විජිත හේරත් – ජාතික ජන බලවේගය

ආණ්ඩුව ඉතා තදින් තුනෙන් දෙකක් ඉල්ලීමේ සටන්පාඨය ඉදිරියට අරන් තියෙනවා…
කිසිම දේශපාලන පක්ෂයකට ඡන්දයෙන් තුනෙන් දෙකක බලයක් ගන්න බැහැ. ඒ තමයි පළවැනි කාරණාව. ජේ.ආර්. ජයවර්ධන මහතා හයෙන් පහක බලයක් ගත්තේ මීට කලින් තිබුණ පරණ මැතිවරණ ක්‍රමයට. දැන් මැතිවරණ ක්‍රමය යටතේ කාටවත් ඡන්දයෙන් තුනෙන් දෙකක බලයක් ගන්න බැහැ. අරගෙනත් නෑ. මේ වෙලාවේ ආණ්ඩුවට සරල බහුතරය ගන්න එකත් අමාරුයි. තුනෙන් දෙකක් කොහොමත් වෙන්නේ නැහැ.

ජවිපෙ මීට පෙර විසිවැනි සංශෝධනයට තුනෙන් දෙකක බලය හොයමින් හිටියා. ආණ්ඩුවේ ව්‍යවස්ථා ප්‍රතිසංස්කරණ යෝජනාව දකින්නේ කොහොමද?
අපි තුනෙන් දෙකක බලය ඉල්ලුවේ දහනවවැනි ආණ්ඩුක්‍රම ව්‍යවස්ථා සංශෝධනය ඉදිරියට ගෙන යමින් විධායක ජනාධිපති ක්‍රමය අහෝසි කරන්න. ආණ්ඩුව තුනෙන් දෙකක බලයක් ඉල්ලන්නේ දහනවය අහෝසි කරන්න. දහනවය කියන්නේ විධායක ජනාධිපති බලතල අඩු කළ ක්‍රමයක්. ස්වාධීන කොමිෂන් සභා ස්ථාපිත කළ එකක්. ජනාධිපතිවරයාගේ ධුර කාලයට සීමා පැනෙව්වේ 19 වැනි සංශෝධනයෙන්. නැත්නම් මීට පෙර ජනාධිපතිවරණයටත් ඉදිරිපත් වෙන්නේ මහින්ද රාජපක්ෂ. දැන් ඡන්දයක් තියෙනවාද නැතිද කියලා හිතාගන්නත් බෑ. ඒ මැතිවරණ කොමිෂන් සභාව නිසා. දහනවය නැත්නම් දැන් මරාගන්නවා. මැතිවරණ ව්‍යාපාරයේදී වෙඩි තියාගන්නවා, ගිනි තියාගන්නවා, කෑගහනවා. ඒ තත්වය දැන් සීයට සීයක් වෙනස් නොවුණාට, ලොකු වෙනසක් වෙලා තියෙන්නේ දහනවවැනි සංශෝධනය නිසා. ඒවා මේ අයට බාධා. අනෙක දහනවය නිසා තමන්ගේ හිතේ හැටියට පත් කිරීම් කරන්න බෑ. උසාවියට පත් කිරීමක් කරනකොට ගෙදරට ගෙන්වලා, පිටට තට්ටු කරලා, තමන්ට හිතවත් කෙනෙක් දාන්න බෑ. පොලීසියට පත් කිරීම් කරගන්න බැහැ. ඒවා ඔවුන්ට බාධා. මැදමුලනේ කැලෑ නීතිය ක්‍රියාත්මක කරන්න තමයි දහනවය අහෝසි කරන්න ඕනෑ. ඒකට තමයි තුනෙන් දෙක ඉල්ලන්නේ. ප්‍රජාතන්ත්‍රවාදයට එරෙහි ඒකාධිපති පාලනයක් ගෙනයන්නයි ඔවුන්ට ඕනෑ. ඒත් ඔවුන්ට ඒක කරන්න බැහැ. ජනතාව ඒ බලය දෙන්නේ නැහැ. ඒ නිසා සැකයක් තබාගන්න ඕනෑ නැහැ.

