දෙමළ ජාතික සන්ධාන
පාර්ලිමේන්තු මන්ත්‍රී
එම් ඒ සුමන්තිරන්

පසුගිය කාලය තුළ දෙමළ ජාතික සන්ධානය විසින් ගත් යම් යම් තීරණ පිළිබඳව දකුණේ බහුතර සිංහල ජනයා විසින් ප්‍රසාදය පළ කරනවා. ඒක හොඳ ලකුණක්. යහපත් දේශපාලනයක් ඇතිවෙන්න නම් දෙමළ ජාතික සන්ධානය දෙමළ ජනතාව වෙනුවෙන් පමණක්ම කතා කරමින් ඉන්නේ නැතිව, රටේ ඵලදායී දේශපාලනයක් ඇති කරන්න සහයෝගය දෙන්න වෙනවා.
ඒ සමගම උද්ගත වෙලා තියෙන තවත් කාරණයක් ගැන මම අද කතා කරන්න කැමතියි. ආණ්ඩුක්‍රම ව්‍යවස්ථාව ගැන. මේක සිද්ධ වෙන්න ඕනෑය කියලා බලාපොරොත්තු වෙන කට්ටියක් අපේ දෙපැත්තේම ඉන්නවා. දැන් ව්‍යවස්ථාව ගැන වාර්තා ඇවිත් තියෙනවා. කවුරුවත් තවම ඒවා කියවලා නැහැ. ව්‍යවස්ථාව පිළිබඳව ඉදිරිපත් කර තිබෙන වාර්තා පාර්ලිමේන්තු වෙබ් අඩවියේ භාෂා තුනෙන්ම තියෙනවා. ඕනෑම කෙනෙකුට ගිහින් කියවන්න පුළුවන්. මම ගමක් ගමක් ගානේ ගිහින් කියන දේවල් ඇත්තද බොරුද කියලා ඒක කියෙව්වාම තේරුම් ගන්න පුළුවන්. මම මිනිස්සුන්ට කියන කාරණා ඒ වාර්තාවල තියෙනවාද නැද්ද කියලා ඔයාලාට බලන්න පුළුවන්. ඒකීය රාජ්‍යයක් කියන්නේ මොකක්ද කියලා ඒ වාර්තා කියෙව්වොත් ඕනෑම කෙනෙකුට තේරෙයි.
දැන් මාධ්‍ය කරන්නේ මොනවාද? මේ වාර්තා කියවන්නේ නැතිව, රනිල් මොනවාද කියන්නේ, කිරිඇල්ල මොනවාද කියන්නේ, රාජපක්ෂ මොනවා කියන්නේ කියලා විතරයි පත්තරවල ලියන්නේ. ඒ වාර්තාවල තියෙන්නේ මොනවාද කියලා ලියලා ජනතාව දැනුවත් කරන්න කැමති නැහැ.
උතුරු පළාත් සභාවේ හිටපු විපක්ෂනායක තවරාජා මහත්මයා තැන් කිහිපයකම ඔහුගේ අදහස් ප්‍රකාශ කරලා තිබුණා. ඔහු කියපු කාරණයක් තමයි, මේ ව්‍යවස්ථාවේ ඒකීය රාජ්‍යයක් කියන සංකල්පය නැහැ කියලා. ඒකීය රාජ්‍යය කියලා අපි කියන ආණ්ඩුක්‍රම ව්‍යවස්ථා සංකල්පය මේ ව්‍යවස්ථා වාර්තාවේ නැහැ කියලා ඔහු පැහැදිලිවම කිහිප වතාවක් කියලා තියෙනවා. බලය බෙදීම සම්බන්ධයෙන් හොඳ යෝජනා රැසක්ම තියෙන බව ඔහු කියලා තියෙනවා. ලෝකයේ ඒකීය රාජ්‍යයන් ෆෙඩරල් රාජ්‍යයන් කියලා දැන් ඉරි ගහලා වෙන්කරන්න බැහැ. ඒත් ජනවාරි 14 වෙනිදා යාපනය දිස්ත්‍රික්කයේ මුද්‍රණය වෙන දමිළ පුවත්පතක ප්‍රධාන ප්‍රවෘත්තිය වෙලා තිබුණේ අලු‍ත් ආණ්ඩුක්‍රම ව්‍යවස්ථාවෙනුත් යෝජනා වෙලා තියෙන්නේ ඒකීය රාජ්‍යයක්ම තමයි කියලා. ලියලා තියෙන්නේ තවරාසා මහත්තයා එහෙම කිව්වා කියලා. මට පුදුම හිතුණා තවරාසා මහත්තයා හදිස්සියේ තමන්ගේ හිත වෙනස් කර ගත්තාද කියලා. ඒක කියවගෙන යනකොට