වාසුදේව

 

හින්දු පුවත්පත සමඟ සාකච්ඡුාවකදී තමන්ගේ සහෝදරයාට ජනාධිපතිවරණයට ඉදිරිපත් විය හැකියැයි කීමෙන් මහින්ද රාජපක්ෂ මහතා අදහස් කර ඇත්තේ පාර්ලිමේන්තු මන්ත‍්‍රී චමල් රාජපක්ෂ මහතා පිළිබඳවයැයි පෙනීයන බව ප‍්‍රජාතන්ත‍්‍රවාදී වාමාංශික පෙරමුණේ නායක වාසුදේව නානායක්කාර පැවසීය.

මහින්ද රාජපක්ෂ මහතාගේ අදහස් දැක්වීම අර්ථකථනය කරගත හැක්කේ ඒ ආකාරයට පමණක් බව ඔහු පැවසීය. දැනට දේශපාලනයේ නියුතු වන, ජනාධිපතිවරණයට ඉදිරිපත් වීමට සුදුසුකම් ඇති මහින්ද රාජපක්ෂ මහතාගේ එකම සහෝදරයා වන්නේ හිටපු කථානායක චමල් රාජපක්ෂ මහතා බවද ඔහු පෙන්වාදුන්නේය.

හින්දු පුවත්පත සමඟ සාකච්ඡාවේදී මාධ්‍යවේදීන් දෙදෙනා විසින් විමසා තිබුණේ මහින්ද රාජපක්ෂ මහතාගේ පවුලේ අයෙකු මීළඟ ජනාධිපතිවරණයට ඉදිරිපත් විය හැකිද යන්න පිළිබඳවය. එහිදී නාමල් රාජපක්ෂ මහතාගේ වයස් සීමාව හේතුවෙන් ඔහුට ජනාධිපතිවරණයට ඉදිරිපත් විය නොහැකි බවත්, සහෝදරයාට ඉදිරිපත් විය හැකි බවත් මහින්ද රාජපක්ෂ මහතා ප‍්‍රකාශ කර තිබුණි. කෙසේ වෙතත් ඉදිරිපත් වන අපේක්ෂකයා පිළිබඳව පක්ෂය විසින් තීරණයක් ගත යුතු බවද මහින්ද රාජපක්ෂ මහතා වැඩිදුරටත් කියා තිබුණි.

නාමල් රාජපක්ෂ මහතාට ඇති වයස් සීමාව මෙන්ම බැසිල් රාජපක්ෂ සහ ගෝඨාභය රාජපක්ෂ යන දෙදෙනාටද සීමා ඇතැයි වාසුදේව නානායක්කාර මහතා කීය. මගේ සහෝදරයා යන තනි පදය යෙදීමෙහි අර්ථය වන්නේ දේශපාලනයෙහි යෙදෙන තම සහෝදරයන් අතරින් සුදුසුකම් ඇති සහෝදරයා, මහින්ද රාජපක්ෂ මහතා අදහස් කර ඇති බව යැයි ඔහු පෙන්වාදුන්නේය.

බැසිල් රාජපක්ෂ සහ ගෝඨාභය රාජපක්ෂ යන දෙදෙනාගෙන් එක් අයෙකුවත් තවම අමෙරිකානු පුරවැසිභාවය ඉවත් කරගෙන නොමැති බවත් එසේ පුරවැසිභාවය ඉවත් කර නොගෙන ඔවුන් දෙදෙනා ජනාධිපතිවරණ අපේක්ෂකයන් බවට පත් කිරීම පිළිබඳව සලකා බැලීමවත් කළ නොහැකි බව වාසුදේව නානායක්කාර මහතා පෙන්වාදුන්නේය.