ඇටම්පිටියේදී මහින්ද පිළට හූ කියයි

බණ්ඩාරවෙල ඇටම්පිටිය ගමේ පැවති පොදුජන පෙරමුණු රැස්වීමකදී විජමු ලොකුබණ්ඩාරට හූ කීමේ සිදුවීමක් මාධ්‍යවලින් වාර්තා කර තිබුණි. පසුබිම් කතාව නොදන්නා අය කල්පනා කළේ, උදිත ලොකුබණ්ඩාර පොදුජන පෙරමුණේ නායක මහින්ද රාජපක්ෂගේ සමීපතමයෙකු වී, ඔහුට හූ කීවේ ඇයිද කියාය. එයට හේතුවක් ඇත.

විජමු ලොකුබණ්ඩාර ‘ඌව වෙල්ලස්සේ හටන්පිටිය මේ ඇටම්පිටිය කියන්නේ..’ යැයි විජමු ලොකුබණ්ඩාර කතාව කියාගෙන එන විට පැමිණ සිටි අය හූ කියා තිබුණි.

‘හා… හරි… අපේ පුතාට ඔය විදියේ කටහැකර මොකා කතාකළත්. අපි එක දෙයක් කියන්නම්. ඒ රත්තරන් පුතා. ඔයවගේ නරි, නරි හූ කියනවා. පර නරි රැළ. හැකර කටවල් දිගහැරියට අපි දන්නවා.’ ආදී ලෙස විජමු ලොකුබණ්ඩාර හූ කියූ අයට පිළිතුරු දුන්නේය.

ඇටම්පිටියේදී හූ කීම අපූරු සිදුවීමකි. ලංකාවේ වෙනත් තැන්වල හූ කීම සිද්ධවුණේ ශ්‍රී ලංකා පොදුජන පෙරමුණේ නායකයන්ගේ හිතවතුන්ගෙන් ශ්‍රීලනිප සාමාජිකයන්ටය. නැතිනම් මෑතක් වනතුරුම ශ්‍රීලනිපයේ සිට, පසුව පොදුජන පෙරමුණට එක් වූ අයටය. එහෙත් බදුල්ලේ ඒ සෙල්ලම් බැරිය.

බදුල්ල, හාලිඇල, ඇටම්පිටිය, බණ්ඩාරවෙල වැනි ප්‍රදේශවල දේශපාලන බලය හිමි නිමල් සිරිපාල ද සිල්වා, ඩිලාන් පෙරේරා, චාමර සම්පත් යන නායකයන් තිදෙනාම ශ්‍රීලනිප කණ්ඩායමේ සිටි සාමාජිකයන්ය. 2015 මහමැතිවරණයේදී ඩිලාන් පෙරේරා ඉදිරිපත් වුණේ නැත. ඒ බදුල්ල දිස්ත්‍රික්කයෙන් එජාපයට විශාල ජයක් අත්වේයැයි අනුමාන කළ නිසාය. අවසාන කාලයේ ඩිලාන් පෙරේරා පොදුජන පෙරමුණට එකතු විය. 2015 මහමැතිවරණයෙන් එවකට ඌව පළාත් සභාවේ මන්ත්‍රීවරයෙකු වූ චාමර සම්පත් ජයගත්තේය. එහෙත් ඔහු මහඇමතිකම භාරගැනීමේ එකඟතාවක් නිසා පාර්ලිමේන්තු මන්ත්‍රීධුරය භාරගත්තේ නැත. මැතිවරණයෙන් තේරී පත් නොවූ ලක්ෂ්මන් සෙනෙවිරත්න පාර්ලිමේන්තු ගියේය. ලක්ෂ්මන් සෙනෙවිරත්නද සිටියේ ශ්‍රීලනිප පැත්තේය. මහින්දගේ සමීපතමයෙකු වූ උදිත ලොකුබණ්ඩාර මහමැතිවරණයෙන් පරාජය විය. ලොකුබණ්ඩාර නාමය බදුල්ල දිස්ත්‍රික්කයේ ශ්‍රීලනිප සාමාජිකයන්ගේ විරෝධයට හේතු වූ නමක් වූ නිසා ඒ පරාජය පුදුමයට කාරණයක් නොවීය. ශ්‍රී ලංකා පොදුජන පෙරමුණ පිහිටුවීමෙන් පසු බදුල්ලට හරිහමන් පොහොට්ටු නායකයෙක් නොසිටි නිසා බදුල්ලේ නායකයා ලෙස කුමාර වෙල්ගම හිටපු මන්ත්‍රීවරයා බදුල්ලට යැවීය. එහෙත් ඔහු පසුව පොහොට්ටුවේ ජනාධිපතිවරණ අපේක්ෂකත්වය ඉල්ලන්නට ගොස් කැපී ගියේය. පොහොට්ටුවේ නායකයාගේ ළඟින් සිටි උදිත ලොකුබණ්ඩාරට බදුල්ලේ ආධාරකරුවන් හූ කීවේ ඔය පසුබිමේය.

