ජනාධිපතිවරණයට පෙර හා පසුව විධායක ජනාධිපති ක‍්‍රමය අහෝසි කරන්නැයි තමා කීවත් පාර්ලිමේන්තුවේ සිටි ලොකු මහත්වරුන් වසර හතරක් තිස්සේ විධායක ජනාධිපති ක‍්‍රමය අහෝසි නොකළ බව ජනාධිපතිවරයා කීය. ඒ අගෝස්තු 30 වැනිදා යාපනයේදීය.

වසර හතරහමාරක් තිස්සේ නව ව්‍යවස්ථාවක් හැදීම සඳහා පාර්ලිමේන්තුව කෝටි ගණන් වියදම් කළ බවත්, මන්ත‍්‍රීවරුන් විදේශ සංචාර ගිය බවත් එහෙත් ව්‍යවස්ථාව හැදුවේ නැති බවත් ඔහු පැවසීය. ඔහු එතැනදී කළේ අගමැතිවරයාගේ ප‍්‍රධානත්වයෙන් යුත් ආණ්ඩුක‍්‍රම ව්‍යවස්ථා මෙහෙයුම් කමිටුවේ අසාර්ථකභාවය ගැන තමාට තිබුණු වගකීමෙන් මිදී අත පිහදාගැනීමයි. එහෙත් ජනාධිපතිවරයා ඇත්ත හැංගුවේය. ජනාධිපතිවරයා හැංගූ ඇත්ත ලිඛිතවම ඉතිහාසයේ ඇත.

ආණ්ඩුක‍්‍රම ව්‍යවස්ථා සම්පාදනය අසාර්ථක වුණේ ජනාධිපතිවරයා සභාපතිත්වය දරන ශ‍්‍රීලනිපය හින්දාය. විධායක ජනාධිපති ක‍්‍රමය අහෝසි කරන්නට ශ‍්‍රීලනිපය එකඟ නැති බව දැනුම් දුන් නිසාය. ඉතාම පැහැදිලිිව, මෙහෙයුම් කමිටු වාර්තාවේ 35 වැනි පිටුවේ ඒ බව ඇත. දැනට පවතින ජනාධිපති ක‍්‍රමයෙහි වැදගත්කමත් එය අහෝසි නොකළ යුතු බවත් ශ‍්‍රීලනිපය වෙනම වාර්තාවක් ඉදිරිපත් කරමින් දීර්ඝව විස්තර කර තිබුණි. ඒ වාර්තාව සම්මත වී තිබුණේ ජනාධිපතිවරයා ප‍්‍රධානත්වය දරන ශ‍්‍රීලනිප මධ්‍යම කාරක සභාවෙන්ය.

එක්සත් ජාතික පක්ෂය හා ශ‍්‍රීලනිපය ප‍්‍රමුඛ ජාතික ආණ්ඩුවට 2016 වර්ෂයේදී පාර්ලිමේන්තුවේ තුනෙන් දෙකක බලයක් තිබුණි. ඊට අමතරව ආණ්ඩුක‍්‍රම ව්‍යවස්ථා සම්පාදන ක‍්‍රියාවලියට දෙමළ ජාතික සන්ධානයද කැමැත්ත දක්වා තිබුණි. එවැනි පසුබිමක 2016 දී කටයුතු අවසාන කළා නම් නව ව්‍යවස්ථාව සම්මත කරගැනීමට පැහැදිලි හැකියාවක් තිබුණි.

මෙහෙයුම් කමිටුවේ කටයුතු ප‍්‍රමාද වීමට හේතුව වුණේ ශ‍්‍රීලනිපය සිය ස්ථාවරය ලබා නොදී ප‍්‍රමාද කිරීමය. ආණ්ඩුක‍්‍රම ව්‍යවස්ථා මෙහෙයුම් කමිටුව කාරණා රැුසක් ගැන 2016 ඔක්තෝබර් මාසය වෙද්දී එකඟතා ඇති කරගෙන මෙහෙයුම් කමිටු වාර්තාව එළිදැක්වීමට පසුබිම සකසාගෙන තිබුණි. එහෙත් ශ‍්‍රීලනිපය හා ජවිපෙ මෙහෙයුම් කමිටුවේ එකඟතාවන් තම තමන්ගේ පක්ෂවල අභ්‍යන්තර එකඟතාවට ලක් කළ යුතු බව කියා තිබුණි. ජවිපෙ මාස දෙකක් ඇතළත සිය එකඟතාව මෙහෙයුම් කමිටු වාර්තාවට ලබාදුන්නත් ශ‍්‍රීලනිපය අවුරුද්දක් තිස්සේ එකඟතා ලබාදුන්නේ නැත. ආණ්ඩුක‍්‍රම ව්‍යවස්ථා සම්පාදනය අසාර්ථක වුණේ ඒ ප‍්‍රමාදය හින්දාය. ප‍්‍රමාද වී ශ‍්‍රීලනිපය ලබාදුන් වාර්තාවෙහි සඳහන්ව තිබුණේ විධායක ජනාධිපති ක‍්‍රමය අහෝසි කිරීමට එකඟ නැති බවයි.

ජනාධිපතිවරයාට අවංක වුවමනාවක් තිබුණා නම් ශ‍්‍රීලනිපය තමන්ගේ මතයට එකඟ කරවාගැනීමේ හැකියාවක් ඔහුට තිබුණි. එසේ වී නම් අද ලංකාවෙහි ඇත්තේ විධායක ජනාධිපති ක‍්‍රමය අහෝසි කළ ව්‍යවස්ථාවකි. සමාජීය, ආර්ථික අයිතිවාසිකම් තහවුරු කළ ව්‍යවස්ථාවකි. සාධාරණව බලය බෙදී ගිය ව්‍යවස්ථාවකි. නායකයන් මහජනයාට වගකියන ව්‍යවස්ථාවකි.x