ඉදිරියේදී එළැඹෙන පාර්ලිමේන්තු මැතිවරණයේදී ශ‍්‍රී ලංකා පොදුජන පෙරමුණෙන් මැතිවරණයට ඉදිරිපත් වීම සඳහා එම පෙරමුණට සමීපව කටයුතු කරන සිවිල් සංවිධාන නියෝජිතයන්, වෘත්තිකයන් හා මාධ්‍යවේදීන් ඇතුළු විශාල පිරිසක් අතර තරගයක් දැන් සිටම ඇතිවී තිබෙන බව අනිද්දා සමග අදහස් දැක්වූ ශ‍්‍රී ලංකා පොදුජන පෙරමුණේ ප‍්‍රබල මන්ත‍්‍රීවරයෙක් කීය.

පාර්ලිමේන්තු මැතිවරණය පැවැත්වීමට තව මාස ගණනාවක් පැවතුණද, ඉදිරියේදී පොදුජන පෙරමුණේ මැතිවරණ වැඩපිළිවෙළ එළිදක්වද්දී එම කණ්ඩායම් හා සංවිධාන අතර ගැටුම් ඇතිවීමේ ඉඩක් ඇතැයි එම මන්ත‍්‍රීවරයා කීය.

ගෝඨාභය රාජපක්ෂගේ වියත් මග හා එළිය සංවිධාන සමග සිටින විශ‍්‍රාමික මිලිටරි සාමාජිකයන්, සිංහල ජාතිකවාදී සංවිධානවල සිටින ක‍්‍රියාකාරිකයන්, බැසිල් රාජපක්ෂ සමග සිටින විශ්වවිද්‍යාල ආචාර්යවරුන්ගේ සංවිධානවල හා ඉංජිනේරුවරුන්ගේ සංවිධානවල ක‍්‍රියාකාරිකයන් මේ වනවිට ඉදිරි පාර්ලිමේන්තු මැතිවරණයේදී අපේක්ෂකත්වය ලබාගැනීමට බලාපොරොත්තු වන සිවිල් සංවිධානවල සාමාජිකයන් බව ඔහු කීය.

පසුගිය කාලයේදී ක‍්‍රියාකාරීව අදහස් දැක්වූ වෛද්‍ය වෘත්තිකයන් කිහිපදෙනෙකුද, ප‍්‍රසිද්ධ රූපවාහිනී වැඩසටහන් ඉදිරිපත් කරන්නන් කිහිපදෙනෙකුද, විශ්වවිද්‍යාල ආචාර්යවරුන් කිහිපදෙනෙකුද, පොදුජන පෙරමුණෙන් මැතිවරණයට ඉදිරිපත් වීමට කැමැත්ත පළ කර ඇති බව ඔහු කීය. ඒ අනුව ඉදිරි මැතිවරණවලට නාමයෝජනා ඉදිරිපත් කිරීමේදී එම කණ්ඩායම් අතර විශාල ගැටුමක් ඇතිවිය හැකි බව ඔහු පෙන්වාදුන්නේය.

ප‍්‍රධාන වශයෙන් බැසිල් රාජපක්ෂ හිතවාදී සංවිධාන හා ක‍්‍රියාකාරීන් සාම්ප‍්‍රදායික සිංහල ජාතිවාදයට විවේචන එල්ලකරන බවත් දෙමළ හා මුස්ලිම් ඡුන්ද පදනම් පොදුජන පෙරමුණට ගොනු කරගැනීම කෙරෙහි අවධානය යොමුකරන බවත් ඔහු කීය. එහෙත් ගෝඨාභය රාජපක්ෂ සහ පොදුජන පෙරමුණ සමග එකට කටයුතු කරන සිංහල ජාතිවාදී පක්ෂ සමග හිතවත් කණ්ඩායම් සම්පූර්ණයෙන්ම සිංහල ජාතිවාදය පදනම් කරගත් මැතිවරණ ව්‍යාපාරයකට කැමැත්තක් දක්වන බව ඔහු පෙන්වීය. ඒ අනුව එම කණ්ඩායම් අතර ඉදිරි මැතිවරණ ව්‍යාපාරවලදී විවෘත මතගැටුම් වර්ධනය විය හැකි බව ඔහු පෙන්වීය.

ඔහු එයට සාධක ලෙස පෙන්වුවේ දැනට ක‍්‍රියාකාරීව සිටින ගෝඨාභය හිතවාදී කණ්ඩායම් සමාජ මාධ්‍යවලින් බැසිල් හිතවාදීන් වන මහින්ද පතිරණ වැනි පුද්ගලයන්ටත් බැසිල් රාජපක්ෂටත් පහර එල්ලකරන බවය. සමාජ මාධ්‍ය අවකාශයේ අදහස් දැක්වීම්වලින් මේ බෙදීම පැහැදිලිව දකින්නට ඇතැයි ඔහු කීය.

අනුරංග ජයසිංහ