■ අනුරංග ජයසිංහ

මාස හයකින් පසු එජාප නායකත්වයට නව පුද්ගලයෙකු පත් කරගන්නා බව එම පක්ෂයේ කෘත්‍යාධිකාරී මණ්ඩලය පසුගිය ජනවාරි මාසයේදී එකඟ වූ නමුත් මැයි 31 වැනිදා පැවති කෘත්‍යාධිකාරී මණ්ඩල රැස්වීමේදී එජාප නායකත්වය වෙනස් කිරීම පිළිබඳ කිසිදු සාකච්ඡාවක් සිදු නොවූ බව එම පක්ෂයේ කෘත්‍යාධිකාරී මණ්ඩල සභිකයෙක් පැවසීය.

නායකත්ව වෙනසට අදාළ තීන්දුවට ජුනි මාසය අවසානයේ මාස හයක් සම්පූර්ණ වන නමුත් රනිල් වික්‍රමසිංහ මහතා ඉදිරියටත් පක්ෂ නායකත්වයේ තබාගැනීමට එකඟතාවක් පවතින නිසා නායකත්වය පිළිබඳ සාකච්ඡාවක් සිදු නොවූ බව වැඩිදුරටත් පැහැදිලි කරමින් එම සාමාජිකයා කීය. කෙසේ වෙතත් සමගි ජන බලවේගයට එකතු වූ පුද්ගලයන් නිසා පුරප්පාඩු වූ තනතුරු පිළිබඳ සාකච්ඡා කළ බව ඔහු කීය.

එක්සත් ජාතික පක්ෂයේ ජාතික ලැයිස්තු මන්ත්‍රීධුරය රනිල් වික්‍රමසිංහ මහතා බාරගත යුතු බවට නැවත යෝජනාවක් ඉදිරිපත් වී ඇති අතර එයට ඒකමතිකව එකඟත්වයක් ලැබී ඇත.

වත්මන් ආණ්ඩුව දුර්වල නිසා විපක්ෂයේ සියලු පක්ෂ ඒකාබද්ධව ඉදිරි මැතිවරණවලදී ඉදිරිපත්විය යුතු බව සහ ඒ සඳහා සාකච්ඡා පැවැත්විය යුතු බව එහිදී සාකච්ඡා කර ඇතැයි එම නියෝජිතයා පැවසීය. පක්ෂයේ අභ්‍යන්තර කාරණාවලට අමතරව රටේ පවතින ආර්ථික තත්වය සහ වසංගත මර්දන තත්වය පිළිබඳ සාකච්ඡා කළ බවද ඔහු වැඩිදුරටත් කීය.

ආර්ථිකය ඉදිරියේදී තවත් දුර්වල වනු ඇතැයි පක්ෂ නායක රනිල් වික්‍රමසිංහ ප්‍රකාශ කර ඇති අතර කෙසේ වෙතත් ආර්ථිකයට වඩා මේ කාලසීමාවේ වසංගත මර්දන ක්‍රියාවලියට එරෙහිව එජාපය අදහස් දැක්වීම් කළ යුතු බව වික්‍රමසිංහ මහතා ප්‍රකාශ කර තිබේ.■