ජාතික ජන බලවේගයේ අපේක්ෂකයාට ඡන්ද කැඩීම නිසා ගෝඨාභය රාජපක්ෂ ජයගෙන අධිකාරිවාදී පාලනයක් ගෙනයනු ඇතැයි ජනාධිපතිවරණයේදී කතිකාවක් ඇතිවුණා. ජාතික ජන බලවේගය කීවා අපි ජනාධිපතිවරණයේදී ශක්තිමත් බලවේගයක් හදලා එයට මුහුණදෙන බව..
ඒ වෙනුවෙන් තමයි, කවුරු ආණ්ඩු බලය ගත්තත් පාර්ලිමේන්තුව තුළ මාලිමාවේ අපේ කණ්ඩායමට ශක්තිමත් නියෝජනයක් බලාපොරොත්තු වෙන්නේ. අපි කීවා වගේම සටන් කරනවා. පාර්ලිමේන්තුව තුළ හඬ නගනවා. ආණ්ඩුව වැරදි ඒකාධිපති ගමනක් යන එක වළක්වන්න මාලිමාවේ බලය පාර්ලිමේන්තුවේ වැඩි වෙන්න ඕනෑ. එක්සත් ජාතික පක්ෂයෙන් ඒ කටයුත්ත වෙන්නේ නැහැ. ඔවුන් දෙකට බෙදිලා ඩීල් දේශපාලනයක නිරත වෙනවා. ඒ නිසා මේ දූෂිත පවුල් පාලනය නැවත හිස ඔසවන එකට එරෙහිව ශක්තිමත්ව ක්‍රියාත්මක වෙන්නට නම් මාලිමාවේ වැඩි පිරිසක් පාර්ලිමේන්තුවේ ඉන්න ඕනෑ. අපේ අරමුණ ඒක.

ජනාධිපතිවරණයේදී සිතූ බලයට ගොඩනඟන්න බැරිව, සීයට තුනක් පමණක් ගත් බව ජාතික ජන බලවේගයට එරෙහිව කියනවා..
ඒ සීයට තුනේ කතාව මහමැතිවරණයට වලංගු නෑ. ජනාධිපතිවරණයේදී ප්‍රධාන අපේක්ෂකයන් දෙදෙනා අතර තරගය තීව්‍ර වුණාම තුන්වැනියා කෙතරම් හොඳ වුණත් ඡන්ද අඩු වෙනවා. එහෙත් මහමැතිවරණයේදී මේ තත්වය වෙනස් වෙනවා. ඒ වගේම අපි වෙනසක් කරලා පෙන්වනවා.

2015 මැතිවරණයට වඩා වැඩි පිරිසක් පාර්ලිමේන්තුවට ඒවි කියලා හිතන්න පදනමක් තියෙනවාද?
අපට විශ්වාසයක් තියෙනවා ගියවරට වඩා සාධනීය ප්‍රගතියක් අත්පත් වේවි කියලා. ජනතාවට දැන් අලුත් බලවේගයක් ඕනෑ වෙලා තියෙනවා. ජාතික ජන බලවේගය කියන්නේ ජනතා විමුක්ති පෙරමුණ නෙවෙයි. ජවිපෙත් තවත් දේශපාලන කණ්ඩායම් සහ සිවිල් සංවිධාන, වෘත්තිකයන් හා විද්වතුන් එකතු වූ බලවේගයක්. ශ්‍රීලනිපයේ ඇත්ත මිනිසුන්, එජාපයේ ඇත්ත මිනිසුන්, සිංහල දෙමළ මුස්ලිම් මිනිසුන් ගොඩක් අප එක්ක එකතුවෙලා ඉන්නවා. 2015 දී ජේවීපීය විතරයි ඡන්දයට ආවේ. මෙවර ඔක්කෝම එකතුවෙලා. ඒ නිසා අපි හිතන්නේ ජනතාවගේ වුවමනාව වන අලුත් විකල්ප බලවේගයක් ගොඩනැඟීම සඳහා බලය අපට ලැබේවි කියලා.

