සමගි ජන බලවේගයේ ජාතික ලැයිස්තු මන්ත්‍රිනී ඩයනා ගමගේ සිය බි්‍රතාන්‍ය පුරවැසිභාවය පිළිබඳ තොරතුරු වසන් කරමින් කටයුතු කිරීම තුළ ආගමන හා විගමන පනත සහ දණ්ඩ නීති සංග්‍රහය කඩ කර ඇති බව කොළඹ ප්‍රධාන මහේස්ත්‍රාත් අධිකරණයට බී වාර්තාවක් ඉදිරිපත් කරමින් අපරාධ පරීක්ෂණ දෙපාර්තමේන්තුව දැනුම් දී තිබේ. ඇය ශ්‍රී ලංකාවේ නීති විරෝධීව රැඳී සිටින බි්‍රතාන්‍ය පුරවැසිභාවය හිමි කාන්තාවක බව එහි සඳහන්ය. ඒ අනුව ඇගේ මන්ත්‍රීධුරය අහෝසි වීමේ ඉඩක් ඇතැයි වාර්තා වේ.
බී 48037/1/21 අංකය සහිත එම බී වාර්තාවෙන්, අපරාධ පරීක්ෂණ දෙපාර්තමේන්තුවේ තැනැත්තන් වෙළඳාම් හා ජාවාරම් විමර්ශන ඒකකය එම කරුණු ඉදිරිපත් කර ඇති අතර ඇගේ

උප්පැන්න සහතික, ජාතික හැඳුනුම්පත් සහ විදේශ ගමන් බලපත්‍ර පිළිබඳ එම වාර්තාවේ කරුණු සඳහන් කර ඇත. ඇය සතුව අංක 09942515 සහ අංක 521398876 සහිත බි්‍රතාන්‍ය ගුවන් ගමන් බලපත්‍ර තිබී ඇති අතර, ඒ අනුව ඇය බි්‍රතාන්‍ය පුරවැසි කාන්තාවක බව එම බී වාර්තාවේ සඳහන් කර ඇත. එලෙස විදේශ පුරවැසිභාවයක් ලබා ගන්නා කෙනෙකුගේ ලාංකික පුරවැසිභාවය ආගමන විගමන පනත අනුව ඉබේම අහෝසි වන බව එහි සඳහන්ය. කෙසේ වෙතත් ඇය එන්5091386 අංකය දරන 2014 ජනවාරි 24 දිනැති ගුවන් ගමන් බලපත්‍රයක් පරිහරණය කර ඇති අතර, එය ලබාගෙන ඇත්තේ 2004 දෙසැම්බර් 22 නිකුත් කළ 658534399වී අංකය දරන ජාතික හැඳුනුම්පත සහ අංක 6553 අංකය සහිත උප්පැන්න සහතිකය ඉදිරිපත් කරමිනි.
ඇය 2018 අගෝස්තු 07 දිනැති ඕඑල් 5654794 අංකය දරන රාජකාරි විදේශ ගමන් බලපත්‍රයක් ද පරිහරණය කර තිබේ. එය පෙර සඳහන් ජාතික හැඳුනුම්පත සහ අංක 4683 දරන වෙනත් උප්පැන්න සහතිකයක් ඉදිරිපත් කරමින් ලබාගෙන තිබේ. එම බී වාර්තාවේ වැඩිදුරටත් සඳහන් වන්නේ අංක 521398876 සහිත බි්‍රතාන්‍ය ගුවන් ගමන් බලපත්‍රය පාවිච්චි කරමින් ශ්‍රී ලංකාවට පැමිණීම වෙනුවෙන් ඇය කිහිප වතාවක් ශ්‍රී ලංකාවේ වීසා ලබාගෙන ඇති බව ආගමන විගමන දෙපාර්තමේන්තුවේ දත්තවල සඳහන් වන බවය.■