■ අරුණ ජයවර්ධන

හෙටානිද්දා සිදුවන්නට නියමිත කැබිනට් මණ්ඩල වෙනස යටතේ බැසිල් රාජපක්‍ෂ මහතා පාර්ලිමේන්තු මන්ත්‍රීවරයකු හැටියට දිවුරුම් දෙන්නට නියමිත බව බොහෝ මාධ්‍ය දැනටමත් තහවුරු කර තිබේ. ජනාධිපති ගෝඨාභය රාජපක්‍ෂත්, අගමැති මහින්ද රාජපක්‍ෂත්, පාර්ලිමේන්තුවට පැමිණෙන ලෙස ඔහුට බලපෑම් කරන බවද එම වාර්තා කියයි. පාර්ලිමේන්තු මන්ත්‍රීවරයකු වුවහොත්, ඔහුට අනිවාර්යයෙන්ම රටේ ඉහළම ඇමති තනතුරු හිමිවන අතර, ජනාධිපති අගමැති හැරුණු විට රටේ රාජ්‍ය යාන්ත්‍රණය මෙහෙයවන ඊළඟ බලවත්ම පුද්ගලයා බවට ඔහු පත්වනු ඇත. (දැනටත් එහි වෙනසක් නැති බවද සලකන්න.)

එහෙත්, පිටත සිට බලන අයට  ප්‍රශ්නයක් තිබේ. ඒ 20 ගැන සහ ආණ්ඩුවේ ජාතිකවාදී පිරිවරේ ලජ්ජාව ගැනය.

20වැනි ආණ්ඩුක්‍රම ව්‍යවස්ථා සංශෝධනයේ ඇති ලොකුම වරද ලෙස ආණ්ඩුවේ සිටින ජාතිකවාදීන්, ගුණදාස අමරසේකර, විමල් වීරවංශ, උදය ගම්මන්පිල, ගෙවිඳු කුමාරතුංග, මැදගොඩ හිමි, මුරුත්තෙට්ටුවේ හිමි, ඇල්ලේ හිමි වැනි පිරිස් දුටුවේ ද්විත්ව පුරවැසියකුට පාර්ලිමේන්තු මන්ත්‍රීවරයකු විමට හා ජනාධිපති ධුරයට තරග කිරීමට ඇති හැකියාවයි. ඊට එරෙහිව ඔවුන් විශාල ආන්දෝලනයක් ඇතිකළ අතර, 20න් එම කොටස ඉවත් කරගන්නා තුරු සටන් කරන බවට ශපථ කළහ. අවසානයේ සිදුවුණේ කුමක්ද? ජනාධිපතිවරයා ඔවුන් සමග කළ සාකච්ඡාවකින් පසු, තමන්ගේ සටන පාවාදී නිවෙන තත්වයකට ඔවුන් පත්කිරීමයි. ඇල්ලේ ගුණවංශ හා මුරුත්තෙට්ටුවේ ආනන්ද හිමිවරුන් කීවේ, තමන් සමග සටන් කල අනෙක් අය සටන පාවාදුන් බවයි.

කොහොම වුණත්, වීරවංස, ගම්මන්පිල, කුමාරතුංග හා මැදගොඩ අභයතිස්ස තමන්ගේ ‘සටන පාවාදීමට’ හේතු මාධ්‍ය ඉදිරියේ දැක්වූහ. එහි හරය මෙසේය. ‘ජනාධිපතිතුමා අපි එක්ක කතාකළා. මේ ද්විත්ව පුරවැසි බාධනකය 19 සංශෝධනයට ගෙනාවේ එතුමාවම ඉලක්ක කරගෙන බව එතුමා කිව්වා. ඒ නිසා පෞද්ගලිකවම ඒක ගැන එතුමා බරපතළ විදියට සංවේදී බව කිව්වා. ඒ නිසා, 20න් ද්විත්ව පුරවැසි බාධකය ඉවත්කිරීමට ඉඩ දෙන්න කියලා අපෙන් ඉල්ලා හිටියා. නමුත් ඊළඟ ආණ්ඩුක්‍රම ව්‍යවස්ථා කෙටුම්පතට නැවතත් ඒක ඇතුළු කරනවා කියලා එතුමා අපිට පොරාන්දුවක් දුන්නා. එතුමා අපිට විශ්වාසයි. ඒක කරන බවට විශ්වාසයි. ඒ නිසා, අලුත් ආණ්ඩුක්‍රම ව්‍යවස්ථාවෙන් ඒ වගන්තිය අයින් වෙන බව විශ්වාසයි.’

