ගණිකා වෘත්තිය එසේ නැතහොත් ලිං ගික ශ්‍රමය සැපයීම යනුවෙන් අදහස් කරන්නේ මුදලට තම සේවාදායකයා පිනවීම සඳහා එකී පුද්ගලයා සමඟ ලිංගික ක්‍රියාවන්හි නිරත වීමය. සාමාන්‍ය ව්‍යවහාරයේදී ගණිකා (prostitute) යන වචනය ස්ත්‍රී ලිං ගිකය. එදා අම්බපාලිය කහවනු තකා එම රැකියාවේ නිරත වූවාය. අද ශානිකාලා, තුෂාරිලා, දිල්ශාන්ලා නිරත වන්නේත් එම රැකියාවේමය. ඒ රුපියල්වලට, ඩොලර්වලටය. ගායකයෝ සංගීතඥයෝ කන් පිනවති. නළු නිළියෝ ඇස් කන් පිනවති. සූපවේදීහු දිව පිනවති. ඒ මුදලටය. ගණිකා වෘත්තිය ලෙස හැඳින්වෙන රැකියාවේ නියැලෙන පිරිසද කරනුයේ එවැනි ලෙසම මුදලට අන් අයගේ ශරීරය පිනවීමකි. එනම් රූප, ශබ්ද, ගන්ධ, රස, ස්පර්ශ යන පස් කම් සැපවලින් ස්පර්ශ රසය ලබා දීමයි. වර්තමානයේ එම වෘත්තිය හැඳින්වීම සඳහා ලිංගික ශ්‍රමික (sex worker) යන වචනය භාවිතයට පැමිණ ඇත. එහෙත් එම වචනය භාවිත කිරීම සංගීතවේදීන් සිංදුකාරයන් ලෙස හඳුන්වනවා වැනිය. එහෙයින් ඔවුන් හැඳින්වීමට ශෘංගාරවේදී (erotic profeessional /entertainer) වැනි ගරුත්වයක් සහිත වචනයක් වුව භාවිත කළාට වරදක් නැත.

ලංකාවේ බහුතර ආගමත් සංස්කෘතියත් යන දෙකෙහිම පදනම පැරණි භාරතීය ආභාසයයි. කොටින්ම කියතොත් ලාංකික ජන සමාජය ගොඩ නැගුණේ භාරතීය ආභාසය තුළින්ය. එහි සිටියේ ගණිකාවන් නොව නගර ශෝභිනියන්ය. ඔවුහු සංගීත, වාදන, නර්තන වැනි අනෙකුත් වින්දන ශිල්පයන්ද ප්‍රගුණ කළ වෘත්තිකයෝ පිරිසක් වූහ. එම රැකියාවට ආවේණික චර්යා පද්ධතියක්ද එකිනෙකාට වෙන්වූ මිල ගණන්ද තිබූ බව කියැවේ. වර්තමානයේද මූලික මානව අවශ්‍යතාවක් සපුරාලීම සිය පූර්ණකාලීන හෝ අර්ධකාලීන රැකියාව කරගත් දහස් සංඛ්‍යාත ගැහැනු පිරිමි දෙපිරිසටම නිදහසේ සිය කටයුතු කිරීම සඳහා මිලක්, ප්‍රමිතියක්, ගරුත්වයක් සැලසෙන ආකාරයේ වටාපිටාවක් තවම නිර්මාණය වී නැත.

සාමාන්‍ය ව්‍යවහාරයේදී ස්ත්‍රී ලිංගික වන ශරීරය පිනවීමේ ශෘංගාර සේවාවන් අප රට තුළ නීති විරෝධීය. එසේම සමාජ විරෝධීය. එසේම එවැනි අයගේ සේවය ලබා ගන්නා පිරිමියා එම වරදට හවුල්කරුවකු ලෙස නොසැලකේ. වර්තමාන මානව හිමිකම්වල පදනමක් වන සමානාත්මතා මූලධර්මයට ද එය පටහැනිය. එසේ වන්නට ඇත්තේ 19 වැනි සියවසේ ඉංග්‍රීසි නීතිය සකස් වන අවධියේ ඇත්තේ වික්ටෝරියානු සදාචාරය මුල් බැස ගෙන තිබූ නිසා වන්නට පුළුවන. එහෙත් අද දිනයේ බොහෝ රටවල ලිංගික ක්‍රියාකාරකම් හරහා ශරීරය පිනවීමේ කර්තව්‍යයන් නීතියෙන් පිළිගත් රැකියාවන්ය. තායිලන්තය වැනි බෞද්ධ රටවල් පවා මෙකී ක්ෂේත්‍රය හරහා විශාල ආදායමක් උපයනු ලැබේ. එනිසා 18 වැනි සියවසේ අර්ථයෙන් එම රැකියාව හැඳින්විය යුතු හෝ එයට ගර්හා කළ යුතු නැත.