 

ජොන්ස්ටන් නාඩි අල්ලයි

මේ මැතිවරණ ව්‍යාපාරයේ නිරීක්ෂණය කරන්නට වටින චරිතයක් වන්නේ ජොන්ස්ටන් ප්‍රනාන්දුය. පසුගිය සතියේ කුරුණෑගල නගරාධිපතිගේ ‘මයිලකට අත තියන්න’ ඉඩ නොදෙන බව ඔහු කියා තිබුණේ විශ්වාසයෙනි. අප පසුගිය සතියේ වාර්තා කළ පරිදි, ජොන්ස්ටන් ප්‍රනාන්දු ඇමතිවරයා මෙවර මැතිවරණයේ මහින්ද රාජපක්ෂගේ ප්‍රචාරක ව්‍යාපාරයේ සේවා සපයන්නාය. වාහන සැපයීම්, පිරිස් සැපයීම් හා රැස්වීම් සංවිධානය කිරීම් සිදුකරන්නේ ජොන්ස්ටන් ප්‍රනාන්දුය. මහින්ද රාජපක්ෂ සමඟ මැතිවරණ ව්‍යාපාරයේ එකට රැස්වීම්වලට ගමන් කරන්නේද ජොන්ස්ටන්ය. මහින්දට පක්ෂ නායකයා ලෙස රටේ වෙනත් ප්‍රදේශවල රැස්වීම්වලටත් සහභාගී වෙන්නට සිදුවෙයි. ඒ නිසා මහින්දට ඡන්දය දෙන්නැයි ඉල්ලමින් තනිව රැස්වීම් පැවැත්වීමද ජොන්ස්ටන් ප්‍රනාන්දු සිදුකරයි. ජුලි 29 වැනිදා දඹදෙනියේ, ජුලි 28 යාපහුවේය, 27 වැනිදා පොල්ගහවෙල සහ බිංගිරියේ එවැනි රැස්වීම් පවත්වා තිබුණි.

ඊට අමතරව මහින්ද රාජපක්ෂගේ හිත දිනාගන්නට ඔහු මහින්ද රාජපක්ෂගේ නාඩි අල්ලන්නටද පටන්ගෙන ඇත. මෙවර මැතිවරණයේ ජොන්ස්ටන් ප්‍රනාන්දු හා ඔහුගේ හිතවත් කථිකයන් නොවරදවා කියන ප්‍රකාශයක් වී ඇත්තේ රටේ ඊළඟ නායකයා නාමල් රාජපක්ෂ බවය. ජොන්ස්ටන් ප්‍රනාන්දුගේ සමීපතම ආධාරකරුවන් පසුගිය කාලය තිස්සේ නාමල් රාජපක්ෂ සමඟ එක්ව කටයුතු කළේය.  නාමල් ඊළඟ නායකයා බව කීම, මහින්දගේ හිත දිනාගැනීමට ලෙහෙසි උපක්‍රමයකි.

කොටුවේ හාමුදුරුවන් ලෙස හඳුන්වන හිමිනම හිරියාලේ නාමල් රාජපක්ෂගේ සහභාගීත්වයෙන් පැවති ජොන්ස්ටන් ප්‍රනාන්දුගේ රැස්වීමකදී මෙසේ කියා තිබුණි. ‘මම කැමැත්තෙන් හිටියා රටේ රජතුමාගේ පුතාගේ රැස්වීමක කතාකරන්නට. නාමල් මැතිතුමනි, එදා දැක්ක නාමල් ඇමතිතුමා නෙවෙයි අද ජොන්ස්ටන් ඇමතිතුමාගේ ගෙදර දැක්කේ. මට හරි සතුටු හිතුණා ඒ දෙන්නා ඉන්න විදිය. මේ ගමන සුබ පෙර ලකුණක්. මේ සුසංයෝගය හරි වටිනවා, සම්පත් ගලා ඒමට.’

