රාජපක්ෂ පවුල ගෝඨාභය රාජපක්ෂ පොදුජන පෙරමුණේ ජනාධිපති අපේක්ෂකයා ලෙස තෝරාගෙන තිබුණත්, මහින්ද රාජපක්ෂ එය නිල වශයෙන් ප‍්‍රකාශ නොකිරීම නිසා එම පෙරමුණ තුළ විශාල ගැටුමක් නිර්මාණය වී ඇතැයි දැනගන්නට ලැබේ.

මහින්ද රාජපක්ෂගේ මෙම වැනෙන ප‍්‍රතිපත්තිය නිසා එම පෙරමුණේ ප‍්‍රධානීන්ගෙන් කොටසක් තමන් සහභාගි වන ජනහමුවලදී ඉදිරි ජනාධිපතිවරණය සඳහා තම පෙරමුණ ගෝඨාභය රාජපක්ෂ ඉදිරිපත් කරන බව ප‍්‍රකාශ කරන බවද තවත් කණ්ඩායමක් ඒ සඳහා චමල් රාජපක්ෂ ඉදිරිපත් කරන බවද පැවසීම නිසා මෙම ගැටුම නිර්මාණය වී ඇත.

එම පක්ෂයේ ප‍්‍රබලයෙකු අනිද්දා වෙත ප‍්‍රකාශයක් කරමින් කීවේ මහින්ද රාජපක්ෂ ගෝඨාභයට අකමැති වුවත් ඔහුට ගෝඨාභය නම්කරන්නට සිදුවී තිබෙන බවය. එම නොකමැත්ත නිසා ඔහු මේ සම්බන්ධයෙන් වැනෙනසුලූ ප‍්‍රතිපත්තියක් අනුගමනය කරන බවය.

මේ පිළිබඳව අදහස් දක්වමින් හිටපු අමාත්‍ය ජෝන් සෙනෙවිරත්න ප‍්‍රකාශ කළේ, මහින්ද රාජපක්ෂ තම පාර්ශ්වයේ අපේක්ෂකයා කවුරුන්දැයි නිල වශයෙන් නොකියා සිටීම විශාල අවුලක් නිර්මාණය කරන බවය. එම තත්ත්වය තුළ පක්ෂයේ සමාජිකයන් මෙන්ම ආධාරකරුවන්ද අසීරුතාවට පත්වී ඇති බවය. මේ අවස්ථාවේ ජනපති අපේක්ෂකයා කවුරුන්දැයි නිවැරදිව ප‍්‍රකාශ කිරීම හොඳ බව ඔහු කීය.

මාර්තු 23 වෙනිදා විපක්ෂ නායක කාර්යාලයේදී මහින්ද රාජපක්ෂ හා ගෝඨාභය රාජපක්ෂගේ ප‍්‍රධානත්වයෙන් පැවති සාකච්ඡුාවක්

අවසානයේ එම ස්ථානයෙන් පිටව යන මහින්ද රාජපක්ෂ, අපේක්ෂකයා ගෝඨාභය බවට තීරණය කළා නේදැයි මාධ්‍ය නගන ප‍්‍රශ්නයකට කෝපයෙන් පිළිතුරු දෙමින් ප‍්‍රකාශ කර ඇත්තේ තම පවුලේ සාමාජිකයන්ට උපන්දිනයකටවත් හමුවීමට නොහැකීවි ඇති බවයි. එම අවස්ථාවේ තරග කරන්න සූදානම් දැයි ගෝඨාභය රාජපක්ෂගෙන් මාධ්‍ය විමසා සිටින අතර ඔහු උපහාසයෙන් සිනාසෙමින් ප‍්‍රකාශ කර ඇත්තේ ඔව් සූදානම් කියා ය.