පැය 24ක කාලය ලබාදීම් කිහිපයකට පසු මැයි 31 වැනිදා ඇරඹි අතුරලියේ රතන හිමි නාටකය දින හතරකට පසු ජුනි 03 වැනිදා අවසන් විය.
ඒ බස්නාහිර පළාත් ආණ්ඩුකාර අසාත් සාලි හා නැගෙනහිර පළාත් ආණ්ඩුකාර එම්.එල්.එම්. හිස්බුල්ලා ඉල්ලා අස්වීමේ ලිපි ජනාධිපතිවරයාට බාරදීමෙන් පසුය. රිෂාද් බදියුදීන් අමාත්‍යවරයා ඇතුලූ කැබිනට්, රාජ්‍ය හා නියෝජ්‍ය ඇමතිධූර දැරූ මුස්ලිම් අමාත්‍යවරුන් එදිනම අස්වීමත් සමඟ ලියා තිබූ පිටපත් රඟදක්වන්නට තිබූ ඉතිරි අවස්ථා මඟහැරී ගියේය.


මෙහිදී ජනාධිපතිවරයාද ඔහුගේ සුපුරුදු රංගනයම ගෙනහැර දැක්වූයේය. අසාත් සාලි හා හිස්බුල්ලා යන ආණ්ඩුකාරවරුන් ස්වෙච්ඡුාවෙන් ඉල්ලා අස්වීමේ ලිපි දෙන තෙක් ඔහු විවිධ අය හරහා බලපෑම් කරමින් සිටියේය. එහෙත් ආණ්ඩුකාරවරු පත්කිරීම මෙන්ම ඔවුන්ව ඉවත්කිරීමේ බලයද ජනාධිපතිවරයා සතුවන බව අමුතුවෙන් මතක් කර දිය යුතු නැත. මීට පෙර ඕනෑ තරම් ඔහු ආණ්ඩුකාරවරු අස්කිරීමද පත්කිරීමද සිදුකර තිබේ. යම් අයෙකු තමා ධුරයෙන් අස්වෙනවායැයි දැනුම් දුන්නද පිළිගන්නේ නැත්නම් ජනාධිපතිවරයාට එය ප‍්‍රතික්ෂේප කළ හැකිය. ධුරයෙන් අස්වීම පිළිගන්නවානම් ඉහත ආණ්ඩුකාරවරුන් පිළිබඳ ප‍්‍රශ්නයේදී අස්වීමේ ලිපි දෙනතෙක් සිටිය යුතු නැත. ඔවුන්ව අස් කළ හැක.

අස්වීමේ ලිපි පිළිගැනීමෙන්ම ජනාධිපතිවරයා නොකියා කියා ඇත්තේ එම ආණ්ඩුකාරවරුන්ව අස්කිරීම ඔහුගේද වුවමනාව වූ බවය.
මීට පෙරත් ආරක්ෂක අමාත්‍යාංශයේ හිටපු ලේකම් හේමසිරි ප‍්‍රනාන්දුව තනතුරෙන් අස්කිරීම සඳහාද ජනාධිපතිවරයා රඟදැක්වූයේ මෙවැනිම රංගනයකි. ලේකම්වරයාව අස්කිරීමේ හැකියාව ඔහුට තිබුණි. එහෙත් අස්වීමේ ලිපියක් ලැබෙන තෙක් ඔහු බලා සිටියේය. ලැබුණු අස්වීමේ ලිපය අවසන ඔහු පිළිගත්තේය. එමඟින් ඔහු කියාපෑවේද හේමසිරි ප‍්‍රනාන්දුව තනතුරෙන් ඉවත් කිරීම සඳහා ඔහුගේ ඇති කැමැත්තය. පොලිස්පති පූජිත් ජයසුන්දරටද තනතුරෙන් ඉවත් වන්නැයි ජනාධිපතිවරයා කීවද ඔහු එය සිදු නොකළේ ඔහුව තනතුරෙන් ඉවත් කිරීමේ බලයක් ජනාධිපතිවරයාට නැති නිසාය. අවසන ජනාධිපතිවරයා අතුරු පාරක් සොයා ගොස් පොලිස්පතිවරයාව අනිවාර්ය නිවාඩු යැව්වේය. දැන් පොලිස්පතිවරයා ඊට එරෙහිව මූලික අයිතිවාසිකම් පෙත්සමක් ඉදිරිපත් කර ඇත. මේ කරුණුවලින් පෙනෙන්නේද කොන්දක් නැති හා දෙබිඩි ජනාධිපතිවරයෙකුගේ භූමිකාවය.
පාස්කු ඉරිදා ප‍්‍රහාරය සම්බන්ධයෙන් අමාත්‍ය රිෂාද් බදියුදීන්, බස්නාහිර ආණ්ඩුකාර අසාත් සාලි හා නැගෙනහිර ආණ්ඩුකාර එම්.එල්.එම්. හිස්බුල්ලා යන අයට එරෙහිව කටයුතු කළ යුතු බවත් එසේ කිරීමට පැය 24ක කාලයක් ලබාදෙන බවත් නොඑසේනම් දැඩි තින්දුවක් ගන්නා බවත් රතන හිමි කීවේ මැයි 28 වැනිදා ප‍්‍රවෘත්ති සාකච්ඡුාවක් පවත්වමින්ය.


