තමාගේ බිරිඳ සහ සහෝදරියගේ නිවෙස්වලට පොලීසිය, බුද්ධි අංශ සහ රහස් පොලීසිය බව පවසමින් විවිධ කණ්ඩායම් පැමිණ වරින් වර ප්‍රශ්න කර ඇති බවත්, එසේ පැමිණියේ පොලීසියේ නිලධාරීන්දැයි සැකයක් ඇති බවත් සඳහන් කරමින් මාධ්‍යවේදියෙකු සහ මාධ්‍යවේදීන්ගේ වෘත්තිය සමිති ක්‍රියාකාරිකයෙකු වන රාමචන්ද්‍රන් සනත් පොලිස්පති සී.ඩී. වික්‍රමරත්න වෙත ලිපියක් යොමු කර තිබේ.

රාමචන්ද්‍රන් සනත් ‘උදයන්’ පුවත්පතේ සහ වෙබ් අඩවි කිහිපයක ස්වාධීන මාධ්‍යවේදියෙකු ලෙස සේවය කරන අතර ශ්‍රී ලංකා වෘත්තිය ජනමාධ්‍යවේදීන්ගේ සංගමය ඇතුළු මාධ්‍ය සංවිධාන කිහිපයක ක්‍රියාකාරිකයෙකු ලෙස කටයුතු කරයි. ඊට අමතරව ඔහු කඳුරට දෙමළ ජනතාවගේ අයිතිවාසිකම් ක්‍රියාකාරිකයෙකු ලෙස කටයුතු කරමින් සිටී.

මැයි 25 දිනැතිව නිකුත් කරන ලද එම ලිපියේ වැඩිදුරටත් මෙසේ සඳහන් වෙයි.

‘පොලීසිය, අපරාධ විමර්ශන දෙපාර්තමේන්තුව (රහස් පොලීසිය) සහ බුද්ධි අංශය ලෙස තමාව හඳුන්වාගන්නා කිහිපදෙනෙක් මා පිළිබඳ තොරතුරු රැස් කරමින් සිටිති. 2021 මාර්තු මාසයේදී ගම්පොළ පිහිටි මගේ මවගේ නිවසට ගිය කීපදෙනෙකු තමන් ගම්පොළ පොලීසියෙන් යැයි පවසමින් මා කරන රැකියාව, මගේ රැකියා ස්ථානය හා මා ගම්පොළ අතහැර වෙනත් ප්‍රදේශයකට යෑමට හේතුව ඇතුළු තවත් තොරතුරු අසා දැනගෙන ඇත.

පසුව තලවකැලේ පොලිස් කොට්ඨාසයේ අපරාධ විමර්ශන දෙපාර්තමේන්තුවේ නිලධාරීන් ලෙස පවසමින් තවත් දෙදෙනෙක් දකුණු මඩකුඹුර ප්‍රදේශයේ පිහිටි මගේ බිරිඳගේ නිවසට මා සොයා පැමිණ ප්‍රශ්න කළහ. ඔවුන් විසින් පිඩි තලපරාදේ සංවිධානය සහ මලෙයියහ උරිමෙ කුරල් (කඳුකර යුක්තියේ හඬ) ව්‍යාපාරය සංවිධානය කර පවත්වන ලද කඳුකර කම්කරු විරුවන් අනුස්මරණ දිනය පිළිබඳ තොරතුරු විමසන ලදි. අපගේ සංවිධාන පිළිබඳවද තොරතුරු විමසන ලදි. අපරාධ විමර්ශන දෙපාර්තමේන්තුවේ නිලධාරීන් යැයි විශ්වාස කර මමද ඔවුන්ට තොරතුරු ලබා දුන්නෙමි. වැඩි විස්තර අවශ්‍ය නම් ඒ සඳහා ඕනෑ වෙලාවක සහයෝගයෙන් කටයුතු කිරීමට සූදානම් බවද මම සඳහන් කළෙමි.

මෙම තත්වය තුළ අද (2021-05-25) උදේ මගේ සහෝදරියගේ නිවසට ගම්පොළ මහර ප්‍රදේශයේ පොලිස් නිලධාරියෙකු බව පවසමින් ඇයෙකු පැමිණ මා ගැන තොරතුරු ලබාගෙන ඇත.

මෙලෙස විමසීම් කටයුතු සිදු කරන්නට හේතුව කුමක්දැයි මට වැටහෙන්නේ නැත. ඇත්ත වශයෙන්ම තොරතුරු රැස් කරමින් සිටින්නේ පොලීසියද යන සැකය මා හට පැන නැගී ඇත. එසේ නොවේ නම්, සැලසුම් සහගත කණ්ඩායමක් මා හට තර්ජනාත්මක ස්වරූපයෙන් ක්‍රියා කරන්නේද යන සැකයද මට ඇති වී තිබේ. එම නිසා මේ පිළිබඳ සොයා බලා සත්‍ය තත්වය මට දන්වන ලෙස මම ඔබතුමන්ගෙන් ගෞරවයෙන් ඉල්ලා සිටිමි.’ ■