 

වගකීමක් නැති ජනපති

ජොන්ස්ටන් ප්‍රනාන්දු නිකවැරටියේ සංවිධානය කර තිබූ උත්සවයක් ගැනත් කිව යුතුය. මීට පෙර මහින්දානන්ද අලුත්ගමගේ කුප්‍රකට ‘ක්‍රිකට් පාවාදීම්’ ගැන ප්‍රකාශයෙන් පසු මහින්දානන්දට සහයෝගය දැක්වීමට ගෝඨාභය රාජපක්ෂ ඔහුගේ රැස්වීමකට ගියේය. ජුලි 26 වැනිදා නිකවැරටියේ ජොන්ස්ටන් ප්‍රනාන්දු සංවිධානය කළ රැස්වීමකට ගෝඨාභය රාජපක්ෂ ගියේ කුරුණෑගල රාජ සභා මණ්ඩපය ගැන කුප්‍රකට සිදුවීමෙන් පසුය. මෙම රැස්වීම නිරෝධායන නීති තුට්ටුවකට මායිම් නොකළ එකකි.

මැතිවරණයේ නිරෝධායන නීති ගැසට් කළත්, එම ගැසට් පත්‍රය වචන පමණක් ඇති බලය නැති ගැසට් පත්‍රයකි. ඒ නීති කැඩුවත්, පියවර ගන්නට කෙනෙක් නැත. ජුලි 26 වැනිදා නිකවැරටියේ ගෝඨාභය රාජපක්ෂගේ සහභාගීත්වයෙන් පැවති දැවැන්ත ජනරැළිය එය තහවුරු කරන එක් සිදුවීමකි.

ගෝඨාභය රාජපක්ෂ පොදුජන පෙරමුණේ නායකයා නොවේ. එම පක්ෂයේ සාමාජිකයෙක්වත් නොවේ. ගැසට් පත්‍රය අනුව ඔහු සහභාගී වන රැස්වීමකට උපරිම සිටිය හැක්කේ 300ක් පමණි. ඔහුගේ සහභාගීත්වයෙන් නිකවැරටියේ පැවති රැළිය නීති රකිනවායැයි කියන ගෝඨාභය රාජපක්ෂ නීති පයිසෙකට මායිම් නොකරන බව තහවුරු කරන එකක් වුණේ ඒ නිසාය. දහස් ගණනක් සෙනඟ එම රැස්වීමට එකතු කර තිබුණි. එක පොදියේ තෙරපෙමින් එම ජනතාව රැස්වීමට එකතු වී සිටියේය. ඡායාරූප හා වීඩියෝවල එම සෙනඟ සටහන් විය.

මේ දිනවල සෞඛ්‍ය අමාත්‍යාංශය සමාජයෙහි ‘අහඹු ලෙස’ පීසීආර් පරීක්ෂණ කරමින් සිටී. ඒ කන්දකාඩු පොකුරෙන් සමාජයට රෝගය පැතිර ගියාදැයි හඳුනාගැනීම සඳහාය. එයින් පැහැදිලි වන්නේ කොවිඞ්-19 රෝගය බාහිර සමාජයේ තිබීමේ අවදානමක් ඇති බවය. එවැනි පසුබිමක කිසිදු වගකීමක් නැතිව රාජ්‍ය නායකයෙකු මෙවැනි රැස්වීම්වලට සහභාගී වීම ඔහුගේ තරම පැහැදිලි කරන සිදුවීමකි. මෙය වගකීමක් නැති ජනාධිපතිවරයෙකුගේ ක්‍රියාකලාපයක් බව සැකයක් නැතිව සටහන් කර තැබිය යුතුය.

 

සජිත්ලා එජාපය අත්හරී

සජිත් ප්‍රේමදාස ප්‍රමුඛ සමගි ජන බලවේගයේ නායකයන් මහමැතිවරණයට වෙනම ඉදිරිපත්වීමට තීරණය කළත් එජාපය අත්හැරීමට සිතුවේ නැත. ඒ වෙනුවට වෙනම ඉල්ලා, පසුව එජාපය හා එක්වීමේ බලාපොරොත්තුවක් ඔවුන්ට තිබුණි. මුලින් සිතුවේ එක්සත් ජාතික පක්ෂය විවේචනය නොකර මැතිවරණ ව්‍යාපාරයේ යෙදෙන්නටය. සජබ නායකයන් ‘සිරිකොතේ බලය අල්ලන’ කතා කීවේ තමන් එජාපය හැර නොයන බව සහතික කරන්නටය.

