කෝප් කමිටුවේ හිටපු සභාපති

ආණ්ඩුව නීතිවිරෝධීව මහජන මුදල් වියදම් කිරීමට උත්සාහ කරන බවට මුල සිටම සාකච්ඡාවක් තිබුණා. ඔබ පෙන්වාදුන්නා ආණ්ඩුව තමන්ගේ වාර්තාවකටත් බොරු කරුණු ඇතුළත් කරලා තියෙන බව..

පහුගිය ආණ්ඩුව 2019 නොවැම්බර් මාසයේදී 2020 වෙනුවෙන් අයවැයක් සම්මත කළේ නැහැ. ඒ ජනාධිපතිවරණය තිබුණු නිසා. ඒ වෙනුවට ඔක්තෝබර් 23 වැනිදා අතුරු සම්මත ගිණුමක් සම්මත කළා. ඒකෙන් අපේ‍්‍රල් මාසයේ 30 දක්වා පළවැනි කාර්තුවට මුදල් වියදම් කිරිම වෙනුවෙන් මුදල් ලැබෙනවා. මාර්තු මාසයේ 02 වැනිදා පාර්ලිමේන්තුව විසුරුවාහැරියා. නැවත පාර්ලිමේන්තුව රැස්වුණේ නැහැ. එහෙම තිබියදී තමයි මා පෙන්වාදුන්න වාර්තාව එළිදැක්වුවේ. මෙය 2003 අංක 03 දරණ රාජ්‍ය මූල්‍ය වගකීම් පනත යටතේ නිකුත් කළ යුතු වාර්තාවක්. මේ වාර්තාව නිකුත් කරන්න  ඕනෑ නිල වශයෙන් ආණ්ඩුව සාමාන්‍යයෙන් මැතිවරණයකට පාර්ලිමේන්තුව විසුරුවලා හැරලා සති තුනක් ඇතුළත. පනත අනුව ඒ පනතෙන් රටේ මූල්‍ය තත්වය පිළිබඳව ජනතාවට කරුණු ඉදිරිපත් කරන්න  ඕනෑ. මාර්තු 23 වැනිදා මුදල් අමාත්‍යාංශයේ වෙබ් අඩවියේ ඒ වාර්තාව පළ වුණා.  ඕනෑම කෙනෙකුට වෙබ් අඩවියෙන් ඒ වාර්තාව බලන්න පුලූවන්.

මේ වාර්තාවේ වැදගත් කාරණාවක් තියෙනවා, බොහෝ ආර්ථික කාරණා අතරේ. එහි 12 වැනි පිටුවේ තවත් අතුරු සම්මත ගිණුමක් ගැන සඳහන් වෙනවා. ඒ වාර්තාවේ කියන්නේ මාර්තු සිට මැයි දක්වා කාලසීමාව වෙනුවෙන් එම අතුරු සම්මත ගිණුම සකස් කරපු බව. ඒකේ ඉතා පැහැදිළිව කියනවා ජනාධිපතිවරයා මාර්තු 02 වැනිදා පාර්ලිමේන්තුව විසුරුවලා තියෙන බව. එහෙම තිබියදී ආණ්ඩුක‍්‍රම ව්‍යවස්ථාවේ 150(3) ව්‍යවස්ථාව යටතේ ජනාධිපතිවරයා අතුරු සම්මත ගිණුමක් මාර්තු 06 වැනිදා පටන් බලපැවැත්වෙන පරිදි සම්මත කළා කියලා. අපි අහන්නේ මාර්තු 06 වැනිදා අතුරු සම්මත ගිණුමක් සම්මත කරන්නෙ කොහොමද කියලා. මාර්තු 06 වැනිදා වෙනකොට පාර්ලිමේන්තුව විසුරුවලා තියෙන්නේ.

මේ කියන බොරු අතුරු සම්මත ගිණුමෙහි වටිනාකම කොපමණද?

මේ වාර්තාව අනුව රුපියල් බිලියන 1229කට හෙවත් කෝටි 122,900කට මුදල් වෙන්කරලා තියෙනවා. ඒ වාර්තාවේම ඒ මුදල් පිළිබඳව වැඩිදුර විස්තර සඳහන් වෙනවා. අපි අහන්නෙ කොහොමද ඒක කළේ. අතුරු සම්මත ගිණුම කියන්නේම පාර්ලිමේන්තුවේ ඡන්දය විමසලා සම්මත කරගන්නා ගිණුමක්. ශ‍්‍රී ලංකා පාර්ලිමේන්තුවේ 2020 අවුරුද්දට අදාලව සම්මත කරලා තියෙන්නේ එක අතුරු සම්මත ගිණුමයි. ඒක ගිය අවුරුද්දේ සම්මත කරපු එක. මුදල් අමාත්‍යාංශයේ වාර්තාවෙහි සඳහන් වෙලා තියෙන අතුරු සම්මත ගිණුම කවුද සම්මත කළේ. කවදාද සම්මත කළේ.

