.

අපරාධ පරීක්ෂණ දෙපාර්තමේන්තුව පැමිණිලි 615 ක් සටහන් කරගෙන ඇත
පැමිණිලි අතරින් 468ක් දරුවන් හැදීමට උත්සාහ නොකළ අයයි
පැමිණිලි අතරින් දරුවන් හැදීමට උත්සාහගෙන ඇත්තේ 147ක් පමණය
ඒ සියලූදෙනා පැමිණිලි කිරීමට පැමිණ ඇත්තේ මාධ්‍ය වාර්තාවලින් පසුවය
2019 දී සිසේරියන් සැත්කමට මුහුණදුන් මව්වරුන් 95ක් ඒ අතර සිටියි
2018 දී සැත්කමට මුහුණදුන් මව්වරුන් 204ක් සිටියි

‘සැකකාර වෛද්‍ය සාෆි සම්බන්ධයෙන් 2019 05 23 දින දිවයින පුවත්පතේ ප‍්‍රධාන සිරස්තලය වන ‘සිසේරියන් සැත්කම්වලින් පසු තවුහිද් ජමාත් දොස්තර සිංහල බෞද්ධ මව්වරුන් 4000ක් වඳකරලා, සාක්ෂි සහිතව හෙළිවේ. දොස්තර අල්ලන්න පුළුල් පරීක්ෂණ‘ යටතේ පළවූ පුවත අනුව සැකකාර වෛද්‍ය සාෆි විසින් කුරුණෑගල රෝහලේ සිසේරියන් සැත්කම් කළ මව්වරුන් ඉහත පුවත සම්බන්ධ තොරතුරු දැනගැනීමෙන් අනතුරුව බියට පත්වී තමන්ට සිසේරියන් සැත්කම් කිරීමේදී පැලෝපීය නාලවලට යම් හානියක් සිදුකර තිබේද යන්න ඇතිවී තිබෙන සැකය මත, තව දරුවන් ලබාගැනීමට උත්සාහ කළද දරුවන් නොලැබීම හේතුවෙන් මේ වනවිට පැමිණිලි 615ක් වාර්තා වී ඇත. එම පැමිණිලිවලින් 468ක් පැමිණිලි කර ඇත්තේ ඉහත පුවතට බියට පත්වී, තමන්ගේ පැලෝපීය නාලවලට හානියක් සිදුවී තිබේද යන්න සැකය මත එම පැලෝපීය නාල පරීක්ෂා කරගැනීම සඳහාය. ඉතිරි 147 වාර්තා වී ඇත්තේ අදාල අවසන් සිසේරියන් සැත්කමෙන් පසු දරුවන් අපේක්ෂාවෙන් ඒ සඳහා කටයුතු කළද නමුත් දරුවන් නොලැබීම පිළිබඳවය.‘


කතාව ආරම්භ කරන්නට අප ඉහතින් උපුටා දැක්වුවේ කුරුණෑගල මහේස්ත‍්‍රාත් උසාවිය වෙත ජුනි 27 වැනිදා අපරාධ පරීක්ෂණ දෙපාර්තමේන්තුවේ සමූහ මංකොල්ල විමර්ශන අංශයේ ස්ථානාධිපති පොලිස් පරීක්ෂක ඒඩි‍්‍රයන් නිශාන්ත සිල්වා ඉදිරිපත් කළ බී 1398/ 19 අංකය දරන වාර්තාවෙහි ඇති කොටසකි. අප මේ සටහන ලියන්නේ මූලිකවම එම වාර්තාව මත පදනම් වෙමින්ය.

දිවයින කීවේ බොරු


දිවයින පුවත්පත වඳ සැත්කම් ගැන මුලින්ම පළ කළ පසුව පොලිස් මාධ්‍ය ප‍්‍රකාශක රුවන් ගුණසේකර එම ප‍්‍රවෘත්තිය ව්‍යාජ එකක් බව කීවේය. අනිද්දා පුවත්පත ඇතුළු කණ්ඩායම් කිහිපයක් එම පුවත ව්‍යාජ එකක් බව වාර්තා කළේය. සරලවම කීවොත්, ඒ පුවත පළකළ දිනය වෙද්දී ඒ පුවතේ කියන අන්දමේ පරීක්ෂණයක් සිදුවෙමින් තිබුණේ නැත. මව්වරුන් ඉදිරිපත්ව සිටියේ නැත. දිවයින පුවතේ තිබුණේ ‘සැකයක්‘ කියා හෝ, ‘ආරංචියක්‘ ගැන නොවේ. සාක්ෂි සහිතව කරුණු හෙළිවී, පොලීසිය පුළුල් පරීක්ෂණ මෙහෙයවන සිදුවීමක් ගැනය. එහෙත් ඉහත කී අපරාධ පරීක්ෂණ දෙපාර්තමේන්තුවේ වාර්තාවේ කරුණු සලකා බලද්දී ඉතා පැහැදිලිව හෙළිවන්නේ ‘සිංහල බෞද්ධ මව්වරුන්ගේ වඳ සැත්කම් 4000ක් කළ බවට සාක්ෂි සහිතව තහවුරු වූ, තවුහිද් ජමාත් සාමාජික වෛද්‍යවරයෙකු‘ ගැන මේ මොහොත වෙද්දීත් කිසිම කරුණක් හෙළිවී නැති බවයි. සරලවම කිවහොත් සීඅයිඞීය දිවයින පුවතෙන් ‘පසු‘ ආරම්භ කළ පරීක්ෂණවලින් පසුවත්, දිවයින පුවතේ තිබුණු එක කරුණක්වත් තවමත් තහවුරු වී නැත.