එහෙත් නොසිතූ ලෙස මැතිවරණ දිනය ප්‍රමාද වන විට එජාප-සජබ ගැටුම තීව්‍ර විය. විනය පියවර ගැනීම්, සාමාජිකත්ව අත්හිටුවීම් දක්වා තත්වය දුරදිග ගියේය. දෙපාර්ශ්වය නැවත එකතු කිරීම පහසු නැත. සජබ පිළේ කණ්ඩායමට නැවත පැමිණීමට දොරටු විවර කර තැබීමේ වුවමනාවක් ඇති බව එජාප නායකයන් පෙන්වා නැත. ඒ නිසා මේ වනවිට සමගි ජන බලවේගයේ නායකයන් ඡන්දයෙන් පසු එජාපය හා එක්වීමේ බලාපොරොත්තු අත්හැර ඇත. නායකයන් කිහිපදෙනෙකුම ඒ බව අප සමඟ කීය.

‘අපි හිතාගෙන හිටියේ ඡන්දයෙන් පස්සේ එජාප සාමාජිකත්වය රැකගෙන පක්ෂයේ බලය අල්ලන්න. පක්ෂ නායකත්වය සජිත් ප්‍රේමදාස මහත්තයාට අරන් දෙන්න. ඒත් දැන් පෙනෙන විදියට ඒක කරන්න බැහැ. ඒ වෙනුවට සමගි ජන බලවේගය විදියට අපි ඉදිරියට යනවා.’ ඒ එක් ප්‍රබල නායකයෙකු කී කතාවය.

 

එජාප විශ්වාසය

එක්සත් ජාතික පක්ෂය මැතිවරණයේ ජයග්‍රහණ පිළිබඳ බලාපොරොත්තු අතින් ඉතිහාසයේ දුර්වලම තැනට මෙවර වැටී ඇති බව නොරහසකි. තම පක්ෂයට මහමැතිවරණයෙන්  මන්ත්‍රීධූර 10ක් පමණ ලැබෙනු ඇතැයි විශ්වාස කරන බවත්, ඒ සංඛ්‍යාව හැකි තරම් වැඩි කරගැනීමට උත්සාහ කරන බවත් එජාපයේ ප්‍රබලයෙකු අප සමඟ කීය. රනිල් වික්‍රමසිංහ, රවී කරුණානායක හා දයා ගමගේ ඉදිරිපත්වන කොළඹ දිස්ත්‍රික්කයෙන් ආසන තුනක් ලැබෙනු ඇතැයි ඔවුන් විශ්වාස කරයි. කුරුණෑගල අකිල විරාජ් කාරියවසම්, ගම්පහ අර්ජුන රණතුංග, කළුතර පාලිත තෙවරප්පෙරුම, පුත්තලම පාලිත රංගේ බණ්ඩාර, නුවඑළිය නවීන් දිසානායක, ගාල්ල වජිර අබේවර්ධන, මහනුවර දිස්ත්‍රික්කයෙන් යම්කිසි අපේක්ෂකයෙක්, බදුල්ල දිස්ත්‍රික්කයේ යම්කිසි අපේක්ෂකයෙක් ආදී ලෙස මන්ත්‍රීධූර 10ක් ලැබෙනු ඇති බවත්, ජාතික ලැයිස්තු මන්ත්‍රීධුර දෙකක් පමණ ලැබෙනු ඇති බවත් ඔවුන්ගේ විශ්වාසය. එහෙත් ඊට වඩා විශාල ජයග්‍රහණයක් ලැබීමේ බලාපොරොත්තු ඔවුන්ට ඇත.

ඉහත ලැයිස්තුවේ සිටින අය අතරින් නවීන් දිසානායක හා දයා ගමගේ ප්‍රසිද්ධියේ කියා ඇත්තේ රනිල් වික්‍රමසිංහගෙන් පසු එජාප නායකත්වය තමන් බලාපොරොත්තුවන බවය. ප්‍රසිද්ධියේ නොකීවාට රවී කරුණානායක හා අකිල විරාජ් කාරියවසම් දෙපළ එජාප නායකත්වය බලාපොරොත්තු වන බව එජාප ආරංචිමාර්ග කියන කතාවය.

දයා ගමගේ කියා ඇත්තේ තමන් සතු සේසතම එජාපයට වියදම් කළ නිසා නායකත්වයට තමා සුදුසු බවය. නවීන් දිසානායක කිසිවක් නොකීවත්, ඔහු නායකත්වය ඉල්ලන්නේ ගාමිණී දිසානායකගේ පුත්‍රයා වන නිසාය. අකිල විරාජ් කාරියවසම්ට නම් පදනමක් ඇත. එහෙත්, රවී කරුණානායකද එජාපය වෙනුවෙන් මුදල් වියදම් කිරීම ආදී හේතු නිසා තමන්ට නායකත්වය බලාපොරොත්තු වෙයි. මේ අතර රනිල් වික්‍රමසිංහ ඉදිරි ජනාධිපතිවරණය දක්වා නායකත්වයේ රැඳී සිටීමට බලාපොරොත්තු වේ.

