ශී‍්‍රලනිප පාර්ලිමේන්තු මන්ත‍්‍රී ඩිලාන් පෙරේරා

 

ඔබ නියෝජනය කරන කණ්ඩායමේ ප‍්‍රබල මන්ත‍්‍රීවරුන් කිහිපදෙනෙක්ව ආසන සංවිධායක ධූරවලින් ඉවත් කළා…
ඒක ගම්වල හිටපු නිදහස් පාක්ෂිකයන්ගෙ පැත්තෙන් ඔවුන්ට කරපු උදව්වක්. ඔවුන්ව අස් කළේ ආසන බලමණ්ඩල හැදුවෙ නැහැ කියලා. මේ අයින් කරපු අය ආසන බලමණ්ඩල හැදුවෙ නැත්තෙ පක්ෂය සන්ධානයෙන් ඉවත්වනතුරු බල මණ්ඩල හදන්න බැහැ කියලයි. අපි කිහිපදෙනෙක් ආසන බලමණ්ඩල හැදුවා. හැබැයි අපේ කොන්දේසිය වුණෙත් අපි බලමණ්ඩල හදනවා. ඒත් ආණ්ඩුවෙන් ඉවත් වෙන්න කියලා. මෙවරත් ශ‍්‍රීලනිපය තේරුම් නොගත්ත කාරණයක් තියෙනවා. මේගොල්ලන් බලමණ්ඩල හැදුවෙ නැත්තෙ ආණ්ඩුවෙන් ඉවත්විය යුතු නිසා. ගමේ ශ‍්‍රීලනිප පාක්ෂිකයො මෙයාලාව දකින්නෙ විරයො විදියට. අදත් ශ‍්‍රීලනිපයෙ බහුතර මතය වෙනුවෙන් ඉන්න අයව ඉවත් කළා.

ඒත් ඔවුන් පක්ෂයේ මතයට විරුද්ධව කටයුතු කරලා තියෙනවා නේද?
එයාලා පෙනී හිටියෙ පක්ෂයෙ මතය වෙනුවෙන්. පක්ෂයෙ සමස්ථ ලංකා කාරක සභාව කියන්නෙ පක්ෂයෙ වැඩිම පිරිසක් සහභාගී වන පක්ෂයෙ තීරණ ගන්නා සභාව. ඒකෙදි ජනාධිපතිවරයා පක්ෂයේ නායකයා විදියට කිව්වා පළාත් පාලන මැතිවරණ ප‍්‍රතිඵලයෙන් කියැවුණේ අපි වහාම ආණ්ඩුවෙන් අයින් වෙන්න ඕනෑ බව. දහසයක් ගියා. අනෙක් අය කවදාද කරන්නෙ කියලා ජනාධිපතිතුමා ඇහුවා. ඒ අය පෙනි හිටියෙ පක්ෂයේ බහුතරය සහ සභාපතිවරයා සමස්ථ ලංකා කාරක සභාවේදි ප‍්‍රකාශ කළ මතය වෙනුවෙන්. මේක බහුතරය නියෝජනය කරන අයව සුළුතරය විසින් ඉවත් කිරිමක්. මේක අමනෝඥ අ¥රදර්ශී තීන්දුවක්. කොහොම වෙතත් පක්ෂයේ බහුතරය සහ අපි එළියට යන දිනය ඈතක නැහැ.

ශ‍්‍රීලනිපය ආණ්ඩුවෙන් ඉවත්වීම වළක්වන්නේ කිහිපදෙනෙක් විසින් බව නිතර චෝදනා නැෙඟනවා..
ඒක ඇත්ත. පක්ෂයේ ලේකම් අමරවිර කතාකරද්දී මට ඇහෙන්නේම සමරවීරගේ හඬ. සමරවීරලා විසින් මෙහෙයවන ඉත්තෝ, ගැත්තෝ, රූකඩ බවට අමරවීරලා පත්වෙලා. අමරවීර කියන්නෙ රාජපක්ෂලාගේ සෙවණේ හැදුණු චරිතයක්. අපි හැදුණෙ රාජපක්ෂලා ළඟ නෙවෙයි. බණ්ඩාරණායකලා ළඟ. මම චන්ද්‍රිකා ළඟ හැදුණු කෙනෙක්. කොහොම වුණත් දැන් අමරවිරලාව සමරවිරලා විසින් ඩැහැගෙන.

