ඡන්දදායකයන්ගේ බලාපොරොත්තු සුන් කරමින් නාමයෝජනා බාර නොදී ම සමහර අපේක්ෂකයන් ජනාධිපතිවරණ තරගයෙන් ඉවත්ව ගොස් ඇත.
ජනාධිපතිවරණය ප‍්‍රකාශයකට පත් කිරීමට බොහෝ කලකට පෙරම දේශපාලන පක්ෂවලට අයත් නොවන ස්වාධීන අපේක්ෂකයන් වශයෙන් ජනතාව අතර සංවාදයට ලක්වෙමින් සිටි අයද එසේ තරගයෙන් ඉවත්ව ගොස් ඇත. නාගානන්ද කොඩිතුවක්කු ඉන් එක් අයෙකි.


ආණ්ඩුකරණය ගැන ඔහු කී දෑ ගැන අවධානය යොමු කළහොත් එය දීර්ඝ ලියවිල්ලක් වනවා ඇත. ඔහුගේ සමහර තර්ක හා යෝජනා මහපොළොවේ පැළකළ හැකිද යන ප‍්‍රශ්නාර්ථය දැනුම් තේරුම් ඇති අයට ඇතිකළාට සැකයක් නැත. එහෙත් දිගින් දිගටම පක්ෂ දේශපාලනයේ පොරොන්දුවලින් හෙම්බත් වී සිටි ජනයාට මේවා මල්වැසි ලෙස පෙනුණාට සැකයක් නැත.


ජනමත විචාරණයක් නම් වූ, ජනතාවගේ ඒ සඳහාම වූ කැමැත්තකින් තොරව ආණ්ඩුක‍්‍රම ව්‍යවස්ථාව වෙනස් කරනවායැයි කියූ, පෙර නීතිඥයෙකුද වූ නාගානන්ද කොඩිතුවක්කුට ජනාධිපතිවරණ අපේක්ෂකත්වය සඳහා ඇති මූලික සුදුසුකම් පිළිබඳව අවබෝධයක් තිබී නැති බව පෙනී යයි.


රොහාන් පල්ලෙවත්ත හා ඔහු ඇතුළු පිරිස් ස්වාධීන අපේක්ෂකත්වය ගැන කුඩා කුඩා කණ්ඩායම් රැුස්කරමින් ප‍්‍රචාරයක් ගෙන යන අවධියේ ලියුම්කරු ඒ සඳහා ආකර්ෂණය වී සිටි කිහිප දෙනෙකුටම කීවේ ස්වාධීන අපේක්ෂකයන් ලෙස ඔවුන්ට ඉදිරිපත් වීමට බැරි නිසා ජනාධිපතිවරණයට තරඟකරන දේශපාලන පක්ෂය කුමක්දැයි ප‍්‍රශ්න කරන ලෙසය.


මන්ද ජනාධිපතිවරණයට ඉදිරිපත්විය හැක්කේ පිළිගත් දේශපාලන පක්ෂයක නියෝජිතයෙකුට හෝ ස්වාධීන අපේක්ෂකයන් ලෙස, පාර්ලිමේන්තුව නියෝජනය කර ඇති පුද්ගලයෙකුට පමණක් බැවින්ය.


ජයග‍්‍රාහකයා වී එක් පෑන් පහරකින් රටේ ව්‍යවස්ථාව වෙනස් කිරීම, පාර්ලිමේන්තුව අහෝසි කිරීම වැනි සුරංගනා කථාවලට වඩා ජනාධිපතිවරණ අපේක්ෂකයෙකු වීමට අති සුදුසුකම් ගැන අවබෝධයක් තිබුණේ නම් මේ අය මුලින්ම කළ යුතුව තිබුණේ ජනාධිපතිවරණයට ඉදිරිපත් වීමට පක්ෂයක් සොයාගැනීමය.


අවසන් මොහොතේ තමාව රැුවටුවේ යැයි ‘ඔක්කොම රජවරු ඔක්කොම වැසියෝ‘ පක්ෂවලට බැන පලක් නැත. පාර්ලිමේන්තුව නියෝජනය නොකළ රොහාන් පල්ලෙවත්ත, මහේෂ් සේනානායක යන ස්වාධීන අපේක්ෂකයන්ට දේශපාලන පක්ෂයකින් නාමයෝජනා ලබාදීමට හැකිවූයේ එම දැනුවත්කම නිසා විය යුතුය.


ජනාධිපතිවරණ අපේක්ෂකයන්ට ඇප තැන්පත් කිරීම සඳහා ලබාදී තිබුණු කාලය දවසක් දෙකක් නොවීය. අවසානයේ සතියේ නිවාඩු දිනයක් වූ, නාමයෝජනා ලබාදීමට පෙර දිනය වූ ඉරිදා දිනයේ පෙරවරුවේත් ඒ සඳහා අවස්ථාව ලබාදී තිබුණි. ඒත් නාගානන්ද කොඩිතුවක්කු කළේ එම ඇප තැන්පත් කිරීමේ අවසන් දිනයේ සවස්වරුවේත් මාධ්‍ය මගින් ජනතාවට කිසිවක් නොකියා නාමයෝජනා දින මැතිවරණ කොමිෂන් සභා පරිශ‍්‍රය අසලට පැමිණ රැුවටීම් පිළිබඳ ළමා කතා කීමය.


