ජනාධිපති ඝාතන කුමන්ත‍‍්‍රණය පොදු මහජනතාව හැර, රටේ සෙසු ආණ්ඩු විරෝධී කණ්ඩායම් සිතූපැතූ සම්පත් සම්පත් ලබාදෙන කප්රුකක් බවට පත්කරගෙන තිබේ. ඒකාබද්ධ විපක්ෂයට මෙම කුමන්ත‍‍්‍රණය ආණ්ඩුව පෙරළීම කෙසේ වෙතත් එය දෙපලූ කරගත හැකි පුවත් මවන මැෂිමකි. ගෝඨාභය හා මෛත‍‍්‍රීපාල සිරිසේනගේ අනාගත එක්වීමක් ගැන සිහින මවන අයට එය වින්දනයකි. තවත් අයට මේ ගැන තොරතුරු සැපයීමෙන් හෝ අනෙක් නිලධාරීන්ට අකුල්හෙළා තරුපටි ගසා ඉහළට යා හැකි ඉනිමගකි. පසුගි ය ආණ්ඩුව සමයේ සිටි හොරුන්ට හා අපරාධකරුවන්ට ලිස්සන බෝට්ටුවකි. මාධ්‍යයට අර්ධ සත්‍යය හෝ අසත්‍යය, සත්‍යය කර පෙන්වා රේටින් වැඩිකරන හෝ පුවත්පත් පිටපත් අලෙවිය වැඩි කරන ප‍‍්‍රවෘත්ති මැවිය හැකි ඉල්ලමකි.

පසුගිය 12 දා ප‍‍්‍රවෘත්ති සාකච්ඡුාවක් පවත්වමින් මෙම කුමන්ත‍‍්‍රණ කතාවේ දෙවන අදියරේ කොටසක් එළිදැක්වුයේ ඒ අදාළ පළමු හෙළිදරව්ව කිරීම සිදුකළ නාමල් කුමාරගේ නිවසේදීමය. එහිදී ඔහු පැවැසුවේ සිංහල කතාකිරීමට නොහැකි ඉන්දීය ජාතියෙකු සටහන් කරගත් සිතියමක් ආධාරයෙන්, නාමල් කුමාර (තමා) ඝාතනය කිරීමට සූදානමක් ඇති බවත් මෙම කුමන්ත‍‍්‍රණය හා සම්බන්ධ තොරතුරු තමා සතුව ඇති බවත්ය.

මෙම ඉන්දියානු ජාතිකයාගේ හැසිරීමත් හරිම අමුතුය. ඒ පිළිබදව කල්පනා කරන විට අපට සැක උපදින්නේ මේ පුද්ගලයා කෙසේ හෝ මේ සම්බන්ධයෙන් විමර්ශන පවත්වන කණ්ඩායම්වල අත්අඩංගුවට පත් වීම අරමුණු කරගනිමින්ම පැමිණ ඇති බවය. කෙසේ වෙතත් මෙම අබිරහස් පුද්ගලයා නාමල්ගේ නිවස තෙක් පැමිණි ආකාරය හෝ ඔහුට ඒ වෙනුවෙන් උපකාර කළ අයෙකු සම්බන්ධයෙන් හෝ මෙම ලිපිය ලියන මොහොත වන තුරුත් අනාවරණය වී නොතිබූ අතර පොලිස් මාධ්‍ය ප‍‍්‍රකාශකවරයා පවසන්නේ මෙවැනි කතාවකි.

‘එවැනි කෙනෙක් අත්අඩංගුවට පත්වෙලා තියෙනවා. ඔහුට සිංහල භාෂාව කතාකිරීමේ හැකියාවක් නෑ. ඔහු පවසන්නේ නාමල් කුමාර ඝාතනය කිරීමට සුදානම් වන බවක් තමාට හැඟුණ නිසා ඔහුව බේරා ගැනීමට පැමිණි බවයි. දැනට මේ පුද්ගලයා රහස් පොලිස් බාරයට අරගෙන අධිකරණයට කරුණු වාර්තා කරලා මොහු ගැනත් විමර්ශනයක් ආරම්භ කරලා තියෙනවා.’