දේශපාලනික ගණිකාව /ගණිකා වෘත්තිය ( political prostitute$prostitution) වැනි වචන දේශපාලන ශබ්ද කෝෂයේ ප්‍රචලිතව යෙදේ. එසේ වන්නට ඇත්තේද ඉහත කී වික්ටෝරියානු සදාචාරය හා ඒ හා සබැඳි නීතිමය පදනම්වල සිටය. දේශපාලනික ගණිකාව ලෙස හැඳින්වෙන්නේ බලය ලද පසු ජනවරමට පයින් ගසා වෙනත් දේශපාලන බලවේගයක අරමුණු වෙනුවෙන් කටයුතු කරන දේශපාලනඥයන්ටය. එසේත් නැතහොත් තම පෞද්ගලික හෝ ඥාති හිතමිත්‍රාදීන්ගේ අභිවෘද්ධිය තකා කටයුතු කරන පිරිසටය. අද දිනයේ ලෝක භාවිතය අනුව රැකියාවක් ලෙස වෘත්තීයමය ශෘංගාරවේදියෙකු වීමත් දේශපාලනික අර්ථයෙන් ගණිකාව යන්නෙහිත් තේරුම් අතර සමානභාවයක් නැත. මේ අනුව බලන විට ගණිකාව යන වචනය භාවිත කළ යුත්තේ කිසියම් මුදලක් අය කර තව කෙනෙකුගේ ශරීරය පිනවන පුද්ගල කොට්ඨාසයට නොව යම් පිරිසක් විසින් යම් නිශ්චිත කටයුත්තකට පත් කරන ලද, බලය ලබා දෙන ලද හෝ එකඟතාවකට එළඹෙන ලද නමුත් එයට හාත්පසින්ම වෙනස් දේ කරන වංචාකාරයන්ටය.

දේශපාලන ක්ෂේත්‍රයේ දේශපාලනික ගණිකාවෝ බොහෝය. පූජක පක්ෂයේද සෑහෙන පිරිසක් පූජක ගණිකාවෝය. (clergy prostitute) ජනමාධ්‍යවේදී ගණිකාවෝද (media prostitutes ) සිටිති. එසේ කරන ජනමාධ්‍ය ආයතනද තිබේ. ගුරු වෘත්තිය, නීති වෘත්තිය වැනි ක්‍ෂේත්‍රයන්හි පමණක් නොව පස් කම් සැප ලබා දීම විෂයෙහි වන ඕනෑම රැකියාවක වුව නියුතු ගණිකාවෝ සිටිති. එනිසා මෙම වචනයට ගැහැනු පිරිමි සියල්ලෝම ඇතුළත්ය. එසේ නම් ගණිකාව යන භාවිතාව/ වචනය වංචාකාරයන් හැඳින්වීම විෂයෙහි පමණක් යොදා ගෙන මූලික මානව අවශ්‍යතාවක් මුදලට සපයන අයට තම රැකියාවට හිමි ගරුත්වය ලැබෙන ලෙස කටයුතු කිරීම/නාමකරණය කිරීම කාලෝචිතය.

එවැනි කතිකාවතක් කරලියට එන විට එයට විරුද්ධව පළමුව නැගී සිටින්නේ දේශපාලන, පූජක, ජනමාධ්‍ය යනාදි මෙකී නොකී පරිසමාප්ත අර්ථයෙන්ම ගණිකාවන් වන පිරිස බව නොකිවමනාය. ■

ප්‍රියදර්ශනී ආරියරත්න