකෙන්් එක්ක එයාලාගේ ඡුන්ද පදනම ඉවරවුණා. පක්ෂයේ ජාතික සංවිධායක විදියට මම කතා කළා අපේ පක්ෂය හැර දාලා ගියපු එක මන්ත‍්‍රී කෙනෙකුට. ඔහුට ඕන උනේ කැබිනට් අමාත්‍යධුරයක්. මම උත්සහ කළා ඔහුට පැහැදිලි කරලා දෙන්න මේ ඔබ අහුවෙන්නේ දේශපාලන මර උගුලක කියලා. ඒත් ඔහු කැබිනට් අමාත්‍යධුරය පස්සේ ගියා. මම කැබිනට් අමාත්‍යවරයෙක් වුණේ දේශපාලනේට ඇවිල්ලා අවුරුදු දහයකටත් වැඩිය කැපකිරීම් කළාට පස්සේ. නමුත් මේ කියන මන්ත‍්‍රීවරයා පාර්ලිමේන්තු එන්නේ 2014. එයාට තව අවුරුදු කීපයක් ඉවසන්න තිබුණා. එයාට හොඳ නියෝජ්‍ය ඇමතිකමක් තිබුණා. විදේශ කටයුතු නියෝජ්‍ය ඇමතිකමත් එක්ක එයාට හොඳ දේශපාලන ගමනක් යන්න දේශපාලන අඩිතාලමක් දාගන්න තිබුණා. ඒ නිසා මං දන්නෑ ඒගොල්ලන් ඇයි තමන්වත් තම පාක්ෂිකයාත් තම පක්ෂයත් විනාශ කරන මෙවැනි තීරණ ගන්නේ කියායා.

අපෙන් වෙන්වුණු රත්නපුරේ ජනතා නියෝජිතයා ගැන නම් මම කතා කරන්න කැමැති නෑ. ඒක ඒ තරමට අශ්ලීලයි. කොහොම උනත් හැමෝටම තමන්ගේ දේශපාලන තීන්දුව ගැන කියන්න මොකක් හරි හේතුවක් ඇති. ඒත් හැමෝම දැනගන්න ඕනේ මේක නිකන් පක්ෂයක් පිළිබඳ ප‍්‍රශ්නයක් නොවෙයි කියලා. මේක රටක ‍ප‍්‍රජාතන්ත‍්‍රවාදය හා ව්‍යවස්ථාව පිළිබඳ ප‍්‍රශ්නයක්. ජනතාවගේ මූලික අයිතීන් පිළිබඳ ප‍්‍රශ්නයක්. දේශපාලන සුරක්ෂාව පිළිබඳ ප‍්‍රශ්නයක්. එවැනි වතාවරණයකදී තමන්ගේ පෞද්ගලික අරමුණුවලට පමණක් අවධානය යොමු කිරීම දේශපාලන නියෝජිතයකුට කිසිසේත් ගැළපෙන්නෙ නෑ කියන එකයි මගේ අදහස.

මේ වෙලාවේ කුමන්ත‍්‍රණයට දායක වුණු පොහොට්ටුවේ ක‍්‍රියාකාරීන් තනතුරු එපා කියනවා. ඒකට හේතුව තමයි එයාලා කැමති නෑ මෛත‍්‍රී ජනාධිපති යටතේ වගකීම් ගන්න. මොකද ඒක භයානකයි කියලා ඒගොල්ලන් දන්නවා. පොහොට්ටුවේ අයත් කියනවා තව මාස හත අටක් හිටියා නම් ප‍්‍රජාතන්ත‍්‍රවාදී ක‍්‍රමයකටම බහුතර බලය ගන්න තිබ්බා කියලා. එයාලටත් ප‍්‍රශ්නයක් ඇයි මේ හදිස්සියේ මෙහෙම දේශපාලන කුමන්ත‍්‍රණයකින් බලයට එන්න හදන්නෙ කියලා. ඒ නිසා අපි දෙගොල්ලම හරියට දන්නේ නැති හේතුවක් මෛත‍්‍රීටයි මහින්දටයි තියෙන්න පුළුවන්. කොහොම වුණත් මේ ඞීල් එකේ පැහැදිලිව පේන හේතු දෙකක් තියෙනවා. මෛත‍්‍රිගේ හේතුව තමයි ඊළඟ වතාවෙත් බලයට එන එන එක තහවුරු කරගැනීම. මහින්දගේ අරමුණ තමයි ඔහුට, බිරිඳට හා පුතුන්ට එරෙහිව තියෙන නඩු ටික අස් කරගැනීම.

