ආයතන 338න් 133ක්ම රාජපක්ෂවරුන්ට

වියත්මගට 37යි     අලි සබ්රිට 17යි

 

දිවුරුම් දී දින දෙකක් ඇතුළත සිය අමාත්‍යාංශවලට ගොස් වැඩ බාරගන්නා ලෙසට ජනාධිපතිවරයා කැබිනට් හා රාජ්‍ය අමාත්‍යවරුන්ට නියෝග කළද එය ඒ ආකාරයෙන්ම සිදුවී නැති බව පෙනෙන්නේ තවමත් සමහර අමාත්‍යවරුන් වැඩ බාරගනිමින් සිටින නිසාය.

මේ වැඩ බාරගැනීම්වලදී කැබිනට් අමත්‍යවරුන්ද විශේෂයෙන්ම රාජ්‍ය අමාත්‍යවරුන්ද කරන ප්‍රකාශවලින් පෙනෙන්නේ ඔවුන් බොහොමයක් ඔවුන්ට ලැබුණ අමාත්‍යධුර පිළිබඳ සෑහීමකට පත් වී නැති බවය.

තමාට ලැබුණ රාජ්‍ය ඇමතිධුරය පිළිබඳ ශ්‍රීලනිප මහලේකම් දයාසිරි ජයසේකර කියා ඇත්තේ චන්ද්‍රිකා පාලන කාලයේදී අගමැති මහින්ද රාජපක්ෂට සැලකූ ආකාරයට අද තමාට සලකා ඇති බවයි.

ආණ්ඩුවේ සෙසු පක්ෂ සාමාජිකයන්ගේ කළකිරීම එසේ වෙද්දී ශ්‍රී ලංකා පොදුජන පෙරමුණේ විමලවීර දිසානායක ඔහුට ලැබුණ රාජ්‍ය අමාත්‍යධුරය ගැන සෑහීමට පත්වී නැත. අම්පාරට කැබිනට් අමාත්‍යධුරයක් ලැබෙනු ඇතැයි තමා පමණක් නොව එම ප්‍රදේශයේ හාමුදුරුවරුන්ද බලාපොරොත්තුව සිටි බව ඔහු කියා ඇත. ඊට අමතරව ඔහුට ලබාදී ඇති ‘වනජීවී රැකවරණය, අලිවැට හා අගල් ඉදිකිරීම ඇතුළු ආරක්ෂිත වැඩපිළිරවෙළවල් හා කැළෑ නැවත වගා කිරීම හා වන සම්පත්’ රාජ්‍ය අමාත්‍යධුරය ගැන කියා ඇත්තේ ඒ ගැන නොසතුටක් පවතින බවත් වනජීවී ප්‍රශ්න වැඩිපුරම තියෙන්නේ පොළොන්නරුව, අනුරාධපුරය, පුත්තලම, ත්‍රිකුණාමලය, මඩකලපුව හා හම්බන්තොට වැනි දිස්ත්‍රික්කවලට බවත්ය.

 ඒ මගින් පෙනෙන්නේ මුළු රටම නියෝජනය වන පරිදි ශ්‍රී ලංකා පොදුජන පෙරමුණෙන් තේරී පත් වූ මහජන නියෝජිතයන්ට කැබිනට් ඇමතිධුර ලබාදී නැති බවත්, රාජ්‍ය ඇමතිධුර ලබාදීමේදීද ඒ ඒ ප්‍රදේශවල තත්වයන් සැලකිල්ලට ගෙන ඒවා ලබාදී නැති බවත්ය. ඊට හොඳම උදාහරණය සපයන්නේ හම්බන්තොට දිස්ත්‍රික්කයය. එහි මුළු ආසන සංඛ්‍යාව වූ 7න් 6ක් ශ්‍රී ලංකා පොදුජන පෙරමුණට හිමිවෙද්දී එම හයදෙනා අතර චමල් රාජපක්ෂ, මහින්ද අමරවීර හා නාමල් රාජපක්ෂ යන කැබිනට් අමාත්‍යවරු තිදෙනෙක් සිටිති. ඊට අමතරව ඩීවී චානක යන ගුවන්සේවා හා අපනයන කලාප සංවර්ධන රාජ්‍ය අමාත්‍යවරයාද සිටී.

