කොවිඞ්-19 රෝගයෙන් මියගිය නවවැනියා ජීවත්වූ මෝදර, මෙත්සඳ සෙවණ මහල් නිවාසයේ බී සංකීර්ණය සෙමි-ලොක්ඩවුන් තත්වයට පත් කර ඇති බවත් ඒ අනුව එහි සිටින පවුල්වලින් එක් අයෙකු පමණක් බැහැරට ගොස් ආහාරපාන ලබා ගැනීම පමණක් සිදු කිරීමට අවසර දී ඇති බවත් මෝදර ප‍්‍රදේශය භාරව කයුතු කරන මහජන සෞඛ්‍ය නිළධාරියෙක් අනිද්දාට පැවසීය. මියගිය කාන්තාවගේ අවසන් කටයුතු කිරීමෙන් පසු සෞඛ්‍ය අංශ වෘත්තිය සමිති ක‍්‍රියාකාරිකයෙකු මාධ්‍යයට ප‍්‍රකාශ කළේ එම කාන්තාව සම්බන්ධ දෙවන පීසීආර් පරීක්ෂණයේදී ඇයට රෝගය වැළඳී ඇති බවට තහවුරු නොවූ බවයි. එම කාන්තාව සමඟ ඇසුරු කළ සහ පවුලේ අයගේ පීසීආර් පරීක්ෂණ සිදු කර තිබුණත් කිසිවෙකුට රෝගය ඇතැයි තහවුරු වී තිබුණේ නැත.

මෙම සෙමි-ලොක්ඩවුන් තත්වයට එම හේතුව බලපා ඇතිද යන්න පදිංචිකරුවන් අතර මේ වන විට සැකයක් මතුවී ඇත. කොවිඞ් 19 ආසාදනය වු කාන්තාවක මිය ගිය බව පවසමින් මැයි 05 වන දින මෙත්සඳ සෙවණ මහල් නිවාසයේ බී නිවාස සංකීර්ණය ලොක්ඩවුන් කර එම සංකීර්ණයේ පවුල් 257කට අයත් පුද්ගලයන් 1250ක් තම නිවාසවලම නිරෝධායනය ආරම්භ කර තිබුණි.

නිවාස සංකීර්ණය මෙසේ සෙමි-ලොක්ඩවුන් කර තැබීමෙන් නිරෝධායන ක‍්‍රියාවලිය කඩාකප්පල් වන බවත් යම් පුද්ගලයෙකුට කොවිඞ් 19 අසාදනය වී ඇත්නම් එය අනෙක් අය අතරේ ව්‍යාප්ත වීමට විශාල ඉඩකඩක් ඇති බවත් මහජන සෞඛ්‍ය පරීක්ෂකවරයෙක් පැවසීය.x