මේ ජාතිකවාදීන්ගේද අත ඉස්සීමෙන් 20 සම්මත විය. ඒ ගැන විවාදයේදීද මේ පිරිස ජනාධිපතිතුමාගේ සංවේදීකම ගැනත්, අලුත් ව්‍යවස්ථාවෙන් එය ඉවත් කරන බවත් පුන පුනා කීහ. කෙසේ වෙතත්, එක පුද්ගලයකුගේ ‘සංවේදීකම’ නිසා, ආණ්ඩුක්‍රම ව්‍යවස්ථාවේ වගන්ති වෙනස් විය හැකි බවට උදාහරණයක් එයින් ඉතිහාසයට එකතු විය.

දැන් අපට මෙසේ සිතිය හැකිය. ‘20හි ද්විත්ව පුරවැසි අවසරය සහිත වගන්තිය දැම්මේ ජනාධිපතිගේ සංවේදීකම නිසාය. ඊළඟ ව්‍යවස්ථාවෙන් එය සහතික වශයෙන්ම ඉවත් කරනු ලැබේ. ඒ අලුත් ව්‍යවස්ථාව, තමාගේ ධුර කාලයෙන් අවුරුදු දෙක ඉක්ම යන්නට පෙර සම්මත කරගන්නා බවද ජනාධිපතිවරයා කියා තිබේ. ඒ නිසා, මේ අවුරුද්දක කෙටි කාලය ඇතුළත, ද්විත්ව පුරවැසි අවසර වගන්තිය ආණ්ඩුක්‍රම ව්‍යවස්ථාවේ තිබෙන නමුත් එය හුදෙක් ජනාධිපතිතුමාගේ සංවේදීකම රැකගැනීම සඳහා පමණක් පවතින අක්‍රිය දෙයකි. එහි ප්‍රතිපාදනය භාවිත කොට කිසිම දෙයක් මේ කෙටි කාලය ඇතුළත සිදු නොවනු ඇත.’

එහෙත්, 20 සම්මත වී මාස දෙකක් යන තැන ද්විත්ව පුරවැසි බැසිල් රාජපක්‍ෂ පාර්ලමේන්තුවට පැමිණෙන්නට නියමිතය. ඒ අනුව පෙනෙන්නේ ජනාධිපතිතුමාගේ සංවේදීකම අහිංසක එකක් නොව, බැසිල් රාජපක්‍ෂ පාර්ලිමේන්තුවට වැඩමවීම සඳහා කළ උප්පරවැට්ටියක් බවයි. ජනාධිපතිතුමාගේ සංවේදීකම ගැනත්, අලුත් ව්‍යවස්ථාවක් ගැනත් හැඟුම්බර වූ වීරවංස, කුමාරතුංග, අභයතිස්ස වැනි ජාතිකවාදීන්ට දැන් සිදුවන්නේ කුමක්ද?

ඔවුන්ට තිබෙන එකම තෝරාගැනීම අපට පැහැදිලිය. ඒ තෝරාගැනීම ඔවුන් ඉත සිතින් කරන බවද අපට පැහැදිලිය. එනම්. ද්විත්ව පුරවැසිභාවයේ වැදගත්කමත්, බැසිල් වැනි කාර්යක්‍ෂම, දක්‍ෂ පුද්ගලයකු පාර්ලිමේන්තුව තුළ සිටීමෙන් සෞභාග්‍යයේ දැක්මට ඇතිවන ආලෝකයත් ගැන ඔවුන් හෙටානිද්දාම වර්ණනා කරන්නට පටන් ගැනීමය. ගෝඨාභය රාජපක්‍ෂ විසින් තමන් නිරුවත් කරනු ලැබීම ගැන ඔවුන්ට නම් ලජ්ජාවක් නොතිබෙනු ඇත.■

 

