මේ මොහොතේ පාර්ලිමේන්තුව කැඳවන ලෙස ඉල්ලා සිටින බවත්, ආණ්ඩුවට වගකීමෙන් සහයෝගය දීමට තමන් සූදානම් බවත් පාර්ලිමේන්තුවේ බහුතරය නියෝජනය කරන විපක්ෂයේ දේශපාලන පක්ෂවල නායකයන් නිවේදනයක් මගින් ප‍්‍රකාශ කර ඇත.

මුදල් අනුමත කරගැනීම, මෙම තත්වයට ගැළපෙන පරිදි නව පනත් ආදිය සම්මත කරගැනීම සඳහා සහයෝගය ලබාදෙන බව එමගින් දැනුම් දී ඇත.

රනිල් වික‍්‍රමසිංහ. ආර්. සම්බන්ධන්, සජිත් පේ‍්‍රමදාස, පාඨලී චම්පික රණවක, මනෝ ගනේෂන්, රිෂාඞ් බදියුදීන්, රවුෆ් හකීම් යන පක්ෂ නායකයන් එයට අත්සන් තබා ඇත. පාර්ලිමේන්තුව නියෝජනය කරන බහුතර මන්ත‍්‍රීවරු ඔවුන් නායකත්වය දරන පක්ෂවලින් තේරී පත්ව සිටිති.

පාර්ලිමේන්තුව විසිරවීම සඳහා ජනාධිපතිවරයා මාර්තු 02 වැනිදා නිකුත් කළ නියෝගය අහෝසි කරන ලෙසත්, සැප්තැම්බර් දක්වා කාලය ඇති පාර්ලිමේන්තුව නැවත කැඳවන ලෙසත් එමගින් ඉල්ලා ඇත.

එම සම්පූර්ණ නිවේදනය මෙසේය.

‘කොවිඞ්-19 වසංගතය ව්‍යාප්ත වීම සහ එය මැඩපැවැත්වීමට රජය ගෙන ඇති ක‍්‍රියාමාර්ග ඇතුළු පසුබිම තුළ, ලෝකයේ අනෙක් රටවල මෙන්ම අපේ රටේද පෙර නොවූ විරූ අභියෝග ගණනාවක් මතු වී තිබේ. පසුගිය සතිය වනතුරු වසංගතයේ ව්‍යාප්තිය පාලනය කිරීමට හැකි වෙනු ඇතැයි අපේ රටේ ගොඩනගා තිබූ අපේක්ෂාව දැන් බිඳවැටෙමින් තිබේ. ඉදිරි සති කිහිපය තුළ තීරණාත්මක ලෙස එහි ව්‍යාප්තිය පාලනය කිරීමට නොහැකි වුවහොත්, දැනට රටේ පවතින මහජන සෞඛ්‍ය සේවා අර්බුදයට අමතරව ආර්ථික, සමාජීය හා දේශපාලන ක්ෂේත‍්‍ර වල අර්බුද ඇතිවිය හැකිය.

සිය ගණනක් ජනතාව ආසාදනය වීමත්, දහස් ගණනක් ජනතාවට ඔවුන්ගේ ජීවනෝපාය අහිමි වීමත්, බෙහෙවින් කණගාටුදායක තත්වයකි. පෙරටුගාමී සෞඛ්‍ය සේවකයන්, තමන්ගේ ආරක්ෂාවද නොතකා, අප සියල්ලන්ම ආරක්ෂා කිරීමට ඔවුන්ගේ උපරිම උත්සාහයන් දරමින් සිටිති. අපේ දේශපාලන තීන්දු හේතුවෙන් ඔවුන්ගේ උත්සාහයන් නිෂ්ඵල නොවිය යුතුය.

පාර්ලිමේන්තුව විසුරුවා හැර තිබීමත්, ආණ්ඩුක‍්‍රම ව්‍යවස්ථාවෙන් නියමිත පරිදි නව පාර්ලිමේන්තු මැතිවරණය පැවැත්වීමට නොහැකි වීමත්, රටේ පවත්නා දේශපාලන වාතාවරණය තුළ අවිනිශ්චිතතාවයක් ඇති කිරීමට විශේෂයෙන් තුඩු දී තිබේ. මැතිවරණ කොමිෂන් සභාව විසින් පාර්ලිමේන්තු මැතිවරණය සඳහා නියම කරන ලද 2020 ජුනි 20 වන දිනදීත් මැතිවරණය පැවැත්වීමට හැකි වේද යන්න අවිනිශ්චිතය. මෙම දිනයද, රටේ පවත්නා මහජන සෞඛ්‍ය තත්වය සලකා, නැවත සලකා බැලෙනු ඇති බව මැතිවරණ කොමිෂන් සභාවද ප‍්‍රකාශ කර තිබේ.