මෛත‍්‍රීම කියන විදිහට ඔහු මේ කුමන්ත‍්‍රණය පටන්ගෙන තිබෙන්නේ සෑහෙන්න කාලෙකට කලින්. ඒ කියන්නේ ඔය කියන ඝාතන කුමන්ත‍්‍රණ කතාවලටත් කලින්. අනික ඔහු කරූ ජයසූරියට සහ සජිත් පේ‍්‍රමදාසට කිහිපවිටක්ම කතාකරලා මේ තනතුර භාරගන්න කියලා තිබෙනවා නේද. ඒ තත්ත්වය තුළ එජාපය මෙම කුමන්ත‍්‍රණය ගැන කලින් දැනගෙන හිටියේ නැහැ කියලා කියන්න බැහැ නේද?..
මීට මාස කිහිපයකට කලින් සන්ඬේ ටයිම්ස් පුවත්පතේ පළ වුණා හිටපු ජනාධිපතිතුමයි වර්තමාන ජනාධිපතිවරයායි එස් බී දිසානායකගේ නිවසේදී හමුවුණා කියලා. ඒකෙන් යම්කිසි ආකාරයකට ඉඟියක් සැපයුණා මේ ඞීල් එක ගැන. නමුත් මම කනගාටුවෙන් වුණත් පිළිගන්නවා පක්ෂයක් විදිහට අපි ඊට නිසි අවධානයක් යොමු නොකළ බව. විශේෂයෙන්ම අපේ නායකතුමා හැමතිස්සෙම බැලූ‍වේ ප‍්‍රශ්න සාමකාමීව විසඳගන්න. එතුමා කිසිවෙලාවක හිතුවේ නෑ මුළු රටම කඩලා දාලා රට අස්ථාවර කරන මෝඩ දේශපාලන තීන්දුවක් ජනාධිපතිවරයා ගනීවි කියලා. ඒ වගේම අපි රජයක් විදිහට පොදු ජනතාවට සහාය දෙන්න විශාල වැඩපිළිවෙළක් ආරම්භ කලා. ඒක සක‍්‍රියව රටපුරා යන මොහොතක් තිබුණේ. ගම්පෙරළිය වැඩසටහන මඟින් ගම සංවර්ධනයට මූලිකත්වය ගත්තා. ගමට සල්ලි යන්න පටන් ගත්තා. එන්ටර්ප‍්‍රයිස් ශ‍්‍රී ලංකා තුළින් තරුණ ප‍්‍රජාව සවිබල ගැන්වීම ආරම්භ කලා. මේ දේවල් ක‍්‍රියාත්මක උනොත් අපිට වාසි වන නිසා ඔක්කොම කඩාකප්පල් කිරීමට තමයි මේ කුමන්ත‍්‍රණය ආවේ.

