ඩඞ්ලි සිරිසේන මහතාගේ අරලිය හෝටලයේ රාත‍්‍රී සමාජ ශාලාවක් විවෘත කළ අන්දම සමාජ මාධ්‍යවල හුවමාරු විය. ඇතැම්හු සදාචාර ප‍්‍රතිපත්තිවලින් ඒ කටයුත්තට පහර දුන්හ. රාජපක්ෂවාදීන්ට මෛත‍්‍රීපාල සිරිසේන මහතා පලූ‍ ගසන්නට හොඳ සදාචාර අවියක් බවට සමාජ ශාලාව පත්විය. ඒ නිසාම ඒ සමාජ ශාලාවට දේශපාලන වැදගත්කමක්ද එක්විය.

එසේ වුව මේ කතාව ඩඞ්ලි සිරිසේන මහතාගේ පෞද්ගලික ව්‍යාපාරික කටයුත්තකට අදාල එකකි. එහෙත් මේ අවස්ථාව විවෘතව අරලිය හෝටලයේ නිල ෆෙස්බුක් අඩවියෙන්ම සජීවී ලෙස සමාජ මාධ්‍යවල ප‍්‍රචාරය කර තිබුණු නිස‍ා එය පෞද්ගලික කටයුත්තක් නොවන බව කිව හැකිය.

කතාව මෙසේය. අරලිය ග‍්‍රීන් සිටි හෝටලයේ අලූ‍තෙන් නිර්මාණය කළ රාත‍්‍රී සමාජශාලාව විවෘත කරන්නට උත්සවයක් පවත්වා තිබුණි. එය එම හෝටලයේ නිල ෆෙස්බුක් පිටුව හරහා ජුලි 22 වැනිදා සජීවීව ප‍්‍රදර්ශනය කර තිබුණි. එහිදී ඩඞ්ලි සිරිසේන මහතා කෙටි කතාවක්ද පැවැත්වීය. කෙටියෙන්, අග මුල ගළපා කීවොත් ඔහු එතැන කීවේ ගුණාත්මක ලෙස රාත‍්‍රී සමාජශාලාව පවත්වාගෙන යන බවත් තමන් ලංකාවේම නයිට් ක්ලබ්වලට ගොස් ඒවායේ ආභාසය ලබා ලංකාවේ හොඳම නයිට් ක්ලබ් එක නිර්මාණය කළ බවත්ය.

‘මම ගිහින්, එව්වගෙන් දෙයක් අරගෙන ලංකාවෙ අංක එකේ නයිට් ක්ලබ් එක හැදුවා මිසක් මම ඒක කරේ දාගෙන නයිට් ක්ලබ්වල රිංගන්න ගියේ නැහැ.’ ඒ කතාවේදී ඩඞ්ලි සිරිසේන කියන්නේය. ඒ කතාව ඔහු කීමෙන්ද, එසේ කීම සමාජ මාධ්‍ය හරහා සජීවීව ප‍්‍රචාරය කිරීමෙන්ද පෙනෙන්නේ ඔහු සහෝදරයාගේ සදාචාරවාදී අදහස් පිළිනොගන්නා නිදහස්කාමී ව්‍යාපාරිකයෙකු බවයි.

මෛත‍්‍රීපාල සිරිසේන ක්ලබ්වලට විරුද්ධ, මත්පැන්වලට විරුද්ධ ව්‍යාජ සදාචාරයක් කර දමාගෙන දේශපාලනය කරන නායකයෙකි.
ඩඞ්ලි සිරිසේන මහතා ලංකාවේ ආර්ථික සංවර්ධන අමාත්‍යවරයා හෝ ආරක්ෂක අමාත්‍යාංශ ලේකම්වරයා නොවීම ගැන අප සතුටු විය යුතුය. ඔහු ප‍්‍රසිද්ධියේ දේශපාලනය නොකරයි. (අප‍්‍රසිද්ධියේ කෙරෙන ඇතැම් දෑ ගැන ආරංචි පැතිරෙයි.) ඩඞ්ලි ව්‍යාපාරික අනන්‍යතාව අනුව කටයුතු කරන්නේය. ඒවා ගැන කතාව වෙනමය. මේ කතාවේ ඩඞ්ලි සිරිසේන මහතාට අගය කිරීමක් මිස චෝදනා නැත.

මේ සටහන සදාචාර අර්ථයකින් ඩඞ්ලි සිරිසේන මහතාගේ ව්‍යාපාර ගැන කියන්නට නොවේ. අප ඉල්ලන්නේ තවත් මෙවැනි ව්‍යාපාර අවස්ථා ලංකාව තුළ පුළුල් විය යුතු බවයි. සාමාන්‍ය ආදායමක් ඇති අයෙකුට වුව විනෝදයක් ලබන්නට මෙවැනි තැන් විවෘත විය යුතු බවයි.
වැදගත්ම කාරණාව නම්, කාන්තා පිරිමි භේදයක් නැතිව මෙවැනි අවස්ථාවලට සහභාගී වීමට නිදහස තිබිය යුතු බවයි.

