ඒකාබද්ධ විපක්ෂයේ මන්ත‍්‍රීවරුන් නියෝජනය කරන ශ‍්‍රී ලංකා පොදුජන පෙරමුණේ තිරය පිටුපස නායකයා සේ කටයුතු කළ බැසිල් රාජපක්ෂ මහතා වෙනුවට එම ස්ථානය හිටපු ජනපති මහින්ද රාජපක්ෂගේ නියමයෙන් නාමල් රාජපක්ෂට හිමිවී ඇතැයි එම පක්ෂයේ අභ්‍යන්තර ආරංචි මාර්ගවලින් දැනගන්නට ලැබේ. මේ අනුව එළැඹෙන 5 වැනිදා පැවැත්වෙන ‘ජනබලය කොළඹට’ මැයෙන් වූ ජනරැුළියේ සංවිධාන කටයුතු නාමල් රාජපක්ෂගේ නායකත්වයෙන් යුත් තරුණ පෙරමුණ යටතට පත්කර ඇත.

ඒ පිළිබඳව මහින්ද රාජපක්ෂ මහතා දිනේෂ් ගුණවර්ධන, විමල් වීරවංශ, වාසුදේව නානායක්කාර වැනි ඒකාබද්ධ විපක්ෂයේ ප‍්‍රබලයන්ට කතාකර නාමල් රාජපක්ෂ මහතාට සහාය දෙන්නැයි පවසා ඇති බව දැනගන්නට ලැබේ. මෙම තීරණයත් සමග පසුගිය කාලයේ නාමල් රාජපක්ෂ ප‍්‍රධාන කථිකයා වෙමින් බොහෝ ආසන තුළ පක්ෂයේ බිම් මට්ටමේ සාමාජිකයන් අමතා ඇත. ඒ මෙම කොළඹ රැුළිය තේමා කරගනිමින්‍ ය. ඉන්පසු ඔහු පසුගිය අගෝස්තු 20 වැනි දා ෆෙස්බුක් සමාජ ජාලයේ සිය ගිනුම උපයෝගීකරගනිමින් ජනතා ප‍්‍රශ්නවලට පිළිතුරු ලබා දී ඇත. ඒකාබද්ධ විපක්ෂයට හිතවත් මාධ්‍ය තුළ නාමල් රාජපක්ෂ මහතාට මේ දිනවල වැඩි ඉඩක් වෙන්වන්නේ ඔහුගේ මෙම නව ආගමනය නිසා බව යැයි දැනගන්නට ලැබේ.

මහින්ද රාජපක්ෂ මහතාගේ මෙම තීරණයත් සමග නාමල් රාජපක්ෂ මහතාට හිතවත් ඒකාබද්ධ විපක්ෂයේ තරුණ මන්ත‍්‍රීවරුන් වන ශෙහාන් සේමසිංහ, කංචන විජේසේකර, කනක හේරත්, දිලූ‍ම් අමුණුගම, ඞීවී චානක, රොෂාන් රණසිංහ, පියල් නිශාන්ත වැනි මන්ත‍්‍රීවරුන්ගේ සහ නාමල් රාජපක්ෂ මහතාට හිතවත් පළාත් පාළන නියෝජිතයින්ගේ ප‍්‍රධානත්වයෙන් මෙම සංවිධාන කටයුතු සිදුවන බව දැනගන්නට ලැබේ.

මෙම තත්ත්වය මත ඒකාබද්ධ විපක්ෂයේ බොහෝ දෙනෙකු තුළ දැඩි කළකිරීමක් ඇතිවී තිබෙන බවත් ඒ නිසා ඔවුන් සිටින්නේ දැඩි නොසතුටෙන් බවත් දැනගන්නට ලැබේ.