භාරකාර ආණ්ඩුවක් පිළිබඳ සාකච්ඡාව මෛත්‍රීපාල සිරිසේන ජනාධිපතිවරයාගෙන් යහපත් ප්‍රතිචාරයක් නොලැබීම හේතුවෙන් කල්ගොස් ඇතැයි වාර්තා වෙයි.

මෛත්‍රීපාල සිරිසේන ජනාධිපතුවරයාට හිතවත්  ශ්‍රීලනිප ප්‍රබලයෙකු මේ පිළිබඳව අනිද්දා සමඟ අදහස් දක්වමින් ප්‍රකාශ කළේ පාර්ලිමේන්තුවේ බලය දිනාගැනීමේ අපහසුව සහ ආණ්ඩුවේ වෙනත් පාර්ශ්වයන්ගේ බලපෑම නිසා භාරකාර ආණ්ඩුව පිළිබඳ සාකච්ඡා තාවකාලිකව කල් දැමීමට සිදුව ඇති බවයි.

රාජිත සේනාරත්න, මංගල සමරවීර වැනි ආණ්ඩුවේ ප්‍රබලයන් ශ්‍රීලනිපය ආණ්ඩුවෙන් ඉවත්වීමට එරෙහිව අදහස් ප්‍රකාශ කරමින් ජනාධිපතිවරයා සමඟ අදහස් දක්වා ඇත.

ඔක්තෝම්බර් 16  වැනිදා පැවති ශ්‍රීලනිප මධ්‍යම කාරක සභා රැස්වීමේදී ශ්‍රීලනිපයේ මන්ත්‍රීවරුන්  15 දෙනාගේ කණ්ඩායම විසින් ආණ්ඩුවෙන් ඉවත්වන ලෙස ඉල්ල එවා ඇති ලිපියක් මධ්‍යම කාරක සභාව වෙත සභාගත කිරීම පමණක් සිදුව ඇති බව එම ප්‍රබලයා කීය.

ඒකාබද්ධ විපක්ෂයේ පක්ෂ නායකයෙකු මේ පිළිබඳව අදහස් දක්වමින් ප්‍රකාශ කළේ මේ වනවිට ජනාධිපති මෛත්‍රීපාල සිරිසේන මහතාගේ පාර්ශ්වය සමඟ සාකච්ඡා තාවකාලිකව නතරවී ඇති බවයි. එසේ වුවද ආණ්ඩුවේ අභ්‍යන්තර අර්බුදය අවසන් වී නැති නිසා කල්ගත වි හෝ භාරකාර ආණ්ඩුවක් ඇති කරගැනීමේ අපේක්ෂාව අත්හැර දමා නැතැයි ඔහු කීය.