අරලිය 555 වන් රාත‍්‍රී සමාජ ශාලාව විවෘත කිරීමේ උත්සවයට පැමිණි කාන්තාවන්ද නිදහසේ මත්පැන් තොලගෑ අයුරු අරලිය ග‍්‍රීන් සිටි නිල ෆෙස්බුක් පිටුවේ ඇති වීඩියෝ බලන්නෙකුට දැකිය හැකිය. එපමණක් නොව ගැහැනු පිරිමි භේදයක් නැතිව අරලිය නයිට් ක්ලබ් එකේදී කාන්තාවන්ට මත්පැන් ලබාදෙන බවත්, අරලිය හෝටලයේ ඇති මත්පැන්හලෙන්ද කාන්තාවන්ට මත්පැන් මිලට ගත හැකි බවත් හෝටලයේ ආරංචි මාර්ගවලින් අපට දැනගන්නට ලැබුණි. නිල වශයෙන් ක‍්‍රියාත්මක නොවූ, රටේ යල්පැන ගිය නීතියක් ඉවත් කරන්නට උත්සාහ කළ මොහොතේ පෞද්ගලික සදාචාර මතයක් කරට ගනිමින් මෛත‍්‍රීපාල සිරිසේන මහතා ඒ නීතිය යළි බලාත්මක කළේය.
වාසනාවකට ලංකාවේ මත්පැන් වෙළෙන්දන් සදාචාරවාදීන් නොවන නිසාත්, වෙළඳාම නැති කරගැනීමට අකැමති නිසාත් බොහෝ තැන්වල ප‍්‍රායෝගිකව ජනාධිපතිවරයාගේ නීතිය ක‍්‍රියාත්මක නොවෙයි. එහෙත් බොහෝ අවස්ථාවල කාන්තාවන්ට දැන් මීට පෙර මත්පැන් මිලට ගත් තැනකින් වුව මත්පැන් මිලට ගැනීමට අයිතිය නැතිවී ඇත. දැන් ඇතැම් මත්පැන් වෙළෙන්දෝ කාන්තාවකට මත්පැන් දෙන්නට බියක් දක්වති. එහි අසාධාරණය ඇත්තේ ප‍්‍රායෝගිකව ක‍්‍රියාත්මක වන ආකාරය මත නොව එය නීතියක් ලෙස ආණ්ඩුව පිළි ගැනීම නිසාය. ඒ අයිතිය කාන්තාවක වීම නිසාම කාන්තාවට නැති වෙද්දී පිරිමින්ට ඒ අයිතිය ලැබෙයි. මත්පැන් නොබොන කාන්තාවන්ට වුව මේ නීතිය අයුතු ලෙස බලපායි. මේ වෙනස හරහා නීතිය විසින්ම කාන්තාව සහ පිරිමියා දෙවිදියකට පිළිගනු ලබන්නේය. එහි ප‍්‍රතිඵලය ලෙස කාන්තාව නීතිය ඉදිරියේ පිරිමියාට පහළින් තැබෙන්නේය.

මෛත‍්‍රීපාල සිරිසේන මහතාගේ බලපෑමෙන් රටේ නීතිය වී ඇත්තේ කාන්තාවන්ට මත්පැන් මිලට ගත නොහැකි බවයි. ඒ නීතියට ඉහළින් අරලිය හෝටලය තිබීම ගැන අපට ගැටලූ‍වක් නැත. චතුරිකා සිරිසේන ජනාධිපති දියණිය බාර් ලයිසමක් තබාගෙන අරක්කු විකිණීම ගැනද අපට ගැටලූ‍වක් නැත. කාන්තාවන් දහස් ගණනක් ලංකාවේ බාර් ලයිසන් ඇති අරක්කු වෙළෙන්දියන් වීමද කමක් නැත. එය යහපත්ය. ලංකාව තුළදී පිරිමියෙකුට කරන්නට ඇති ඕනෑම දෙයක් කිරීමේ නිදහස කාන්තාවන්ට ඇත. වෙනස්විය යුත්තේ ජනාධිපතිවරයාගේ ව්‍යාජ සදාචාර ප‍්‍රතිපත්තියයි.

අප පෙන්විය යුත්තේ ජනාධිපතිවරයා මාස කිහිපයකට පෙර කාන්තාවන්ට මත්පැන් විකුණන්නට නොදෙන බව කියමින් කළ කී දෑ විකාරයක් බවය. එහි නිසරු බව ජනාධිපතිවරයාට පහසුවෙන් වටහාදෙන්නට දියණිය සහ සහෝදරයා ඉදිරිපත්වී සිටින බවය.
ඇත්තෙන්ම මෛත‍්‍රීපාල සිරිසේන ජනාධිපතිවරයාද තම සහෝදරයාගෙන් සහ දියණියගෙන් ඉගෙනගත යුත්තේ කාන්තාවන්, පිරිමින් භේද නැතිව විනෝද වීමෙහි වටිනාකමයි. මධුවිතක් තොල ගෑමට කැමති නම් එසේ තොල ගා සංගීත තාලයකට පුංචි නර්තනයක් සමඟ නිදහසේ ජීවිත රසය විඳීමෙහි වැදගත්කම පිළිබඳව ජනාධිපතිවරයාට සහෝදරයාගෙන් පාඩමක් ඉගෙනගත හැකි වනු ඇත.