වරාය නැගෙනහිර පර්යන්තයේ ආයෝජනය කිරීම සඳහා ඉන්දියානු සමාගම්වලට ලබාදීමට විරුද්ධ වෙන බව ප්‍රකාශ කළ ආණ්ඩුවේ විමල් වීරවංශ ප්‍රමුඛ නායකයන් හා ශ්‍රී ලංකා පොදුජන පෙරමුණේ බැසිල් රාජපක්ෂ පිල අතර දැඩි මතභේදයක් හටගෙන ඇතැයි වාර්තා වේ.
මෙම ගනුදෙනුව සිදු කළ යුතුම බව කියමින් පසු ගිය මාස කිහිපයක් තිස්සේ බැසිල් රාජපක්ෂට සමීප කැබිනට් ඇමතිවරුන් වන රෝහිත අබේගුණවර්ධන, ප්‍රසන්න රණතුංග, පවිත්‍රා වන්නිආරච්චි, එස්.එම්. චන්ද්‍රසේන දැඩි ලෙස කැබිනට් මණ්ඩලයේ අදහස් දක්වා තිබුණු බව අනිද්දා සමඟ අදහස් දැක් වූ ඇමතිවරයෙකු කීය.
එයට ප්‍රතිපක්ෂව විමල් වීරවංශ, උදය ගම්මන්පිල, වාසුදේව නානායක්කාර ඇතුළු නායකයන් පිරිසක් දිගින් දිගටම අදහස් දක්වා තිබේ.
පෙබරවාරි 01 වැනිදා කැබිනට් මණ්ඩල රැස්වීමේදී අමාත්‍යවරුන් වන රෝහිත අබේගුණවර්ධන,

ප්‍රසන්න රණතුංග, එස්.එම්. චන්ද්‍රසේන විමල් වීරවංශ ඇතුලු පිරිසට එරෙහිව අදහස් දක්වා තිබේ.
මීට පෙර විසි වන සංශෝධනය කැබිනට් මණ්ඩලයට ඉදිරිපත් කළ අවස්ථාවේදී ද්විත්ව පුරවැසිභාවය පිළිබඳ විමල් වීරවංශ ප්‍රමුඛ පිරිසක් විරෝධය පළ කළේය. ඉන් පසු අවස්ථා කිහිපයකදීම මෙම දෙපාර්ශ්වය අතර මත ගැටුම් ඇති වූ බව අනිද්දා සමඟ අදහස් දැක් වූ අමාත්‍යවරයා පැවසීය.
අමාත්‍ය විමල් වීරවංශ කැබිනට් මණ්ඩල සාමූහිකත්වය ආරක්ෂා නොකිරීම පිළිබඳ කණගාටු වන බව ශ්‍රී ලංකා පොදුජන පෙරමුණේ මහලේකම් නීතිඥ සාගර කාරියවසම් පසුගිය සතියේ මාධ්‍ය සාකච්ඡාවකදී ප්‍රකාශ කර තිබුණි.■