අල්ලස් කොමිසමට රාජපක්‍ෂ යාළුවෙක්

ජනාධිපති මහින්ද රාජපක්‍ෂ, එවකට හිටපු නීතිපත,ි ඊවා වනසුන්දර වැඩ ඇරී ගෙදර යන ගමන් අරලියගහ මන්දිරයට ගෙන්වාගෙන ශ්‍රේෂ්ඨාධිකරණ විනිසුරුකමක් ප්‍රදානය කළ බව සියල්ලෝම දනිති. ඒ බව ඇයම ‘දේශය’ පත්තරයට දුන් සම්මුඛ සාකච්ඡාවක පැහැදිලිව කියා තිබුණි. ඒ 18 වැනි ආණ්ඩුක්‍රම ව්‍යවස්ථා සංශෝධනය යටතේ එවකට ජනාධිපතිවරයාට තිබුණු බලය ක්‍රියාත්මක වුණු හැටිය.
ඒ ජනාධිපතිගේ මල්ලි වන ගෝඨාභය රාජපක්‍ෂ මහතා අත්අඩංගුවට ගන්නට යන බැවින් එයින් වළක්වන නියෝගයක් දෙන්නැයි ඉල්ලා ශ්‍රේෂ්ඨාධිකරණයට ආ විට, ඒ නඩුව අසමින්, ගෝඨාභය රාජපක්‍ෂ අත්අඩංගුවට ගැනීමෙන් වළකින්නැයි පොලිසියට නියෝගයක් කළේ ඊවා වනසුන්දරය. ඒ, ගෝඨාභයගේ අයියා තමාට ශ්‍රේෂ්ඨාධිකරණ විනිසුරුකම දුන්නාට කළ ගුණ සැලකීමක් හැටියටද වන්නට බැරි නැත. හරි නම් ඇය කළ යුතුව තිබුණේ ගෝඨාභය රාජපක්‍ෂගේ නඩුව තමන්ට අසන්නට බැරි බව කියා ඉන් ඉවත්වීමයි. මහින්ද රාජපක්‍ෂ තමාගේ නීති විද්‍යාල සමීප යාළුවකු නිසා ස්වාභාවිකවම යම් පැත්තකට නැමෙන්නට ඉඩ තිබුණු බැවිනි. ඇය එසේ නොකළාය. (එහෙත්, පසුව බැසිල් රාජපක්‍ෂ සම්බන්ධයෙන්ද එවැනි නඩු ආ විට ඇය ඒවා ඇසීම ප්‍රතික්‍ෂෙප කළාය. ඒ මාධ්‍යවල කැරුණු කතාබහේ ප්‍රතිඵලයක් ලෙසය.) ඒ වෙනුවට ගෝඨාභය අල්ලන්නට එපායැයි පොලිසියට නියම කළේය.
2019දී ගෝඨාභය රාජපක්‍ෂ මහතා ජනාධිපති වූ පසුව, ප්‍රංශයේ තානාපතිවරිය හැටියට ඇය නම් කර යවන්නට කටයුතු පිළියෙල වී තිබුණි. එහෙත් එය සිදු නොවිණ. දැන් ඒ ඊවා වනසුන්දර මහත්මිය, අල්ලස් හෝ දූෂණ චෝදනා විමර්ශන කොමිෂන් සභාවේ සභාපති හැටියට ජනාධිපතිවරයා විසින් පත්කරනු ලැබ තිබේ.
මේ කොමිසම පිහිටුවා තිබෙන්නේ, රාජ්‍ය යාන්ත්‍රණය සම්බන්ධයෙන් වන අල්ලස් හෝ දූෂණ චෝදනා විමර්ශනය කර නීතිමය පියවර ගැනීමටය. එවැනි තැනක, සභාපතිකමට රාජපක්‍ෂවරුන්ගේ පවුලේ හිතවතියක වැනි කෙනකු පත් වූ විට සිදුවන්නේ කුමක්දැයි අලුතෙන් පැහැදිලි කළ යුතු නැත. පිටතට පෙනෙන්නට කොමිෂන්ද තබාගෙන, ඒවා ඇතුළතින් පුස්සක් කිරීමේ රාජපක්‍ෂ ව්‍යාපෘතිය ක්‍රියාත්මක වන්නේ ඒ ආකාරයටය.■