තමයි මට තේරුණේ තවරාසා මහත්තයාගේ ප්‍රකාශයේ එහෙම කිසි දෙයක් සඳහන් වෙලා නැහැ කියලා. තවරාසා මහත්තයා නැවත කියලා තියෙන්නේ ඒකීය රාජ්‍යක් කියලා ලෝකයේ හඳුන්වන ව්‍යවස්ථා සංකල්පය මේකේ නැහැ කියලා. ඔහුගේ පරණ ප්‍රකාශයම තමයි. නමුත් රනිල් වික්‍රමසිංහ පාර්ලිමේන්තුවේදී ඒකීය රාජ්‍ය ක්‍රමය මේකේ තියෙනවායැයි කීවා කියලා ඔහු කියලා තියෙනවා. මේ පත්තරයේ ප්‍රධාන පුවත තවරාසා කියලා තියනවා කියලා වාර්තා කළාට ඒ ප්‍රකාශය කරලා තියෙන්නේ රනිල් වික්‍රමසිංහ. නමුත් තවරාසා මහත්තයාගේ මතය කියලා තමයි තියෙන්නේ. මේ බොරු ප්‍රවෘත්තිය ඕනැකමින්ම වාර්තා කරලා තියෙනවා. ඒක දැන දැන එයාලා කරලා තියෙන්නේ. අවධානයෙන් කියවන ඕනෑම නෙනෙකුට මේ කාරණය තේරුම් ගන්න පුළුවන්. නමුත් නොදන්නා අය මේක විශ්වාස කරනවා. මෙයාලා බොරු ප්‍රකාශ කරන්නේ අලු‍ත් ව්‍යවස්ථාවක් ඇති වේවි කියන බයට. ඒ බය තියෙන්නේ රාජපක්ෂවරුන්ටයි, රාජපක්ෂවාදීන්ටයි විතරයි. ඒ අය උතුරෙත් යම් ප්‍රමාණයක් ඉන්නවා කියලා අපිට පැහැදිලිවම පේනවා.
නව ව්‍යවස්ථාවක් ඒවි කියලා බය වෙලා ඉන්න අය දකුණෙත් ඉන්නවා. එයාලා කලින් කිව්වාට වඩා දරුණු විදියට වැඩ කරමින් ඉන්නේ. එයාලාගෙන් ප්‍රධානම කෙනා විධියට බොරු වපුරමින් ඉන්නේ සිරස , ශක්ති, එම්ටීවී කියන මාධ්‍ය ආයතනය. අද මෙතනටත් එයාලා ඇවිල්ලා ඉන්නවා. මම කියන දේවල් එහෙම්ම ඔයාලාගේ ප්‍රවෘත්තිවල දාන්න. පසුගිය 12 වෙනිදා මම යාපනයේ කතාවක් පැවැත්තුවා විනාඩි 44ක විතර. ඒ විනාඩි 44න් විනාඩි 07 ක විතර මම කිව්වා අපි වෙනම රටක් පිළිබඳව තවදුරටත් සිහින දකින්න ඕනෑ නැහැ කියලා. ගොඩක් අය කියන්න බය කතාව මම එදා කිව්වා. එදා හැම සිංහල ප්‍රවෘත්තියකම ප්‍රධාන ප්‍රවෘත්තිය වෙලා තිබුණේ වෙනම රටක් ගොඩනැගිය හැකි බව සුමන්තිරන් ප්‍රකාශ කළා කියලා.
ඒක තමයි සිරසෙත් ප්‍රවෘත්තිය වුණේ. ඒක නැවත නැවත සිරස ප්‍රවෘත්තියක් විධියට ප්‍රකාශයකට පත් කළා. ඒ ක්‍රියාව ඔවුන් කළේ දකුණේ සිංහල ජනතාවට කේන්තියක් ඇති කරන්න. මම කියපු දෙයට වඩා සම්පූර්ණයෙන්ම ප්‍රතිවිරුද්ධ කතාවක් තමයි වාර්තා කළේ. ඒ කතාව කළ දවසේම මමයි, සේනාධිරාජා මහත්තයයි එහි කතා කළා. අපි රනිල් වික්‍රමසිංහ ප්‍රමුඛ මේ ආණ්ඩුවට අපේ සහය ලබා දෙද්දි හැමෝම අපෙන් ඇහුවා මොකක්ද රනිල් වික්‍රමසිංහලා එක්ක ඇති කර ගත්ත රහස් ගිවිසුම කියලා. අපි කිසිම රහස් ගිවිසුමක් ගැහුවේ නැහැ. අපි සාකච්ඡා කලා විතරයි. ඒක හැමෝම දන්න සාකච්ඡාවක්.