නිදහස් හා සාධාරණ මැතිවරණයක් පැවැත්වීමට සුදුසු වාතාවරණයක් ඉදිරි මාස දෙක තුළදී බිහිවෙනු ඇතැයි අපට සාධාරණ අපේක්ෂාවක් තැබිය නොහැක. එමෙන්ම නුදුරු කාලයේදී මහ මැතිවරණයක් පැවැත්වීම මගින් අප රටේ ජනතාව විශාල සෞඛ්‍ය අවදානමකට අනාවරණය කිරීම නොකළ යුතු දෙයක් යැයි අපි සිතමු. ශ‍්‍රී ලංකා ජනතාව මැතිවරණ ව්‍යාපාරයට සක‍්‍රිය ලෙස සහභාගි වෙමින්ද, ඉහළ ප‍්‍රතිශතයක් ඡුන්දය දීමට ඉදිරිපත් වීමෙන්ද, ප‍්‍රජාතන්ත‍්‍රවාදී ක‍්‍රියාවලිය වෙත තමන් සතු කැපවීම සෑම අවස්ථාවකදීම ප‍්‍රදර්ශනය කර ඇත. එබැවින් නිදහස් හා සාධාරණ මැතිවරණයක් සඳහා බාධා රහිත චන්ද ප‍්‍රචාරක ව්‍යාපාර වලටද අවකාශ තිබිය යුතුය. මහජන සහභාගීත්වයෙන් යුත් මැතිවරණ ප‍්‍රචාරක ව්‍යාපාර, කොවිඞ්-19 වෛරසය පැතිරීමට අනුබලයක් වනු ඇත. පසුගිය දිනවල සිදුවූ රෝගීන්ගේ සංඛ්‍යාවේ පෙර නොවූ විරූ වැඩිවීම අප අමතක නොකළ යුතුය.

අන් සෑම ප‍්‍රජාතන්ත‍්‍රවාදයක මෙන්ම අප රටද පාලනය වන්නේ විධායකය, ව්‍යවස්ථාදායකය සහ අධිකරණය යන ආයතන තුනෙන් වන අතර ඒවාට එකිනෙකට වෙනස් හා නිශ්චිත වූ බලතල තිබේ. නීතියේ ආධිපත්‍යය පැවතීමට නම් මෙම ආයතන තුනම සක‍්‍රීයව පැවතීම අත්‍යවශ්‍ය වේ. ඒවායේ සක‍්‍රීය පැවැත්ම අප රටේ වතර්තමාන තත්වය නිසා අන් කවරදාටත් වඩා අද වැදගත් වී ඇත. එසේ වුවත් අප රටේ වර්තමාන අද අර්බුදයේ ඇති විශේෂත්වය නම් එය දිගහැරෙන්නේ පාර්ලිමේන්තුව අක‍්‍රිය කර ඇති පසුබිමක වීමයි. හදිසි අවස්ථාවක් පැන නැග ඇතැයි ජනාධිපතිතුමාට හැෙඟන්නේ නම්, විසුරුවාහැර ඇති පාර්ලිමේන්තුව යළි කැඳවීමට ආණ්ඩුක‍්‍රම ව්‍යවස්ථාවේ 70 වැනි ව්‍යවස්ථාව බලය ලබාදී ඇත. එම බලය ජනාධිපතිවරයා විසින් භාවිතා කර නැත. පාර්ලිමේන්තු මැතිවරණය නැවත නැවත කල් දැමීමට ඇති අවකාශය තුළ පාර්ලිමේන්තුව තවත් දිගු කලකට අක‍්‍රියව පැවතීමේ අනතුර රට ඉදිරියේ තිබේ.

අප විශ්වාස කරන්නේ විසුරුවාහැර ඇති පාර්ලිමේන්තුව නැවත කැඳවීම සහ පාර්ලිමේන්තුවේ නියෝජනය වන දේශපාලන පක්ෂ වලත්, මන්ත‍්‍රීවරුන්ගේත් සක‍්‍රිය සහයෝගය ලබාගැනීම මගින් දැනට පවත්නා අර්බුදය තුළ මතුවී ඇති හදිසි ගැටලූ ගණනාවක්ම නිරාකරණය කළ හැකි බවයි. මහජන සෞඛ්‍ය තත්වය නිසා පැන නැගී ඇති අර්බුදයට මුහුණ දීමට අවශ්‍ය නව සහ සුදුසු නීති පැනවීමත්, ඒකාබද්ධ අරමුදල රජයේ වියදම් සඳහා යොදා ගැනීමත් ඒ අතර ප‍්‍රධාන වේ.

