මධ්‍යම අධිවේගී මාර්ගයේ පළමු කොටසේ ඉදිකිරීමේ කටයුතු චීනයට හිතවත් රාජපක්‍ෂ පාලනයක් ශ්‍රී ලංකාව තුළ ස්ථාපිත නොවීම නිසා මේ වනවිට ඇනහිට ඇතැයි වාර්තාවේ.
කඩවත සිට මීරිගම දක්වා වූ මධ්‍යම අධිවේගී මාර්ගයේ පළමු කොටසේ දුර කිලෝමීටර් 37.1ක් වන අතර ඒ සඳහා ඇස්තමේන්තු ගතකර ඇති මුදල රුපියල් බිලියන 158කි. එම මුදල චීනයේ එක්සිම් බැංකුව විසින් ලබාදීමට නියමිත අතර ඉදිකිරීම් සමාගම ලෙස කටයුතු කරන්නේ චීනයේ එම්සීසී සමාගම හෙවත් මෙට්රෝලොජිකල් කෝපරේෂන් ඔෆ් චයිනා ලිමිටඩ් ආයතනය.
මෙම ඉදිකිරීම් සමාගමේ දේශීය නියෝජිතයා වශයෙන් කටයුතු කරන්නේ මහින්ද රාජපක්‍ෂගේ ව්‍යාපාරික හිතවතෙකු වශයෙන් ප්‍රසිද්ධ ප්‍රභාත් නානායක්කාරය. ඔහුට අයත් ඇසට් ඉංජිනියරින් සමාගම දේශීය කොන්ත්‍රාත්කරු වශයෙන් කටයුතුකරයි.
යහපාලන ආණ්ඩුව බලයට පත්වී මෙන් පසුව මෙම ව්‍යාපෘතිය සඳහා අවබෝධතා ගිවිසුමක් අත්සන් කර ඇතත් ණය මුදල සම්බන්ධ ගිවිසුමකට තවමත් අත්සන් කර නැත. එසේ වුවද සෙමින් වුවත් ව්‍යාපෘතියේ ඉදිකිරීම් කටයුතු පසුගිය කාලයේ සිදුකර ඇත.
එහෙත් පසුගිය අර්බුදකාරී වාතාවරණයෙන් මහින්ද රාජපක්‍ෂ පරාජය වීමෙන් පසු ව්‍යාපෘතියේ කටයුතු නවතා දමා ඇත.
එහෙත් මෙම ව්‍යාපෘතියට සම්බන්ධ චීන ජාතිකයන් නවාතැන් ගැනීම සඳහා පිහිනුම් තටාක, පැසිපන්දු පිටි ඇතුළු සියලු‍ පසුකම්වලින් සමන්විත නිවාස සංකීර්ණයක් වේයන්ගොඩ ප්‍රදේශයේ ඉදිකර ඇති අතර චීන ජාතිකයෝ එහි පදිංචි වී සිටිති.
මේ සම්බන්ධයෙන් අනිද්දා මාර්ග සංවර්ධන අධිකාරියේ අධ්‍යක්‍ෂ ජෙනරාල් කමල් අමරවීරගෙන් කළ විමසීමකදී ඔහු පැවසුවේ ව්‍යාපෘතියේ අවබෝධතා ගිවිසුම අත්සන් කර ඇතත් ණය ගිවිසුම තවම අත්සන් කර නොමැති බවයි. ඒ නිසා මුදල් නොමැති බවත් වැඩ අඩාල වී ඇති බවත් ඔහු පැවසීය.
එම ව්‍යාපෘතියේ නියෝජ්‍ය අධ්‍යක්‍ෂ දහනායක මහතාගෙන් කළ විමසීමකදී ඔහු පැවසුවේ ණය ගිවිසුම් අත්සන් නොකළද චීන එම්සීසී සමාගම ව්‍යාපෘතියේ යම් වැඩ කොටසක් පසුගිය කාලයේ සිදු කළ බවය.

ලසන්ත රුහුණගේ / ධම්මික ප්‍රියදර්ශන