අපි කතාකරපු එක කාරණයක් තමයි ගෙවී ගිය අවුරුදු තුනක කාලය තුළ අපේ පක්ෂය ආණ්ඩුවට සහය ලබා දෙමින් සිටිමින් සිටියදීත් උතුරු නැගෙනහිර සංවර්ධන කටයුතු අපිත් එකක් සහයෝගයෙන් කටයුතු නොකර ඔවුන්ට ඕනෑ විධියට ඒ කටයුතු කරපු බව. අපි ඒ ගැන ඔවුන්ට දොස් කිව්වා, ඔවුන් උතුරු නැගෙනහිර සංවර්ධනය කියලා ඔවුන් කරපු වැඩවල අඩුපාඩුකම් පෙන්වලා දුන්නා. අපි තමයි උතුරු නැගෙනහිර ජනතාව නියෝජනය කරන්න පාර්ලිමේන්තුවට තෝරා පත් කරගත් අය. අපි නව ආණ්ඩුවට සහාය දෙන්නම්. උතුරු නැගෙනහිර කටයුතු කරද්දී කතාකරන්න කියලා විතරක් අපි එයාලාගෙන් ඉල්ලු‍වා. නමුත් ඔවුන් කිව්වේ අපිට කරන්න දෙයක් නැහැ කැබිනට් එකේදී තීරණ අරන් ඉවරයි කියලා. අපි කිව්වේ අනාගතයේදී අමාත්‍යවරුන් තීරණ ගන්න කලින් උතුරු නැගෙනහිර සම්බන්ධ දේවල් ගැන අපෙත් එකක් එකතු වෙලා අදාල කාරණා ගැන කතා කරන්න කියලා. ඒකේ මොකක්ද තියෙන වැරැද්ද? අපියි උතුරු නැගෙනහිර ජනතාව නියෝජනය කරන්නේ.
උතුරු නැගෙනහිර නියෝජනය කරමින් පාර්ලිමේන්තුවේ ඉන්න නියෝජිතයන් 18 දෙනාගෙන් 16 දෙනෙක්ම ඉන්නේ දෙමළ ජාතික සන්ධානයේ. අනිත් දෙන්නා පාර්ලිමේන්තුවට වැරදිලා ආපු දෙන්නෙක්. මුළුමනින්ම උතුරු නැගෙනහිර ජනතාව නියෝජනය කරන පක්ෂය තමයි අපි. නමුත් අපේ එක්ක කතා කරන්නේ නැතිව ඇයි අමාත්‍යවරු පමණක් රැස් වෙලා අපි ගැන අපේ ජනතාව ගැන තීරණ ගන්නේ කියලා අපි ඇහුවා. ඉන්පසු ඔවුන් අපිට උතුරු නැගෙනහිර සම්බන්ධයෙන් යම් තීරණ ගන්නවා නම් අපි එක්ක කතා කරන්නම් කියලා අපිට පොරොන්දු වුනා. ඒ ගැන මාවෙයි සේනාධිරාජා මහත්තයා පැහැදිලිව ප්‍රකාශයක් කළා.
මම කැමතියි ඔබලාට දකුණේ සිංහල පත්තරයක් වන මව්බිම සහ ඒකේ ඉංග්‍රීසි පත්තරය පෙන්වන්න. ඒ පත්තරේ මුල් පිටුවේ බොහෝම ගාම්භීර විධියට එක පැත්තක සේනාධිරාජා මහත්තයායි අනිත් පැත්තේ මමයි ඉන්නවා. අපේ ලස්සන පින්තූර අරන් දාලා තියෙනවා. පත්තරේ මුල් පිටුවේ භාගයකම ඉන්නේ අපි. ඒකේ ලියලා තියෙන්නේ, ‘අපෙන් අහන්නේ නැතිව කැබිනට් තීරණ ගන්න බැහැ.’ ඉංග්‍රීසි පත්තරයේ දාලා තියෙන්නේ ‘කැබිනට් ඩිසිෂන් කැනොට් බී ටේකත් විතවුට් කන්සල්ටින් අස්’ කියලා. මේක තමයි යූඑන්පී / ටීඑන්ඒ ඩීල් එක. හෙළිදරව්ව කියලා. එයාලා හොයාගත්තාලු‍. ප්‍රසිද්ධ කතාවක් වරද්දලා රිපෝට් කරලා, එයාලාගේ හෙළිදරව්වක්ලු‍.
