රට පුරා ඇඳිරි නීතිය ඉවත් කිරීමත් සමග, නිරෝධායන නීති ආරක්ෂා කර ගැනීම සඳහා විශාල වෙහෙසක් ගන්නට පොලිසියට සිදු වී තිබේ. මුඛ ආවරණ නොපැළඳීමත්, සමාජ දූරස්ථභාවය නොපැවැත්වීමත් කියන චෝදනා මත පුද්ගලයන් අත්අඩංගුවට ගෙන නීතිය ඉදිරියට පැමිණවීම් ගැන හැමදා ම පුවත්පත්වල සංඛ්‍යා ලේඛන පළ වේ.

නිරෝධායන නීතිවලට මිනිසුන් අනුගත වීම අත්‍යවශ්‍යය. නොවුණහොත්, රටේ බරපතළ මහජන සෞඛ්‍ය ප්‍රශ්නයක් උද්ගත විය හැකි නිසා ය. දිගු කලකට පෙර වුව ද, නිරෝධායන නීති පනවා තිබෙන්නේ ම ජනතාවගේ සෞඛ්‍යය ආරක්‍ෂා කිරීමේ අරමුණෙනි. එහෙත්, ඒ උතුම් අර්ථයෙන් යුතු නිරෝධායන නීති පවා, ආණ්ඩුව පාවිච්චි කරන ආකාරයෙන්, මහජන සෞඛ්‍යයටත් වඩා අරමුණු ආණ්ඩුවට තිබෙන බව පැහැදිළි වෙයි.

එකක්, නීතිය එක් එක් පුද්ගලයාට එක් එක් ආකාරයෙන් ක්‍රියාත්මක කිරීමයි. පසුගිය දිනවල දැනගන්නට ලැබුණේ මුඛ ආවරණ නොපැළඳීම, එකිනෙකා අතර නියමිත දුර නොතබා ගැනීම යනාදිය නිසා දහස් ගණන් පුද්ගලයන් අත්අඩංගුවට ගෙන නීතිය ඉදිරියට පමුණුවා ඇති බවයි. එය දඬුවම් ලැබිය යුතු නීතියක් හැටියට පොලිසිය ක්‍රියාත්මක කරනවා නම්, අත්අඩංගුවට ගත යුතු ව තිබුණු එක් පුද්ගලයකු වූයේ ජනාධිපති ගෝඨාභය රාජපක්‍ෂ ය. මැයි 19 වැනි දා පැවැති රණවිරු සැමරුම් උළෙලට ජනාධිපතිවරයා සහභාගි වුණේ මුඛ ආවරණ නැතිව ය. ඒ උත්සවයේ දී දූරස්ථතාව කොතරම් කඩ විණිදැයි රූපවාහිනී දර්ශන බලා සිටි ඕනෑ ම කෙනකුට වැටහෙන්නට ඇත. නීතිගරුක රටක් හදන්නට පත්වුණු ජනාධිපතිවරයා, ආදර්ශයෙන් පෙන්වන්නේ මුඛාවරණ නොපැළඳ මහජන උත්සවයකට සහභාගි වීම නම්, රටේ සාමාන්‍ය මිනිසුන් මුඛාවරණ නොපැළඳ සිටීම නිසා පොලිසියේ අත්අඩංගුවට පත් විය යුත්තේ ඇයි?

රාජ්‍ය නායකයෝ වැරදි නොකරති’යි නීතියේ ආප්තයක් තිබේ. වරෙක හිටපු අගවිනිසුරු සරත් නන්ද සිල්වා කීවේ, හෙල්පින් හම්බන්තොට නඩුවේ දී මහින්ද රාජපක්‍ෂ තමන් මුදා හැරියේ ‘අගමැතිවරයා වැරදි නොකරයි’ කියන ආප්තය ද උදව් කර ගෙන බව ය. කෙසේ වෙතත්, රාජ්‍ය නායකයා හෝ නායිකාව නීතිමය වරදක් කළත් නොකළත්, ඔහුගෙන් හෝ ඇයගෙන් මෙන් ම ඔහුට හෝ ඇයට ද, රෝගයක් බෝවීමට තිබෙන ඉඩකඩ නැති නොවේ. කොරෝනා ආසාදිතයන් අතර රාජ්‍ය නායකයන් ද සිටි බව අමතක නොකළ යුතු ය. බ්‍රිතාන්‍ය අගමැති බේරුණේ පරලොවට අඩියක් තබා නැවත ගැනීමෙනි. ඔහුගේ බිරියත්, කැනඩා අගමැති බිරියත් ආසාදිතයන්ගේ ලැයිස්තුවේ සිටිති. මොනාකෝ ඔටුන්න හිමි කුමරු, ඕස්ට්‍රේලියාවේ අභ්‍යන්තර කටයුතු ඇමතිවරයා ඇතුළු ඒ ලැයිස්තුව බොහෝ දිග ය. මියගියවුන් අතර ද පාලක රජ පෙළපත් සාමාජිකයෝ වෙති.