ජනාධිපතිවරයා මීට පෙර කරපු කතාවකදීත් තමන් අතුරු සම්මත ගිණුමක් සම්මත කරගත් බව කීවා. අතුරු සම්මත ගිණුම් සම්මත කිරීමේ බලයක් ජනාධිපතිට ලැබුණේ කවදාද කියලා අපි ඒ මොහොතේ ප‍්‍රශ්න කළා. ඒත් සමහරු හිතන්නේ ජනාධිපතිවරයාට එවැනි බලයක් තියෙනවා කියලයි…

අතුරු සම්මත ගිණුමට ඉංග‍්‍රීසියෙන් කියන්නේ වෝට් ඔන් අකවුන්ට් කියලයි. සරලව කීවොත්, ඡන්දයකින් සම්මත කරගත් ගිණුම කියන එකයි අදහස. අතුරු සම්මත ගිණුම කියන යෙදුමෙනුත්, සම්මත කරගත් ගිණුමක් කියන අදහස තියෙනවා. ඒ කෙසේ වෙතත්, මුදල් පිළිබඳ සම්පූර්ණ බලය තියෙන්නේ පාර්ලිමේන්තුවට. අයවැය හදන්න හෝ අතුරු සම්මත ගිණුම හදන්න විධායකයට බලය තිබුණාට, ඒවා ක‍්‍රියාත්මක කරන්න බලයක් විධායකයට නෑ.

අතුරු සම්මත ගිණුමක් ඡන්ද විමසීමකින් තොරව, පාර්ලිමේන්තුවේ සමම්ත නොකර ක‍්‍රියාත්මක කරන්න කිසි කෙනෙකුට බෑ. ඒක සම්පූර්ණයෙන්ම ව්‍යවස්ථා විරෝධීයි. නීතිවිරෝධීයි. ඒ නිසා අපි දැනගන්න  ඕනෑ මේ මුදල් අමාත්‍යාංශ වාර්තාවෙහි සඳහන් කරලා තියෙන අතුරු සම්මත ගිණුමෙන් සල්ලි සම්මත කරලා තියෙන්නේ කොහොමද. මේක මුදල් අමාත්‍යවරයා අත්සන් තැබූ වාර්තාවක්. මේක නිල ලේඛනයක්.

ජනාධිපතිවරයාට මුදල් වියදම් කරන්න ආණ්ඩුක‍්‍රම ව්‍යවස්ථාවේ 150(3) ව්‍යවස්ථාවෙන් බලය තියෙන බව ආණ්ඩුවේ ඇතැම් නායකයන් කියනවා නේද?

ආණ්ඩුක‍්‍රම ව්‍යවස්ථාවේ 150(3) ව්‍යවස්ථාවෙන් මෙහෙම වැඩකට බලයක් ලැබෙන්නේ නැහැ. ඒ ව්‍යවස්ථාවේ ඉතා පැහැදිළිව තියෙන්නේ මෙහෙමයි. ‘යම් කිසි වර්ෂයක විසර්ජන පනත් කෙටුම්පත් නීතිය බවට පත්වීමට පෙර..’ ඒ කියන්නේ අයවැය සම්මත වෙලා නැත්නම් ‘ජනාධිපතිවරයා විසින් පාර්ලිමේන්තුව විසුරුවාහරින ලද අවස්ථාවක පාර්ලිමේන්තුව විසින් රජයේ සේවාවන් සඳහා මුදල් වෙන්කර නොමැත්තේ නම් අභිනව පාර්ලිමේන්තුව රැස්වීමට නියමිත දින සිට මාස තුනක් නිකුත් වන තෙක් රජයේ සේවාවක් සඳහා මුදලක් අවශ්‍ය වේයැයි ජනාධිපතිවරයා සලකයි නම් ඒ මුදල ඒකාබද්ධ අරමුදලෙන් නිකුත් කිරීමටත්, වැය කිරීමටත්, නියම කිරීමටත් ජනාධිපතිවරයාට බලය ඇත්තේය.’ ව්‍යවස්ථාවේ තියෙන්නේ එහෙමයි.