ඒ අනුව සිදුවීම් පෙළගැසෙන ආකාරයත් මෙම අනන්‍යතාව තහවුරු කර ගත නොහැකි පුද්ගලයා සම්බන්ධයෙන් පළවෙන තොරතුරුත් කියන්නේ මෙම පුද්ගලයා ඉන්දීය මධ්‍යම රහස් ඔත්තු සේවාව වන රෝ සංවිධානයට සම්බන්ධ විය හැකි බවය. ත‍‍්‍රස්ත විමර්ශන ඒකකයේ නියෝජ්‍ය පොලිස්පතිවරයා රෝ ඔත්තු සේවයේ අවශ්‍යතාවට අනුව ජනාධිපතිවරයා හා ගෝඨාභය රාජපක්ෂ ඝාතනයට උත්සාහ කළ බව මෙම කරුණුවලින් තහවුරු කිරීම මේ රංගනයේ අරමුණ විය හැකිය. එහිම දිගුවක් ලෙස අද මහින්ද රාජපක්ෂ පවුල ඝාතනය කිරීම දක්වා මෙම කුමන්ත‍‍්‍රණය කි‍‍්‍රයාත්මක කළ බවට වාර්තා පළවෙනු දැකිය හැකිය. එම සිදුවීම්වල මුලාරම්භය දූෂණ විරෝධී බලකායේ නාමල් කුමාර කියන පරිදි, දැනට මාස කිහිපයකට පෙර (නියෝජ්‍ය පොලිස්පති නාලක ද සිල්වාගේ සිද්ධිය වූ කාලවකවානුව) නොව මෙම ආණ්ඩුව බලයට පත්වීමත් සමග ආරම්භ වී ඇත.

2015 වසරේ යහපාලන ආණ්ඩුව බලයට පත්වී ආරම්භ කළ වංචා දූෂණ හා අපරාධ විමර්ශනවලදී පැවති රාජපක්‍ෂ ආණ්ඩුවේ ඊට සම්බන්ධ පුද්ගලයන් ප‍‍්‍රකාශ කළේ යහපාලනය විසින් තමන්ගෙන් දේශපාලන පළිගැනීම් කරන බවය. රණවිරු දඩයම් සිදුකරන බවටද ආණ්ඩුව රට පාවා දීමට අතගසා ඇති බවටද, ඔවුහු ප‍්‍රකාශ කළෝය. මෙම රජය බලයට පත්වීමෙන් පසු වැඩි වශයෙන්ම රාජපක්‍ෂලා පීඩාවට ලක්වූයේ ඔවුන් සිදුකළ අපරාධ හා දුෂණ සම්බන්ධ විමර්ශනවලදීය. මූල්‍ය අපරාධ කොට්ඨාසය හා අපරාධ පරීක්‍ෂණ දෙපාර්තමේන්තුව හා ත‍‍්‍රස්ත විමර්ශන අංශය විසින් මෙම පරීක්‍ෂණ මෙහෙයවනු ලැබීය. එම තත්ත්වය තුළ පසුගි ය ආණ්ඩුවේ සිටි පුද්ගලයන් පොලිසිය සමග සිටියේ දැඩි කේන්තියකිනි. එක් අවස්ථාවක මෙම විමර්ශන පැවැත්වීම සම්බන්ධයෙන් විපක්‍ෂයේ දේශපාලකයකු සඳහන් කළේ තමන් බලයට පත්වූ සැණින් මූල්‍ය අපරාධ කොට්ඨාසයේ නිලධාරීන් ගල් ගසා මරා දමන බවටය. මෙම කුමන්ත‍‍්‍රණයේ ආරම්භය එවැනි ප‍‍්‍රකාශවල හා ඉහත සඳහන් දේශපාලන සටන්පාඨවල දිගුවක් වශයෙන් හඳුනාගත හැකිය. කෙසේවෙතත් රටේ ජනතාව පොලිසියට හා ආණ්ඩුවට ඇති විරෝධය නිසාම ගෝඨාභය, මෛතී‍‍්‍ර ඝාතන කථාවල පරස්පර හා විගඩම් ස්වරූපය නොසලකා හරිමින්ම, පොලිසිය මෙම කුමන්ත‍‍්‍රණය කළ බවට සෘජුවම ඇඟිල්ල දිගු කරන්නේය. පොලිසිය කෙරෙහි ජනතාව බිඳවමින් ඔවුන් මේ තාක් සාර්ථකව ඉදිරියට කරගෙන එනු ලැබූ පරීක්ෂණ පිළිබඳව ජනතාව තුළ නොපහන් හැඟීමක් ඇතිකිරීම මේ සිදුවීම් දාමයේ ඇතුළත කතාව විය හැකිය.