ඉහත කී වඳ සැත්කම් 4000ක් ගැන සාක්ෂි සහිත බවට දිවයින පුවත පළකර තිබුණේ වෛද්‍ය සාෆිගේ වත්කම් ගැන කුරුණෑගල දිසාව බාර නියෝජ්‍ය පොලිස්පති කිත්සිරි ජයලත්ගේ ඍජු මැදිහත්වීමෙන් ‘ප‍්‍රශ්න කිරීමක්‘ පමණක් සිදුකිරීමෙන් පසුවය. ඉහත කී වාර්තාවෙහි ඒ පිළිබඳව මෙසේ ඇත.
‘දැනට සටහන් කරගෙන ඇති ප‍්‍රකාශ අනුව මෙම සිරස්තලයට අදාල කරුණු කුරුණෑගල දිසාවේ නියෝජ්‍ය පොලිස්පති විසින් අදාල මාධ්‍යවේදියා වෙත මෙසේ ප‍්‍රකාශ කර ඇත. ‘වඳ සැත්කම් සිදුකර ඇති බවට කටකතා ඇති බවයි.‘ මෙම මාධ්‍යවේදී හේමන්ත රන්දුණු විසින් පළකර ඇති පුවත නිසි පරීක්ෂාවකින් තොරව පුවත්පතේ පළකර ඇති බවට සිදුකර ඇති විමර්ශනයේදී අනාවරණය විය.‘


වෛද්‍ය සාෆිට ‘තවුහිද් ජමාත් දොස්තර‘ යැයි දිවයින ලියා තිබුණේ දිවයිනට අයත් බුද්ධි ඒකකයකින් ලැබුණු තොරතුරක් මත විය යුතුය. මෙම සිදුවීමට අදාල බුද්ධි ඒකක කිසිවක් වෛද්‍ය සාෆි ගැන එවැනි බුද්ධි තොරතුරක් හෝ සැකයක් තබාගෙන සිට නැත. ඉහත කී පරීක්ෂණය වෙනුවෙන් අපරාධ පරීක්ෂණ දෙපාර්තමේන්තුව ආයතන ගණනාවකින් වෛද්‍ය සාෆි ගැන තොරතුරු ලබාගෙන ඇත. කුරුණෑගල පොලිස් ස්ථානය, පොලිස් විශේෂ කාර්ය බලකාය, රාජ්‍ය බුද්ධි සේවය, අපරාධ ලේඛනාගාරය, ත‍්‍රස්ත විමර්ශන අංශය, බස්නාහිර බුද්ධ කොට්ඨාසය, පොලිස් විශේෂ කාර්යාංශය, දඹුල්ල පොලිස් ස්ථානය, රාජ්‍ය බුද්ධි සේවය, නාවික හමුදා බුද්ධි අංශය, ගුවන් හමුදා බුද්ධි අංශය, යුද්ධ හමුදා බුද්ධි අංශය යන සියලූ අංශ එක් මූලික පිළිතුරක් ලබාදී ඇත. ඒ ත‍්‍රස්තවාදී ක‍්‍රියා සම්බන්ධයෙන් ඔහු පිළිබඳ තොරතුරු ලේඛනගත වී නොමැති බවය.


