ඔබේ සාමාජිකත්වය දරන දේශපාලන පක්ෂය..
මම පොදුජන පෙරමුණේ සාමාජිකයෙක්. පාර්ලිමේන්තුවට ආවේ ශ‍්‍රී ලංකා නිදහස් පක්ෂයෙන්. ශ‍්‍රීලනිප සාමාජිකත්වය අත්හැරලා නැහැ. හැබැයි දැන් කවුරුහරි ඇහුවොත් පොදුජන පෙරමුණේ සාමාජිකයෙක් කියලයි කියන්නේ.

ඔබේ කණ්ඩායමට ශ‍්‍රීලනිපය එක්ක තියෙන අනාගතය මොකක්ද?
ශ‍්‍රීලනිපයට ඕනෑ නම් පොදුජන පෙරමුණේ දේශපාලන කටයුතුවලට සම්බන්ධ වෙන්න පුළු‍වන්. හැබැයි අපේ ප‍්‍රතිපත්ති එක්ක ඉන්න ඕනෑ. ශ‍්‍රීලනිපයේ සැබෑ ප‍්‍රතිපත්ති පාවා දීලා අලූ‍තෙන් හදාගත්ත ප‍්‍රතිපත්ති එක්ක යන්න අපට බැහැ. අපි ජනතාවාදී දේශපාලනයක් කරනවා අපේ ප‍්‍රතිපත්ති අනුව. ලංකාවෙ දේශපාලනය තුළ වාමාංශික හුරුව ඇති ප‍්‍රගතිශිලී බලවේගය යැයි ඉතිහාසය පුරා හැඳින්වූ බලවේගය දැන් ඉන්නේ පොදුජන පෙරමුණ එක්ක. ඒ දේශපාලන බලවේගයට අයිතිවාසිකම් කියන්න කිසිම හැකියාවක් ශ‍්‍රීලනිපයට නැහැ. දැන් තියෙන්නේ එජාප ප‍්‍රතිපත්ති. ශ‍්‍රීලනිපයෙ වමේ ප‍්‍රතිපත්ති විනාශ කළා. අපේ දේශපාලන ප‍්‍රතිපත්ති එක්ක එකඟ ඕනෑම කෙනෙක්ට අපි එක්ක එකතුවෙන්න පුළුවන්.

ඔබේ පවුල ශ‍්‍රීලනිපය කඩලා දැම්මා කිව්වොත්..
රාජපක්ෂලා තමයි අදටත් ශ‍්‍රීලනිපයේ බණ්ඩාරනායක ප‍්‍රතිපත්ති ආරක්ෂා කරන්නේ.

පොදුජන පෙරමුණේ අය කොයිවෙලෙත් රාජපක්ෂ නම තමයි මතක් කරන්නේ. අපේ නායකයා රාජපක්ෂ. අපේ ප‍්‍රතිපත්තිය රාජපක්ෂ. අපේ ඊළඟ අපේක්ෂකයාව තෝරන්නේ රාජපක්ෂ. එයා රාජපක්ෂ පවුලේ කෙනෙක් වෙන්න ඕනෑ. ඔය වගේ රාජපක්ෂ ගැනම කතාකරන එක ගැන ඒ පවුලෙ කෙනෙක් විදියට ඔබ හිතන්නේ මොකක්ද?
රාජපක්ෂ පවුලේ වෙන අය නෙවෙයි. මම හිතන්නේ සියලූ‍මදෙනා විශ්වාස කරන්නේ මහින්ද රාජපක්ෂ ජනාධිපතිතුමාව. ඒ විශ්වාසය උඩ තමයි පොදුජන පෙරමුණ ගැන විශ්වාසය ගොඩනැඟිලා තියෙන්නේ. ඉතින් ඇත්තටම ගත්තොත් ජනාධිපතිවරණයට ඉල්ලන්නේ මහින්ද රාජපක්ෂ. එතුමාට ඉල්ලන්න නීතියෙන් බැරි නිසායි එතුමා වෙන කෙනෙක්ව නම් කරන්නේ. මහින්ද රාජපක්ෂට විකල්ප නැහැ. කාටවත් මහින්ද රාජපක්ෂ වෙන්න බැහැ. මහින්ද රාජපක්ෂ වෙන කෙනෙක්ව නම් කළොත් මහින්ද රාජපක්ෂ වෙනුවෙන් ජනතාව ඔහුට සහාය දෙන්න ඕනෑ. ඒ නිසා සැබෑ ලෙසම තේරුම්ගන්න ඕනෑ රාජපක්ෂලා නෙවෙයි, මහින්ද රාජපක්ෂට තමයි මේ තත්වය තියෙන්නේ.

