මේ  දුම්රිය රියැදුරන් මත්ද්‍රව්‍ය ප‍්‍රවාහනය කරතැ’යි ආණ්ඩුවේ ඇමතිවරයෙක් කීය. ඒ අවමානාත්මක ප‍්‍රකාශය, තමන්ට අවමානයකැ’යි දුම්රිය දෙපාරේතමේන්තුවේ ඇතැම් වෘත්තීය සමිති නායකයන් හීන් කෙඳිරියක් නැගූ නමුත්, ඊට එහා කිසිවක් කරන්නට ඔවුන්ගේ ‘ඉවසීම’ නමැති හොඳ ගුණය විසින් ඔවුන්ට ඉඩ දෙන්නේ නැති බව පෙනේ. ඔවුන් වහා ම කළේ, ඇමතිවරයාට  ඕනෑ නම් ප‍්‍රකාශය වෙනස් කරන්නට කාලය ඉතිරි වන පරිදි, දින කිහිපයකට පසු ව වැඩ වර්ජනයක් නියම කර ගැනීම ය.

රේගු අධ්‍යක්‍ෂ ජෙනරාල් ධුරයට හිටපු හමුදා නිලධාරියකු පත් කළ විට, රේගුවේ කිසිවකුට එය ප‍්‍රශ්නයක් නොවී ය. වෘත්තීය සමිති නායකයන් හීන් කෙඳිරියක් නැගූ නමුත්, ජනාධිපතිතුමා සමග සාකච්ඡුාවෙන් පසු හිත සන්තෝස කර ගෙන ඇති බව පෙනේ.

රටේ වැඩවර්ජන ඇතිවීම හොඳ දෙයක් නොවේ. එයින් රාජ්‍ය යාන්ත‍්‍රණය අඩපණ වනවා මෙන් ම ජනජීවිතයද දුබල වේ. ඒ නිසා වැඩවර්ජන දිරිගැන්වීම නරක ය.

එහෙත් මේ ආයතන දෙක ගැන කතා කළේ, මීට පෙර ආණ්ඩුව පැවැති සමයේ මෙවැනි දේවල් සිදුවුණා නම්, මේ ආයතන දෙකේ වෘත්තීය සමිති හා ඒවායේ කොන්ද කෙලින් ඇති නායකයන් මරාගෙන මැරෙන තරම් දැඩි පියවර ගත් ආකාරය මතකයට නැගුණු නිසා ය.

ඒ දවස්වල, සමහර පුංචි දේවලටත් විරෝධතාව පටන්ගන්නේ වැඩ වර්ජනයෙනි. ? නිදාගෙන උදේ නැගිටින විට රේල්ලූව වැඩ වර්ජනයක් පටන් අරගෙන ය. උදේ කාර්යාලයට, පාසලට යන්නට විදියක් නැත.

එහෙත් දැන් අපමණ ඉවසීමක් මේ වෘත්තීය සමිති නායකයන්ටත්, ඒ වෘත්තීය සමිතිවලටත් තිබෙන බව පෙනේ. කිසිවෙක් වැඩ වර්ජනයට කැමති නැතිය. පාලකයන්ට ‘චාන්ස්’ දී අපේ ප‍්‍රශ්න විසඳාදෙන තෙක් ඉවසීමේ හොඳ ගුණය ඒ අය දැන් පුරුදු කරමින් සිටිති.

ප‍්‍රජාතන්ත‍්‍රවාදය දියුණු වෙන්නට වෙන්නට රාජ්‍යයේ බලය තහවුරු වෙනවා වෙනුවට මහජනතාවගේ බලය තහවුරු වෙයි. එහෙත් සමහරුනට ඒ නිදහසෙන් වැඩක් නැත. ඔවුන්ට අවශ්‍ය තමන් දැඩිව පාලනය කරනා ආඥාදායකයන් යටතේ වහලූන් හැටියට විසීමය. ඒ නිසා ප‍්‍රජාතන්ත‍්‍රවාදී වටිනාකම් ප‍්‍රතික්‍ෂෙප කර අධිකාරවාදය කැඳවාගැනිණ. දැන් ඒ යටතේ ඉවසීම ප‍්‍රගුණ කරමින් සිටිතිx

x තිවංක සපරමාදු