වෛද්‍ය සාෆි අත්අඩංගුවට ගැනීමේ අඩුපාඩු, දිවයින පුවතේ බොරුව, කිත්සිරි ජයලත්ගේ මැදිහත්වීම්, වෛද්‍ය සාෆිගේ වත්කම්, කුරුණෑගල රෝහල් කාර්යමණ්ඩලයේ ක‍්‍රියාකලාපය ආදි කාරණා රැුසක් ගැන අපරාධ පරීක්ෂණ දෙපාර්තමේන්තුවේ පරීක්ෂණ වාර්තාවෙන් හෙළිවන කරුණු බොහෝය. එහෙත් එම කරුණු සියල්ල අපට එකවර කියා නිමකළ නොහැක. ඉදිරි සතිවලදී අපි ඒ කාරණාවලට යොමුවීමට බලාපොරොත්තු වන්නෙමු. එයට පෙර වෛද්‍ය සාෆිට එල්ලවී ඇති චෝදනා ගැන වැදගත්ම කාරණය දෙසට අවධානය යොමු කරන්නෙමු.

මව්වරුන්ගේ පැමිණිලි


වෛද්‍ය සාෆිට එරෙහිව දිවයින සමාජගත කළ බොරුවට මහා වටිනාකමක් ලැබුණේ එක් හේතුවක් නිසාය. ඒ කුරුණෑගල හා දඹුල්ල රෝහල්වලට වෛද්‍ය සාෆිගෙන් සැත්කම් සිදුකළ මව්වරුන් සිය ගණන් පෝලිමේ පැමිණි නිසාය. මෙසේ පැමිණි මව්වරුන්ගේ පැමිණිලිවලින් වෛද්‍ය සාෆිට එල්ලවූ චෝදනාව සැබෑවක් බව සමාජගත කරන්නට දිවයින ප‍්‍රමුඛ මාධ්‍ය ආයතනත්, රතන හිමි ප‍්‍රමුඛ ජාතිවාදී බලවේගත් උත්සාහ කළේය. අපරාධ පරීක්ෂණ දෙපාර්තමේන්තුව එම මව්වරුන් 615කගේ පැමිණිලි සටහන් කරගෙන තිබුණි. ඉහත කී වාර්තාවට එම හැම පැමිණිල්ලකම සාරාංශ සඳහන් කර තිබුණි.
ඉදිරිපත්ව සිටින මවුවරුන් කෙබඳුද? ඔවුන්ගේ ප‍්‍රකාශ මොනවාද? ඒ මව්වරුන් අතර පැලෝපීය නාලය අවහිර වී ඇතැයි වෛද්‍ය පරීක්ෂණයකින් තහවුරු කරවාගත් මවුවරුන් කීදෙනෙක් සිටිත්ද? මෙවැනි කාරණා ගැන බොහෝදෙනෙකුට කුතුහලයක් ඇත. ඉදිරිපත් වූ බොහෝ මව්වරුන්ගේ පැමිණිලි එක සමානය. සියලූදෙනාම ඉදිරිපත්ව තිබුණේ මාධ්‍යවල වාර්තා පළවීමෙන් පසුවය. ඒ වාර්තා නිසා වෛද්‍ය සාෆි ගැන සැකයක් ඇති කරගනිමින්ය. ඊට පෙර පැමිණිලි කළ මව්වරුන් නැත.


අප පහත ඉදිරිපත් කරන්නේ මවුවරුන්ගේ පැමිණිලිවල ස්වභාවය තේරුම් ගත හැකි සාරාංශයකි. අප තැන් කිහිපයක අපරාධ පරීක්ෂණ දෙපාර්තමේන්තුවේ වාර්තාවෙහි සඳහන්වන ආකාරයටම පැමිණිලි සාරාංශ එලෙසින්ම උපුටා දැක්වුවෙමු. අපි මව්වරුන්ගේ සම්පූර්ණ නම් හෝ සම්පූර්ණ ලිපින සටහන් නොකරන්නෙමු. අපරාධ පරීක්ෂණ දෙපාර්තමේන්තු වාර්තාවෙහි සම්පූර්ණ නම් හා ලිපින සඳහන්ය. මෙම ප‍්‍රකාශවල සත්‍ය බව තහවුරු කළ යුතු නිසා, මවගේ නමෙන් කොටස් දෙකක් හා පදිංචි ප‍්‍රදේශය සඳහන් කරන්නෙමු.


අපරාධ පරීක්ෂණ දෙපාර්තමේන්තුවෙහි සඳහන් පැමිණිලි අතරින් 468ක් දරුවන් හැදීමට උත්සාහ නොකළ අයයි. ඔවුන් පැමිණ ඇත්තේ පුවත්පතේ පුවත දැකීමෙන් ඇතිවූ බිය නිසා පමණකි. අනෙක් 147 දෙනාද පැමිණ ඇත්තේ දිවයින පුවත දැකීමෙන් පසුවය. එහෙත් ඔවුන් දරුවන් හැදීමට උත්සාහ කොට දරුවන් නොමැති බව සිය පැමිණිලිවල සඳහන් කර ඇත.