දැන් තියෙන දේශපාලන පසුබිම ජාතික ජන බලවේගයට වාසියක්ද?
රාජපක්ෂ පාලනය පටන්ගන්නකොට ජනතාවට ලොකු බලාපොරොත්තු තිබුණා. දැන් ඒ බලාපොරොත්තු බිඳවැටිලා. එක රටක් එක නීතියක් කියලයි ඔවුන් බලයට ආවේ. එහෙත් කරුණා අම්මාන්ට, තොණ්ඩමන් පවුලට, කුරුණෑගල නගරාධිපතිට නීතිය ක්‍රියාත්මක වෙන්නේ නැහැ. අඟුලානේ ගමේ දුප්පත් කාන්තාවන් අත්අඩංගුවට අරගෙන උසාවි දාලා නීතිය ක්‍රියාත්මක වෙනවා. බලපුළුවන්කාරයන්ට එක නීතියක්. පුංචි මිනිසුන්ට එක නීතියක්. ඒක නෙවෙයි ජනතාව බලාපොරොත්තු වුණේ. මාස අටක් යනකොට කියපු දේවල් සිදුනොවෙන බව පෙනුණා. ප්‍රජාතන්ත්‍රවාදය ගැන බලාපොරොත්තුවක් තිබුණා නම් ඒක බිඳවැටිලා. මහජන ආරක්ෂාව බිඳවැටිලා. ඒ අනුව පහුගිය ජනාධිපතිවරණයේදී රාජපක්ෂලාට ඡන්දය දීපු අයත් ගොඩක් කළකිරිලා ඉන්නවා. ඔවුන් අපි එක්ක එකතුවෙනවා. එජාපයේ අභ්‍යන්තර කුළල් කාගැනීම්, බෙදීම් එක්ක කළකිරුණ විශාල පිරිසක් එකතු වෙමින් ඉන්නවා.
ජාතික ජන බලවේගයට 2019 දී ගෝඨාභය රාජපක්ෂට ඡන්දය දුන් අයගේ ආකර්ෂණයක් තියෙනවාද?
ඒ අවස්ථාවේදී සහරාන්ගේ බෝම්බයත් එක්ක ජනතාව භීතියට පත්වෙලා හිටියා. ආරක්ෂාව ගැන උත්තරයක් ලැබේවි කියලා තමයි රාජපක්ෂලාට ඡන්දය දුන්නේ. දැන් මාස අටක් ගෙවිලා. එහෙත් ආරක්ෂාව ගැන බලාපොරොත්තු බිඳවැටිලා. පාවෙන ඡන්දදායකයන් එක පක්ෂෙක එල්ලිලා නෑ. කැපුවත් යූඇන්පී කැපුවත් ශ්‍රීලංකා කියලා නැහැ. නිවැරදි බව තමාට හැඟෙන පැත්ත බලලා ඡන්දය දෙනවා. එවැනි විශාල පදාසයක් ඉන්නවා. ඔවුන් මේ මොහොතේ ඔය කණ්ඩායම් දෙකම ගැන කළකිරීමෙන් ඉන්නවා. ඔවුන් අප කෙරෙහි විශ්වාසය තියන බව පේනවා.