අනෙක් අතට ලෝකයේ ශිෂ්ට රටවල නායකයන් නිරෝධායන නීති ආරක්‍ෂා කළ යුතු බව ජනතාවට පෙන්නුවේ තමන්ගේ ම ආදර්ශයෙනි. නිරෝධායන නීති නිසා නෙදර්ලන්ත අගමැතිවරයාට, තම මවගේ අවමඟුලට පවා සහභාගි වීමට නොහැකි වූ බව මේ සතියේ මාධ්‍ය වාර්තා කෙළේ ය. නවසීලන්ත සෞඛ්‍ය ඇමතිවරයා නිරෝධායන නීති කැඩූ නිසා ධුරයෙන් පහත හෙළිණ. නෙදර්ලන්තයේ ඇමතිවරියකට, නිරෝධායන නීති කඩ කිරීම නිසා ධුරය අත හරින්නට සිදු විය. අපේ රටේ නිරෝධායන නීති පවා ක්‍රියාත්මක කෙරන්නේ ඒ ඒ අයගේ හැටියට ය. බලවතා රැකෙන අතර දුබලයාට හිමි, නීතියට යටත් වීම ය.

අනෙක් අවලස්සන පැත්ත නම්, විපක්‍ෂ ක්‍රියාකාරීන් මර්දනයත් නිරෝධායන නීති යොදා ගැනීමයි. මැතිවරණ කොමිසමේ සාමාජික මහාචාර්ය රත්නජීවන් හූල් සමග ආණ්ඩුවට තිබෙන දේශපාලන විරසකය නිසා, එලව එලවා ඔහුත්, ඔහුගේ දියණියත් ඉලක්ක කොට නිරෝධායන නීතිවලින් පහර දීමේ දුෂ්ට ක්‍රියාන්විතයක් දැන් පැවැත්වේ. හිටපු පාර්ලිමේන්තු මන්ත්‍රී චම්පික රණවක පැවැත්වූ සාකච්ඡාවකට ද නිරෝධායන නීතිය යොදා ගෙන අවහිර කරන ලදි. හිටපු ඇමති රාජිත සේනාරත්න අත්අඩංගුවට ගැනීමට විරෝධය පළ කරමින් තිබුණු උද්ඝෝෂණයකට ද දැන් අත්වී ඇත්තේ නිරෝධායන නීතිවලින් පහර කෑමේ ඉලක්කය වන්නට ය. එහෙත් වසංගතය ඉහළම තිබුණු මොහොතක ප්‍රසිද්ධ උත්සවයක් පැවැත්වූ සෞඛ්‍ය ඇමතිනිය, සෞඛ්‍ය සේවා අධ්‍යක්‍ෂ ජෙනරාල්, යුද හමුදාපති ඇතුළු පිරිසට සැලකුණේ වෙනත් විදියකට ය.

එක, නිරෝධායන නීති කඩ කිරීමට කිසිවකුට අයිතියක් හෝ බලයක් හෝ නැත. කිසිවෙක් ඒවා කඩ කරයි නම් ඔවුන්ට විරුද්ධ ව නීතිය ක්‍රියාත්මක විය යුතු ය. හැබැයි, නීතිය ක්‍රියාත්මක විය යුත්තේ හැම දෙනාට ම සමානව ය. ඉහළ තනතුරු දරන්නන්ට එක විදියකටත්, සාමාන්‍ය මිනිසුන්ට තව විදියකටත් නොවේ. ඒ වාගේ ම විරුද්ධ අදහස් දරන්නන් මර්දනය කිරීමට නිරෝධායන නීති වැනි නීති පවා යොදා ගන්නේ නම්, අනාගතයේ යොදා නොගනු ඇත්තේ මොනවා ද?