දැන් ශ‍්‍රීලනිප කාර්යාලයට, චන්ද්‍රිකා වැනි හිටපු නායිකාවන්ට හූ කියන තැනට ශ‍්‍රීලනිප පාක්ෂිකයන් පත්වෙලා තියෙනවා නේද?
මම අනුමත කරන්නෙ නැහැ හූ කීම. එතුමිය අපේ පක්ෂයේ හිටපු නායිකාව. පක්ෂයේ නිර්මාතෘවරයාගෙ දුව. හිටපු ජනාධිපතිතුමියක්. මම හූ කීම හෙළා දකිනවා. ඒත් ඒ හරහා එළිවෙන්නෙ ආණ්ඩුවෙන් පක්ෂය ඉවත් නොවීම නිසා නැගෙන විරෝධය. දැන් ඒ විරෝධය වෛරයක් බවට පත්වෙමින් තියෙනවා. ඒක වර්ධනය වෙන්න නොදි ශ‍්‍රීලනිපය ආණ්ඩුවෙන් එළියට එන්න ඕන. මහින්ද රාජපක්ෂ මහත්තයාව අගමැති කරන්න අකමැති නම් අඩු තරමේ එජාපයට ආණ්ඩුව කරගෙන යන්න ඉඩ දෙන්න ඕන. එහෙම වුණොත් ශ‍්‍රිලනිපය ශක්තිමත් කරගන්න පුලූ‍වන්. ඉතින් හූ කීමට අකැමති වුණත් ඒක අපට පාඩමක්. සිරිකොතේ වළං හෝදන එක, සිරිකොතේ සනීපාරක්ෂක කම්කරුවන් හැටියට ශ‍්‍රීලනිප නායකයන් කටයුතු කරන එක දැන් නවත්වන්න. මම කියන්නෙ නැහැ සිරිකොතෙන් නියෝග ගන්න එක නවත්වලා නෙළුම් මාවතෙන් නියෝග ගන්න කියලා. සිරිකොතෙන්වත්, නෙළුම් මාවතෙන්වත් නියෝග එපා. ඩාලි පාර නියෝග දෙන තැනක් බවට පත් කරන්න.

ජනාධිපති මෛත‍්‍රීපාල සිරිසේන මහතා ආණ්ඩුවෙන් ඉවත්වීමට කැමතියි කියලා ඔබ විශ්වාස කරනවාද?
ජනාධිපතිතුමා හිතන දේ ගැන මම දන්නෙ නැහැ. හැබැයි මම කලින් කීවා වගේ ජනාධිපතිතුමා මේ මාතෘකාව ගැන විවෘතව කරපු කතාව තමයි සමස්ථ ලංකා කාරක සභාවේදී කී කතාව. ඒකෙදී ඔහු කිව්වෙ ආණ්ඩුවෙන් අයින් වෙන්න කියලා. ඒකෙදී තමයි එජාප හිතවාදී හිටපු මහලේකම්වරයාව ඉවත් කරලා රෝහණ ලක්ෂ්මන් පියදාස මහත්තයාව පක්ෂයේ මහලේකම්වරයා විදියට පත් කළේ. මම හිතුවෙ ඒක පවා එජාපයෙන් ශ‍්‍රීලනිපය ගලවා දැමීම සඳහා ජනාධිපතිවරයාගේ කැමැත්ත ප‍්‍රකාශ කිරීමක් කියලා.