දරුවන් හැදීමට උත්සාහ නොකළ


දරුවන් හැදීමට උත්සාහ නොකළ අය අතරින් පැමිණිලි 95ක් 2019 වර්ෂයේදී සිසේරියන් සැත්කමට ලක්වූ මව්වරුන්ය. එනම්, 95 දෙනෙකු දරුවන් ලබා ඇත්තේ මේ සිදුවීමට මාස 4ක් හෝ ඊට අඩු කාලයක් ඇතුළතය. 2019 දී ලබාදුන් පැමිණිලි සියල්ලේම සාරාංශය එකම ආකෘතියකින් යුක්තය. එක් උදාහරණයක් ගත හැකිය.


අලව්ව ප‍්‍රදේශයේ ලිපිනයක පදිංචිව සිටින නිරෝෂා සඳමාලි නමැති කාන්තාවගේ කටඋත්තරයෙහි සාරාංශයක් මෙසේය. ‘මෙම කාන්තාවගේ දෙවැනි දරුවා කුරුණෑගල රෝහලේදී 2019-04-30 වන දින වෛද්‍ය සාෆි විසින් සිසේරියන් සැත්කමකින් ලබාගෙන ඇති අතර සිසේරියන් සැත්කම් කරන අවස්ථාවේ වෛද්‍ය සාෆි විසින් කර ඇති බවට පුවත්පත්වල සඳහන් යම් දෙයක් තමන්ටත් කර ඇත්ද යන්නත් වෙනත් දරු උපතක් සිදු නොවේද යන්නත් පරීක්ෂා කරගැනීමට අවශ්‍ය බව කියමින් පැමිණිල්ලක් ලබාදී ඇත.‘ එම කාන්තාවට සිසේරියන් සැත්කම සිදුකොට මාසයක්වත් ගෙවීයෑමට මත්තෙන් දිවයින ප‍්‍රවෘත්තිය පළවී ඇති බව පෙනී යයි.


2019 අවුරුද්දේ මාස 4 ගැන අමතක කළත්, වැඩිම පැමිණිලි ප‍්‍රමාණයක් ලැබී තිබුණු සම්පූර්ණ වර්ෂය වන්නේ 2018 වර්ෂයයි. පැමිණිලි 204කි. ඒ අනුව මෙම පැමිණිලි ලැබීමේ රටාව සැකසී ඇත්තේ සිසේරියන් සැත්කමෙන් පසුව දරුවන් නැතිවීමේ අනුපාතයට නොව, මෑතකදී වෛද්‍ය සාෆිගෙන් සිසේරියන් සැත්කම් කළ මව්වරුන්ගේ අනුපාතයට බව පැහැදිලිය. පැමිණිලිවල ස්වභාවය තේරුම් ගැනීමට එය උදව්වකි.


2018 වර්ෂයේදී සිසේරියන් සැත්කමට මුහුණ දුන් මවක වන නෙල්ලිය ප‍්‍රදේශයේ ලිපිනයක් සහිත ඩිල්කි ප‍්‍රියන්වදාගේ පැමිණිල්ලෙහි සාරාංශය මෙසේ සටහන්ව ඇත. ‘මෙම කාන්තාවගේ පළමු දරුවා කුරුණෑගල රෝහලේදී 2018-09-15 වන දින වෛද්‍ය සාෆි විසින් සිසේරියන් සැත්කමකින් ලබාගෙන ඇති අතර සිසේරියන් සැත්කම් සිදුකරන අවස්ථාවේ වෛද්‍ය සාෆි විසින් සිදුකර ඇති බවට පුවත්පත්වල සඳහන් යම් දෙයක් තමන්ටත් සිදුකර ඇත්ද යන්නත් වෙනත් දරු උපතක් සිදු නොවේද යන්නත් පරීක්ෂා කරගැනීමට අවශ්‍ය බව කියමින් පැමිණිල්ලක් ලබාදී ඇත.‘


2017 වර්ෂයට අදාලව ඉහත වර්ගයේ පැමිණිලි 147 ක් ලැබී ඇත. එම පැමිණිලිවල සාරාංශයද අප 2019 හා 2018 වර්ෂවලට අදාලව ඉදිරිපත් කළ පැමිණිලි සාරාංශවලට බොහෝදුරට සමානය.


