ජනාධිපති මෛත්‍රිපාල සිරිසේන විසින් අග්‍රමාත්‍යවරයා හිටපු ජනාධිපති මහින්ද රාජපක්ෂව අගමැතිවරයා ලෙස පත්කිරීම මෙරට ව්‍යයස්ථාව උල්ලංඝණය කරමින් සිදුකල නීති විරෝධී කටයුත්තක් බව නව සමසමාජ පක්ෂයේ නායක ආචාර්ය වික්‍රමබාහු කරුණාරත්න පවසයි.

එමෙන්ම ඔහු පෙන්වා දෙන්නේ ජනාධිපති වරයාට පාර්ලිමේන්තුවේ යම් මහජන නියොජිතයෙකු අග්‍රාමාත්‍ය ධූරයට පත්කරීමට සුදුසු යැයි සිතන්නේ නම්, ඔහු විසින් ඒ සම්බන්ධයෙන් අනුගමනය කලයුතු පියවර වන්නේ පාර්ලිමේන්තුවට යෝජනාවක් ඉදිරිපත් කර වැඩි ඡන්දයක් ලැබුවොත් එම පුද්ගලයා අගමැති ධූරයට පත්කිරීම  බවයි.

වික්‍රමබාහු කරුණාරත්න මහතා මෙසේද පැවසීය. ‘මම දකින්නේ මෙම තත්වය ඇතිවීමට හේතුව ජනාධිපතිවරයා ව්‍යවස්ථාව උල්ලංඝනය කරමින් සිදුකරන නින්දා සහගත හැසිරීමයි. මේ වෙනකොට මහින්ද රාජපක්ෂ සිදුකරමින් යන ඇමතිවරු පත්කිරීම් සහ ආයතන ප්‍රධානීන් පත්කරීම් යන සියල්ල ව්‍යවස්ථාවට පටහැනියි. නීතිය නොසලකා හරිමින් රට ඇතුලේ මේ නටන නාඩගම නිසා ලංකාව ජාත්‍යන්තර ප්‍රජාව තුල නීතිය නැති රටක් ලෙස ලේබල් වෙමින් පවතිනවා. එය ඉදිරියේදී ඉතාම බරපතල ලෙස බලපායි. ඒකට ජනාධිපති වරයා වගේම මහින්ද රාජපක්ෂත් වගකිව යුතුයි’

ධම්මික ප්‍රියදර්ශන