අනුරංග ජයසිංහ

ජනාධිපතිවරණයක් කැඳවන අවස්ථාව වනවිට ද්විත්ව පුරවැසිභාවය ඉවත් කරගැනීමට නොහැකි වුණත් ගෝඨාභය රාජපක්ෂට නාමයෝජනා බාරදිය හැකි බව ප්‍රචාරය කළත්, මැතිවරණ කොමිෂන් සභාව ද්විත්ව පුරවැසියෙකුගේ නාමයෝජනා බාර නොගනු ඇතැයි මැතිවරණ කොමිසමේ ආරංචි මාර්ග පවසයි.

ද්විත්ව පුරවැසියෙකුට ජනාධිපති ලෙස පත්වීමට ආණ්ඩුක්‍රම ව්‍යවස්ථාව අනුව නොහැකි වුණත් මැතිවරණයට ඉදිරිපත් වීමට ව්‍යවස්ථාවෙන් බාධාවක් නැතැයි ගෝඨාභය රාජපක්ෂට හිතවත් කණ්ඩායම් ප්‍රචාරය කර ඇත. ඒ අනුව ද්විත්ව පුරවැසියෙකු නාමයෝජනා බාරදුනහොත් මැතිවරණ කොමිෂන් සභාව එය බාරගත යුතු බවට ඔවුහු තර්ක කරති.

එසේ වුවත් අනිද්දා සමඟ අදහස් දැක්වූ ජ්‍යේෂ්ඨ නීතිඥ එල්මෝ පෙරේරා ප්‍රකාශ කළේ, තේරී පත්වීමට නුසුදුසු අපේක්ෂකයෙකුගේ නාමයෝජනා භාර නොගැනීමේ හැකියාව මැතිවරණ කොමිෂන් සභාවට තිබෙන බවයි. පුරවැසිභාවය ඉවත් කරගැනීමට ලියකියවිලි දුන් පමණින් නාමයෝජනා භාරගත නොහැකි බව ඔහු කීය. රටක පුරවැසිභාවය ලබාගැනීමට කොන්දේසි තිබෙනවා මෙන්ම එම පුරවැසිභාවය ඉවත් කරගැනීමටද කොන්දේසි තිබෙන බවත් කොන්දේසි සම්පූර්ණ කළහොත් පමණක් පුරවැසිභාවය ලබාගැනීමට හෝ ඉවත් කරගැනීමට හැකිවන බවත් ඔහු කීය.

ඊට අමතරව මැතිවරණ නීතිය පිළිබඳව කරුණු දත් ප්‍රවීණයෙකු ප්‍රකාශ කළේ, ගෝඨාභය රාජපක්ෂ මහතා ද්විත්ව පුරවැසියෙකු බව මේ වෙද්දී මුළු රටම දන්නා සත්‍යයක් නිසා ද්විත්ව පුරවැසිභාවය ඉවත් කරගත් බව ලියකියවිලි සහිතව දන්වන තෙක් ඔහුගේ නාමයෝජනා භාරගැනීම මැතිවරණ කොමිසමට කළ නොහැකි බවයි. ■