මා අද රැකියාව නිමා කර ගෙදර යමින් සිටියදී, මගේ මිතුරකුගෙන් ලද පණිවිඩයකින් ජනාධිපති මෛත‍්‍රීපාල සිරිසේන නම් වූ ඔබතුමාගේ නවතම ප‍්‍රකාශය ගැන අසන්නට ලැබුණි.

එහි මාතෘකාව කියවූ මම, නැවත නැවතත් එය කියවීමටත් අන්තර්ගත වීඩියෝ පටය නැරඹීමටත් පටන්ගත්තෙමි. වීඩියෝවේ මාතෘකාව දුටු මා, කිසිම විටෙක රටේ ජනාධිපතිවරයා වන ඔබතුමා විසින් මෙවැනි ප‍්‍රකාශයක් සිදු කරතැයි බලාපොරොත්තු නොවීමි. ඒ ප‍්‍රකාශය තවදුරටත් විස්තර කිරීමට මගේ කැමැත්තක් නැත. මේ විවෘත ලිපිය කියවන බොහෝ දෙනෙකු මේ වෙද්දී එම ප‍්‍රකාශය අසා ඇති බව සැකයක් නැත.

මුලින්ම කිවයුතු වන්නේ, මට කිසිම දේශපාලන පක්ෂයක් ගැන කිසිදු විශ්වාසයක් නොමැති බවයි. මෙම විවෘත ලිපිය කිසිදු දේශපාලන කණ්ඩායමකට ගැති නොවී ලියමි. රනිල් වික‍්‍රමසිංහ, මහින්ද රාජපක්ෂ මෙන්ම ඔබද ජනාධිපතිතුමනි, වැඩිම මුදලට විකිණෙන ලංසු දේශපාලන ක‍්‍රමයේ ඉත්තන් පමණක්යැයි මම විශ්වාස කරමි.

නැවත ඔබගේ ප‍්‍රකාශය වෙත මම යොමු වෙමි. ඔබට රනිල් වික‍්‍රමසිංහ විවේචනය කරන්නට ඕනෑ තරම් හේතු ඇත. ඔහුගේ අකාර්යක්ෂමභාවය, ඔහුගේ අසාර්ථක ප‍්‍රතිපත්ති ඕනෑ තරම්ය. එහෙත් රනිල් වික‍්‍රමසිංහ පිළිබඳ එවැනි විවේචන ඔබට නැතිවා විය හැකිය. නැත නැත. ඒවා කිසිවක් ඔබට අදාල නැත.

දෙදහස් පන්සීය වසරක ඉතිහාසයේ හා සංස්කෘතියේ මහා ආරක්ෂකයා ලෙස ඔබ, අප කිසිවෙකුටත් විශ්වාස කරගත නොහැකි තරම් පහළ මට්ටමකට ඇදවැටී ඇත. පසුගිය දින කිහිපය තුළ ඔබගේ ක‍්‍රියා දුටු අප සිතුවේ, තවත් නම් පහළට අද වැටීමට ඔබට ඉඩක් නොතිබුණු බවය. එහෙත් අපව නැවත නැවතත් පුදුම කිරීමට ඔබට ඇත්තේ පුදුමාකාර හැකියාවකි.

දැන් ඔබ රනිල් වික‍්‍රමසිංහට සමනළයා යයි ආමන්ත‍්‍රණය කර ඇත. සමනළයා යනු සමලිංගිකයන් අපහසුතාවට පත්කිරීමට යොදා ගන්නා යෙදුමකි. ඔබ රනිල් ප‍්‍රමුඛ කණ්ඩායම හැඳින්වූයේ සමනළ කල්ලිය නමිනි. ඔබට ඉතා පහසුවෙන් පුද්ගලයන් අපහසුතාවට පත්කිරීමට හැකියාව ඇත. මිනිස් සමාජයේ අනෙක් මිනිසුන්ට මූලික ගෞරවයක් දක්වන්නටවත් ඔබට අවශ්‍ය නැතැයි පෙනෙන්නට තිබේ.

ඔබ සුරකිනවායැයි පවසන ශ‍්‍රී ලාංකේය සංස්කෘතිය යනු සියලූ දෙනා සමව පිළිගන්නට ඉඩ සැලසීමක් මිස අවමන් කිරීමට මග පාදන්නක් නොවන බව මම විශ්වාස කරමි.

ඔබට එතරම් අවබෝධයක් නැති වුවද ජනාධිපතිතුමනි, ඔබගේ වචනවලට ඔබ හිතනවාට වඩා විශාල බරක් ඇත. ඒ වචනවලින් දැඩි ප‍්‍රතිවිපාක ඇතිවිය හැකිය. රටේ ජනතාව විසින් ඔබ ජනාධිපතිවරයා ලෙස පත්කළේ සියලූ‍ පුරවැසියන්ගේ අයිතීන් ආරක්ෂා කිරීමට මිස එක කණ්ඩායමක් ආරක්ෂාකිරීමට නොවන බව ඔබට අමතක වී නැතැයි සිතමි. මට ඔබ වෙනුවෙන් ඡුන්දය භාවිතකිරීමට අවස්ථාවක් ලැබුණේ නැත. 2015 ජනාධිපතිවරණය වන විට මම අවශ්‍ය වයස සපුරා තිබුණේ නැත. එහෙත් මගේ මතකය නිවැරදි නම් ඔබ බලයට පත්වන විට ප‍්‍රකාශ කළේ, සියලූ‍ පුරවැසියන්ගේ අයිතීන් ආරක්ෂා කිරීම වෙනුවෙන් ඔබ බලයට පැමිණි බවයි. වසර තුනකදී මෙසේ වේ යැයි අප කිසිම මොහොතක සිතුවේ නැත. නමුත් ඒ සියල්ල පසෙකලමින් ඔබ ඔබගේ හිටපු මිතුරා සහ වත්මන් දේශපාලන මිතුරා සමඟ ඇති වෛරය පිරිමැසීමට, රටේ ජීවත්වන සමස්ත ප‍්‍රජාවකට නින්දිත ලෙස පහර ගසා ඇත. සියලූ‍ පුරවැසියන් නියෝජනය කළ යුතු නායකයා මෙතරම් පහළට අද වැටී සිටීම මහා වේදනාවට කරුණකි.

