බුර්කාව ආදි ශ්‍රී ලංකාවේ මුස්ලිම් ජනතාව අඳින අරාබි සංස්කෘතියට අයත් ඇඳුම් පැළඳුම් හා විලාසිතා වෙනුවට ලංකාවේ අනෙකුත් ජනවර්ග අඳින පළඳින අන්දමේ සාමාන්‍ය ඇඳුම් පැළඳුම් ඇඳීම පිළිබඳව මුස්ලිම් ජනතාව අතර සාකච්ඡාවක් ඇති කරගැනීමට බලාපොරොත්තු වෙන බව අනිද්දා සමඟ අදහස් දැක්වූ මුස්ලිම් දේශපාලන පක්ෂ හා මුස්ලිම් සංවිධාන කිහිපයක ප්‍රධානීහු කීහ.


මෙම ඇඳුම් පැළඳුම්, විලාසිතා, ගෘහ නිර්මාණ ශිල්පය ආදිය රටවල්වල සංස්කෘතියේ කොටසක් මිස ආගමේ කොටසක් නොවන බවත් ඒවා ආගම ලෙස සලකමින් වැළඳ නොගත යුතු බවත් ඔවුහු කීහ. එමෙන්ම මුස්ලිම් ජනවර්ගය පිළිබඳව අනෙකුත් ජනවර්ගවල සහෝදර ජනතාවගේ විවේචනයන් දෙස විවෘතව බලා ඒ පිළිබඳව සංවාද ඇති කරගැනීමට බලාපොරොත්තු වෙන බවද ඔවුන්ගේ අදහස් පළකිරීම්වලදී කීය. එම සංවාදවලට එරෙහිව අදහස් පළකරන පුද්ගලයන් මුස්ලිම් ජනවර්ගයේම සිටින නමුත්, ඔවුන් සමඟ සාකච්ඡා කළ හැකි බවද වැඩිදුරටත් කීය.
ශ්‍රී ලංකා මුස්ලිම් කොංග්‍රසයේ නායක රවුෆ් හකීම්, මුස්ලිම් කවුන්සිලයේ සභාපති එන්.එම්. අමීන්, ජමෙයිතුල් උලමා සංවිධානයේ ඉහළ නිලධාරියෙකු ඇතුළු පිරිසක් අනිද්දා කළ විමසීම්වලදී මේ අදහස් පළ කළේය. ■