මහබැංකු බැඳුම්කර ගනුදෙනුව පිළිබඳ වෝහාරික විගණන වාර්තාව ජනාධිපති මෛත‍්‍රීපාල සිරිසේන වෙත ලැබී ඇති බවත්, එහි ඇති කරුණු මත පදනම් වෙමින් අගමැති රනිල් වික‍්‍රමසිංහ හා මුදල් අමාත්‍ය රවී කරුණානායකට එරෙහිව නඩු පැවරීමට ජනාධිපතිවරයා සැලසුම් කර ඇති බවත් වාර්තා වෙයි.

ජනාධිපතිවරයාට සමීප ආරංචි මාර්ගයක් ප‍්‍රකාශ කළේ එම වාර්තාවෙහි පෙන්වාදී ඇති කරුණු හා බැඳුම්කර ගනුදෙනුව පිළිබඳ පත්කළ ජනාධිපති පරීක්ෂණ කොමිෂන් සභාවේ වාර්තාව මත පදනම් වෙමින් එලෙස නඩු පැවරීමේ හැකියාවක් තිබෙන බවයි.

මේ වනවිට බැඳුම්කර ගනුදෙනුවට අදාලව හිටපු මහබැංකු අධිපති අර්ජුන මහේන්ද්‍රන් ඇතුළු පර්පෙචුවෙල් ටෙ‍්‍රෂරීස් සමාගමේ හා මහබැංකුවේ නිලධාරීන් කිහිපදෙනෙකුට එරෙහිව ත‍්‍රිපුද්ගල ස්ථීර මහාධිකරණය ඉදිරියේ නඩු පවරා ඇත.

බීඞී ඕ ඉන්දියා නම් විදේශීය සමාගමටත් කේපීඑම්ජී ශ‍්‍රී ලංකා යන දේශීය සමාගමටත් බැඳුම්කර ගනුදෙනුව පිළිබඳ වෝහාරිගක විගණන වාර්තාවක් සකස් කිරීම බාරදී තිබුණේ කැබිනට් මණ්ඩල තීරණයකින්ය. වෝහාරික විගණනයක් සිදුකරන ලෙස ජනාධිපති පරීක්ෂණ කොමිෂන් සභා වාර්තාවෙන්ද නිර්දේශ කර තිබුණි.

ජනාධිපති මෛත‍්‍රීපාල සිරිසේන ශ‍්‍රීලනිප සංවත්සරයේදී අදහස් දක්වමින් ඉඟිකර ඇත්තේ මෙම නඩු පැවරීම ගැන බවද එම ආරංචි මාර්ග වැඩිදුරටත් පවසයි. අර්ජුන් මහේන්ද්‍රන් ශ‍්‍රී ලංකාවට ගෙන ඒමට කටයුතු සූදානම් කර ඇති බවත්, අර්ජුන් මහේන්ද්‍රන්ට වඩා ඉහළ අයට පවා නඩු පැවරීමටද සියල්ල සූදානම් බවත් ජනාධිපතිවරයා ශ‍්‍රීලනිප සංවත්සරයේදී ප‍්‍රකාශ කළේය.

වෝහාරික විගණනයක් යනු කුමක්දැයි  පැහැදිලිි කරමින් හිටපු විගණකාධිපති සරත් මායාදුන්නේ ප‍්‍රකාශ කළේ එලෙස හඳුන්වන්නේ අධිකරණමය ස්වරූපයේ විගණනයකට බවයි. සාමාන්‍ය විගණනයකට වඩා වෝහාරික විගණනයකදී අපරාධ වරදක් සිදුවී ඇතිද යන්න පිළිබඳව ගැඹුරට සොයාබලන බව ඔහු කීය. එය අධිකරණමය කටයුත්තක් නොවන බව ඔහු කීය. එහෙත් අධිකරණයේ නඩු පැවරීමකදී සාමාන්‍ය විගණනයකට වඩා වෝහාරික විගණනයකට වැඩි පිළිගැනීමක් ඇතැයි ද ඔහු පැවසීය.

නීතිපති දප්පුල ද ලිවේරා මහතා ඉහත කී ජනාධිපති පරීක්ෂණ කොමිෂන් සභාව ඉදිරියේ නීතිපති දෙපාර්තමේන්තුව නියෝජනය කරමින් නියෝජ්‍ය සොලිසිටර් ජෙනරාල්වරයෙකු ලෙස සාක්ෂි මෙහෙයවීය. අමාත්‍ය රවී කරුණානායක, අග‍්‍රාමාත්‍ය රනිල් වික‍්‍රමසිංහ ඇතුළු මෙම ගනුදෙනුවට අදාළව එම කොමිසම හමුවට කැඳවන ලද පුද්ගලයන්ගෙන් දීර්ඝ ලෙස ප‍්‍රශ්න කරනු ලැබුවේද දප්පුල ද ලිවේරා මහතාය.x