”ඇබා කණ්ඩායමේ ගීත භක්තිමත් ස්තෝත‍්‍ර ගායනා වගෙයි. ඒවාට සවන් දුන්නේ කොහේදී ද යන්න අමතකව යන තරමට ඒවා අපේ සිරුරු තුළ දිය වෙලා යනවා.”


මේ වදන් ප‍්‍රකට නළු හියු ස්කිනර්ගේ ය.
”අවුරුදු අටේ වයසේදී මං මගේ පුංචි යෙහෙළියන් සමග කාමරයකට වී, සාද ඇඳුම් ඇඳගෙන, මයික්‍රොෆෝන් විදියට කොසු මිටි අරගෙන සින්දු කිය කියා නැටුවා. ඒ සින්දු ඇබා කණ්ඩායමේ සින්දු,”


ජනප‍්‍රිය ගායිකා කයිල් මිනෝග් වරක් එසේ සිය අතීතය සිහි කළා ය. 1984 වසරෙන් පසු ඇබා සංගීත කණ්ඩායම ගීත ගායනා කළේ නැත. එහෙත් තිස් පස් වසරකට පසුව ද ඔවුන් හඹා එන මෙබඳු ලක්ෂ සංඛ්‍යාත ප‍්‍රශංසාවන් එලෙසම ය. ඊට හේතුව ඔවුන්ගේ ගැයුම්වල රැුඳි පැරණි නොවන මිහිරියාව ම මිස අන් කවරක් ද?


එක් දහස් නවසිය හැත්තෑව දශකයේදී ස්වීඩනයේ ඇබා :්ඊඊ්* කණ්ඩායම සංගීත ලෝකය විස්මයට පත් කළේ අද පවා අතිශයින් ජනප‍්‍රියව පවතින විශිෂ්ට ගීත ගොන්නක් නිර්මාණය කරමිනි. එයට :්ඊඊ්* යන නම යොදනු ලැබුවේ එහි සාමාජිකයන් වූ ඇග්නෙතා ෆෝල්ස්කොග්, බොජෝන් අල්වයස්, බෙනී ඇන්ඩර්සන් සහ ඇනී-ෆ‍්‍රිඞ් ලින්ග්ස්ටැඞ්ගේ නම්වල මුලකුරු එක් කරමිනි. ඇග්නෙතා සහ අල්වයස් තම මිතුරු යුවළක් වූ ඇනී සහ බෙනීට සයිප‍්‍රස් දිවයිනෙහි නිවාඩුවක් ගත කිරීම සඳහා ආරාධනා කළේ 1970 අප‍්‍රියෙල් මාසයේදී ය. මේ සිව් දෙනා වෙරළේ වාඩි වී විනෝදයට ගී ගයමින් සිටියහ. ඒ විනෝදය ලෝකය පුරා රසික හදවත් ආකර්ෂණය කළ සංගීත චාරිකාවක ආරම්භය බව එදින ඔවුන්වත් නොසිතන්නට ඇත.


ඉතිහාසයේ වැඩි ම අලෙවි වාර්තා තැබූ සංගීත කණ්ඩායම් දෙකෙන් එකක් වන ඇබා කණ්ඩායමේ ගී තැටි මිලියන 390කට අධික ප‍්‍රමාණයක් ලොව පුරා අලෙවි වී තිබේ. සදානුස්මරණීය ගීත ලෙස හැඳින්විය හැකි Waterloo, Honey Honey, Dancing Queen, Fernando, Take A Chance On Me, The Winner Takes It All, Lay All Your Love on Me iy Mamma Mia ඇතුළු මියුරු වූත්, අර්ථවත් වූත් ගීත සිය ගණනක් ඔවුහු ලෝකයට දායාද කළෝ ය.


ඉඳහිට මෙරට ඉංග‍්‍රීසි ගුවන් විදුලි නාලිකාවල වාදනය කෙරෙන ඇබා කණ්ඩායමේ අපූරු ගීයක් නොදැනුවත්ව ම මගේ ප‍්‍රියතම ගීතයක් බවට පත් විය. එය ශෝකයට පත්ව සිටින මිතුරියක අමතා ගැයෙන්නකි. සොවින් කලකිරීමෙන් පසු නොවී, සිදු වූ දේවල් අමතක කර, ධෛර්යයෙන් ජීවිතයට මුහුණු දෙන ලෙස ගායිකාව, ඇග්නෙතා එහිදී ඉල්ලා සිටින්නේ සිය මිතුරියට සවියක් වීමට සිය මිත‍්‍රත්වයත්, ඇයට වාරු වී හැඬීමට සිය උරහිසත් ප‍්‍රදානය කරමිනි. ජීවිතයේ දුක්ඛ දුර්ගයෙන්, ධෛර්යයේ සොඳුරු මාවතට අප කැඳවන මේ සුවිශේෂ ගීතය යුරෝපයේ සහ පොදුවේ ලෝකය පුරාමත් අතිශය ජනප‍්‍රියත්වයට පත්ව විශිෂ්ට ගීත ලැයිස්තුවල මුල් තැන් දිනූ නිර්මාණයකි.
මෙම ගීතය හඳුන්වා ඇත්තේ ”චිකිටීටා” නමිනි. ”චිකිටීටා” යනු කාන්තා නාමයකැයි සිතෙන්නට ඉඩ ඇතත් එය එසේ නොවේ. මේ ස්පාඤ්ඤ වදනේ අරුත ”කුඩා දැරිය” වැන්නකි. එය දියණියකට හෝ මිතුරියකට යොමු කරන ආදරණීය ආමන්ත‍්‍රණයක් ලෙස අපට හැඟී යයි.


