ශ‍්‍රීලනිප හා ඒකාබද්ධ විපක්ෂය එක්ව ඇතිකරගන්නට යන්නේයැයි කියන භාරකාර ආණ්ඩු කතාවත් සමග ඊට බියවී ඇති අග‍්‍රාමාත්‍ය රනිල් වික‍්‍රමසිංහ විසින් ජනාධිපතිවරයා සහ එක්සත් ජාතික පක්ෂය අතර ඇතිවී තිබෙන ගැටුම සමනය කරගැනීම සඳහා ජනාධිපති මෛත‍්‍රීපාල සිරිසේන සමඟ සාකච්ඡා කිරීමට අමාත්‍ය මංගල සමරවීර යවා ඇතැයි අනිද්දා වෙත වාර්තා වෙයි.

මෙම හමුව කොළඹ පැජට් පාරේ ජනාධිපති නිවසේදී සිදුවී ඇති අතර එහිදී මංගල සමරවීර ජනාධිපති මෛත‍්‍රීපාල සිරිසේනට ප‍්‍රකාශ කර ඇත්තේ මීළඟ ජනාධිපතිවරණයට එජාප ඉදිරිපත් කරන්නේ කවුරුන්දැයි යන්න පිළිබඳව අවසන් තීරණයකට පැමිණ නැති බවය. ඒ අනුව මෛත‍්‍රීපාල සිරිසේනටද පොදු අපේක්ෂකයා ලෙස ඉදිරිපත් විමේ හැකියාව විවරව තිබෙන බවය.

පොලිස්පති පූජිත් ජයසුන්දර සිය ධුරයෙන් ඉවත්වෙනවා නම් එයට විරෝධයක් එජාපය තුළ හෝ තමන් තුළ නැතැයි අග‍්‍රාමාත්‍යවරයා ප‍්‍රකාශ කළ බවද එම සාකච්ඡාවේදී අමාත්‍ය මංගල සමරවීර ජනාධිපතිවරයාට පවසා ඇතැයි දැනගන්න ලැබේ.

මංජු කස්තුරිආරච්චි