ජනාධිපතිවරයාට ඒ බලය තියෙන්නේ මේ වගේ අතුරු සම්මත ගිණුමක් හදන්න නෙවෙයි. ඒකෙන් කියන්නේ අභිනව පාර්ලිමේන්තුව රැස්වීමට නියමිත දින ඉඳලා ඉදිරි අයවැය සම්මත කරගන්නාතුරු මාස තුනකට සල්ලි වියදම් කරන්න බලය ජනාධිපතිවරයාට තියෙනවා කියලා. ඒත් මේ කරලා තියෙන්නේ ඒ වගන්තිය පාවිච්චි කරලා මැතිවරණයට පාර්ලිමේන්තුව විසුරුවපු දවසෙන් දවස් කිහිපයකට පස්සේ අතුරු සම්මත ගිණුමක් හදාගෙන.  ඕනෑ කෙනෙකුට මුදල් අමාත්‍යාංශයේ වෙබ් අඩවියෙන් දැනටත් මේ වාර්තාව බලන්න පුළුවන්. රටේ ජනතාව දන්නේ නැති, පාර්ලිමේන්තුව දන්නේත් නැති, පාර්ලිමේන්තුව විසුරුවාහැරීමෙන් පස්සේ මුදල් වෙන් කරගැනීමක් ගැන තමයි මේ වාර්තාවේ තියෙන්නේ.

ව්‍යවස්ථාවේ මොනවා තිබුණත් මේ වගේ හදිසි වෙලාවක මුදල් වියදම් කළාට කමක් නැහැ කියලා හිතන අයත් ඉන්නවා නේද?

ඒවා විහිළු තර්ක. භාණ්ඩාගාරය කියන්නේ ගෝඨාභය රාජපක්ෂ ජනාධිපතිවරයාගේ පෞද්ගලික දේපලක් නෙවෙයි. කාගෙවත් පෞද්ගලික සල්ලි නෙවෙයි. ඒකේ තියෙන්නේ මහජනතාවගේ මුදල්. ඒ මුදල් වියදම් කරන්නට රටක ව්‍යවස්ථාපිත ක‍්‍රමයක් තියෙනවා. එහෙනම් මේක හදිස්සි වෙලාවක් කියලා අපේ රටේ  ඕනෑ කෙනෙක්ට ගිහින් භාණ්ඩාගාරයෙන් සල්ලි ඉල්ලගෙන එන්න පුළුවන් වෙන්න එපැයි. සල්ලි වියදම් කරන්න ව්‍යවස්ථාපිත ක‍්‍රමයක් තියෙනවා. දැන් ආණ්ඩුව ඒකාධිපති ක‍්‍රමයට මුදල් වෙන් කරගැනීමේ බලයක් බලෙන් පවරාගෙන. ඊට පස්සේ ඒකට අදාලව ව්‍යාජ ලේඛන පවා සකස් කරමින් ඉන්නවා. සරලව කීවොත් බොරු ලේඛන හදලා නීතිවිරෝධී විදියට මහජන මුදල් වියදම් කරනවා.

පාර්ලිමේන්තුවත් නැතිව, මුදල් වියදම් කිරීමේ විනිවිදභාවයකුත් නැතිව  ඕනෑ විදියකට රට පාලනය කරන්නට ආණ්ඩුව උත්සාහ කරන බව පේනවා නේද?

රාජ්‍ය යනු මමය කියන අදහස තමයි මේ කියන්න උත්සාහ කරන්නේ. දැන් රාජ්‍ය සේවකයන්ගේ වැටුප ලබාදෙන්න කියලා පෞද්ගලික ඉල්ලීමක් නිල නිවේදනයක් වගේ ජනාධිපති ලේකම්වරයා රාජ්‍ය යාන්ත‍්‍රණයට නිකුත් කරලා තියෙනවා. දැන් රාජ්‍ය මූල්‍ය වගකීම් පනතක් තිබුණාට වගකියන්නේ නැති තත්වයක් තියෙන්නේ. අතුරු සම්මත ගිණුමක් කියන්නේ මොකක්ද කියලාවත් මායිමකට ගන්නේ නැතිව වැඩවසම් රදල පාලනයක් ගෙනයන්න තමයි උත්සාහ කරන්නේ. මේවා රජ කාලයේ කරපු වැඩ.

ලංකාවේ ආණ්ඩුක‍්‍රම ව්‍යවස්ථාවත්, ලෝකයේ පිළිගත්ත මුදල් පිළිබඳ සම්ප‍්‍රදායත් සම්පූර්ණයෙන්ම අමතක කරලා මෙලෙස කටයුතු කිරීමෙන් ලෝකය ඉදිරියේ ශ‍්‍රී ලංකාව අපකීර්තියට ලක්වීමත්, ඇතැම්විට ආධාර ආදිය නොලැබී යෑමත් සිදුවිය හැකියි නේද?