පැංචියේ! මට කියන්න ඇයි මේ වේදනාවෙන් වෙලී පැටලී ගිහින් ඔබ ඔබේම ශෝකෙන් නෑ ඔබේ දෑසේ හෙටක් ගැන පැතුමන් මං කොච්චර අකමැති ද දකින්න ඔබ මෙලෙසින්
නෑ කියන්න අද ඔබට බෑ කිසි ලෙසින් මට පෙනෙනවා ඔබ ඉන්නෙ හරි දුකින් මුනිවතින්
පැංචියේ දැන් මට ඇත්ත කියන්න උරහිසක් වෙන්නම් මං ඔබට අඬන්න ඔබේ හොඳ ම මිතුරිය වන මා ගැන බලාපොරොත්තු තබන්න


බෙනී ඇන්ඩර්සන් විසින් රචනා කරන ලද මේ ගීයට මුල් වූයේ ගායිකා, ඇග්නෙතාගේ ම අත්දැකීමක් බව ඇතැමෙක් පවසති. ඇය මෙයින් අමතනුයේ දිනෙක දුකින් පසෙකට වී හඬමින් සිටි සිය කුඩා දියණිය බව ඔවුන්ගේ මතයයි. තවකෙකුට අනුව මෙය ඇගේ නිවසේ අත්උදව්කාරිය අමතා ගැයෙන්නකි. සත්‍යය කුමක්දැයි ඇබා කණ්ඩායම කිසිදා පවසා නැතත් මේ ගීතය දුකින් සහ කලකිරීමෙන් සිටින ඕනෑම කෙනෙකු වෙනුවෙන් නිර්මාණය වූවක් ලෙස පුළුල් අර්ථයෙන් වටහා ගැනීම වඩාත් සුදුසු බව හැෙඟ්. දුක් ජාලාවෙන් පිටතට පැමිණ නැවත සුපුරුදු ජීවිතය තුළ ස්ථානගත වීමේ අපහසු කාර්යය මේ ගීතයෙන් දිරි ගන්වනු ලබයි. එය අප කාහටත් මුහුණ දෙන්නට සිදු වන අත්දැකීමකි. ගීතයක මිහිර අතරින් ජීවිතයට ද යමක් එක් කරන්නේ නම් එය සුවිශේෂ ගීතයක් වන බව නිසැක ය.


ඔබ හැමදා ම විශ්වාස කළා තමන් ගැන ඒත් දැන් ඔබ පියාපතක් බිඳගෙන පැංචියේ ඔබත් මාත් දන්නවා හද රිදුම් එන තැන යන තැන කැලැල් ද මැකෙන බව අවසන
ඔබ නැවත රැුඟුමේ යෙදිය යුතුයි වේදනාව නිමා වෙයි මේ දුක් වීමට කාලය නොවෙයි
පැංචියේ ඔබත් මාත් සිටින විට හඬමින් තවමත් හිරු අහසේ බැබළේවි ඔබට ඉහළින් ඔබ ගයනු එදා ලෙස අහන්න දෙන්න විගසින් පැංචියේ, අලූත් ගීයක් ගයන්න සතුටින්


ඇබා කණ්ඩායමේ අතිසාර්ථක නිර්මාණයක් බවට පත් වූ මේ ‘චිකිටීටා’ ගීතය තවත් අතකින් සුවිශේෂ වෙයි. එය 1979 වසරේ ලෝක ළමා සංවිධානයේ සුබසාධන කාර්යයක් සඳහා භාවිත කරන ලද අතර ඉන් පසු ගීතයෙන් උපයනු ලබන සම්පූර්ණ මුදලින් අඩක් ළමා සුබසාධනය උදෙසා යොදවනු පිණිස යුනිසෙෆ් සංවිධානය වෙත ප‍්‍රදානය කිරීමට ඇබා කණ්ඩායම විසින් තීරණය කරන ලදි. ඇත්තෙන් ම ලෝකයේ දුකට පත්ව සිටින දරුවන් විෂයෙහි වුව ද, ජීවන ධෛර්යේ පණිවුඩය ඇතුළත් මේ ගීය මනාව පෑහෙන අයුරු අපට නිරීක්ෂණය කළ හැකි ය.