අද අප සියලූදෙනාම මුහුණ පා සිටින්නේ පෙර නොවූ ආකාරයේ සහ කවදා අවසන්වනු ඇතිදැයි අනාවැකි කිව නොහැකි, බරපතල අර්බුදයකටය. මෙම අර්බුදය විසඳීම සඳහා විසුරුවාහැර ඇති පාර්ලිමේන්තුවේ මන්ත‍්‍රීන් වන අපට වගකීමක් ඇති අතර, ඒ සඳහා වගකිවයුතු සහයෝගීතාවයක් ජනාධිපතිවරයාට ලබා දීමට සූදානම් බව ප‍්‍රකාශ කර සිටිමු. පෙර නොවූ විරූ අර්බුදයක් මධ්‍යයේ දේශපාලන බෙදීම් අභිබවා යමින්, සියලූම දේශපාලන පක්ෂ සහ දේශපාලන නායකයන්ට, ජනතාවගේ සහ රටේ පොදු යහපත සඳශා එකට වැඩ කිරීමේ යුතුකමක් හා අභියෝගයක් ඇති බව අපි අවධාරණය කරමු.

අපේ රටේ ආණ්ඩුකරණ ක‍්‍රියාවලිය නිසි පරිදි, නීත්‍යනුකූලව සහ රටේ ආණ්ඩුක‍්‍රම ව්‍යවස්ථාවට අනුකූලව සිදුවන බවට සහතික කරගනු පිණිස, පාර්ලිමේන්තුවේදී ආණ්ඩුවට සහය දීමට අප සූදානම්ය. අප මෙම කාලය තුලදී වැටුප් ලබා නොගන්නා බවටත්, ආණ්ඩුව පරාජය කිරීමට උත්සාහ නොගන්නා බවටත්, ආණ්ඩුව ගන්නා අවශ්‍ය ක‍්‍රියාමාර්ග කඩාකප්පල් කිරීමට කටයුතු නොකරන බවටත් අපි ජනතාවට සහතික වෙමු. නීත්‍යනුකූලව පනවා නොතිබුණත් දැනට බලපවත්නා ‘ඇඳිරි නීතිය’ පවත්වාගැනීමට පූර්ණ සහයෝගය දැක්වීමෙන් අපි මේ බව දැනටමත් තහවුරු කර ඇත්තෙමු.

මෙම පසුබිම තුළ අප ගරු ජනාධිපතිතුමාගෙන් ඉල්ලා සිටින්නේ මෙම තීරණාත්මක අවස්ථාවේදී අප සද්භාවයෙන් ඉදිරිපත් කර සිටින ‘වගකීමෙන් සහයෝගය දීමේ’ යෝජනාවට යහපත් ප‍්‍රතිචාරයක් දක්වමින් පාර්ලිමේන්තුව විසුරුවාහැරීමට 2020 මාර්තු 02 නිකුත් කළ නියෝගය ආපසු කැඳවන ලෙසයි. එසේ කිරීම කොරෝනා වෛරසයේ අභියෝගය ජයගැනීමට සහයෝගයෙන් සහ එක්ව වැඩ කිරීමටත්, එේ කරන සියලූ දේ නීත්‍යනුකූලව සහ ආණ්ඩුක‍්‍රම ව්‍යවස්ථාවට එකඟව සිදුකිරීමටත් ඉඩ ප‍්‍රස්තාව ලබාදෙනු ඇති බව අපේ දැඩි විශ්වාසයයි. ඉන්පසුව පාර්ලිමේන්තු මැතිවරණයක් පැවැත්වීමට සුදුසු අවස්ථාව පැමිණ ඇතැයි හැෙඟන අවස්ථාවක පාර්ලිමේන්තුව විසුරුවා හැරීමට ජනාධිපතිතුමාට හැකිවනු ඇත.

පාර්ලිමේන්තුව විසුරුවාහැරීමේ නියෝගය ආපසු කැඳවීම නොකරන්නේ නම්, එයට විකල්ප ක‍්‍රියාමාර්ගයක් ලෙස, ආණ්ඩුක‍්‍රම ව්‍යවස්ථාවේ 70(7 )ව්‍යවස්ථාව ප‍්‍රකාරව ඇති බලතල අනුව අඩු තරමින් විසුරුවා ඇති පාර්ලිමේන්තුව යළි කැඳවන ලෙස ඉල්ලා සිටිමු. ‘වගකීමෙන් සහයෝගය දීමේ’ මෙම යෝජනාව අප ඉදිරිපත් කරන්නේ අවංක චෝදනාවෙන් පමණක් බවට අප ජනාධිපතිතුමාට සහ මුළු රටටම සහතික වන අතර, අප එසේ කරන්නේ කිසිදු සැඟවුණු න්‍යායපත‍්‍රයක් නොමැතිව සහ රටේත්, ජනතාවගේත් උපරිම සුභසිද්ධිය අරභයා බවත් ප‍්‍රකාශ කරමු.’