ඔබේ කණ්ඩායම ශ‍්‍රීලනිපය අත්හැරලා පොහොට්ටුවට යනවාද?
අපි හැමදාම ශ‍්‍රීලනිප සාමාජිකයන්. මම පොහොට්ටුවට ගිහින් නැහැ. අපි එක්ක ඉන්න කණ්ඩායම වගේම පාර්ලිමේන්තුවේ ඉන්න ඒකාබද්ධ විපක්ෂයේ මන්ත‍්‍රීවරුන් 70 ම පොහොට්ටුවේ සාමාජිකත්වයක් අරගෙන නැහැ. එහෙත් අපි පොහොට්ටුව මිත‍්‍ර බලවේගයක් විදියට සැලකිය යුතුයි. කොහොම වුණත් පොහොට්ටුවට මතවාදයක් හෝ අනන්‍යතාවයක් තියෙන බව පෙනෙන්නෙ නැහැ. ඔවුන් මහින්ද රාජපක්ෂ මහත්තයාට තියෙන ජනප‍්‍රියත්වය පාවිච්චි කරමින් තමයි පළාත් පාලන මැතිවරණය දින්නෙ. ඒකෙ වැරැද්දක් නැහැ. මොකද පක්ෂ ඡන්ද ඉල්ලන්නෙ දිනන්නනෙ. හැබැයි පක්ෂයක් වුණාම ප‍්‍රතිපත්තියක් තියෙන්න ඕනෑ. ඉතින් පොහොට්ටුව කියන පක්ෂය එක්ක නෙවෙයි අපි එකතුවුණේ. එජාප විරෝධී පොදු පක්ෂ ආණ්ඩු විරෝධී සන්ධානයක් ලෙස ගොඩනැඟීමේ අවශ්‍යතාවය මත තමයි ඒකාබද්ධ විපක්ෂය එක්ක එකතුවුණේ. ඒකට වාසුදේව නානායක්කාර මහතා තමයි මතවාදී නායකත්වය දුන්නෙ. ඉතින්, ඒ වේදිකාවට ශ‍්‍රීලනිපය ඇතුළුවෙන්න ඕන. ඒකට කිසි අමාරුවක් නැහැ.

මේක සමඟ ශ‍්‍රීලනිපය එකතුවිය යුත්තෙ මොන පදනමෙන්ද?
මම පෞද්ගලිකව විශ්වාස කරන්නෙ දැනට රටේ පුද්ගලයෙක් හැටියටම ජනප‍්‍රියම චරිතය තමයි මහින්ද රාජපක්ෂ මහතා. ඒකට එකඟ වුණත් නැතත් ඒක පිළිගන්න සිද්ධවෙනවා. ඉතින්, එජාපය පරාජය කිරීම සඳහා ඒ ජනප‍්‍රියත්වය පාවිච්චි කිරිමේ වැරැුද්දක් නැහැ. එහෙත් එහෙම ගොඩනැගෙන සන්ධානය සියළුම ජාති, ආගම්, කුල භේදයක් නැතිව ජනතාව එකතු කරගන්න පුලූ‍වන් වෙන්නෙ ශ‍්‍රීලනිපය එම කණ්ඩායමේ කටයුතු කිරීමෙන් පමණයි. එහෙම නැත්නම් වාසුදේව නානායක්කාර, ඩිව් ගුණසේකර වගේ නායකයන්ව එවැනි මහා ව්‍යාපාරයක අතරමං වෙනවා. මොකද මම පෞද්ගලිකව විමල් වීරවංශ, ගම්මන්පිළ වගේ අය සමග ජාතික ප‍්‍රශ්නය පැත්තෙන් පරස්පරතා තියෙනවා. ඒත් යූඇන්පීයට විරුද්ධව අපි එකතුවෙනවා. ඒත් මේ සන්ධානය එක ජාතියකට, ආගමකට සීමා නොවී පොදු ව්‍යාපාරයක් බවට පත් කරන්න පුලූ‍වන් වෙන්නෙ ශී‍්‍රලනිපය මේ සන්ධානයේ ක‍්‍රියාකාරිව නායකත්වය සහ දායකත්වය දුන්නොත් පමණයි. මේ සන්ධානය ජනප‍්‍රියයි. හැබැයි ඒක සුදු ජාතිවාදී, ආගම්වාදී තැනකට තල්ලූ‍ කරන්නෙ නැතිව රටේ අනාගතය තීන්දු කරන්නාවූ සංහිඳියාව පදනම් කරගත් ජන ව්‍යාපාරයක් බවට පත් කරන්න නම් ශ‍්‍රීලනිපය ඒ සන්ධානය තුළ ක‍්‍රියා කළ යුතුයි. මෛත‍්‍රීපාල සිරිසේන මැතිතුමාත් යූඇන්පි විරෝධී සන්ධානය තුළ හිටගැනිම හරහා ඒ සන්ධානය තුළ දැනට අඩුවක් සේ මට පෙනෙන දෙමළ හා මුස්ලිම් ජනතාව දිනාගැනීම කළ හැකිවෙනවා. මහින්ද රාජපක්ෂගේ ජනප‍්‍රියත්වය ජාතිවාදීන්ට අවභාවිත කරන්න දෙන්න බැහැ. එහෙම කරන්න දැන් අවස්ථාවක් තියෙනවා. ඒත් ශී‍්‍රලනිපය ආවොත් ඒ අවස්ථාව අඩු කරන්න පුලූ‍වන්. ඒක ශූන්‍ය කරලා දාන්න ඕනැ කියලයි මම හිතන්නෙ.

