මේ ආණ්ඩුවේ අභ්‍යන්තරයේ තිබෙන අවිනිශ්චිත තත්වය දිනෙන් දිනම තව තවත් අර්බුදයට යමින් පවතින බව දැන් හැමෝටම පැහැදිලිය. එය එක්තරා ආකාරයකින් විසඳන්නට නොහැකි ආකාරයේ ගැටුම්කාරීත්වයක් තත්වයට පත්වී ඇත්තේ රටේ ආරක්ෂාව සම්බන්ධයෙන්ද අලූත් තත්වයක් උදා වී ඇති වාතාවරණයත් සමගය. වත්මන් ජනාධිපතිවරයා හා හිටපු ජනාධිපතිවරයාගේ පවුලේ අය ඇතුළු කණ්ඩායමකගේම ආරක්ෂාව අනතුරට පත්වන තරමට තත්වය සංකීර්ණ වී ඇති රටම දැනගත්තේ පසුගිය සතියේය. ආණ්ඩුවේ ඇති මේ අවුල්සහගතභාවය හා ඒ නිසාම රටේ ඇතිවෙන්නට නියමිත අවුල්සහගත තත්වය ගැන අප වැනි අය අදහස් පළකළේ පසුගිය ජනාධිපතිවරණයෙන් පොදු අපේක්ෂකයා ජයගත් දිනයේ පටන්මය. ඒත් ආණ්ඩුවේ අය හුඟක් උජාරුවෙන් වගේ කීවේ හොඳම මොළ ටිකක් එකට එකතුවී ආණ්ඩුවක් හදා ඇති බවත් රටේ ප‍්‍රශ්න නිට්ටාවටම සුව කරන බවත් අප කළ යුත්තේ කට වහගෙන සිටීම බවත්ය. ඒත් හොඳ මොළකාරයන්ගේ කථා හුදු කයිවාරු බව මේ වන විට ආර්ථික ක්ෂේත‍්‍රය පමණක් බැලූවත් පෙනී යන කාරණාවන්ය. මගේ මිත‍්‍ර ධම්ම දිසානායකගේ වචනයකින් කිවහොත් ‘2015-ජනවාරිවරු’ වනාහි මේ රටේ ඉරණම සැබෑවටම වෙනස් කළ කාණ්ඩයක් බව දැන් හොඳටම පැහැදිලිය. ඒ වෙනස් කළේ රටේ සුභවාදී පැත්තකට නොව අනාගතය ගැන මුදල් ඇමතිතුමාගේ සිට සියලූම දෙනාට බය හිතෙන ඉරණමක් කරා ගමන් කරන දිසාවටය. ‘රටකට ඕනෑ අපමණ අගයක්’ යැයි කීවාට දැන් වැඩි වෙන්නේ රුපියලට සාපේක්ෂව ඩොලරයේ අගය පමණක් යැයි කීමේ වැරැුද්දක් නැත. මේ තත්වය කළමනාකරණය කරගැනීමට හැකියාවක් ඇතැයි සිතූ සමහරුන් පවා දැන් දැන් කරන්නේ ඊළඟ ආණ්ඩුවක් එන්නේ කවදාදැයි කියා ඇඟිලි ගැනීමය.

මට හිතෙන්නේ කාරණා කීපයක් පැත්තෙන් මේ ආණ්ඩුව මහ පුදුම ආණ්ඩුවක් කියාය. එක් කාරණයක් වන්නේ රටේ ඇත්තටම පවතින තත්වය ගැන අබමල් රේණුවක් තරම් වත් ගණන් ගන්නේ නැතිව ඔහේ තමන් කැමති ආකාරයටම වැඩ කරගෙන යාමට ආණ්ඩුව ඇති නිර්භීතකමය. පසුගිය පෙබරවාරි මාසයේ පැවති පළාත් පාලන මැතිවරණයෙන් පළාත් පාලන ආයතන 300 ගණනකින් 250 පමණ බලය ලැබුණේ අලූත් පක්ෂයක් වූ පොදුජන පක්ෂයටය. එසේ තමන්ගේ ප‍්‍රතිවාදියා කර ළඟටම ජයග‍්‍රහණය කරමින් සිටින තත්වයකදීවත් ආණ්ඩුව කරවන අයට ජනතාවගේ මතය පිළිබඳව කිසිදු අදහසක් හිතෙන්නේ නැතිව කටයුතු කර ගෙන යාම පෙන්නුම් කරන්නේ ‘ටෙක්ස් බුක්වල’ :එැංඑ ඉදදන චදකසඑසජි* නැති ආකාරයේ නිර්භීත දේශපාලනයක් බව මගේ අදහසය.

