ලංකාව ක‍්‍රිකට් ටෙස්ට් වරම් ලද්දේ 1982 වසරේ ය. ඒ ජාත්‍යන්තර ක‍්‍රිකට් කවුසන්ලය හා දිගු කලක සිට කළ අයදුම් පත‍්‍ර ක‍්‍රියාවලියක ප‍්‍රතිඵලයක් ලෙස ය එම වරම අප ලද්දේ. ටෙස්ට් වරම් ලද තොස සමරනු වස් හාහාපුරා කියා ටෙස්ට් තරගයක් අප ක‍්‍රීඩා කළේ එංගලන්තය සමග ය. එහිදී අප කඩුලූ හතකින් පැරදුණි. එහෙත් එම වසරේ ම ක‍්‍රිකට් සම්බන්ධයෙන් රටේ පමණක් නොව ලොවේ ද වඩා අවධානයක් ලංකාව වෙත යොමු වුණේ ආන්දෝලනාත්මක අඩව්වක් නිසා ය. ඒ නායක බන්ධුල වර්ණපුර ඇතුළු කණ්ඩායමේ බහුතරයක් ‘කැරලි කණ්ඩායමක්’ ලෙස එවකට ලොවේ කවුරුත් සෙල්ලම් නොකරන දකුණු අප‍්‍රිකා කණ්ඩායම හා සෙල්ලම් කරනට ගිය නිසා ය. දකුණු අප‍්‍රිකාවේ සුදු සුළුතරය කළු බහුතර ජන කොටස් පාගා ගෙන ගිය අසාධාරණ ‘අපාතයිඞ්’ පාලනයට විරෝධයක් ලෙස ක‍්‍රීඩාව ඇතුළු ක්ෂේත‍්‍ර ගණනාවක් බොහෝ රටවල් ‘බෝයිකොට්’ කළේ ය. එවන් තත්ත්වයක් තුළ අපේ ‘කැරලි කණ්ඩායමේ’ සියලූ සාමාජිකයන්ට සිය ජීවිත කාලය පුරා ම ක‍්‍රිකට් ගැසීමේ තහනමක් පැනවිණ. ඒ ඔවුන් ‘බෝයිකොට්’ කළ යුතු දෙයක් නොතකා හළ නිසාවෙනි.


ඉංග‍්‍රීසියෙන් බෝයිකොට් * යන යෙදුම වර්ජනයට කිට්ටු වුණත් මුල් අදහස ම සම්පූර්ණයෙන් පරිවර්තනය කෙරෙන්නේ නැත. බෝයිකොට් යන්නෙන් අදහස් කරන්නේ දඬුවමක හෝ විරෝධයක සංකේතයක් ලෙස යම් වාණිජ, සමාජ හෝ ආයතනික මට්ටමේ සම්බන්ධතාවක් නොපැවැත්වීම ය.


කලක සිට හෙමින් හෙමින් කරමින් සිටිය ද අයිතිකරුවන් මුස්ලිම් වන ව්‍යාපාර ආයතනවල භාණ්ඩ හා සේවා මුස්ලිම් නොවන ජනකොටස් විසින් බෝයිකොට් කිරීම නැවත උග‍්‍ර ව පැන නැගුණේ අපේ‍්‍රල් 21 සිදුවීම්වලින් පසු ව ය. මුස්ලිම් ජනකොටස් ද යම් ව්‍යාපාර ස්ථානවලට පැමිණීමේදී මුහුණ දුන් අක‍්‍රමිකතා ගැන චෝදනා නිසා මුස්ලිම් ජනකොටස් ද ඒ ව්‍යාපාර, විශේෂයෙන් එක්තරා සුපර් මාරකැට්ටුවක්, බෝයිකෝට් කරන්නට පටන් ගෙන ඇතැයි සැල වේ. ජනවාර්ගික පදනම මත සිදුකරන මෙම බෝයිකොට් රැල්ල මාළු ලෑල්ල, සිල්ලර කඬේ, හන්දියේ හෝටලේ සිට විශාල ව්‍යාපාර දක්වා පැතිර ඇත.


බෝයිකොට්හි ඊළඟ පියවර සැන්ක්ෂන් හෙවත් සම්බාධක පැනවීම ය. මෙය සිදුවන්නේ ස්වෙච්ඡුා පදනමකින් නොව නිල හා සම්මත මට්ටමකින් ය. බොහෝ විට රටක් විසින් තවක් රටකට ආර්ථික තලයේ සම්බාධක පැනවීම සිදු කෙරේ. බෝයිකොට් හා සැන්ක්ෂන් මිශ‍්‍රිත ප‍්‍රකාශයක් රටේ මුදල් ඇමති, සෞඛ්‍ය ඇමති හා තවත් මන්ත‍්‍රීවරයෙකුට නොබෝ දිනකදී කළෝ ගම්පහ සඟ නායක රුවනක් ය. අදාළ මැති ඇමති වරුන්ගේ පිළිගත නොහැකි කියුම් කෙරුම් නිසාවෙන් ගම්පහ ආශ‍්‍රිත බල සීමාවේ වැඩ වසන භික්ෂුහු ඉහත කොටස්වලට ආරාධනා නොකරන බවත් ඔවුන් යම් හෙයකින් පැමිණියහොත් තමන් වහන්සේ එම ස්ථානවලින් නික්ම වැඩම කරන බව ද දැන්වූ හ. මෙම බෝයිකොට් කිරීමට භාජනය වූ එක් ඇමැත්තෙකු ඊට ප‍්‍රතිප‍්‍රකාශ එල්ල කිරීම නිසා බෝයිකොටය දිග් ගැස්සෙමින් තිබේ. පාරවල් වල නම් ද හිටි අඩියේ වෙනස් වේ. එංගලන්තයේ ඇසූ ලිංගික අපචාර නඩු හබ ගැන තතු ද හෙළිවෙමින් තිබේ. බෝයිකොටයක් ගිය දුර !