මීළඟ අපේක්ෂකයා රාජපක්ෂ පවුලේ කෙනෙක්ම විය යුතුද?
මැතිවරණය ප‍්‍රකාශයට පත් කළාම අවශ්‍ය ඕනෑම අපේක්ෂකයෙක්ව ඉදිරිපත් කරයි.

මහින්ද රාජපක්ෂ, රනිල් වික‍්‍රමසිංහ, මෛත‍්‍රීපාල සිරිසේන ඇතුළු‍ ලංකාවේ නායකයන් බොහොමයක් අවුරුදු හැටහැත්තෑව පසු කළ අය. තරුණ දේශපාලනඥයෙක් විදියට ලංකාවෙ දේශපාලන නායකත්වය වියපත් අය අත පැවතීම ගැන අදහස මොකක්ද?
වැඩිහිටියන්ට චෝදනා කරලා වැඩක් නෑ. අඩුව තියෙන්නේ තරුණ දේශපාලනඥයන්ගේ. තරුණ දේශපාලනඥයන් ප‍්‍රතිපත්ති දන්නේ නැහැ. එයාලා ජනප‍්‍රිය දේශපාලනය කරන්නේ. ඒක මඩ පදනම් කරගත්ත දේශපාලනයක්. විපක්ෂයේ අයට මඩ ගහනවා. නැත්නම් ආණ්ඩු පක්ෂයේ අය තමන්ගේම අයට මඩ ගහනවා. හැබැයි අපේ තාත්තාලාගේ පරම්පරාවේ දේශපාලනය ගත්තාම වාසුදේව නානායක්කාර, ගාමිණී ලොකුගේ වගේ මහත්වරුන්ට දේශපාලන චින්තනයක් තිබුණා. මතවාදීව දරුණු වෙනස්කම් තියෙන්න පුළුවන්. හැබැයි කවුරුවත් පෞද්ගලිකව තව කෙනෙකුගේ චරිත ඝාතනය කරන දේශපාලනයක් කළේ නැහැ. පවුල් කඩන්න හැදුවෙ නැහැ. අද තරුණ දේශපාලනඥයෝ වැඩිහිටි දේශපාලනඥයන්ගෙ කොන්ත‍්‍රාත්වලට මඩ ගහන එකයි කරන්නෙ. තරුණ දේශපාලනඥයන්ගෙන් රටේ ආර්ථික ප‍්‍රතිපත්තිය ඇහුවොත් දන්නේ නැහැ. ආරක්ෂක ප‍්‍රතිපත්තිය ඇහුවොත් දන්නේ නෑ. ඒ නිසා තමයි මේ ප‍්‍රතිපත්ති ගැන අද සංවාදයක් නැත්තේ.

මහින්ද රාජපක්ෂ ජනාධිපතිවරයාගේ කාලයේදී ඔබ ඇතුළු‍ පවුලේ අය පියාගේ දේශපාලන බලය අවභාවිත කිරීමේ චෝදනාව ගැන අදහස..
ඒ කාලයේ ඒවා චෝදනා විදියට ආවා. කිසිවක් ඔප්පු කරලා නැහැ. අපි වාහනවල මිනිස්සු අරගෙන ගිහින් නෑ. නයිට් ක්ලබ් ගියේ නැහැ. ගහගෙන නැහැ. ගෑනු ළමයින්ගේ ඇෙඟ් නැඟලා නෑ. අපි දේශපාලනයට අඩු වයසෙන් ආවා. ඒ නිසා චෝදනා එල්ලවුණා. හැබැයි අහවල් ක‍්‍රියාව කියලා කියන්න බැහැ. වෙන ජනාධිපති පුතුන්ට තියෙන චෝදනා ගැන ඕනෑනම් විස්තර ඇතිව කියන්න පුළුවන්.

