රාජාංගණයේ පළමු කොවිඞ්-19 ආසාදිතයා ලෙස හඳුනාගත් පුද්ගලයා පැමිණි ඇති අවමංගල්‍ය උත්සවයට අමාත්‍ය එස්.එම්. චන්ද්‍රසේන සහ හිටපු පාර්ලිමේන්තු මන්ත්‍රී දුමින්ද දිසානායක පැමිණීම නිසා ඔවුන්ට ස්වයං නිරෝධායනය වන ලෙස එම ප්‍රදේශයේ සෞඛ්‍ය බලධාරීන් උපදෙස් ලබා දී ඇතත් එම උපදෙස් පිළිනොපැද මැතිවරණ කටයුතුවල නියැලෙන බව වාර්තා වේ.

ප්‍රදේශයේ සෞඛ්‍ය නිලධාරීන් හා මහජන සෞඛ්‍ය පරීක්ෂකවරුන් එම අපේක්ෂකයන් දෙදෙනාට මෙම දැනුම්දීම වාචිකව සිදුකර ඇත්තේ ජුලි 14 වැනිදාය. මේ පිළිබඳව කරුණු විමසීමකට එම අපේක්ෂකයන් දෙදෙනා දූරකථනයෙන් සම්බන්ධ කර ගැනීමට අප උත්සාහ කළ නමුත් උත්සාහය ව්‍යර්ථ විය.

එම අවමංගල්‍ය උත්සවයට සහභාගි වූ දහසකට අධික පිරිසක් නිරෝධායනයට යොමු කර ඇත. එම ප්‍රදේශවල මැතිවරණ ප්‍රචාරක කටයුතුවලට අමතරව එස්.එම්. චන්ද්‍රසේන මහතා බත්තරමුල්ලේ පිහිටි වන සංරක්ෂණ සහ වනජීවී දෙපාර්තමේන්තු දෙකේ නිලධාරීන් කැඳවා ජූලි 15 වන දින රැස්වීමක්ද පවත්වා ඇත. ■