ඉන්පසුව 2016 හා 2015 වර්ෂවලට අදාලව පැමිණිලි ඉදිරිපත් වී නැත. එම කාලසීමාව ඇතුළත වෛද්‍ය සාෆි සිසේරියන් සැත්කම් සිදුකර නැති බව පෙනී යයි. එයට හේතු පැහැදිලි නැත. බොහෝවිට වෛද්‍යවරයා යම් කාලයක් දඹුල්ල හා ගලේවෙල රෝහල්වල සේවය කර ඇති නිසාත්, ඔහු පාර්ලිමේන්තු මැතිවරණයට ඉදිරිපත් වීමට සේවයෙන් ඉවත්ව සිටි නිසාත් එම වර්ෂවල කුරුණෑගලදී සිසේරියන් සැත්කම් කර නැතිවා විය යුතුය.


2014 වර්ෂයේ කළ සැත්කම්වලට අදාලව එක් පැමිණිල්ලක්, 2013 වර්ෂයේ කළ සැත්කම්වලට අදාලව පැමිණිලි 2ක්, 2012 වර්ෂයේ කළ සැත්කම්වලට අදාලව පැමිණිලි 3ක්, 2011 වර්ෂයේ කළ සැත්කම්වලට අදාලව පැමිණිලි 5ක්, 2010 වර්ෂයේ කළ සැත්කම්වලට අදාලව පැමිණිලි 3ක්, 2009 වර්ෂයේ කළ සැත්කම්වලට අදාලව පැමිණිලි 1ක්, 2008 වර්ෂයේ කළ සැත්කම්වලට අදාලව පැමිණිලි 1ක් මේ ආකාරයෙන් ඉදිරිපත්ව ඇත. එනම්, වෛද්‍ය සාෆිගෙන් සිසේරියන් සැත්කමකට මුහුණදී ඇතත්, දරුවන් හැදීමට උත්සාහ නොකළ මව්වරුන්ගේ කාණ්ඩයට ඉහත මව්වරුන් අයත්ය. ඔවුන් සියලූදෙනාගේම පාහේ කටඋත්තර ඉහතින් අප උපුටා දැක්වූ කටඋත්තරවලට බොහෝදුරට සමානය. සැත්කම සිදුකළ දිනය සඳහන් නොවූ පැමිණිලි 5ක් ඇත. ඒවායේද ස්වභාවය ඉහත කී ඒවාට සමානය. මාධ්‍යවල සඳහන් ප‍්‍රවෘත්ති නිසා ඔවුන් පැමිණ ඇත. ඔවුන් පැමිණි නිසා මාධ්‍යවල ප‍්‍රවෘත්ති පළවුණා නොවේ.

දරුවන් නොලද මව්වරුන්


පරිදි දරුවන් හැදීමට උත්සාහ කළද, දරුවන් නොලද බව පැමිණිල්ලේ සඳහන් කළ මවුවරුන් සංඛ්‍යාව 147කි. එම මවුවරුන් ඉදිරියේදී එස්එච්ජී නම් පරීක්ෂණයකට ඉදිරිපත් කළ යුතුය. කුරුණෑගල මහේස්ත‍්‍රාත් අධිකරණයේ නිරීක්ෂණය මත එම මව්වරුන් විශේෂ වෛද්‍ය මණ්ඩලයකින් එස්එච්ජී පරීක්ෂණයට ඉදිරිපත් කරනු ඇත. එම පරීක්ෂණයෙන් පසු, දරුවන් නැතිවීමට හේතු ගැන වැඩි තොරතුරු හෙළිවනු ඇත. එම මවුවරුන් අතරින් මවුවරුන් බහුතරයක් තමන්ට දරුවන් නැති බව මීට පෙර වෛද්‍ය පරීක්ෂණයකින් තහවුරු කරගත් අය නොවේ. වෛද්‍ය පරීක්ෂණයකට ඉදිරිපත් වූ අය ඉන්නේ ඉතා සුළුතරයකි.