මේ අය වැඩ කරන්නේ අවට අය කරන්නේ මොකක්ද, හිතන්නේ කොහොමද කියලා කල්පනා කරමින් නෙවෙයි. දැන් මේ වැඩවසම් පුරුදු රාජ්‍ය නිලධාරීන්ටත් බෝවෙලා. හැමෝම නීතිය නොතකා වැඩකරන තත්වයක් ඇවිත්. නීතිය මොකක්ද කියලා කල්පනා කරන්නේ නැහැ. ඒ නිසා තමයි ඇමතිවරු සල්ලි අච්චු ගහලා හරි ආර්ථිකය ගොඩගන්න කියලා යෝජනා කරන්නේ. මේ ඇමතිවරුන්වත් දන්නේ නැහැ ජාත්‍යන්තර සම්මුතීන් මොනවාද කියලා. උද්ධමනය ගැනත්, ජාත්‍යන්තර සම්මුතීන් ගැනත් සතපහකට මායිම් නොකර මුදල් අච්චු ගහන්න යෝජනා කරන්නේ ඒ නිසා. මේවා කියන්නේ විහිළුවට නෙවෙයි. මේ නොදැනුවත්කම. අඩු තරමේ මුදල් කියන්නේ මොකක්ද කියලාවත් දන්නේ නැති අය තමයි ආණ්ඩුවේ ඉන්නේ. මුදල් කියන්නේ භාණ්ඩ නෙවෙයි. භාණ්ඩ මිලදී ගැනීම හා අලෙවි කිරීම සඳහා පාවිච්චි කරන මාධ්‍යයක්. ලෝකයේ භාණ්ඩ හිඟයක් තියෙනවානම් මුදල් අච්චු ගහපු පළියට භාණ්ඩ ලැබෙන්නේ නැහැ. මේ පුංචි යථාර්තයවත් තේරෙන්නේ නැති අය තමයි ඉන්නේ.

ජවිපෙ අරලියගහ මන්දිරයේ රැස්වීමට ගියේත් නැහැ නේද?

ඔවුන් හිතන්නේ ඒ රජගෙදර කියලයි. එයාලා එන්න කිව්වාම අපි රජගෙදරට යන්න  ඕනෑ කියලයි හිතන්නේ. මේ උත්සාහ කරන්නේ තමන්ගේ බල පරාක‍්‍රමය පෙන්වන්නයි. අපි මොකටද රජගෙදරට එන්න කිව්වාම යන්නේ. ඒකට කිසිම නිත්‍යානුකූල පදනමක් නෑ. ව්‍යවස්ථානුකූල පදනමක් නෑ. පාර්ලිමේන්තුව කියන ආයතනය තියෙන්නේ තීන්දු තීරණ ගැනීම සඳහා. පාර්ලිමේන්තුව රැස් කරන්න. සෙල්ලම් පාර්ලිමේන්තු  ඕනෑ නැහැ.

මෙලෙස නීතියට පිටින් මුදල් වියදම් කිරීමෙන් දීර්ඝකාලීන බලපෑමක් ඇතිවේවිද?

දීර්ඝකාලිනව විය හැක්කේ අරාජිකත්වය ඇතිවීම. ඒ වගේම ඒකාධිපතිත්වය දක්වා මඟ සැලසීම. එහෙම නැත්නම් මේ අනීතික, වැඩවසම් ක‍්‍රියා පිළිවෙත ජනතාව පරාජය කිරීම. අපි හිතන්නේ ඔවුන් අරාජිකත්වය හෝ ඒකාධිපතිත්වය දක්වා යනතුරු ජනතාව බලා ඉන්න  ඕනෑ නැහැ. ජනතාව මේ අයව පරාජය කළ යුතුයි.

මුදල් පිළිබඳ සම්පූර්ණ බලය පාර්ලිමේන්තුව සතු බව ව්‍යවස්ථාවෙහි සඳහන් වෙනවා. මේ ‘සම්පූර්ණ බලය’ කියන යෙදුම විශේෂයි නේද?