යහපාලන ආණ්ඩුව බලයට පත්වීමට පසු ආරම්භ කළ දූෂණ හා අපරාධ සම්බන්ධ විමර්ශනවලදී එම විමර්ශනවල තොරතුරු දැනගැනීම සඳහා, පැවති රාජපක්‍ෂ ආණ්ඩුවේ ප‍‍්‍රබලයන් විසින් බුද්ධි තොරතුරු ඒකකයකට සමාන ව්‍යුහයක් පවත්වා ගෙනගොස් තිබේ. ඒ රාජපක්‍ෂලාට හිතවත් ආරක්‍ෂක අංශවල නිලධාරීන්ගෙන්යැයි සිතිය හැකිය. එමගින් ඔවුන් ලබාගන්නා තොරතුරු ඒකාබද්ධ විපක්‍ෂයේ දේශපාලනඥයන් විසින් වරින් වර එම විමර්ශනවලට පෙර හෙළිකරනු ලැබූ බව දැනට අනාවරණය වී තිබේ. ඒ මෙම නීතිය ක‍්‍රියාත්මක වීම් දේශපාලන පළිගැනීම් සහ රණවිරු දඩයම් ලෙස හුවා දැක්වීමටය. අනෙක් පැත්තෙන් එම අත්අඩංගුවට ගැනීමට ජනතා විරෝධයක් සමාජයේ නිර්මාණය සඳහා ය. නිදසුන් වශයෙන් මූල්‍ය අපරාධ කොට්ඨාසය හෝ අපරාධ පරීක්‍ෂණ දෙපාර්තමේන්තුව සිදුකරනු ලැබූ අත්අඩංගුවට ගැනීම්වලදී එම සිද්ධි දින කිහිපයකට පෙර අනාවරණය කරමින් මාධ්‍ය සාකච්ඡුා පවත්වන්නේ ය. මේ තොරතුරු සැපයීම සඳහා හමුදාවේ, පොලිසියේ විශ‍‍්‍රාම ගිය පිරිසක්ද සම්බන්ධ වූ බවට තොරතුරු තිබේ.

නාමල් කුමාර එවැනි තොරතුරු සපයමින්, පසුගිය ආණ්ඩුවේ ප‍‍්‍රධානීන් සමග සමීපව කටයුතු කළ අයෙකු බවට අනාවරණය වන අතර අනෙක් පැත්තෙන් ඔහු යුද හමුදාවට, නාවික හමුදාවට හා ගුවන් හමුදාවට තොරතුරු සැපයූ ඔත්තුකරුවෙකි. ඔහු පොලිස්පතිවරයා මාර්ගයෙන් නාලක ද සිල්වා හඳුනා ගන්නේ අදාළ දේශපාලන සැලසුමකට අනුවය. එම හඳුනාගැනීමෙන් පසුව නාවික හමුදාව, ගුවන් හමුදාව හා යුද හමුදාව සමග සබඳතා පැවැත්වීමෙන් ලැබෙන බුද්ධි තොරතුරු යම් ප‍‍්‍රමාණයක් නාලක සිල්වාට ලබාදී විශ්වාසය දිනාගත් අතර ජාතීවාදී කණ්ඩායම්වල තොරතුරුද නාලක සිල්වාට ලබාදී තිබේ. රෝහින්යා සිදුවීම හා තෙල්දෙණියේ ගැටුම හා සම්බන්ධ පුද්ගලයන් සමීපව කටයුතු කර ඇති නාමල් කුමාර ඔවුන් එම ගැටුම්වලට පොළඹවා පසුව ත‍‍්‍රස්ත විමර්ශන ඒකකයට කොටු කර දී ඇති බවට තොරතුරු පවතී. මෙම ජාතිවාදී සංවිධානවල පුද්ගලයන් නාමල් කුමාර හඳුන්වන්නේ තමන් සමීපව කටයුතු කළ අයෙකු වශයෙනි. ඒ ඔහු ඔවුන්ගේ ද හිත දිනාගෙන වෙනත් අරමුණක් වෙනුවෙන් වැඩකළ නිසාය. මේ ජාතිවාදී කල්ලි කණ්ඩායම්වලද නාමල් කුමාරගේද අවසාන බලාපොරොත්තුව මේ ආණ්ඩුව විනාශ කර රාජපක්ෂ ආණ්ඩුවක් බලයට ගෙනඒමය.

 ධම්මික ප‍්‍රියදර්ශන