මාලනී සම්පත් නම් මිනුවන්කැටේ ප‍්‍රදේශයේ කාන්තාවකගේ පැමිණිල්ලෙහි සාරාංශය මෙසේ සඳහන් කර ඇත. ‘මෙම කාන්තාවගේ පළමු දරුවා කුරුණෑගල රෝහලේදී 2011-07-31 වන දින සිසේරියන් සැත්කමකින් ලබාගෙන ඇති අතර නැවත දරුවෙක් හදන්න උත්සාහ කළද මේ වනතෙක් දරුවෙක් නොමැති බවත් සිසේරියන් සැත්කම සිදුකරන අවස්ථාවේදී වෛද්‍ය සාෆි විසින් සිදුකර ඇති බවට පුවත්පත්වල සඳහන් යම් දෙයක් තමන්ටත් සිදුකර ඇත්ද යන්නත් මෙමගින් දරුවන් නොමැතිව ඇත්ද යන්නත් වෙනත් දරු උපතක් සිදු නොවෙයිද යන්නත් පරීක්ෂා කරගැනීමට අවශ්‍ය බව පැමිණිල්ලක් ලබාදී ඇත.‘
ඉහත කී ආකෘතියේම පැමිණිලි දින වකවානු පමණක් වෙනස්ව ඉදිරිපත්ව ඇති අවස්ථා ගණන මෙසේය. 2018 වර්ෂයේ 06ක්, 2017 වර්ෂයේ 36ක්, 2014 වර්ෂයේ 01 ක්, 2013 වර්ෂයේ 04ක්, 2012 වර්ෂයේ 22ක්, 2011 වර්ෂයේ 13ක්, 2010 වර්ෂයේ 14ක්, 2009 වර්ෂයේ 16ක්, 2008 වර්ෂයේ 06ක්, 2007 වර්ෂයේ 02ක්, 2006 වර්ෂයේ 02ක්, 2005 වර්ෂයේ 01ක් වශයෙන් ඉදිරිපත්ව ඇත.
එම පැමිණිලිවල ලක්ෂණය වන්නේ මව්වරුන් තමන්ට දරුවන් නැතිවීමට හේතුව පිළිබඳ වෛද්‍ය පරීක්ෂණයකට මුහුණදී නොතිබීමය. තමන් දරුවන් හැදීමට උත්සාහ කළද, දරුවන් නැති බව පමණක් ඒ මව්වරුන් කියා ඇත. ඉහත කී ලෙස තමන්ට දරුවන් නැති බව කියන මව්වරුන් අතරින් ඉහත වර්ගයේ පැමිණිලි ලබාදුන් මව්වරුන් සංඛ්‍යාව 123කි.

වෙනස් පැමිණිලි


ඉහත කී පැමිණිලි සියල්ලම පාහේ එකම ආකෘතියක පැමිණිලිය. ඔවුන් වෛද්‍ය සාෆිගෙන් සිසේරියන් සැත්කමක් සිදුකරවාගෙන ඇත. ඉන්පසුව දරුවන් නැතිවීම ගැන සැකයක් මත පැමිණිලි කර ඇත. ඉහත කී තත්වයන්ට වෙනස් ආකාරයේ පැමිණිලි ඇත්තේ කිහිපයක් පමණි. ඒවා මෙබඳුය.

චමිලා ප‍්‍රියදර්ශනී නමැති බුලූවල ප‍්‍රදේශයේ ලිපිනයක් ඇති කාන්තාවකගේ පැමිණිල්ලෙන් පවසා ඇත්තේ 2010-01-17 දින සිසේරියන් සැත්කමක් සිදුකළ බවත්, ඉන්පසුව 2012 වර්ෂයේ සිට දරුවකු හදන්නට උත්සාහ කළත් දරුවන් නැති බවයි. පසුව වෛද්‍ය පරීක්ෂනයකට ඇය මුහුණදී ඇත. ඇයට දැනුම් දී ඇත්තේ පැලෝපීය නාලයේ අවහිරයක් ඇති බවයි. ඒ අනුව ප‍්‍රතිකාර ලබාගෙන දරුවෙක් ලබන්න අවස්ථා දෙකකදී උත්සාහ කළත්, දරුවන් නැතිවූ බව ඒ මව ප‍්‍රකාශ කරන්නීය. කෙසේවෙතත් ඇය මීට පෙර වෛද්‍ය සාෆි ගැන සැක කරමින් පැමිණිල්ලක් සිදුකර නැත. ඇගේ පැලෝපීය නාලය අවහිර වීමට හේතුවත් හෙළිවී නැත.


තාරුකා ෂෙරීන් නම් කුරුණෑගල පදිංචි මවක ලබාදුන් පැමිණිල්ලකින් පවසා ඇත්තේ කුරුණෑගල රෝහලේ පේසල නම් වෛද්‍යවරයෙකුගේ නියමය පරිදි තමන් ගබ්සා සැත්කමකට 2017-06-10 දින මුහුණදුන් බවයි. ගබ්සා සැත්කම වෛද්‍ය සාෆි සිදුකළ බවත්, ඉන්පසුව දරුවන් ලැබීමට උත්සාහ කළත් දරුඵල නොලැබුණු බවත් ඇගේ පැමිණිල්ලෙහි සඳහන්ය.


