ශ‍්‍රීලනිපය සහ ඒකාබද්ධ පොදුජන පෙරමුණ එකට තරඟ කිරීම සඳහා වන සැලසුම් වළක්වා එක්සත් ජාතික පෙරමුණ සහ ශ‍්‍රීලනිපය ඉදිරි මැතිවරණවලදී එකම සන්ධානයකින් තරඟ කිරීම සඳහා පසුබිම සකස් කිරීමට ශ‍්‍රීලනිපයේ මහින්ද අමරවීර සහ දුමින්ද දිසානායක ඇතුළු පිරිසක් උත්සාහ කරමින් සිටින බව වාර්තා වෙයි.

එක්සත් ජාතික පක්ෂය සහ එක්සත් ජාතික පෙරමුණෙන් මැතිවරණයට ඉදිරිපත් වූ පක්ෂ කිහිපය එක්ව නව සන්ධානයක් ගොඩනැඟීම සඳහා මේ වනවිට සාකච්ඡා මාලාවක් දියත් කර ඇති අතර එම සන්ධානය සමඟ ශ‍්‍රීලනිපයද එක් කිරීම ඔවුන්ගේ අරමුණ වී ඇත.

දුමින්ද දිසානායක ඇතුළු කණ්ඩායම එක්සත් ජාතික පක්ෂයට එක්වනු ඇති බවට මාධ්‍ය හරහා ප‍්‍රචාරයක් ගෙනයෑමට හේතුව එම උත්සාහය අඩපණ කිරීම බවත් දුමින්ද දිසානායක ඇතුළු කණ්ඩායමේ සැබෑ අරමුණ එක්සත් ජාතික පක්ෂය සහ ශ‍්‍රීලනිපය අතර සන්ධානයක් ගොඩනැංවීම බවත් ශ‍්‍රීලනිප ආණ්ඩු පිළේ සාමාජිකයෙක් අනිද්දා සමඟ අදහස් දක්වමින් කීය.

කෙසේ වෙතත් ජනාධිපති මෛත‍්‍රීපාල සිරිසේන මේ පිළිබඳව තම අදහස නිශ්චිතව ප‍්‍රකාශ කර නොමැත.

අනිද්දා සමඟ සම්මුඛ සාකච්ඡාවකට එක්වෙමින් මේ පිළිබඳව අදහස් දැක්වූ අමාත්‍ය දුමින්ද දිසානායක ප‍්‍රකාශ කළේ තමන්ට කිසිසේත්ම එක්සත් ජාතික පක්ෂය සමඟ එක්වීමේ වුවමනාවක් නැති බවයි. එසේ වුවද මහින්ද රාජපක්ෂ මහතා ඇතුළු ඒකාබද්ධ විපක්ෂය විසින් මෙතෙක් පවත්වාගෙන ආ වැඩපිළිවෙළ වෙනස් කර නොමැති බවත් ඒ නිසා ජනාධිපති මෛත‍්‍රීපාල සිරිසේනට ඒකාබද්ධ පොදුජන පෙරමුණ සමඟ එක්වීමේ හැකියාවක් නැති බවත් ඔහු කීය. 2015 දී එවකට පැවති රජයට විරුද්ධව ආරම්භ කළ දේශපාලන ගමන 2020 න් පසුවද ඉදිරියට යා යුතු බව දුමින්ද දිසානායක අමාත්‍යවරයා කීය. කෙසේ වෙතත් දුමින්ද දිසානායක සහ මහින්ද අමරවීර ඇතුළු පිරිස ඉවත් කොට ශ‍්‍රීලනිපය සහ ඒකාබද්ධ පොදුජන පෙරමුණ එක් කිරිම සඳහා ශ‍්‍රීලනිප ජ්‍යෙෂ්ඨයන් අතර සාකච්ඡුාවක් ඇතැයි වාර්තා වෙයි. ශ‍්‍රීලනිප කණ්ඩායමෙන් ඉවත්ව ඒකාබද්ධ පොදුජන පෙරමුණ සමඟ එක්වූ 15 දෙනාගේ කණ්ඩායමේ සුසිල් පේ‍්‍රම්ජයන්ත් ඇතුළු කණ්ඩායම විසින් මේ වනවිට දුමින්ද දිසානායක සහ මහින්ද අමරවීර අමාත්‍යවරුන් දෙදෙනාට විරුද්ධව අදහස් පළ කිරීමට හේතුව වී ඇත්තේද දුමින්ද දිසානායක සහ මහින්ද අමරවීර ඇතුළු කණ්ඩායමේ සැලසුම් අසාර්ථක කොට ශ‍්‍රිලනිපය ආණ්ඩුවෙන් ඉවත් කරවීම බව ඒකාබද්ධ පොදුජන පෙරමුණේ ආරංචිමාර්ග පවසයි.