ඔබ 2014 ජනාධිපතිවරණය වෙන තෙක්ම ජාතික රග්බි පිලේ ක‍්‍රීඩකයෙක්. ආණ්ඩු මාරුව සමඟම ඔබේ රග්බි නැවතුණේ ඇයි?
ඒක වයස එක්ක වුණේ. මට 2014 වෙද්දී වයස අවුරුදු තිහයි. පාර්ලිමේන්තු යද්දී විසිතුනයි. මට අවුරුදු විසිතුනේදී වගේ ? එළිවෙනකන් මළගෙවල්වල, සමාජ වැඩකටයුතුවල නිදිමරලා පහුවදා ගිහින් ප‍්‍රැක්ටිස් කරන්න බැහැ. වැඩිපුර රෙස්ට් එක ඕනෑ. දේශපාලන කටයුතුවලට වෙලාව වෙන් කරන්නත් ඕනෑ. මගේ ශරීරයේ තත්වය තේරුම් ගන්න ඕනෑ. ඒ නිසා තමයි ක‍්‍රීඩාවෙන් සමුගත්තෙ.

ඔබව කිරුළ හිමි කුමාරයා විදියට හඳුන්වනවා. ඒ ගැන අදහස මොකක්ද?
ආණ්ඩුවට ස්තූතිවන්ත වෙන්න ඕනෑ. මොකද අවුරුදු තිහ විදියට ජනාධිපතිවරණයට ඉදිරිපත් වීමේ ළාබාල වයසට තිබුණු සීමාව තිස්පහ කළා. ඒකෙන් කිරුළ අයින්වුණා. නැත්නම් ජනාධිපතිවරණයට මගේ නම ගාවන්නත් තිබුණා. දැන් අඩු තරමේ මාමලා බාප්පලා ගැන විතරයි නම යන්නේ. මේ කිරුළ හිමි කුමාරයා වගේ කතන්දර සමාජයෙන් හදන දේවල්. ඒකෙන් ඇඳගත්තොත් ඇඳගත්තාම තමයි. ඇත්ත තේරුම් ගත්තොත් තේරුම්ගත්තා. අපි ජීවත්වෙන්න දැනගන්න ඕනෑ. අපි හිරගෙදරට ගියත් හිනාවෙලා යන්නෙ. ඇඬිලි පැමිණිලි කංකෙඳිරිගෑම් නෑ. හැබැයි මෛත‍්‍රීපාල සිරිසේන ජනාධිපතිතුමා රජගෙදර ඉඳලත් දුකෙන් ඉන්නේ.

රටේ සිදුවන ජාතිවාදී කෝලාහලවලදී රාජපක්ෂ නායකත්වයට ඇඟිල්ල දිගුවෙනවා. රාජපක්ෂලා ජාතිවාදය දේශපාලනයට යොදාගන්නා බවට…
ඒවා තනිකරම ආණ්ඩුවේ ක‍්‍රියා. ඔය පහරදීම් ආණ්ඩුවට නවත්වන්න තිබුණා. නැවැත්වුවේ නැහැ. පැත්තකට වෙලා ආණ්ඩුව සහ පොලීසිය හිටියා. දැන් පාතාලයෙන් ඇවිල්ලා වෙඩි තියලා යනවා. දැන් පොලිස් මාධ්‍ය ප‍්‍රකාශකලා මරණකරුගේ ඉතිහාසය තමයි කියවන්නේ. එහෙනම් වැලිකඩ බන්ධනාගාර සිද්ධියේදිත් මැරුණෙ පාතාල නායකයෝ. වැලිකඩදී මැරුණ අහවල් කෙනා කුඩුකාරයෙක් කියලා කියන්නේ නෑ. එතැනදී මරපු එක වැරදියි. මෙතැනදී මරණකරුගේ ඉතිහාසය කියනවා. පොලිසිය මරණකරුගේ ඉතිහාසය කියලා වැඩක් නෑනේ. මරපු කෙනාව හොයන්න ඕනෑ. දැන් පොලීසිය දේශපාලනීකරණය කරලා. ඉතින් ජාතිවාදී ක‍්‍රියා නෙවෙයි, වෙන මොනවා වෙයිද දන්නෑ.