තවත් පැත්තකින් ගත්තොත් පළාත් පාලන ආයතනවල තුනෙන් දෙකක බලය ආණ්ඩු පක්ෂයට විරුද්ධව පොදු පෙරමුණට වැටෙන්නට එක හේතුවක් වූයේ පළාත් පාලන ආයතන ඡුන්දය බොරු හේතු දමා වසර එකහමාරක් පමණ කල් දැමීම නිසා යැයි පිළිගැනීමට හේතු ඕනෑ තරම් තිබෙන තත්වයක් තුළ වුවත් ඒ තත්වය ගණනකටවත් ගන්නේ නැතිව පළාත් සභා ඡන්දයත් ඒ පරණ හේතුවම දමා කල් දැමීමට ආණ්ඩුව කටයුතු කරන ආකාරය පෙන්නුම් කරන්නේ තවත් අමුතුම ආකාරයේ ‘නිර්භීත’ තත්වයක් බව මගේ හැඟීමය. කොච්චර පැරදුණත් අපි නම් වෙනස් වෙන්නේ නැතැයි දේශපාලනයේදී කිව හැක්කේ ජනතා මතය ගැන කිසිම සැලකිල්ලක් නොමැති අයෙකුට හා/හෝ පරාජය ගැන කිසිම විවේචනයක් නැති දේශපාලන ව්‍යාපාරයකට පමණක්ය. ඒ පැත්තෙන් ගත්තත් මේක නම් මහ පුදුම ආණ්ඩුවක් බව මගේ අදහසය.
තුන්වෙනුව ආණ්ඩුවේ අයගේ කථා සහ ඒ අයගේ කෙරුවාව අතර ඇති පරතරය ගැන කිසිම ලැජජාවක් නොමැතිවීම පැත්තෙන් ගත්තත් පෙන්නුම් කරන්නේ මේ ආණ්ඩුව මහ පුදුම ආණ්ඩුවක්ය. ඇමතිවරුන් හුඟක් අය තමන්ගේ දවසේ වැඩි කාලයක් ගත කරන්නේ ආර්ථිකයේ අර්බුදය පිළිබඳව රටට පෙන්වමින් එයට හේතුව පරණ රාජපක්ෂ ආණ්ඩුවේ ණය ගැනීම යැයි කියන්නට උත්සාහ කිරීමය. ඒ පැත්ත එහෙම වුණත් අගමැතිතුමා යන යන හැම රැුස්වීමේම පාහේ කියන්නේ එතුමා පසුගිය වසර තුනක් තුළ මේ රටේ ආර්ථික ප‍්‍රශ්නය සම්පූර්ණයෙන්ම විසඳා නිමා කළ බවයි. ඊළඟ වසරේ ඉතිරි ප‍්‍රශ්න ටික විසඳන බව එතුමාගේ අදහසය. එක්කෝ ආණ්ඩුවේ අනෙක් අය ආර්ථිකය ගැන නිවැරදි දත්ත එතුමාට ලබා දෙන්නේ නැත. එහෙම නැත්නම් එතුමා ‘ආර්ථික ප‍්‍රශ්නය අපි සම්පූර්ණයෙන්ම විසඳුවා’ යැයි කියන්නේ ඒ වචනවල තේරුම ගැන එච්චර අවධානයක් ගන්නේ නැතිවය. එහෙම නැත්නම් මේ දෙකමය.

චරිත හේරත්