කණපිට බෝයිකොට හෙවත් රිවර්ස් බෝයිකොට රැුල්ලක් ද මේ අතර හෙමිහිට හමනු දැකිය හැක. කණපිට බෝයිකොට් යන්නෙන් මා අදහස් කරන්නේ යමක් වර්ජනය කිරීම නොව යමක් වඩ වඩා පරිභෝජනය කිරීම යි. ඒ පිළිබඳ ව තලූ මර මර කතා කිරීමයි. මේ රැුල්ල යම් මාංශ වර්ගයක් අනුභව කරන භවතුන් පිරිසක් විසින් (සයිබර්* සමාජයේ ජනප‍්‍රිය කිරීමට උත්සාහ කරනු පෙනේ. ඒ මාංශ වර්ගය එක්තරා ජනවාර්ගික කොටසක් ආගමික හේතුන් මත අනුභව කරන්නේ නැති වීම නිසා ඉහත රැුල්ල අහම්බයක් ලෙස දැකිය නොහැක. නීතියෙන් තහනම් කර නොමැති ඕනෑම ආහාරයක් පාරිභෝජනයට ඇති අයිතිය අප පිළිගත යුතු ය. එහෙත් යමක් කුමන හේතුවක් නිසා හෝ පරිභෝජනය කරනට අරුචි තවත් සහෝදර ජන කොටසකගේ මුහුණේ එය උලිච්චි කර කෑම පහත් හා අසංවේදී ක‍්‍රියාවක් ය.
නිෂ්පාදනයේ හා බෙදාහැරීමේ දී සැපයුම්-දාම ඉතා වැදගත් ය.

අප කන කෑමක, අඳින ඇඳුමක නිෂ්පාදන හා බෙදාහැරීමේ ක‍්‍රියාවලියේ විවිධ අදියර විවිධ පාර්ශ්ව විසින් කරනු ලැබේ. එම පාර්ශ්ව ජනවාර්ගික ලෙස හඳුනාගෙන බෝයිකොට් කොරන්නට ගියහොත් අපට කන්නට අඳින්නට දෙයක් ඉතිරි වන්නේ නැත. නිෂ්පාදනය, බෙදාහැරීම, අලෙවිය / මිල දී ගැනීම හා පාරිභෝජනය ආර්ථීකයක අඩිතාලම යි. බෝයිකොට් කරන්නට යාමෙන් වැටෙන්නේ ඉලක්ක කරන ජනවාර්ගික කණ්ඩායම පමණක් නොව සමස්ත ආර්ථිකය යි.


කුමන ජනකොටසක විසින් කළ ද මේ බෝයිකොට් කිරීම් සිදුවන්නේ ඕපපාතික ව නොවේ. ඒ පසුපස සංවිධානාත්මක යාන්ත‍්‍රණයක් ඇත. යම් රටක්, ආයතනයක්, කණ්ඩායමක් හෝ පුද්ගලයෙකු බෝයිකොට් කිරීම සාමාන්‍යයෙන් සිදුකරන්නේ අවසාන තුරුම්පුව ලෙස ය; ‘ලාස්ට් රිසොර්ටය’ ලෙස ය. ඒ වෙන කිසිවක් ම කළ නොහැකි බවට හොඳට ම ඒත්තු ගැන්වී ගිය පසු ය. අප රටේ නම් මුලින් ම ගහන කොලය බෝයිකොටය බව පෙනේ.
බෝයිකොට නාඩගමේ නවත ම සන්නියට වෙස් බැඳ සිටින්නෝ වෙන කවුරුවත් නොව අප ජනපති ය.

එතුමෝ බෝයිකොට් කරන්නෝ කැබිනෙට්ටුව ය. එය ලෙහෙසි පහසු බෝයිකොටයක් නොවේ. එවන් බෝයිකොටයක් විධායකය හා ව්‍යවස්ථාදායකය අතර ගැටුමකට හා එය දුරදිග ගියහොත් එම වැදගත් උපස්තම්භක ද්වය, තෙවැන්න වන අධිකරණය සමග සමස්ත ක‍්‍රමය පවත්වාගැනීමේ අඩිතාලම බිඳ වැටෙන්නේ ය. බෝයිකොට රැුල්ල දැන් දැන් නැගෙන ආකාරයට කැබිනෙට්ටුවත් බැරිවෙලාවත් ජනපති ව බෝයිකොට කරනට ගියහොත් කුමක් වේ ද යි සිතීම පවා භයංකර ය. අපට එතකොට කියන්නට වෙන්නේ ‘ ඕ..බෝයි..’ කියා ය.x


x උදන් ප‍්‍රනාන්දු