2015 දී වුණා වගේ කෝප් කමිටු සභාපතිකම නැවත ජාතික ජන බලවේගයට ලැබේවි කියා හිතන්න අමාරුයි. ජාතික ජන බලවේගය පාර්ලිමේන්තුවේදී කරන කාර්යභාරය මොකක්ද?
ජාතික ජන බලවේගයට මේ වෙලාවේ ඉල්ලන්නේ රට රකින බලය. ජනතාව රකින බලය. ආණ්ඩු කරන අයගේ ක්‍රියාකාරකම් ගැන නිරීක්ෂණය කරමින්, ඒවා ප්‍රශ්න කිරීමේ බලය. එහෙත් රට හදන බලයක් අනාගතයේ අපට ඕනෑ. 2025 දී අපි රට හදන බලය ඉල්ලනවා. අපි යන්නේ ආණ්ඩු බලය ලබාගැනීම සඳහා අදියර දෙකක ගමනක්. මේ ඡන්දයේදී අපි අත්තිවාරම දානවා. බිත්ති බැඳලා, වහලය ගහලා ගේ හදාගැනීමට කාලයක් යනවා. ෆවුන්ඬේසම දාගන්න එකයි දැන් කරන්නේ. පාර්ලිමේන්තුවේදී ශක්තිමත්, විකල්ප, අලුත් දේශපාලන ගමනක් අපි යනවා. කණ්ඩායමක් විදියට අපේ දේශපාලන භාවිතාව සිද්ධවෙනවා. පාර්ලිමේන්තුවේදීත් පිටත් අපි කරන දේශපාලන ක්‍රියාදාමය මත රට හදන ආණ්ඩුව ගැනීමේ ඉලක්කයක් එක්ක ඉස්සරහට යනවා.

ගත වූ මාස කිහිපයේදී ගෝඨාභය රාජපක්ෂ පාලනය නීතියට පිටින් සිදු කළ අත්තනෝමතික ක්‍රියා වලට ජාතික ජන බලවේගයෙන් මහ පොළොවේ තීරණාත්මක අභියෝගයක් එල්ල වුණාද?
ගෝඨාභය රාජපක්ෂ පාලනය පහුගිය කාලයට අත්තනෝමතික වැඩ ගොඩක් කළා. රාජ්‍ය සේවය නොසලකා හැර හමුදාමය පත්කිරීම් ගොඩක් කළා. ජනාධිපති කාර්යසාධක බලකා පත් කළා. කොරෝනා තත්වය නිසා ඒවාට විරුද්ධව ගන්න ක්‍රියාමාර්ග තාවකාලිකව නතර කරන්න වුණා. එහෙත් අපි ඉදිරියේදී ජනතාව එක්ක එකතු වෙලා ඒවාට එරෙහි ක්‍රියාමාර්ග ශක්තිමත් කරනවා. බලාපොරොත්තු නැති විදියට පහුගිය මාස තුනහතරේදී කොරෝනා නිසා ඔවුන්ගේ අත්තනෝමතිකත්වය යට ගියා. ඒත් ඒ ගැන අපේ විරෝධය යට ගිහින් නැහැ. අපේ දේශපාලනය යටගිහින් නැහැ. අපි ඉදිරියේදී ඒ ක්‍රියාමාර්ග ගන්නවා.

සමහරුන් ප්‍රශ්න කරන්නේ ජනවාර්ගික ප්‍රශ්න ආදි සංවේදී ප්‍රශ්න වලදී ජාතික ජන බලවේගය ඍජු පෙනී හිටීමක් කරන්නේ නැතිවේවි කියලා…
අපි කිසි දවසක අපට වාසි අවාසි ගැන හිතලා කතා නොකර ඉඳලා නැහැ. අසාධාරණය, අයුක්තිය කොතැනද, අපි එතැන කතා කළා. ඕනෑ ජාතියකට අසාධාරණයක් වුණොත් අපි ඒ ගැන කතා කරනවා. ඒ වෙනුවෙන් සටන් කරනවා. සමහරු ඔය වගේ මතයක් හදනවා. විවිධ කණ්ණාඩි වලින් බලන අය ඉන්නවානේ. එහෙත් එදා ඉඳලාම ජාතික ජන බලවේගයේ ප්‍රතිපත්තිමය ස්ථාවරයේ වෙනසක් නැහැ. හෙට දවසේ අපි තවත් ශක්තිමත්ව සටන් කරනවා මිසක් ඒ කිසිදෙයක් මඟහැරලා යන්නේ හෝ නොසලකා යන්නේ නැහැ. ඒක වැරදි අදහසක්. අපි අනිවාර්යයෙන්ම යුක්තිය වෙනුවෙන් සටන් කරනවා.