නිසංසලා උදුගොඩ නම් කැකිරාව ප‍්‍රදේශයේ ලිපිනයක පදිංචි කාන්තාවක පැමිණිලි කර තිබුණේ 2010 පෙබරවාරි 16 වැනිදා තමන්ගේ ගර්භාෂයේ වෛද්‍ය සාෆි සැත්කමක් කළ පසුව දරුවන් නොමැති බවයි.
ආශා ලක්මාලි නමැති ගලේවෙල පදිංචි කාන්තාවක ඉදිරිපත් කර තිබුණු පැමිණිල්ලක සඳහන්ව ඇත්තේ වෛද්‍ය සාෆි ගර්භාෂයේ තිබුණු ගෙඩියක් ඉවත් කිරීම සඳහා සැත්කමක් කළ බවත්, ඉන්පසුව නැවත දරුවන් නොලද බවත්ය.


සමුද්‍රා ගයානි නම් බංඩාර කොස්වත්ත ප‍්‍රදේශයේ පදිංචි කාන්තාවක පැමිණිල්ලෙහි සඳහන් කර තිබුණේ තම දෙවැනි දරුවාව 2017-10-26 වැනිදා සිසේරියන් සැත්කමකින් ලබාගත් බවත්, සැත්කමෙන් පසුව ගෝස් කැබැල්ලක් ඉතිරි කළ උදරය මසා තිබුණු බවත්ය. එහෙත් එම සිදුවීමට අදාලව කුරුණෑගල රෝහලේ කාර්ය මණ්ඩලයේ සාක්ෂිවල සඳහන්ව ඇත්තේ මෙය ගෝස් කැබලි ඉතිරි කර මැසීමක් නොව, සුදු රුධිරාණු සහිත රුධිර කැටිතිවල සුදු පැහැය නිසා ගෝස් කැබලි යැයි වරදවා වටහාගැනීමක් සිදුව ඇති බවය.
තවත් වෙනස් ආකාරයක පැමිණිල්ලක් වන්නේ ගර්භාෂයෙන් පිටත වැඩුණු දරුවෙකු සැත්කමකින් ඉවත් කිරීමෙන් පසුව දරුවන් නොමැති බව කියමින් පැමිණිලි කළ ඉදුල්ගොඩ පදිංචි සකුන්තලා කුමාරිහාමි නම් කාන්තාව සිදුකළ පැමිණිල්ලයි.


පුෂ්පමාලා රණතුංග නම් වේවැල්පොල පදිංචි කාන්තාවක් 2011-02-27 සිදුකළ සිසේරියන් සැත්කමක් සිදුකිරීමෙන් පසුව රෝගී තත්වයක් නිසා දරුවන් නොලැබුණු බවට පැමිණිලි කර ඇත.
පහළ වල්පොල පදිංචි කමනි ශ‍්‍රියාලතා නම් කාන්තාව 2008-07-09 වැනිදා සිදුකළ සිසේරියන් සැත්කමකින් පසු දරුවන් නොමැති වීම පිළිබඳ පරීක්ෂා කරද්දී, පැලෝපීය නාලය ඉදිමී විකෘති වී ඇති බව වෛද්‍යවරුන් දැනුම් දී තිබුණි.
මොරින් මල්කාන්ති නම් පාදෙනිය ප‍්‍රදේශයේ පදිංචි කාන්තාව පැමිණිලි කර තිබුණි. ඇයට දරුවන් නොමැති අතර ගර්භාෂයේ තිබුණු ගැටිති ඉවත් කිරීම සඳහා 2008-10-30 සැත්කමක් සිදුකර ඇත. එම සැත්කම සිදුකළ වෛද්‍යවරුන් අතරින් එක් අයෙකු වන්නේ වෛද්‍ය සාෆිය.


චන්ද්‍රලතා දිසානායක නම් කෝන්වැව පදිංචි කාන්තාව 2007-09-13 වැනිදා වෛද්‍ය සාෆිගෙන් සිසේරියන් සැත්කමක් සිදුකරගෙන ඇති බවත්, පසුකාලීනව ඇතිවූ බඬේ වේදනාවක් ගැන පරීක්ෂණයට ඉදිරිපත්වීමෙන් පසුව පැලෝපීය නාලයේ ලේ ගැටිත්තක් ඇති බව දැනගැනීමට ලැබුණු බවත් පැමිණිලි කර ඇත.


මංජුලා මධුෂානි නම් වාරියපොල ලිපිනයක පදිංචි කාන්තාව පැමිණිලි කර ඇත්තේ 2018-01-29 වැනිදා වෛද්‍ය සාෆි ඩිම්බකෝෂවල ගෙඩියක් සැත්කමකින් ඉවත්කළ බවත් ඉන්පසුව දරුවන් නොලද බවත් සඳහන් කරමින්ය.