පාර්ලිමේන්තුව කැඳවීම 14 වෙනිදාට සිදුවෙන බව ජනපති ගැස්ට්ටුවක් පළකර තිබෙනවා. මේකත් සෑහෙන්න කල් ගැනී මක්.. මේ කල්‍ යාමට විකල්පයක් තිබේද?
අපි බලාපොරොත්තු වුණා රටේ ප‍්‍රජාතන්ත‍්‍රවාදයත් එක්ක මේ කරන සෙල්ලම නවත්තලා ජනාධිපතිතුමා කථානායකවරයාට සහ ජාත්‍යන්තර ප‍්‍රජාවට පොරොන්දු වූ පරිදි මේ සතියේ පාර්ලිමේන්තුව කැඳවයි කියලා. එහෙත් එතුමා එක එක දේවක් කියමින් හැවෝම රැුවැට්ටුවා. ඒ තමන්ට 113 නැති නිසා. දැන් සල්ලිවලට මන්ත‍්‍රීවරුන් එකතුකරගනිමින් ඉන්නවා. ඔහු හිතනවා ඇති එලඹෙන 14 වෙනිදා වෙනකොට 113 හදාගන්න පුළුවන් වෙයි කියලා. මේ කල්මැරීමෙන්ම පේනවා මෙතනදී ජනාධිපතිවරයාගේ හැසිරීමේ තිබෙන ස්වරූපය. පාර්ලිමේන්තුව දාහතර වැනි දා දක්වා වසා තැබීම රටට විශාල හානියක් සිදු කළ හැකියි. ආර්ථිකය දැනටමත් කඩාගෙන වැටිලා. අන්තර්ජාතිකව තිබෙන්නේ රට පිළිබඳ හොඳ තත්ත්වයක් නෙවෙයි. අපි හිතනවා අපි මේ ගෙනියන අරගලය තුළින් ඉක්මනින් රටට, මෙම තත්ත්වය සමනය කරලා හොඳ තත්ත්වයක් උදා කරගන්න පුළුවන් වෙයි කියලා. ඒ සඳහා අපි පුළුවන් තරම් උත්සාහ කරනවා. නමුත් ඔබ දන්නවා මෙම අරගලය වටා ඉන්නේ එක්සත් ජාතික පක්ෂය පමණක් නෙවෙයි. ප‍්‍රජාතන්ත‍්‍රවාදයට ආදරය කරන රටේ නිදහස හා අයිතීන් වෙනුවෙන් පෙනීසිටින ලක්ෂ ගණනක් මිනිස්සු. මෙම දේශපාලන කුමන්ත‍්‍රණයට එරෙහිව හඬ නගනවා. එනිසා මෙම පීඩනය පුපුරා යා හැකියි. රටේ ජනාධිපතිවරයාට වගකීමක් තිබෙනවා එවැනි තත්ත්වයකට ඉඩ නොදී මෙම තත්ත්වය යහපත් මට්ටමින් ‍ විසඳාගැනීමට. මෙය ජන අරගලයක් දක්වා වර්ධනය වුණොත් ඒක රටේ සාමයට හා පැවැත්මට ලොකු බාධාවක් වනවා.

මේ අර්බුදයේ විසඳුම සහ රටේ අනාගතය ඔබ කොහොමද දකින්නේ?
පක්ෂයක් විදිහට එජාපයට වගේම ආණ්ඩුවක් විදිහට අපිටත් සමස්ත රටටත් මේ අර්බුදය ලොකු පාඩමක්. ඒ නිසා අපි ඒ පාඩම ඉගෙනගන්න ඉඩ හැදුවාට ජනපතිට ස්තූති කළ යුතුයි. මේ අර්බුදය ජය ගත්තාට පස්සේ පක්ෂයක් විදිහට අපේ පක්ෂට ඇතුළත තිබෙන ප‍්‍රශ්නත් නිරාකරණය කරගත යුතුයි. මේ අර්බුදය අපේ පක්ෂයේ නායකයන්ට දෙන හොඳම පණිවිඩය ඒක. අපි තරුණයන්ට මේ පක්ෂයේ මුදුනට මග විවර කරන්න ඕනෑ. ඒ වගේම අපේ ආණ්ඩුවට වැරදුණේ කොතනද, අපි ඒ ගැනත් කල්පනා කළ යුතුයි. වංචාව දූෂණ ඉවත් කිරීමට කටයුතු කළ යුතුයි. විශේෂයෙන් ජනවාරි 8 වෙනිදා අපි අපේ ඡුන්දදායකයන්ට දුන්න පොරොන්දු පමාවෙලා හරි දැන් ඉටුකිරීමට අපි මහන්සි විය යුතුයි. ආණ්ඩුකරණය පිළිබඳව අපි නැවත අලූ‍තින් අලූ‍ත් විදිහට තරුණ විදිහට සිතා බැලිය යුතුයි. ඒවා ඒ විදිහට වුණේ නැත්නම් මේ අර්බුදයෙනුත් අපි ඉගෙනගත්තා වෙන්නෙ නෑ..