ආණ්ඩුවට හිතවත්ව කටයුතු කරන ඩග්ලස් දේවානන්දා, පිල්ලෙයාන් හා ඒ.එල්.ඒ. අතාවුල්ලා යන නායකයන්ගේ පක්ෂ සමඟ සන්ධානගතව ආණ්ඩුවක් නිර්මාණය කරන බව ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ පවසයි.

ශ්‍රී ලංකා පොදුජන පෙරමුණට මන්ත්‍රීධුර 145ක් ලැබුණත්, එම පක්ෂ සමග එක්ව පාර්ලිමේන්තුවේ තුනෙන් දෙකක බලයකින් යුත් ආණ්ඩුවක් ඇති කරගැනීමට නියමිතය.

මඩකළපු දිස්ත්‍රික්කයෙන් තරග කළ පිල්ලෙයාන්ගේ ටීඑම්වීපී පක්ෂයට ජාතික ලැයිස්තු මන්ත්‍රීධුරයක් සමග මන්ත්‍රීධුර දෙකක් ලැබුණු අතර, යාපනය හා වන්නි දිස්ත්‍රික්කවලින් තරග කළ ඩග්ලස් දේවානන්දා මහතාගේ නායකත්වයෙන් යුත් ඊපීඩීපී පක්ෂයට මන්ත්‍රීධුර දෙකක් ලැබුණි. මඩකළපු දිස්ත්‍රික්කයෙන් තරග කළ ඒ.එල්.ඒ. අතාවුල්ලා මහතාගේ ජාතික කොංග්‍රසයට මන්ත්‍රීධුරයක් හිමිවිය.

ඊට අමතරව යාපනය දිස්ත්‍රික්කයෙන් ශ්‍රීලනිපය නියෝජනය කරමින් තරග කොට තේරී පත් වූ අංගජන් රාමනාදන්ද ජාතික ආණ්ඩුවේ පාර්ශ්වකරුවෙකු කරගැනීමට නියමිත බව රාජපක්ෂ මහතා කීය. කෙසේ වෙතත් ජාතික ආණ්ඩුවක් පිහිටුවීම සඳහා ආණ්ඩුක්‍රම ව්‍යවස්ථාවේ ඇති ප්‍රතිපාදන පාවිච්චි කරමින් ආණ්ඩුවේ ඇමතිධුර සංඛ්‍යාව විශාල වශයෙන් වැඩි කරගැනීමේ බලාපොරොත්තුවක් නැති බව ඔහු කීය.

ආණ්ඩුක්‍රම ව්‍යවස්ථාවේ 46 (4) හි ජාතික ආණ්ඩුව පිළිබඳව මෙසේ සඳහන් වෙයි.

‘..පාර්ලිමේන්තුවේ වැඩිම ආසන සංඛ්‍යාවක් ලබාගන්නා පිළිගත් දේශපාලන පක්ෂය හෝ ස්වාධීන කණ්ඩායම හෝ විසින් ජාතික ආණ්ඩුවක් පිහිටුවන අවස්ථාවේදී අමාත්‍ය මණ්ඩලයේ අමාත්‍යවරයන් සංඛ්‍යාවද අමාත්‍ය මණ්ඩලයේ සාමාජිකයන් නොවන අමාත්‍යවරයන් සංඛ්‍යාවද නියෝජ්‍ය අමාත්‍යවරයන් සංඛ්‍යාවද පාර්ලිමේන්තුව විසින් තීරණය කළ යුත්තේය.’

ආණ්ඩුක්‍රම ව්‍යවස්ථාවේ 46 (1) (අ) හි සඳහන් වන්නේ ජාතික ආණ්ඩුවක් නොවන අවස්ථාවක අමාත්‍ය මණ්ඩලයේ මුළු අමාත්‍යවරයන් සංඛ්‍යාව තිහ නොඉක්මවිය යුතු බවත්, අමාත්‍ය මණ්ඩලයේ සාමාජිකයන් නොවන අමාත්‍යවරුන්ගේ හා නියෝජ්‍ය අමාත්‍යවරුන්ගේ සංඛ්‍යාව හතලිහ නොඉක්මවිය යුතු බවත්ය.■