නදීකා පුෂ්පකුමාරි නම් මැල්සිරිපුර පදිංචි කාන්තාවකගේ පැමිණිල්ලකට අනුව ඇය 2008-02-29 දින සිසේරියන් සැත්කමකට මුහුණදී ඇත. ඇය වසර 11කට පසුව දෙවැනි වර පිළිසිඳගෙන ඇත. එහෙත් පැලෝපීය නාලය ගර්භාෂය ඇතුළත තිබීම නිසා කලලය ඉවත් කර ඇත.
වාරියපොල පදිංචි නදීකා නිලන්ති නම් කාන්තාවක පැමිණිලි කර තිබුණේ 2013-01-02 වැනිදා සිසේරියන් සැත්කමක් සිදුකර ඇත. වෛද්‍ය සාෆි ඇගෙන් එල් ආර්.ටී. සැත්කමක් සිදුකරන්නේදැයි විමසා ඇති බවය. ඇගේ පැමිණිල්ලෙහි ඇය සඳහන් කරන්නේ ඇය ඒ මොහොතේ එයට අකැමති වූ බවත්, වෛද්‍ය සාෆි තමන්ට දැනුම් නොදී තමන්ට එල්ආර්ටී සැත්කමක් සිදුකර ඇති බවත්ය. කෙසේ වෙතත් ඇයට එල්ආර්ටී සැත්කමක් සිදුකළාදැයි තවම තහවුරු වී නැත. බලහත්කාරයෙන් තමන්ට එල්ආර්ටී සැත්කමක් කළ බව හෝ එල්ආර්ටී සැත්කමක් කිරීමට උත්සාහ ගත් බව කියමින් පැමිණිලි කිහිපයක් ලැබී තිබුණි.

කෙසේ වෙතත් මෙම පැමිණිලි ගැන පුදුම විය යුතු නැත. ප‍්‍රසව හා නාරි වෛද්‍යවරුන් මවගේ සෞඛ්‍ය තත්වය සලකා බලමින්, හදිසි අවශ්‍යතා මත එල්ආර්ටී සැත්කම් කිරීමට තීන්දු ගැනීම සාමාන්‍ය තත්වයකි. මෙම කියන පැමිණිලිවලදී ඊට වෙනස් තත්වයක් ඇතිවී තිබේදැයි ඉදිරියේදී හෙළිවනු ඇත.
එස්.එච්.ජී. නම් පරීක්ෂණයට මෙම කාන්තාවන් යොමු කළ යුතුය. ඉදිරියේදී කුරුණෑගල මහේස්ත‍්‍රාත් අධිකරණය නම් කර ඇති පරීක්ෂණ මණ්ඩලයකින් එම පරීක්ෂණය සිදු කිරීමට නියමිතය. එම පරීක්ෂණයෙන් කරන්නේ කාන්තාවගේ යෝනි මාර්ගය දිගේ දියරයක් යවා, එම කාන්තාවගේ පැලෝපීය නාලය අවහිර කර ඇතිදැයි සොයා බැලීමය. වෛද්‍ය සාෆිට එරෙහි චෝදනාවල සම්පූර්ණ ඇත්ත නැත්ත සියයට සියයක් තහවුරු කරගත හැක්කේ එම පරීක්ෂාවෙන් පසුවය. එහෙත් දැනට ඉදිරිපත්ව සිටින කාන්තාවන්ගේ ප‍්‍රකාශ සලකා බලද්දී, මෙම පරීක්ෂණයේ අගමුල ගැන මනා වැටහීමක් ලබාගත හැකිය. අනෙක් අතට ඈත වර්ෂවල පැමිණිලි අඩු වීමත්, මෑත වර්ෂවල පැමිණිලි වැඩිවීමත් තුළින් වෛද්‍ය සාෆිගෙන් සැත්කම කරගැනීමෙන් පසු දරුවන් ලැබූ මව්වරුන්ද සිටින බව අනුමාන කළ හැකිය. ඇත්තෙන්ම එවැනි මව්වරුන් අප සමඟ කතාබහ කර ඇත. වෛද්‍ය සාෆිගේ කතාව මෙතැනින් අවසන් කළ නොහැකිය. රටම කැළඹූ ඒ කතාවට පැති ගණනාවක් ඇත. කුරුණෑගල රෝහලේ නිලධාරීන්ගේ ප‍්‍රකාශවලින් හෙළිවන කරුණු පුදුමාකාරය. වෛද්‍ය සාෆිට එරෙහි පරීක්ෂණ ක‍්‍රියාත්මක වූ ආකාරය කතාකිරීමට වටී. වෛද්‍යවරයාවේ දේපළ ගැන කතාවත් කිව යුතුය. ඉදිරි සතිවලදී අපි ඒවා ගැන කතාකරන්නෙමු.x