ථෙරවාදී පාලි ත්‍රිපිටකය යුනෙස්කෝ ලෝක උරුමයක් ලෙස නම් කරන බව කියමින් ජනාධිපති මෛත්‍රීපාල සිරිසේන මේ වන විට ප්‍රචාරණ ව්‍යාපෘතියක් ආරම්භ කර තිබුණද ලෝක උරුමයක් ලෙස නම් කිරීමට අවශ්‍ය  ත්‍රිපිටකයේ මුල් පිටපතක් නොමැති බව වාර්තා වේ.

අනිද්දා  කළ විමසීමකදී  ශ්‍රී ලංකා යුනෙස්කෝ සභාවේ මහලේකම් ප්‍රේමලාල් රණවීර පවසා සිටියේ  මෙමරි ඔෆ් ද වර්ල්ඞ් (ලෝක මතක උරුම) යටතේ මෙවැනි ආගමික ලේඛන යුනෙස්කෝව විසින් ලෝක උරුම ලෙස නම් කරන බවත්  ඉන්දියාව, මියන්මාරය සහ උතුරු කොරියාවේ  එවැනි  ආගමික ලේඛන  ලෝක මතක උරුමයන් ලෙස නම් කර ඇති බවත්ය. එසේ වූවත් යම් ලේඛනයක් ලෝක මතක උරුමයක් ලෙස නම් කිරීමට නම් අදාළ ආගමික ලේඛනවල මුල් පිටපත් අවශ්‍ය බවද ඔහු පැවසීය.

ලංකාවේ ථෙරවාදී පාලි ත්‍රිපිටකයෙහි දඹදෙනි යුගයට අයත් මුල් පිටපතක් තවමත් සොයා ගෙන නොමැති බව කී ඔහු එය වෙනුවට ඇත්තේ නුවර දළදා මාලිගාවේ දැනට තැන්පත් කර ඇති නුවර යුගයට අයත් ථෙරවාදී පාලි ත්‍රිපිටකයෙහි පුස්කොළ පිටපතක් පමණක් බවත් කීවේය. මුල් පිටපත් සොයාගැනීමට සහ ලෝක මතක  උරුමයක් ලෙස නම් කිරීමේ ක්‍රියාවලියට කමිටුවක් පත් කර ඇති බවද එසේ මුල් පිටපත් සොයාගත නොහැකි වුවහොත් දළදා මාලිගාවේ ඇති පුස්කොළ පිටපත් ලෝක උරුම මතකයක් ලෙස නම් කිරීමට උත්සාහ කරන බවත් ඔහු කීය.

ථෙරවාදී පාලි ත්‍රිපිටකය යුනෙස්කෝ  ලෝක උරුමයක්  ලෙස ඇතුළත් කිරීම සඳහා  වන තාක්ෂණික ක්‍රියාවලිය වෙනුවෙන්  ජනාධිපති ජ්‍යෙෂ්ඨ අතිරේක ලේකම්  ඇසළ වීරකෝන්, බෞද්ධ කටයුතු කොමසාරිස්  ජනරාල්  සුනන්ද කාරියප්පෙරුම, මහාචාර්ය මැදගොඩ විජිතනන්ද හිමි, නිවාස ඉදිකිරීම්  හා සංස්කෘතික කටයුතු අමාත්‍යාංශයේ අතිරේක ලේකම් ජී. විජිත නන්ද  කුමාර්, ශ්‍රී ලංකා යුනෙස්කෝ සභාවේ මහලේකම් ප්‍රේමලාල් රණවීර, පුරාවිද්‍යා දෙපාර්තමේන්තුවේ  වැඩ බලන අධ්‍යක්‍ෂ  ජනරාල්  ජී.බී. මණ්ඩාවල, මහාචාර්ය  කේ.ඩී. පරණවිතාන, මහාචාර්ය මාලනී ඇඳගම, මහාචාර්ය ජී.බී. නන්දදේව, මහාචාර්ය චන්දිම බණ්ඩාර ඇතුළු මහත්ම මහත්මීන් අදාළ කමිටුවට පත් කර ඇත. ■