ඔබ හිතන විදියට ලාංකික අනන්‍යතාව කියන්නේ මොකක්ද?
ලෝකයේ න්‍යායන් තියෙනවා. එංගලන්තය, ඇමෙරිකාව වගේ රටවල ජනාධිපතිවරයා බයිබලයේ අත තියලා දිවුරුම් දෙනවා. පල්ලියට තැනක් තියෙනවා. මැදපෙරදිග ඉස්ලාම් නායකත්වයක් තියෙනවා. ඉන්දියාව හින්දු. හැබැයි ඒ රටවල අනෙක් ජාතීන් ජීවත්වෙනවා. ලංකාව සිංහල කතාකරන ජනතාව ඉන්න බෞද්ධ රටක් විදියට ලෝකය සහ අපේ අය හඳුනාගෙන තියෙනවා. හැබැයි ඒකෙන් කියැවෙන්නේ නෑ අනෙක් ආගම්වල අයට ජීවත්වෙන්න බැරි බව. ත‍්‍රස්තවාදයට එරෙහිව සටන්කළ දෙමළ හා මුස්ලිම් නායකයනුත් හිටියා. ඇත්තටම අපේ රටේ කවදාවත් ජාතීන් සහ ආගම් අතර ගැටුම් ඇතිවුණේ නැහැ. එල්ටීටීඊය පටන්ගත්තේ දොරේඅප්පාව මරලා. එයා දකුණේ නගරාධිපති කෙනෙක් නෙවෙයි. යාපනයේ නගරාධිපති. එල්ටීටීඊය අනෙක් උතුරේ සංවිධානවල නායකයන්ව මැරුවා. ඉතින්, ඒක ජාතින් අතර ගැටුමක් නෙවෙයි. ත‍්‍රස්තවාදයක්. ලංකාවෙ කිසිම දවසක ආගම ජාතිය ප‍්‍රශ්නයක් කරගෙන තිබුණෙ නැහැ.

හිටපු ආණ්ඩුව ජනාධිපතිවරණයෙන් පරාජය වෙන්නට හිටපු ආණ්ඩුව පැත්තේ අඩුපාඩු හේතුවුණේ නැද්ද?
හැම ආණ්ඩුවකම අඩුපාඩු තියෙනවා. මගේ මතය තමයි රටේ සංවර්ධනය සාමාන්‍යකරණය වුණා. එයාපෝට්, වරාය එදිනෙදා දේවල් වුණා. සමෘද්ධිය, පොහොර සහනාධාරය කොහොමත් දෙන දේවල් වුණා. එතකොට මිනිස්සුුන්ට අපේ ආණ්ඩුවෙන් ලැබුණු දේවල් අලූ‍ත් දේවල් නෙවෙයි වගේ දැනුණා. ගමේ පාර කාපට් කිරීම අලූ‍ත් දෙයක් නෙවෙයි. විදුලිය දෙන එක අලූ‍ත් දෙයක් නෙවෙයි. ඉතින් වෙනසක් කරලා බලන්න මිනිස්සු පෙළඹුණා. හැබැයි දැන් ගමේ පාරක් හදන්නේ නැහැ. මහින්ද රාජපක්ෂ ආණ්ඩුවේ සංවර්ධනය අසීමිතයි. හැබැයි දැන් සමෘද්ධිය කැපෙන්න පුළුවන්, පොහොර සහනාධාරය කැපෙන්න පුළු‍වන් බව මිනිස්සුන්ට වැටහිලා තියෙනවා. එදා අපට විරුද්ධව එල්ලකළ දුෂණ චෝදනා තිබුණා. හැබැයි ඔප්පුවුණේ නැහැ. මේ ආණ්ඩුවේ බැඳුම්කර වංචාව ගැන අපි කිව්වා. දැන් ඒක ඔප්පුවෙලා. සමහරු හිරේත් ඉන්නවා. හැබැයි චෙක් ගත්ත අය එළියේත් ඉන්නවා. මේ ආණ්ඩුවේ කොන්ත‍්‍රාත්වලින් කොමිස් ගැහුවා කියන්න බෑ. මොකද පාලමක් බෝක්කුවක්වත් හදලා නැහැ. සංවර්ධනය කරද්දී චෝදනා කරන්න ලේසියි. මොනාවත් නොකර ඉද්දී චෝදනා කරන්න අමාරුයි. අපට ලොකු ඉලක්ක තිබුණා. ඒවාට යද්දි දේශපාලනයේ යෙදෙන එක අපට අමතක වුණා. ඒ නිසා පරාද වුණා. විපක්ෂයේ ඉඳගෙන අපි අවුරුදු කිහිපයක් දේශපාලනය කළා.