කැබිනට් අමාත්‍යාංශ එක නමකින් හෝ නම් දෙකකින් හඳුන්වද්දී රාජ්‍ය අමාත්‍යාංශ ඉතා දීර්ඝව හාස්‍යයට ලක්වන අයුරින් හැඳින්වීමද එම රාජ්‍ය අමාත්‍යවරුන්ට අත්වී ඇති ඉරණම කියාපායි රාජ්‍ය අමාත්‍යවරුන් එම අමාත්‍යාංශ මගින් කළ යුතු කාර්යයන් ලෙස සදහන් කර ඇති වක්‍ය කන්ඩම බොහෝ විට එම රාජ්‍ය අමාත්‍යාංශ හැඳින්වීම සඳහා යොදාගෙන ඇති අතර එම කාර්යයන්ට හෝ විෂයන්ට අදාල පොදු නමක් ඉතිහාසයේ පළමු වරට භාවිතා නොකළේ ඇයිද යන්න දන්නේ එම නම නිර්මාණය කළ අය පමණය.

 

රාජපක්ෂවරුන්ට සීයට 40

නාමිකව හෝ තනතුරු ලැබුණ අයගේ කළකිරීම් එසේ වෙද්දී රාජපක්ෂවරුන් සුපුරුදු පරිදි තමන් අත ඇති හැන්දෙන් තමන්ටම බෙදාගෙන ඇති බව කැබිනට් හා රාජ්‍ය අමාත්‍යාංශවලට බෙදා ඇති රාජ්‍ය ආයතන ගැන අවධානය යොමු කළ විට පෙනේ.

ජනාධිපතිවරයා ගැසට් මගින් ප්‍රකාශයට පත්කර ඇති ඒ ඒ අමාත්‍යාංශවලට අයත් රාජ්‍ය ආයතන ගණන් බැලූ විට මුළු සංඛ්‍යාව 338කි. ඉන් රාජ්‍ය ආයතන 133ක්ම හෙවත් සීයට 40ක පමණ ප්‍රමාණයක් තබාගෙන ඇත්තේ රාජපක්ෂවරුන් අතය. එමෙන්ම එම බොහෝ රාජ්‍ය ආයතන රටේ ඇති හොඳම ඒවාය.

ඒ යටතේ ජනාධිපතිවරයා ආරක්ෂක අමාත්‍යවරයා ලෙස රාජ්‍ය ආයතන 23ක්ද, ජනාධිපතිවරයා ලෙස රාජ්‍ය ආයතන 7ක්ද වශයෙන් රාජ්‍ය ආයතන 30ක් තබාගෙන සිටී.

අගමැතිවරයා මුදල් අමාත්‍ය ලෙස රාජ්‍ය ආයතන 59ක්ද බුද්ධශාසන අමාත්‍යවරයා ලෙස රාජ්‍ය ආයතන 11ක් හා රාජ්‍ය ආයතන 2ක් වශයෙන් රාජ්‍ය ආයතන 72ක් තබාගෙන සිටී.

චමල් රාජපක්ෂ වාරිමාර්ග අමාත්‍යවරයා ලෙස රාජ්‍ය ආයතන 5ක්ද, ආරක්ෂක රාජ්‍ය අමාත්‍යවරයා ලෙස රාජ්‍ය ආයතන 12ක්ද වශයෙන් රාජ්‍ය ආයතන 17ක් තබාගෙන සිටී.

නාමල් රාජපක්ෂට ක්‍රීඩා හා තරුණ කටයුතු අමාත්‍යවරයා ලෙස රාජ්‍ය ආයතන 8ක් ඇත. ශෂීන්ද්‍ර රාජපක්ෂට කෘෂිකර්ම රාජ්‍ය අමාත්‍යවරයා ලෙස රාජ්‍ය ආයතන 6ක් ඇත.