ආණ්ඩුක‍්‍රම ව්‍යවස්ථාවේ 149 ව්‍යවස්ථාවෙන් ඉතාම පැහැදිළිව තනි සරල වාක්‍යයක් විදියට කියනවා මේ ගැන. මුදල් පිළිබඳ සම්පූර්ණ බලය පාර්ලිමේන්තුව සතුයි. පාර්ලිමේන්තුව සතුයි කියලා කියන්නේ පාර්ලිමේන්තු මන්ත‍්‍රීවරුන් වන 225 දෙනා සතුයි කියන එක නෙවෙයි. ඒ බලය ජනතාව සතුයි. ජනතාවගේ පරමාධිපත්‍යය බලය තමයි පාර්ලිමේන්තුව ක‍්‍රියාත්මක කරන්නේ.

කෙසේ වෙතත් ‘225ම එපා’ කියන ජනප‍්‍රිය මතය නිසා පාර්ලිමේන්තුව කැඳවන්න  ඕනෑ නැති බව සමහරු කල්පනා කරනවා..

දැන් තියෙන ප‍්‍රශ්නය තමයි ඒ අය කියන්නේ 225 එපා කියලාද, පාර්ලිමේන්තුව එපා කියලාද කියන එක. මිනිස්සු කියන්නේ දැන් පාර්ලිමේන්තුවේ ඉන්න මන්ත‍්‍රීවරුන් නුසුදුසු බවද. නැත්නම් පාර්ලිමේන්තුව කියන ආයතනයම එපා කියන එකද. මේ කතා දෙකට එකිනෙකට වෙනස් අදහස් දෙකක් තියෙනවා. පාර්ලිමේන්තුවම එපා කියලා කියනවානම් ජනතාව කියන්නේ තමන්ට බලය එපා කියලයි. මොකද පාර්ලිමේන්තුව ක‍්‍රියාත්මක කරන්නේ ජනතාව සතු බලය. පාර්ලිමේන්තුවේ ඉන්නේ ජනතා නියෝජිතයන්. පත්කරපු අයගේ වරදක් තියෙනවානම්, කරන්න  ඕනෑ ඔවුන්ව පරාජය කිරීම. ජනතාව 225ම එපා කියලා කියන්නේ දැන් ඉන්න පාර්ලිමේන්තු සාමාජිකයන් ගැන නම්, ඔවුන්ට ඡන්දය නොදී ඉන්න පුළුවන්. ඒත් ඇත්තටම ජනතාව ඡන්දය දෙන්නේ කාටද. දැන් නාමයෝජනා දීලා තියෙන්නේ කාටද.

කවුරුහරි දැන් ඉන්න මන්ත‍්‍රීවරුන්ව එපා කියලා කියනවානම් ඒක වෙනම කතාවක්. පාර්ලිමේන්තුවම එපා කියලා කියනවානම් ඔවුන් කියන්නේ තමන්ට කිසිම බලයක් එපා කියලයි. තමන්ගේ බලය අත්හරින බවයි ඔවුන් කියන්නේ. ඒක හරිම බරපතලයි.

බොහෝ අය නොදන්නා කාරණයක් තමයි පාර්ලිමේන්තුවේ ජනතාවගේ මුදල් පිළිබඳව වැදගත් ක‍්‍රියාමාර්ග බොහොමයක් ගන්න බව. විශේෂයෙන්ම විසුරුවාහරින ලද පාර්ලිමේන්තුව පවා මහජන මුදල් පිළිබඳව ක‍්‍රියාමාර්ග ගොඩක් අරන් තියෙන බව. ඔබ සභාපතිත්වය දරන ලද කෝප් කමිටුවෙන් විධායකය කරලා තියෙන මුදල් අවභාවිතයන් බොහොමයක් ගැන කරුණු හෙළිකළා. මහජන මුදල් වංචා කිරීම ගැන ප‍්‍රශ්න කළා. එවැනි පසුබිමක පාර්ලිමේන්තුව මොනතරම් වැදගත් ආයතනයක්ද කියන කාරණය ඇතැමුන් දන්නේ නැහැ නේද?

සමහරුන් හිතාගෙන ඉන්නේ පාර්ලිමේන්තුව කියන්නේ රැස්වීම් වලදී මන්ත‍්‍රීවරුන් කතාකරන දේවල් විතරක් කියලයි.රෑට රූපවාහිනියේ ප‍්‍රවෘත්තිවලින් පෙන්වන, කුණුහරුප සහ විහිළු කතා විතරක් කියලයි. ප‍්‍රවෘත්ති බලලා විතරක් පාර්ලිමේන්තුව තේරුම් ගන්න බෑ. පාර්ලිමේන්තුවේ බොහෝ දේවල් සිද්ධවෙනවා. කාරක සභා තියෙනවා. සමහරුන් රූපවාහිනියේ පෙන්වන දේවල් වලින් එහාට බලන්නේ නැහැ.