ඕනෑම ආණ්ඩුවක් තමන්ට එරෙහි දුෂණ චෝදනා තරයේ ප‍්‍රතික්ෂේප කරනවා. ඇත්තටම රාජපක්ෂ ආණ්ඩුවේ දුෂණයක් තිබුණේම නැද්ද?
ලංකාවේ විතරක් නෙවෙයි. ලෝකයේ ඕනෑම තැනක දුෂණ තියෙනවා. මාධ්‍ය, දේශපාලනය ඇතුළු හැමතැනම දුෂණය තියෙනවා. මේක සම්පූර්ණයෙන් නතර කරන්න ගියොත් සම්පූර්ණයෙන් ආර්ථිකය කඩාවැටෙන්නත් පුළුවන්. ඒ හින්දා ඒක අවම කිරීම තමයි තියෙන ක‍්‍රමය. මම දුෂණයට සහාය දෙන්නේ නෑ. ප‍්‍රතික්ෂේප කරනවා. හැබැයි ඒක සම්පූර්ණයෙන් නවත්වන්න බැහැ. රාජ්‍ය ආයතනයකට ගියත් අල්ලසක් දෙන්න ඕනැ. මේක හැමතැනම තියෙනවා. ඉතින් ඒක අවම කිරීම වැදගත්.

දෙමළ ජනතාවගේ ඡුන්දය මහින්ද රාජපක්ෂ මහතාට ලැබුණේ අඩුවෙන්. ඔබලාට උතුරේ ජනතාව ජයගන්න බැරි ඇයි?
මම කාලයක් තිස්සේ මේ ගැන කතාකළා. අපේ ප‍්‍රධාන දේශපාලන පක්ෂ උතුරේ දේශපාලනය කරන්න පටන්ගන්න ඕනෑ, අද ආණ්ඩුව ටීඑන්ඒ එකෙන් යැපෙනවා. අපි ඩග්ලස් දේවානන්දා මහතාගේ පක්ෂය වගේ කණ්ඩායම්වලින් යැපෙනවා. මම පාසල් කාලයේ ඉඳන්ම කිව්වා ලංකාවේ ප‍්‍රධාන පක්ෂ උතුරේ දේශපාලනය කරන්න ඕනෑ බව. අපේ යාන්ත‍්‍රණය ගෙනයන්න ඕනෑ. එතකොට ඒ ජනතාවගේ වුවමනාවන්ට අපි ඇහුම්කන් දෙන්න පටන්ගන්නවා. සංවර්ධනය ගෙනියනවා. රැුකියා දෙනවා. එතකොට මේ භේදය නැතිවෙනවා. පොදුජන පෙරමුණ මේ වෙද්දී උතුරේ ශක්තිමත් යාන්ත‍්‍රණයක් හදාගෙන යනවා.

හිටපු එල්ටීටීඊ සෙබලූ‍ කියන්නේත් මනුෂ්‍යයෝ. එහෙත් ඔවුන් වෙනුවෙන් කරන ආධාරවලට පවා දකුණේ නායකයන් විරුද්ධ වෙනවා. දෙමළ ජනතාවගේ ඉඩම් ප‍්‍රශ්න ඇතුලූ‍ ප‍්‍රශ්න ගණනාවක් එහෙමමයි. ආර්ථික ප‍්‍රශ්න, අතුරුදන්වීම් වගේ ප‍්‍රශ්න තියෙනවා. මේවාට විසඳුම් දෙන්න පුළුවන්ද?
අද මහින්ද මහත්තයා බලයේ හිටියා නම් ඔය ඉතිරි එල්ටීටීඊ සෙබලූ‍ ගෙදර ගිහිල්ලා. නිකන්ම තියාගෙන ඉන්නෙ නෑ, උතුරේ ඉඩම් ප‍්‍රශ්නය නම් විසඳන්න හරි අමාරුයි. මොකද මේ ඉඩම්වල අයිතිය බෙදී ගිහින් තියෙන්නෙ. සමහර ඉඩම්වල නීත්‍යනුකූල හිමිකරුවා අවුරුදු තිහකට කලින් රට අත්හැර ගිහින්. ඒ කාලයේ වෙන කෙනෙක් පදිංචිවෙලා ඉඳලා. දැන් මුල් අයිතිකාරයා අයිතිය ඉල්ලනවා. ඉඩම කාටද දෙන්නෙ. ඔය වගේ ප‍්‍රශ්න තියෙනවා. තවත් උතුරේ ලොකුම ප‍්‍රශ්නයක් තමයි දෙමළ නිලධාරීන් නැති වීම. විශේෂයෙන් පොලිසියේ නිලධාරීන්. මහින්ද මහත්තයා දාපු නිලධාරීන් ටිකත් දකුණේ පළාත්වලට මාරුකරලා දැම්මා. අද පැමිණිල්ලක් ලියාගන්න නිලධාරීන් නෑ.
ඒ හැරුණාම දෙමළ ප‍්‍රශ්න කියලා විශේෂ ප‍්‍රශ්න නැහැ. මේ හැමෝටම තියෙන ප‍්‍රශ්න එකයි. අපේ ජනවර්ග එකිනෙකා ගැටගැහිලා ඉන්නෙ. බෞද්ධ ආගමටත් හින්දු බලපෑම් තියෙනවා. දළදා හාමුදුරුවෝ ආරක්ෂා කරන්න දෙවිවරු ඉන්නවා. ශ‍්‍රී මහා බෝධිය ආරක්ෂා කරන්න දෙවිවරු ඉන්නවා. සිංහල ගෙවල්වල පවා දේවරූපයක් තියෙනවා. හැම පන්සලකම දේවරූප තියෙනවා.