අලුත් අමාත්‍යාංශ සඳහා රාජ්‍ය ආයතන බෙදීමේදී දැනගත හැකි විශේෂය සඳහා අප යා යුත්තේ ගෝඨාභය රාජපක්ෂ මහතා ජනාධිපති වූ විට අමාත්‍යාංශ විෂය වෙන් කිරීම සඳහා නිකුත් කළ ගැසට් පත්‍රය සමඟ සංසන්දනයකටය. එම මුල් ගැසට් පත්‍රයේ ආරක්ෂක අමාත්‍යාංශයට තිබූ ආයතනවල වෙනසක් මෙවර සිදුවී නැත. ආරක්ෂක අමාත්‍යවරයා ලෙස (නීති විරෝධී) ගෝඨාභය රාජපක්ෂ මල්ලීත්, එහි රාජ්‍ය අමාත්‍යවරයා ලෙස චමල් රාජපක්ෂ අයියාත්, එම රාජ්‍ය ආයතන බෙදාගෙන ඇත. වෙනසකට ඇත්තේ මුල් ගැසට්ටුවේ තිබුණාටත් වඩා රාජ්‍ය ආයතන ආරක්ෂක අමාත්‍යාංශයට හා ආරක්ෂක රාජ්‍ය අමාත්‍යාංශයට එකතු වී තිබීමය. බහුකාරිය සංවර්ධන කාර්යසාධක බලකා දෙපාර්තමේන්තුව, පුරාවිද්‍යා දෙපාර්තමේන්තුව, මිලෝදා ආයතනය, සියලුම දිස්ත්‍රික් ලේකම් කාර්යාල හා ප්‍රාදේශීය ලේකම් කාර්යාල රෙජිස්ට්‍රාර් ජෙනරාල් දෙපාර්තමේන්තුව එම ආයතන වේ.

 

අරමුදල් මහින්ද යටතට

එමෙන්ම මුදල් අමාත්‍යවරයා ලෙස මහින්ද රාජපක්ෂ යටතේ තිබූ ආයතනවලද වෙනසක් සිදුවී නැත. සිදුවී ඇත්තේ ඊට අදාළ ආයතන ගණන වැඩිවීමය. එම වැඩි වූ ආයතන අතර විශේෂත්වය වන්නේ මීට පෙර විවිධ අමාත්‍යාංශ විෂයන් යටතේ පැවති එම අමාත්‍යාංශ විෂයන්ට අයත් සියලුම අරමුදල් මුදල් අමාත්‍යාංශය යටතට ගැනීමය. ලාහෝර් ආර්යා අරමුදල, වර්ජන, කෝලාහල, සිවිල් කලබල හා ත්‍රස්තවාදය පිළිබඳ අරමුදල, ජාතික රක්ෂණ භාර අරමුදල හා සේවා නියුක්තිකයන්ගේ භාරකාර අරමුදල පසුගිය වරත් මුදල් අමාත්‍යාංශය යටතේ පැවතුණි.

මෙවර ඊට අලුතින් ඈඳාගෙන ඇත්තේ දරුවන් සුරකිමු ජාතික භාර අරමුදල, ශ්‍රම වාසනා අරමුදල, ජාතික සෞඛ්‍ය සංවර්ධන අරමුදල, වකුගඩු අරමුදල, තේ ශක්ති අරමුදල, කප්රුක අරමුදල, රාජ්‍ය සේවා විශ්‍රාමිකයන්ගේ භාර අරමුදල, බුද්ධශාසන අරමුදල, බෞද්ධ පුනරුද අරමුදල, සීමාසහිත නිපුණතා සංවර්ධන අරමුදල, නිපැයුම්කරුවන්ගේ අරමුදල, තුරුසවිය අරමුදල හා මධ්‍යම සංස්කෘතික අරමුදලය.

එමෙන්ම ඈවර කිරීමට නියමිත විදුලි සංදේශ දෙපාර්තමේන්තුව, වනජීවී භාරය, ශ්‍රී ලංකා ජනමාධ්‍ය අභ්‍යාස ආයතනය හා අභ්‍යන්තර වෙළඳ දෙපාර්තෙම්න්තුවද ඒ යටතට ගෙන ඇත.

 

කබ්රාල්ට සලකලා

එහි රාජ්‍ය ඇමතිවරයා වූ අජිත් නිවාඞ් කබ්රාල්ට මුදල් අමාත්‍යාංශය යටතේ තිබූ ආයතන 3ක් සහ අලුතින් නිවාස සංවර්ධන මූල්‍ය සංස්ථාව, රාජ්‍ය උකස් හා ආයෝජන බැංකුව හා මහා භාණ්ඩාගාරයේ ලේකම්වරයා යටතේ ඇති ඌන ක්‍රියාකාරී ව්‍යවසායන් හා ඌන උපයෝගිත වත්කම් යටතේ වන ආයතනය පවරා ඇත.