මේවා තමයි වෙන්නේ. උතුරු සංවර්ධන විෂය අගමැතිතුමා අතේ දැන් තියෙන්නේ. එතකොට නැගෙනහිර ඉන්න දමිළ කතා කරන අය අපෙන් අහනවා ඇයි අපිව අතහරින්නේ කියලා. අපි මිනිස්සුන්ට කිව්වා ඒ වාගේ වැරදි ආපහු වෙන්න අපි දෙන්නේ නැහැ. යළිත් සංවර්ධන ක්‍රියාවලි වෙනකොට අපි ඒවා සොයා බලන්නම් කියලා. නැගෙනහිර ජනතාව අපෙන් මේ ගැන අහනකොට අපි උත්තර දෙන්න ඕනෑ. ඇයි උතුරට විතරක්ද සේරම කියලා. මම ඒ ගැන පසුගිය 12 වෙනිදා කතාවක් කලා. ඒ ගැන මව්බිම පත්තරය වාර්තා කරලා තිබුණේ උතුරයි දකුණයි ඒකාබද්ධ කරලා, ලංකාවෙන් බෙදෙන්න යනවා කියලා.
අපට පෙනෙන්නේ දකුණේ සමහර මාධ්‍ය සිංහල ජනතාවගේ සිත්වල භය ඇති කරන්න රට කැලී 9 කට කැඩෙන්න යනවා කියලා බොරු ප්‍රචාර සමාජගත කරනවා.
රාජපක්ෂ හැම වෙලාවෙම කියන්නේ රට දෙකට කැඩෙන්න යනවා කියලා. කුමන්ත්‍රණ කරනවා කියලා. නමුත් රනිල් වික්‍රමසිංහ කියනවා අපි කුමන්ත්‍රණ කරන්නේ නැහැ කියලා. එයාලා එක එක වෙලාවට එක එක කාරණා කියමින් ඉන්නවා. එයාලාගේ පාක්ෂිකයින්ව සමාදාන කර ගන්නයි එයාලාව උසිගන්වන්නයි. නමුත් ඇත්ත කියන එක සෑහෙන්න අමාරු වැඩක්. හැමදාම ගිහින් තමන්ගේ පාක්ෂිකයන්ට බොරු කියන එක තමයි එයාලාට වැදගත් වෙන්නේ. අපි කවදාවත් අපේ ජනතාවට බොරු කියලා නැහැ.
දේශපාලනඥයන්ට වඩා නරකම විදියට දේශපාලනය කරන්නේ මාධ්‍ය. මාධ්‍යවල කරදරය අපිට දරාගන්නම බැහැ. ඒ නිසා ඉදිරියේදි මහාරාජා මාධ්‍ය ජාලයට එරෙහිව සමහර නීතීමය ක්‍රියා මාර්ග ගන්න අපිට සිද්ධ වෙනවා. අපි ඒක අනිවාර්යයෙන්ම කරනවා. මම එයාලාට ඒක ළඟදිම දැනුම් දෙනවා. ඉවරයක් නැතිවම එයාලා ගෙන යන බොරු ප්‍රචාර ඒකට හේතුව. මේ රට දේශපාලන වශයෙන් යම් ස්ථාවරයකට එන්න නොදී පැල් බැඳගෙන ප්‍රචාරය කරන බොරු ප්‍රචාරවලට විසඳුමක් ලබා දෙන්න ඕන.
අද මේ පැවැත්වෙන උත්සවය හරහා මහින්ද රාජපක්ෂ කණ්ඩායමට පණිවිඩයක් යවන්න කැමතියි. නව ආණ්ඩුක්‍රම ව්‍යවස්ථාව හදන්න දෙන්න. කරුණාකරලා ඒක වලක්වන්න එපා. ඔවුන් කියනවා අපි වලක්වන්නේ නැහැ කියලා. හිටපු ජනාධිපතිවරයා විසින් පොංගල් දිනයට සුබ පතලා යවලා තිබ්බ සුබ පණිවිඩයේ ඔහු දෙමළ ජනතාවට දේශපාලන විසඳුමක් ඉක්මනින් ලැබෙන්න කියලා තමයි ප්‍රාර්ථනා කරලා තියෙන්නේ. ඔහු දන්නවා දෙමළ ජනතාවට දේශපාලන වශයෙන් විසඳුමක් ලැබෙන්න ඕනෑ කියලා. අපි ඒකට ඔහුට ස්තූති කරනවා. අපි ඔහුගේ ප්‍රර්ථනාව ඉෂ්ට කරන්න තමයි අපි උත්සාහ දරන්නේ.■