ලංකාවට ජාත්‍යන්තර වශයෙන් තිබිය යුතු ප‍්‍රතිපත්තිය මොකක්ද?
ලංකාව නොබැඳි පිළිවෙත අනුගමනය කරන්න ඕනෑ. කිසිම රාජ්‍යයකට යටත් වෙන්න බෑ. අපි ඇමෙරිකාව, චීනය, ඉන්දියාව, රුසියාව වගේ ආර්ථිකයක් නෙවෙයි. ඉතින් අපට ගැළපෙන ප‍්‍රතිපත්තිය නොබැඳි ප‍්‍රතිපත්තිය. හැමෝගෙන්ම උදව් අරගෙන හැමෝටම උදව් කරන්න වෙනවා. හැබැයි අපේ භූමිය රටේ ආරක්ෂාවට සීමා වැටෙන පරිදි වෙන රටවලට යටත් කරන්න බෑ.

හැබැයි රාජපක්ෂ රජය චීනයට වැඩියෙන් සමීප වුණා. නිව්යෝක් ටයිම්ස් චෝදනාව වගේ ඒවා එන්නෙත් ඒ නිසා..
අපි යුරෝපයෙන්, ජපානයෙන් ආධාර ගත්තා. ඉන්දියානු ණය ආධාර ගත්තා. චීනයෙන් නෙවෙයි අපි වැඩිම ණය ගත්තෙ. අපට වඩා චීන ණය මේ රජය ගත්තා. අපි චීනය එක්ක එකතුයි කියලා කියන්නෙ බටහිර රටවල්. ඒ අපි එයාලාගේ පදයට නටන්නෙ නැති හින්දා. චීනයේ ණයක් ගත්තා කියලා බටහිර රටවල් අපට බැනපුවාවේ. අපේ රට ඇතුළේ ඒක ගැන වාද කරගන්න ඕනෑ නෑ. චීනයයි ඇමෙරිකාවයි ගහගනීවි. අපි ඒක ගැන කතාකරන්න ඕනෑ නැහැ. අල්ලපු ගෙවල්වල රණ්ඩුවලට අපි මැදිහත් වෙන්නෙ ඇයි.

පෝට් සිටි කියන්නෙ රටේ සම්පත් විකිණීමක් නෙවෙයිද?
ගිවිසුම් තමයි ප‍්‍රශ්නය. ඒ කාලෙ අපි තමයි තීන්දු කළේ ඒ ව්‍යාපෘති කෙරෙන විදිය. හැබැයි අද තීරණ ගැනීමේ සම්පූර්ණ බලය සමාගම්වලට දීලා.

රාජපක්ෂ රජය හම්බන්තොට කරපු ව්‍යාපෘති කිසිම ප‍්‍රයෝජනයක් කරපු සුදු අලි බවට පත්වුණා නේද?
වරායට එන නැව් නවත්වලා, එයාපෝට් එකේ ගුවන් යානා නවත්වලා, ක‍්‍රිකට් තරඟ නවත්වලා දැන් කියනවා මේවා වැඩක් නැහැ කියලා. වරායට අපේ කාලේ නැව් ආවා. මෙයාලා නැව් නැවැත්වුවා. මත්තලට එදා ගුවන්යානා ආවා. දැන් එන්නෙ නෑ.