ජනාධිපති මෛත්‍රීපාල සිරිසේන හා හිටපු ආරක්ෂක අමාත්‍යාංශ ලේකම් ගෝඨාභය රාජපක්‍ෂ ඝාතනය කිරීමේ කුමන්ත‍‍්‍රණයක් ඇතැයි පැවසූ නාමල් කුමාරට පොලිස් විශේෂ කාර්ය බලකායේ ආරක්ෂාව ලබාදී ඇත.

නාමල් කුමාර පදිංචිව සිටින මහඔය සමගිපුර ප‍්‍රදේශයේ නිවසට මෙලෙස ආරක්ෂාව ලබාදී ඇති අතර ඒ සඳහා විශේෂ කාර්ය බලකායේ නිලධාරීන් 3ක් හා මහඔය පොලිසියට අනුයුක්තව සේවය කරන එක් නිලධාරියකු යොදවා ඇත.

නාමල් කුමාරගෙන් අප කළ විමසීමේදී ඔහු පැවසුවේ දැනට තමාගේ මහඔය නිවසේ පොලිස් නිලධාරීන් දෙදෙනෙකු රැුඳීසිටින බවයි. තමාගේ ආරක්ෂාව හා ආර්ථික දුෂ්කරතා නිසා වරකාපොළ පදිංචිය අතහැර තම උපන් ගම වන මහඔය සමගිපුරට පැමිණි බවයි. එසේ පදිංචිය මාරුකිරීමේදී ඒ පිළිබඳව අපරාධ පරීක්‍ෂණ දෙපාර්තමේන්තුවට දැනුම් දුන් බවත් ඉන් පසුව මෙලෙස ආරක්ෂාව ලබාදුන් බවත් ඔහු පවසයි.

එසේ වුවද අපරාධ පරීක්ෂණ දෙපාර්තමේන්තුවෙන් අප කළ විමසීමකදී එහි නිලධාරියෙකු පැවසුවේ එවැනි ආරක්ෂාව සඳහා ඉල්ලීමක් තමන්ට කර නොමැති බවත් ඔහුට ආරක්ෂාව සපයන ලෙසට කිසිදු දැනුම්දීමක් තම දෙපාර්තමේන්තුව සිදු කර නොමැති බවත්ය.
නාමල් කුමාරට මෙලෙස විශේෂ කාර්ය බලකායේ ආරක්ෂාව ලබාදීම සම්බන්ධයෙන් අප පොලිස් මාධ්‍ය ප‍‍්‍රකාශක ජ්‍යෙෂ්ඨ පොලිස් අධිකාරි රුවන් ගුණසේකරගෙන් විමසීමේදී ඔහු ප‍‍්‍රකාශ කළේ තමා දැනට ඒ පිළිබඳව කිසිවක් නොදන්නා බවත් පසුව ඒ ගැන සොයා බලා ප‍‍්‍රකාශයක් ලබා දෙන බවත්ය.

ධම්මික ප්‍රිරයදර්ශන