ආණ්ඩුවෙන් ඉවත්වීම සඳහා තව කෙටි කාලයක් පමණයි ඉතිරිවෙලා තියෙන්නෙ. ශ‍්‍රීලනිපය ඉදිරි කාලය තුළ තීන්දුවක් ගත යුතුයි නේද?
දේශපාලන ක‍්‍රියාකාරීන් හැටියට අපට කාලසීමා පිළිබඳ කාරණයේදි කිව හැකි දේවල් සහ කිව නොහැකි දේවල් තියෙනවා. ඉතින් කාලසීමා ගැන ප‍්‍රශ්නය මඟහරින්න අපි උත්සාහ කරනවා.

අයවැයේදි ආණ්ඩුව පෙරළන්න සැලසුම් කරමින් ඉන්නවා නේද?
ඒ අවස්ථාව ගැන සමහර අය කතාකරනවා. විවිධ අවස්ථා ගැන කතාකරනවා. ඒත් දේශපාලන සැලසුමක් කරද්දී අපි ප‍්‍රවේශම් වෙනවා විශ්වාසභංග යෝජනාවේදි කළ වරද නොකර ඉන්න. විශ්වාසභංග යෝජනාව සැලසුම් කරද්දී ඒ සැලසුම් අපි මාධ්‍ය එක්ක සාකච්ඡුා කළා. ඒ නිසා අපේම හිටපු ලේකම්වරු කේලම්වරු වෙලා අගමැතිවරයාව ආරක්ෂා කරගත්තා. ඒ නිසා අපි ඉදිරි සැලසුම් ගැන කාරණාව අපි අතර තියාගන්න බලාපොරොත්තු වෙනවා.

ඒකාබද්ධ පොදුජන පෙරමුණේ තියෙන රාජපක්ෂ පවුල්වාදය ගැන ඔබේ අදහස මොකක්ද?
මම පෞද්ගලිකව විශ්වාස කරනවා මහින්ද රාජපක්ෂ මැතිතුමා අගමැති වෙන්න ඕනෑ කියලා. එතුමාට ජනාධිපති වෙන්න බැරි නිසා. ඒ නිසා රාජපක්ෂ පවුලෙන් පිට කෙනෙක් ජනාධිපතිවරණයට ආවොත් හොඳයි කියලා මම හිතනවා. රාජපක්ෂලාගේ පවුල්වාදය නිසා 2015 දී රාජපක්ෂ ආණ්ඩුව පරාජය වුණා. එහෙත් දැන් බොහෝ අය රාජපක්ෂ කෙනෙක්ව ජනාධිපතිධූරයට යෝජනා කරනවා. ඒ විදියට ජනමතය කණපිට හැරුණෙ මේ ආණ්ඩුවේ වැඩ හින්දා. මේ ආණ්ඩුවේ වැරදි නිසා අපි එතැනට තල්ලූ‍වෙලා. යම් විදියකට මහින්ද රාජපක්ෂ මැතිතුමා ඊළඟ ජනාධිපතිවරණයට කලින් අගමැති වුණොත් ව්‍යවස්ථාවේ තියෙන කරුණු කාරණාවලට ගැලපෙන පුද්ගලයෙක්ව මේ බලවේගයේ බහුතර මතය මත තෝරාගත යුතුයි.