 

ගොඩහේවාට සලකලා

නාගරික සංවර්ධන හා නිවාස අමාත්‍යවරයා ලෙස මහින්ද රාජපක්ෂ මහතා තබාගෙන ඇත්තේ ආයතන දෙකක් පමණය. එහි රාජ්‍ය ඇමතිවරයා වූ නාලක ගොඩහේවාට නාගරික සංවර්ධන අධිකාරිය, ඉඩම් සංවර්ධනය කිරීමේ සංස්ථාව ඇතුළු රාජ්‍ය ආයතන 6ක් ලබාදී ඇත. පෙර නාගරික සංවර්ධන අමාත්‍යාංශය යටතේ නොතිබූ සමුද්‍රීය පරිසර ආරක්ෂණ අධිකාරිය හා වෙරළ සංරක්ෂණ හා වෙරළ සම්පත් කළමනාකරණ දෙපාර්තමේන්තුව පවරා ඇත.

 

අලි සබ්රිටත් සලකලා

ජාතික ලැයිස්තුවෙන් පළමු වරට පාර්ලිමේන්තුවට පත් කරන ලද ජනාධිපති ගෝඨාභය රාජපක්ෂ වෙනුවෙන් නොමිලේ පෙනී සිටීමේ නීතිඥයා වූ අලි සබ්රිටත් හොඳින් සලකා ඇත. අධිකරණ අමාත්‍යාංශය යටතේ පෙර තිබූ ආයතන 16ක් ඔහු යටතේ ඇත. ඊට අපරාධ වින්දිතයන් හා සාක්ෂිකරුවන් ආරක්ෂා කිරීම සඳහා වූ ජාතික අධිකාරියද ලබාදී ඇත. එහි රාජ්‍ය ඇමතිනිය වූ සුදර්ශනී ප්‍රනාන්දුපුල්ලේට ලබාදී ඇත්තේ බන්ධනාගාර විෂයට අදාළ ආයතන 4 පමණය.

 

වීරසේකරට සලකලා

ජනක බණ්ඩාර තෙන්නකෝන් රාජ්‍ය සේවා, පළාත් සභා හා පළාත් පාලන අමාත්‍යවරයා වුවද එම විෂයට අදාළ දිස්ත්‍රික් ලේකම් කාර්යාල හා ප්‍රාදේශීය ලේකම් කාර්යාල ඇත්තේ ආරක්ෂක රාජ්‍ය අමාත්‍ය චමල් රාජපක්ෂ යටතේය. එමෙන්ම රෙජිස්ට්‍රාර් ජෙනරාල් දෙපාර්තමේන්තුව ඇත්තේද චමල් රාජපක්ෂ යටතේය. විශ්‍රාමිකයන්ගේ අරමුදල ඇත්තේ මහින්ද රාජපක්ෂ ටතේය. මිලෝදා ආයතනය ඇත්තේ ගෝඨාභය රාජපක්ෂ යටතේය. එම අමාත්‍යාංශය යටතේ පැවතිය යුතු සුවිශේෂ පනත් වන ප්‍රාදේශීය සභා පනත, නගර සභා ආඥාපනත, මහනගර සභා ආඥා පනත, පළාත් සභා ආඥාපනත ඇත්තේ එහි රාජ්‍ය අමාත්‍ය සරත් වීරසේකර යටතේය.

 

සීතාට ආයතන 21ක්

මහාචාර්ය ජී.එල්. පීරිස් අධ්‍යාපන අමාත්‍යවරයා වුවද එයට රාජ්‍ය අමාත්‍යවරුන් 4 දෙනෙකු නම්කර ඇත. දිවුරුම් දීමේදී එහි එක් රාජ්‍ය අමාත්‍යවරයෙකු දිවුරුම් නොදුන් අතර දිවුරුම් දුන් රාජ්‍ය අමාත්‍යවරුන්ගෙන් හොඳටම සලකා ඇත්තේ සීතා අරඹේපොලටය. ඇයට නිපුණතා සංවර්ධන, වෘත්තීය අධ්‍යාපන, පර්යේෂණ හා නව නිපැයුම් රාජ්‍ය අමාත්‍ය ලෙස ආයතන 21ක් පවරා ඇත. ඒවා පෙර තිබූ විද්‍යා, තාක්ෂණ, වෘත්තීය පුහුණු යන අමාත්‍යාංශ විෂයන්වලට අයත් ඒවාය. ඒ අනුව කැබිනට් අමාත්‍ය ජී.එල්. පීරිස් පමණක් නොව රාජපක්ෂවරුන් නොවන අනෙකකුත් කැබිනට් අමාත්‍යවරුන්ටත් වඩා ඇයට සලකා ඇති බව පෙනේ.