මම තරුණයෙක්මි. මම මහා අත්දැකීම් ඇත්තෙකු නොවන බව සැබෑය. එහෙත් මේ කෙටි ජීවිත කාලය තුළ ඔබ සිහිනෙන්වත් විශ්වාස නොකරන තරම් හිරිහැර විඳ ඇති තරුණ සමනළයෙක් වෙමි. අඛණ්ඩව සමච්චලයට ඔච්චමට ගැරහීමට ලක්වූ තරුණයෙක් වෙමි. භීතියෙන්, ශෝකයෙන්, ලැජ්ජාවෙන් නොනිදා පහන් කළ රාත‍්‍රීන් ගණන අපමණය. මම දැන් වැඩිහිටියෙක් වෙමි. එමෙන්ම අභිමානවත් පුරවැසියෙක් වෙමි. එමෙන්ම ශක්තිමත් සමනළයෙක් වෙමි. එහෙත් අමතක නොකළ යුතුය. ඔබතුමාගේ අදහස් දැක්වීම් අසා සිටින, එයට හුරේ දමන ඔබතුමන්ගේ ආධාරකරුවන් දෙස බලා සිටින, රනිල් වික‍්‍රමසිංහගේ හා ඔහුගේ කණ්ඩායමට ඇතැයි ඔබ අනුමාන කරන ලිංගි ක අනන්‍යතාව ගැන ඔච්චම් කරන සහචරයන් නිසා බියෙන් ත‍්‍රස්ත වූ මා වැනි තරුණයන් බොහෝ දෙනෙකු ලංකාවේ සිටින බව ඔබ අමතක නොකළ යුතුය.

පුද්ගලයෙකුගේ ලිංගිකත්වය අරමුණු කරගනිමින් කරන පහරදීම් ඉතා අශෝබන හා තැතිගන්වනසුලූ ඒවා බව කිව යුතුමය. අපේ ශ‍්‍රී ලංකාව එහි සියලූ දෙනාටම ආරක්ෂාකාරී තැනක් විය යුතුය. අප ඉදිරියට යා යුත්තේ එකා මෙන්, ශක්තිමත්වය.

එහෙත් ශ‍්‍රී ලංකා ප‍්‍රජාතාන්ත‍්‍රික සමාජවාදී ජනරජයේ විධායක ජනාධිපති ධුරය හොබවමින් ඔබ දැක්වූ අදහස්වලින් අප වෙත දන්වා සිටින්නේ, ඔවුන්ගේ රට අපව පිළිනොගන්නා බවය. ඔවුන්ගේ ජනාධිපතිවරයා ඔවුන්ව සම තත්ත්වයේ නොසලකන බවයි. අපේ ලිංගිකත්වය නිසාම අප විසින් රටේ බලවත් තනතුරක් නොදැරිය යුතු බවයි.

ජනාධිපතිතුමනි, ඔබ නොදන්නවා විය හැකිය. ඇලන් ටියුරින්, ටිම් කුක්, එලන් ඩි ජෙනරස්, ලියෝ වරාඞ්කර්, ආතර් සී ක්ලාක් වැනි ලොව ගෞරවනීය මිනිසුන් බොහෝ දෙනෙකු සමනලයන් වන බවයි. ලොව පුරා ජනතාවට ආදර්ශයක් වූ, තම අරමුණු මුදුන් පමුණුවාගත් තරුණ සමලිංගික ප‍්‍රජාවන්ට ඔවුන් ආදර්ශයක් වූ බවයි. අප වැනි තරුණ සමනළයන්ට විදෙස් රටවල මෙවැනි තරුවලින් ආදර්ශ ලබාගැනීමට සිදුවීම ශෝකයට කාරණයකි. ලංකාවේ සිටින සමනළයන්ට තම අනන්‍යතාව සඟවාගැනීමට සිදුව ඇත්තේ ඔබ වැනි පුද්ගලයන්ගේ අදහස් දැක්වීම් නිසාය. සමනළයන්ට නිදහසේ පියාසර කරමින්, තම අනන්‍යතාව මත පිහිටා කටයුතු කිරීමට හැකි දිනක් නුදුරු අනාගතයේ ලංකාවේ ඇති නොවන බව දැනටමත් පැහැදිලි වී අවසානය. ඔබ වැනි ජනාධිපතිවරයෙකු යටතේ නම් එය සිදුනොවන බව ස්ථිරය.
ඔබගේ අදහසට ස්තුතියි ජනාධිපතිතුමනි, එය මා තවත් ශක්තිමත් කළා පමණි.

මහේල ගමගේ

(කලම්බු ටෙලිග‍්‍රාප් වෙබ්අඩවියේ පළවූ ලිපියක පරිවර්තනයකි.)