 

ඇත්ත මිනිස්සු සතුටෙන්

එජාපය එසේ කුඩා බලාපොරොත්තු තබාගත්තද, ජවිපෙ ප්‍රමුඛ ජාතික ජන බලවේගය පෙර තිබුණු පාර්ලිමේන්තු නියෝජනයට වඩා යහපත් නියෝජනයක් ලබාගැනීමට උත්සාහ කරමින් සිටී. පෙර පැවති මන්ත්‍රීධූරවලට අමතර ලෙස මාතර දිස්ත්‍රික්කයෙන් සුනිල් හඳුන්නෙත්ති, මහනුවර දිස්ත්‍රික්කයෙන් කේ.ඩී. ලාල්කාන්ත, බදුල්ල දිස්ත්‍රික්කයෙන් සමන්ත විද්‍යාරත්න පත්වනු ඇතැයි ඔවුන්ගේ විශේෂ බලාපොරොත්තු ලෙස පවතී. කොළඹ දිස්ත්‍රික්කයෙන් ආසන දෙකක් ලබාගැනීමට ඔවුන් උත්සාහ කරයි. ජනාධිපතිවරණයේදී සම්පූර්ණ ඡන්ද ප්‍රතිශතයෙන් සීයට 3ක් පමණක් ලැබූ ඔවුන්, මෙවර ඊට වැඩි ඡන්ද ප්‍රතිශතයක් ලැබෙනු ඇතැයි අපේක්ෂා කරයි. ඒ බලාපොරොත්තු සැබෑ වනු ඇතිදැයි දැකගත හැකි වන්නේ මහමැතිවරණයේ ප්‍රතිඵල ප්‍රකාශයට පත් කළ පසුය. බලාපොරොත්තු තැබුවත් ඔවුන් ඉන්නේත් අවිනිශ්චිත හැඟීමකය.

ජාතික ජන බලවේගයේ කටයුතු කරන ජාතික විද්වත් සංවිධානයේ නායකයන් කිහිපදෙනෙකු අතට පත්ව තිබෙන ‘සමීක්ෂණ වාර්තාවක්’ නිසා එම කණ්ඩායමේ නායකයන් කිහිපදෙනෙකුගේ බලාපොරොත්තු ඉහළ ගොස් ඇත. මැතිවරණයක් ළංවෙද්දී විවිධාකාර සමීක්ෂණ වාර්තා එළිදකී. ‘බුද්ධි අංශයේ අලුත්ම වාර්තාව’ යැයි කියමින් වාර්තා ගණනාවක් අවසන් දින කිහිපය වනවිට එළිදකින බව අමුතුවෙන් කිව යුතු නැත. ඒවායේ සත්‍ය අසත්‍යතාවය ගැන අත්දැකීම් විවිධාකාරය.

මේ කියන වාර්තාව ශ්‍රී ලංකා පොදුජන පෙරමුණේ පිරිසක් කළ බව කියන සමීක්ෂණ වාර්තාවකි. එම වාර්තාව අනුව ඔවුන් උතුරු, නැගෙනහිර පළාත්වල හැර අනෙකුත් පළාත්වල දිස්ත්‍රික්ක 14 ඡන්ද ප්‍රතිශත ගණන් බලා ඇත. එම ඡන්ද ප්‍රතිශත අනුව ශ්‍රී ලංකා පොදුජන පෙරමුණට ජාතික මට්ටමෙන් තුනෙන් දෙකක බලයක් නොලැබෙන බව ඔවුන් ගණන් හදා ඇත. එම දිස්ත්‍රික් 14හි සම්පූර්ණ මන්ත්‍රීධූර සංඛ්‍යාව 149කි. ඒ අතරින් 88ක් ශ්‍රී ලංකා පොදුජන පෙරමුණට, 41ක් සමගි ජන බලවේගයට, 8ක් එක්සත් ජාතික පක්ෂයට, 12ක් ජාතික ජන බලවේගයට ලැබෙනු ඇතැයි එම කණ්ඩායමේ ගණන් බැලීමය. මෙය ජාතික ජන බලවේගය මෙතෙක් ලබා ඇති ඡන්ද ප්‍රතිශත හා සැසඳූ කළ ඉහළ බලාපොරොත්තු තැබීමකි. එහෙත් මැතිවරණයට පෙර සිහින දකින්නට බාධා නැත. ඒ සිහින සැබෑ කරගැනීම ඇත්තේ ඔවුන් අතේය.■

 

■ දේශපාලන වාර්තාකරු