 

ජයසුමනටත් සලකලා

පවිත්‍රා වන්නිආරච්චි සෞඛ්‍ය ඇමති වූවාට ඒ යටතේ තිබූ රාජ්‍ය ඖෂධ නීතිගත සංස්ථාව, රාජ්‍ය ඖෂධ නිෂ්පාදන සංස්ථාව හා රාජ්‍ය ඖෂධ නියාමන අධිකාරිය රාජ්‍ය ඇමති චන්න ජයසුමනට පවරා ඇත. රාජ්‍ය ඇමති සිසිර ජයකොඩිට ආයුර්වේදයට සම්බන්ධ ආයතන පවරා ඇත.

 

අමරවීරට කුඩාම අමාත්‍යාංශය

මහින්ද අමරවීර පරිසර ඇමති වූවාට එයට ඇත්තේ රාජ්‍ය ආයතන 3ක් පමණය. ඒ යටතේ රාජ්‍ය අමාත්‍යාංශයක්වත් නැත. කුඩාම අමාත්‍යාංශයත් එයය. සී.බී. රත්නායක වනජීවී හා වන සංරක්ෂණ අමාත්‍යවරයා යැයි කීවද ඔහුට ඇත්තේ රාජ්‍ය දැව සංස්ථාව පමණය. රාජ්‍ය ඇමති විමලවීර දිසානායකට වන සංරක්ෂණ හා වනජීවී දෙපාර්තමේන්තුව ලබාදී ඇත.

 

අලුත්ගමගේට 3යි ශෂීන්ද්‍රට 6යි

මහින්දානන්ද අලුත්ගමගේ කෘෂිකර්ම ඇමතිවරයා වුවද ඔහුට ඇත්තේ ආයතන 4ක් පමණය. එහි රාජ්‍ය ඇමති ශෂීන්ද්‍ර රාජපක්ෂට වී අලෙවි මණ්ඩලය ඇතුළු ආයතන 6ක් ලබාදී ඇත. එහි ඉතිරි ආයතන රාජ්‍ය ඇමති මොහාන් ද සිල්වාටත්, පශු සම්පත්වලට අදාළ ආයතන ඩී.බී. හේරත්ටත් ලබාදී ඇත.

 

ඩග්ලස්ට 2යි වාසුට 1යි

ඩග්ලස් දේවානන්දා ධීවර ඇමති වූවාට ඔහුට ඇත්තේ ධීවර හා ජලජ සම්පත් දෙපාර්තමේන්තුව හා නෝර්ත් සී ලිමිටඞ් පමණය. එහි වැදගත් අනෙක් ආයතන 5ක් කංචන විජේසේකරට පවරා ඇත.

වාසුදේව නානායක්කාර ජල සම්පාදන අමාත්‍යවරයා වුවද ඔහුට ඇත්තේ ජාතික ජල සම්පාදන හා ජලපවාහන මණ්ඩලය පමණය. එහි රාජ්‍ය ඇමති සනත් නිශාන්තටත් ඇත්තේ එක් ආයතනයක් පමණය.

 

ඩලස්ගේ කෑලි හලයි

ඩලස් අලහප්පෙරුම විදුලිබල අමාත්‍යවරයා පමණය. එම අමාත්‍යාංශය යටතේ තිබූ බලශක්ති විෂය මෙවර උදය ගම්මන්පිලට කඩා දී ඇත. විදුලිබලයෙන් සුනිත්‍ය බලශක්ති අධිකාරිය දුමින්ද දිසානායකට ලබාදී ඇත.