එම ළමා කතා කීමෙන් ඔහු ජනතාව රැුවටුවා නොවේ යැයි කිව හැකිද? මන්ද ඔහු ජනාධිපතිවරණ මැතිවරණයක් නිල වශයෙන් ප‍්‍රකාශයට පත්කිරීමට පෙරම සිය ප‍්‍රචාරයන් ආරම්භ කළා පමණක් නොව ජනාධිපතිවරණයට තරග කිරීම සඳහා ජනතාවගෙන් මුදල්ද එකතු කළ නිසාය. ඔක්තෝබර් 07 වැනිදා මැතිවරණ කොමිෂන් සභාව ඉදිරිපිටදී නාගානන්ද කොඩිතුවක්කුම කියා ඇති පරිදි ඔහුට දේශීය වශයෙන් පමණක් නොව විදේශයන්ගෙන්ද ජනාධිපතිවරණය සඳහා මුදල් ලැබී ඇත. ඒ පිළිබඳ විස්තර ඉදිරියේදී මාධ්‍යයට ලබාදෙන බවද ඔහු ප‍්‍රකාශ කර ඇත.


ඉහත කී දේශපාලන පක්ෂයක අනුමැතිය නොලැබුණත් ඔහුට ජනාධිපතිවරණයට ඉදිරිපත් වීමට නොහැකි තවත් බාධකයක් තිබුණි. ඒ ඔහුගේ බි‍්‍රතාන්‍ය පුරවැසිභාවයයි. එය ඔහු ඉවත් කරගත්තාද නැද්ද යන්න දන්නේ ඔහුම පමණි. මන්ද බි‍්‍රතාන්‍ය පුරවැසිභාවය ඉවත් කරගැනීමට අදාල කිසිදු නිල ලේඛනයක් ඔහු ප‍්‍රසිද්ධියට පත් නොකළ නිසාය. ඒ සම්බන්ධයෙන් ගත් කලද ඔහු ජනතාව රැුවටුවා යන සැකය මතුවේ.


ඔහු ජනතාව අතර ප‍්‍රසිද්ධියට පත්වුණේ පවතින දේශපාලන ක‍්‍රමයේ ජනතාවගේ විරෝධයට හේතුවෙමින් පැවති දේවල් පිළිබඳව ප‍්‍රශ්න කරන හා අධිකරණ ක‍්‍රියාමාර්ග ගැනීම හේතුවෙන්ය. ලියුම්කරුගේ අදහස වන්නේ ඒ සමහර අධිකරණ ක‍්‍රියාමාර්ගවලට පදනමක් නොතිබූ බවය. ඊට එක් උදාහරණයක් වන්නේ පාර්ලිමේන්තු මන්ත‍්‍රීවරුන්ට ලබාදෙන තීරුබදු රහිත වාහන බලපත‍්‍ර අන්සතු කිරීමෙන් රටට අතිවිශාල අලාභයක් වන බවට ඔහු ඉදිරිපත් කළ නඩුවය. මේ බලපත‍්‍ර ක‍්‍රමය නවතා දැමිය යුතු බව ලියුම්කරුගේ අදහසය. එහෙත් ඔහු ජනප‍්‍රිය නඩු කටයුත්තට යනවිටත් පාර්ලිමේන්තු මන්ත‍්‍රීවරුන්ට ලබාදෙමින් තිබුණේ අන්සතු කළ හැකි ආකාරයේ වාහන බලපත‍්‍රයක්ය. ඔහුගේ ඒ අදහස නඩුවෙන් තීන්දුවක් ලබාගැනීමට ප‍්‍රායෝගික නැතත් ජනතාවට ආකර්ෂණය වූවාට සැක නැත.


නාගානන්ද කොඩිතුවක්කුගෙන් රැවටීමට ලක්වූ මිනිසුන්ට ඔහුගෙන් අසන්නට ප‍්‍රශ්නාවලියක් තිබේ.


එකක් ඔහුගේ ශ‍්‍රී ලංකා රේගුවේ රාජකාරී කාලය ගැනය. එම රේගු සේවා කාලයේදී ඔහු වැඩ තහනමට හෝ සේවයෙන් ඉවත් කිරීමකට ලක්වූවාද? එසේ වූවා නම් ඒ කිනම් කරුණක් මත පදනම් වීද? එම වැඩ තහනම හෝ සේවයෙන් ඉවත් කිරීම නැවත ඔහු සකස් කරගන්නේ කෙසේද? ඒ සඳහා ඉදිරිපත් කරන ලද කරුණු මොනවාද?


අනෙක් ප‍්‍රශ්නය වන්නේ ඔහුගේ බි‍්‍රතාන්‍ය පුරවැසිභාවය සම්බන්ධයෙන්ය. ඔහු බි‍්‍රතාන්‍යයට ගියේ කිනම් කරුණක් සඳහාද? එහිදී ඔහු දේශපාලන රැුකවරණය ඉල්ලූවාද? ඒ සඳහා ඉදිරිපත් කරන ලද කරුණ කුමක්ද?
නැවත ලංකාවට ආ පසු නීතිඥ වෘත්තියේ ඔහුගේ ක‍්‍රියාකාරීත්වය අනෙක් ප‍්‍රශ්නයය. ශ‍්‍රී ලංකා රේගුවට එරෙහිව රේගු පරීක්ෂණ සම්බන්ධයෙන් ඔහු පෙනී සිටියාද, නැද්ද?


ඉහත ප‍්‍රශ්නවලට පිළිතුරු ලැබෙතොත් ඔහුට ආකර්ෂණය වූ මිනිසුන්ට ඔහු ගැන හොඳ අවබෝධයක් ලබාගත හැකි වෙතැයි අපගේ විශ්වාසයය. එම නිසා එම ප‍්‍රශ්න ඔහුට යොමු කිරීම ඔහු වෙනුවෙන් ප‍්‍රචාරණයේ යෙදුණු අයගේ වගකීමය.

ඉඳුවර බණ්ඩාර