දැනට පවතින වසංගත තත්වය නිසා මැතිවරණ ප‍්‍රචාරක කටයුතු කළ නොහැකි බවත් එවැනි පසුබිමක මැතිවරණය සාධාරණ ලෙස පැවැත්විය නොහැකි බවත් මැතිවරණ කොමිෂන් සභාව සමඟ පැවති සාකච්ඡාවකදී ආණ්ඩුවට සම්බන්ධ දේශපාලන පක්ෂ හැර අනෙකුත් පක්ෂවල නියෝජිතයන් ප‍්‍රකාශ කර ඇත.

මැයි 02 වැනිදා පැවති මෙම සාකච්ඡාවට සහභාගි වී තිබුණේ මැතිවරණ කොමිෂන් සභාවේ සාමාජිකයන් සහ ඉදිරි මහමැතිවරණයට නාමයෝජනා බාරදී ඇති දේශපාලන පක්ෂවල නියෝජිතයන්ය.

එහිදී දේශපාලන පක්ෂවල නියෝජිතයන් පෙන්වාදී ඇත්තේ සෞඛ්‍ය සේවා අධ්‍යක්ෂ ජෙනරාල්, ප‍්‍රජා සෞඛ්‍ය සේවා පිළිබඳ අධ්‍යක්ෂ, වෛරසවේදී විශේෂඥ වෛද්‍යවරුන් ඇතුළු පිළිගත් විද්වතුන් මැතිවරණය පැවැත්වීම සඳහා සම්පූර්ණ ආරක්ෂිත තත්වයක් ඇතැයි ප‍්‍රකාශයට පත් කරන තුරු මැතිවරණය පැවැත්වීම කල්දැමිය යුතු බවය. මැතිවරණ දිනයක් නියම කර ඇතත්, තවමත් මැතිවරණ ප‍්‍රචාරක කටයුතු සිදුකිරීමට නොහැකි වී ඇති බවත්, නිවෙස්වලට ගොස් මැතිවරණ ප‍්‍රචාරක කටයුතු කිරීම මෙන්ම මැතිවරණ රැස්වීම් පැවැත්වීමද අනාරක්ෂිත බවත් එහිදී පෙන්වාදී ඇත.

ඊට අමතරව මැතිවරණය පැවැත්වීමට නම් අධිකරණ කටයුතු සිදුකිරීමට අවශ්‍ය පසුබිම සැකසිය යුතු බවද එහිදී පෙන්වාදී ඇත. ශ්‍රේෂ්ඨාධිකරණය මෙන්ම මහේස්ත‍්‍රාත් අධිකරණ පවා විවෘත කළ යුතු බවත් සාධාරණ මැතිවරණයක් පැවැත්වීම සඳහා අධිකරණය සාමාන්‍ය පරිදි ක‍්‍රියාත්මක වීම වැදගත් බවත් එම දේශපාලන පක්ෂ පෙන්වාදී ඇත.