ඊට පෙර දින කුරුණෑගල ශික්ෂණ රෝහලට ගොස් වෛද්‍ය සාෆිට එරෙහිව පැමිණිලි දැමීමට පැමිණි මව්වරුන් හමුවීමෙන් පසු රතන හිමි කීවේ මින්පසු මේ රට පාලනය කරන්නේ මහපාරේ ඉඳගෙන ඔවුන් බවය. කුරුණෑගල ඞීඅයිජීව මාරු කළහොත් හෝ අයින් කළහොත් රටක් ඉතුරු කරන්නේ නැති බවය.


කොහොම කොහොමින් මැයි 27 පටන් ගත් මුස්ලිම් ආණ්ඩුකාරවරුන්ට හා මුස්ලිම් අමාත්‍යවරයාට එරෙහි කටයුතු කිරීමේ කාලය ලබාදීම හෙවත් පැය 24 සීමාව මැයි 29 දිනටත් කල් ගියේය. එදිනද ප‍්‍රවෘත්ති සාකච්ඡුාවක් පවත්වමින් අද නොවේ හෙට ලෙස පැය 24 කාලය දීර්ඝ කළේය. මැයි 30 වැනිදා රට කළඹන ඒ ප‍්‍රවෘත්තිය අසන්නට රාජගිරිය සදහම් සෙවණට පැමිණෙන්නැයි මාධ්‍යයට ඔහු ආරාධනා කළේය. එදිනද සවස 3 සිට වේලාව පැය ගණනින් ඉදිරියට ගියේය. අවසන් පැය 24 කල්දීමේ නාටකය ආරම්භ වූයේ මැයි 31 වැනිදා මහනුවර දළඳා මාළිගය අසලින්ය.


එම නාටකය අවසන් කළ අවස්ථාවේදී දින හතරක කාලයක් නොකා නොබී වැතිර සිටි රතන හිමි මාරාන්තික යැයි කියූ උපවාසය අවසන් කර ඉතා ශක්ති සම්පන්නව මාධ්‍යයට අදහස් ප‍්‍රකාශ කර, පසුව ශක්ති හීනවූවකු සේ යළි ගිලන්ව වැතිර රෝහල කරා යෑම සිදුවූයේ කෙසේදැයි අපි ප‍්‍රශ්න නොකරමු.
එහෙත් අප ප‍්‍රශ්න කරන කාරණය වන්නේ පාස්කු ඉරිදා ප‍්‍රහාරකයන්ට ආධාර අනුබල දුන්නා යන්න නම් ඉහත ආණ්ඩුකාරවරුන්ට හා අමාත්‍යවරයාට ඇති චෝදනාව ඔවුන් එම තනතුරුවලින් අස්කිරීම මගින් එම ප‍්‍රශ්නය විසඳනවාද යන්නය.


පැහැදිළිවම පාස්කු ඉරිදා ප‍්‍රහාරය අන්තවාදී ත‍්‍රස්තවාදී ප‍්‍රහාරයකි. එවන් ප‍්‍රහාරයකට ආධාර අනුබල දීම සුළුපටු චෝදනාවක් නොවේ. එය අපරාධ චෝදනාවකි. එවැනි චෝදනාවකට දඬුවම තනතුරු වලින් ඉල්ලා අස්වීම හෝ අස්කිරීම නම් චෝදනාලාභීන්ට ලැබෙන්නේ දණ්ඩ මුක්තියකි.


මේ ආණ්ඩුකාරවරුන්ට හා අමාත්‍යවරයාට ඇති චෝදනා තවම ඔප්පු නොවූ චෝදනාය. එවන් ශක්තිමත් චෝදනාවක් තිබේ නම් කළ යුතු පළමු කාර්ය වන්නේ පොලීසියේ විමර්ශන අංශයකට කරුණු හා සාක්ෂි සහිත ශක්තිමත් පැමිණිල්ලක් ඉදිරිපත් කිරීම ය. ඒ මගින් අධිකරණ ක‍්‍රියාමාර්ගයකින් ඔවුන්ට දඬුවම් ලබාදිය හැකි මාර්ගයකට අවතීර්ණ වීමය.


එම මුස්ලිම් දේශපාලඥයන්ට එරෙහිව සාක්ෂි සහිත පැමිණිලි ඇත්නම් ඉදිරිපත් කරන ලෙස පොලීසිය කියන්නේ ඔවුන් තනතුරුවලින් ඉවත් වූ පසුය. එහෙත් පොලීසියේ වුවමනාව පරිදිය. දැන් රතන හිමි ඇතුළු මේ දේශපාලඥයන්ට එරෙහිව කෑ මොරදුන් සංඝයාට සාක්ෂි සහිත පැමිණිලි පොලීසියට ඉදිරිපත් කළ හැකිය. දණ්ඩ මුක්තිය නොදී ඔවුන්ව මේ මහා අපරාධයට වරදකරුවන් කළ හැකිය. රිෂාද් බදියුදීන් අමාත්‍යවරයාට එරෙහි විශ්වාසභංග යෝජනාව වූ කලී අතුරලියේ රතන පිටපතේම කාබන් කොපියක්ය. ඒ මගින් උත්සාහ කෙරුණේද ඔහුව තනතුරෙන් ඉවත් කිරීම පමණය. ඔවුන් එල්ල කරන අපරාධ චෝදනාව නීතිය හමුවේ ඔප්පු කර ඔහුට දඬුවම් ලබාදීම නොවේ. අමාත්‍යවරයාට දණ්ඩ මුක්තිය ලබාදීමය.
රතන හිමිත්, ඒකාබද්ධ විපක්ෂයත් එම බරපතල චෝදනාවලට දණ්ඩ මුක්තිය ලබාදීම නොදැන කරනවා විය හැකිද? x