 

අනුරාධ ජයරත්නට 0යි

ග්‍රාමීය කුඹුරු හා ආශ්‍රිත වැව් ජලාශ හා වාරිමාර්ග රාජ්‍ය අමාත්‍ය අනුරාධ ජයරත්නට රාජ්‍ය ආයතන ලෙස ඇත්තේ ගොවිජන සේවා දෙපාර්තමේන්තුවේ හා වාරිමාර්ග දෙපාර්තමේන්තුවේ අනුග්‍රාහක ආයතන යන්නය. එහි තේරුම ඔහුට කිසිදු රාජ්‍ය ආයතනයක් ලබාදී නැති බවය.

එමෙන්ම ගුදම් පහසුකම්, බහාලුම් අංගන, වරාය සැපයුම් පහසුකම් හා බෝට්ටු හා නැව් කර්මාන්ත සංවර්ධන රාජ්‍ය ඇමති ජයන්ත සමරවීරටත් ආඥාපනත් දෙකක් පමණය. රාජ්‍ය ආයතන නැත.

මේ සියල්ලම බැලූ විට පෙනෙන කාරණා කිහිපයක් තිබේ. එකක් රාජපක්ෂවරුන් මෙවර ඇමති මණ්ඩලය පත් කිරීමේදී ඔවුන්ට හොඳ හැටි බෙදාගෙන ඇති බවය. එමෙන්ම ජනාධිපති ගෝඨාභය රාජපක්ෂද තමාගේ පෞද්ගලික (අලි සබ්රි) හා වියත්මඟ සාමාජිකයන්ට හොඳින් සලකා ඇති බවය. කැබිනට් අමාත්‍යාංශයක් ලබාදිය යුතුවාට සමහරුන්ට කිසිදු හරයක් නැති අමාත්‍යාංශ ලබාදී ඇති බවය. රාජ්‍ය අමාත්‍ය ධුරයක් හෝ ලබාදිය යුතුවාට සමහරුන්ට වැඩක් නැති රාජ්‍ය අමාත්‍යාංශ ලබාදී ඇති බවය.

දූෂණයෙන්, නාස්තියෙන් තොර කාර්යක්ෂම රාජ්‍ය සේවයක් මේ මගින් බලාපොරොත්තු විය හැකිද? දූෂණය කෙසේ වෙතත් නාස්තිය නම් ඒ මගින් සිදුවනු ඇත. ඒ මෙම කැබිනට් හා රාජ්‍ය අමාත්‍යාංශ යන දෙවර්ගයටම වෙන වෙනම අයවැයෙන් මුදල් වෙන්කරන බව ජනාධිපතිවරයා ඊට අදාළ ගැසට් පත්‍රයේ සඳහන් කර තිබීම නිසාය.

කැබිනට් අමාත්‍යාංශ සංඛ්‍යාව 28 යැයි කීවාට රාජ්‍ය අමාත්‍යාංශ 40 සමග (දැනට 39යි) ඇත්තටම රටේ අමාත්‍යාංශ 68ක් පවතී. මේ සෑම අමාත්‍යාංශයකටම ස්ථීර ගොඩනැඟිල්ලක්ද, ලේකම්වරයෙකුද ඇතුළු ස්ථීර කාර්ය මණ්ඩලයක්ද, වාහන හා අනෙකුත් පහසුකම්ද ඇතුළත්ය.

එසේ වුවද සමහර ඇමතිවරුන්ට කරන්නට දෙයක් නැත. ඒ බලා කියාගන්නට එක් ආයතනයක් හෝ නැති නිසාය. සමහර ඇමතිවරුන්ට ඇත්තේ එක් ආයතනයක් හෝ දෙකක් පමණය. දෙපාර්තමේන්තු බලා ගැනීමට ඒවාහි අධ්‍යක්ෂ ජෙනරාල්වරු සිටිති. සංස්ථා, මණ්ඩල, අධිකාරී හා අනෙකුත් ව්‍යවස්ථාපිත ආයතන බලාගැනීමට ඒවාහි සභාපතිවරු හෝ වෙනත් නම් ඇති ආයතන ප්‍රධානීහු සිටිති.

ඊට අමතරව මණ්ඩලයක් හෝ සංස්ථාවක් බලා ගැනීමට ඇමතිවරයෙක්ද, ලේකම්වරයෙක්ද, කාර්ය මණ්ඩලයක්ද සිටින ලෝකයෙන් උතුම් රට ශ්‍රී ලංකාව විය යුතුය. ඊට කියන අනෙක් නම ‘සෞභාග්‍යයේ දැක්ම’ යන්නය.■